بسر بن سعید سے روایت ہے کہ زید بن خالد جہنی نے انہیں ابوجہیم (رض) کے پاس بھیجا تاکہ وہ ان سے یہ پوچھیں کہ انہوں نے مصلی کے آگے سے گزرنے والے کے بارے میں رسول اللہ ﷺ سے کیا سنا ہے ؟ تو ابوجہیم (رض) نے کہا : رسول اللہ ﷺ نے فرمایا ہے : اگر مصلی کے آگے سے گزرنے والا جان لے کہ اس پر کیا (گناہ) ہے تو اس کے لیے مصلی کے آگے سے گزرنے سے چالیس … تک کھڑا رہنا بہتر ہوگا۔ ابونضر سالم کہتے ہیں : مجھے نہیں معلوم کہ انہوں نے چالیس دن کہا، یا چالیس مہینے کہا یا چالیس سال۔ امام ترمذی کہتے ہیں : ١- ابوجہیم (رض) کی حدیث حسن صحیح ہے، ٢- اس باب میں ابو سعید خدری، ابوہریرہ، ابن عمر اور عبداللہ بن عمرو (رض) سے بھی احادیث آئی ہیں، ٣- نبی اکرم ﷺ سے یہ بھی مروی ہے کہ آپ نے فرمایا : تم میں سے کسی کا سو سال کھڑے رہنا اس بات سے بہتر ہے کہ وہ اپنے بھائی کے سامنے سے گزرے اور وہ نماز پڑھ رہا ہو ، ٤- اہل علم کے نزدیک عمل اسی پر ہے، ان لوگوں نے نمازی کے آگے سے گزرنے کو مکروہ جانا ہے، لیکن ان کی یہ رائے نہیں کہ آدمی کی نماز کو باطل کر دے گا۔ تخریج دارالدعوہ : صحیح البخاری/الصلاة ١٠١ (٥١٠) ، صحیح مسلم/الصلاة ٤٨ (٥٠٧) ، سنن ابی داود/ الصلاة ١٠٩ (٧٠١) ، سنن النسائی/القبلة ٨ (٧٥٧) ، سنن ابن ماجہ/الإقامة ٣٧ (٩٤٥) ، ( تحفة الأشراف : ١١٨٨٤) ، موطا امام مالک/قصرالصلاة ١٠ (٣٤) ، مسند احمد (٤/١٦٩) ، سنن الدارمی/الصلاة ١٣٠ (١٤٥٦) (صحیح) قال الشيخ الألباني : صحيح، ابن ماجة (945) صحيح وضعيف سنن الترمذي الألباني : حديث نمبر 336