انس بن مالک (رض) سے روایت ہے کہ نبی اکرم ﷺ گھوڑے سے گرگئے، تو آپ کے دائیں جانب خراش آگئی، ہم آپ کی عیادت کے لیے گئے، اتنے میں نماز کا وقت ہوگیا، تو آپ ﷺ نے ہمیں بیٹھ کر نماز پڑھائی، اور ہم نے آپ کے پیچھے بیٹھ کر نماز پڑھی، جب آپ ﷺ نے نماز پوری کرلی تو فرمایا : امام اس لیے بنایا گیا ہے کہ اس کی اقتداء کی جائے، لہٰذا جب وہ الله أكبر کہے، تو تم بھی الله أكبر کہو، اور جب رکوع کرے تو تم بھی رکوع کرو، اور جب سمع الله لمن حمده‏ کہے، تو تم لوگ ربنا ولک الحمد‏ کہو، اور جب سجدہ کرے تو تم سب لوگ سجدہ کرو، اور جب بیٹھ کر نماز پڑھائے تو تم سب لوگ بیٹھ کر نماز پڑھو ۔ تخریج دارالدعوہ : صحیح البخاری/الصلاة ١٨ (٣٧٨) ، الأذان ٥١ (٦٨٩) ، ٨٢ (٧٣٢) ، ١٢٨ (٨٠٥) ، تقصیرالصلاة ١٧ (١١١٤) ، صحیح مسلم/الصلاة ١٩ (٤١١) ، سنن النسائی/الإمامة ١٦ (٧٩٥) ، ٤٠ (٨٣٣) ، التطبیق ٢٢ (١٠٦٢) ، (تحفة الأشراف : ١٤٨٥) ، وقد أخرجہ : سنن ابی داود/الصلاة ٦٩ (٣٦١) ، سنن الترمذی/الصلاة ١٥١ (٧٩٣) ، موطا امام مالک/الجماعة ٥ (١٦) ، مسند احمد (٣/١١٠، ١٦٢) ، سنن الدارمی/الصلاة ٤٤ (١٢٩١) (صحیح )