ابولیلیٰ کندی کہتے ہیں کہ خباب (رض) عمر (رض) کے پاس آئے، تو عمر (رض) نے کہا : میرے قریب بیٹھو، تم سے بڑھ کر میرے قریب بیٹھنے کا کوئی مستحق نہیں سوائے عمار (رض) کے، پھر خباب (رض) اپنی پیٹھ پر مشرکین کی مار پیٹ کے نشانات ان کو دکھانے لگے ١ ؎۔ تخریج دارالدعوہ : تفرد بہ ابن ماجہ، (تحفة الأشراف : ٣٥٢٣، ومصباح الزجاجة : ٥٨) (صحیح ) وضاحت : ١ ؎: اس حدیث سے معلوم ہوا کہ اصحاب فضل و کمال کو مجلس میں ممتاز مقام پر رکھنا چاہیے، عمر (رض) افاضل صحابہ کو اپنے پاس جگہ دیتے تھے، عمار (رض) نے بھی اللہ کی راہ میں بہت تکلیفیں اٹھائی تھیں اس لئے عمر (رض) نے ان کو بھی یاد کیا، اور معلوم ہوا کہ کسی کی تعریف اس کے سامنے اگر اس سے خود پسندی اور عجب کا ڈر نہ ہو تو جائز ہے، اور اللہ تعالیٰ کی نعمتوں کا اظہار اس اعتبار سے جائز ہے کہ وہ اللہ کی نعمتیں ہیں، جیسے خباب (رض) نے اپنے جسم کے نشان دکھائے کہ جو ایک نعمت الٰہی تھی، اور جو اللہ کے نزدیک بلندی درجات کا سبب ہوئی۔