عبداللہ بن مسعود (رض) سے روایت ہے کہ ان سے پوچھا گیا : نبی اکرم ﷺ بیٹھ کر خطبہ دیتے تھے یا کھڑے ہو کر ؟ تو انہوں نے کہا : کیا تم نے یہ آیت کریمہ نہیں پڑھی : وترکوک قائما جب ان لوگوں نے تجارت یا لہو و لعب دیکھا تو آپ کو کھڑا چھوڑ کر چل دیئے (سورة الجمعة : 11) ١ ؎۔ ابوعبداللہ ابن ماجہ کہتے ہیں : یہ حدیث غریب ہے، اس کو صرف ابن ابی شیبہ ہی نے بیان کرتے ہیں۔ تخریج دارالدعوہ : تفرد بہ ابن ماجہ، (تحفة الأشراف : ٩٤٣٨، ومصباح الزجاجة : ٣٩٤) (صحیح ) وضاحت : ١ ؎: اس سے معلوم ہوا کہ آپ ﷺ خطبہ کھڑے ہو کردیتے تھے۔ ٢ ؎: پوری آیت یوں ہے : وإذا رأوا تجارة أو لهوا انفضوا إليها وترکوک قائما جب کوئی تجارت یا تماشا اور کھیل کود دیکھتے ہیں تو ادھر چل دیتے ہیں، اور آپ کو کھڑا ہوا چھوڑ جاتے ہیں (سورة الجمعة : 11) اس آیت سے یہ نکلتا ہے کہ آپ ﷺ جمعہ کا خطبہ کھڑے ہو کردیتے تھے۔