عبداللہ بن مسعود (رض) سے روایت ہے کہ ان سے ایک ایسے شخص کے بارے میں پوچھا گیا جس نے کسی عورت سے شادی کی، اور مہر کی تعین اور دخول سے پہلے ہی اس کا انتقال ہوگیا، تو انہوں نے کہا : اس عورت کو مہر ملے گا، اور میراث سے حصہ ملے گا، اور اس پہ عدت بھی لازم ہوگی، تو معقل بن سنان اشجعی (رض) نے کہا : میں رسول اللہ ﷺ کے پاس موجود تھا، جب آپ نے بروع بنت واشق (رض) کے سلسلہ میں ایسے ہی فیصلہ کیا ١ ؎۔ تخریج دارالدعوہ : سنن ابی داود/النکاح ٣٢ (٢١١٤، ٢١١٥) ، سنن الترمذی/النکاح ٤٣ (١١٤٥) ، سنن النسائی/النکاح ٦٨ (٣٣٥٨) ، الطلاق ٥٧ (٣٥٥٤) ، (تحفة الأشراف : ١١٤٦١) ، وقد أخرجہ : مسند احمد (١/٤٤٧، ٣/٤٨٠، ٤/٢٨٠) ، سنن الدارمی/النکاح ٤٧ (٢٢٩٢) (صحیح ) وضاحت : ١ ؎: یہ روایت مختصر ہے، بعض حدیثوں میں یوں ہے کہ عبداللہ (رض) نے کہا : اس عورت کو مہر مثل ملے گا، یعنی اس کے کنبے کی عورتوں کا جو مہر ہوگا وہی اس کو دلایا جائے گا، نہ کم اور نہ زیادہ، پھر معقل (رض) نے گواہی دی تو عبداللہ بن مسعود (رض) نہایت خوش ہوئے کہ ان کا فیصلہ نبی اکرم ﷺ کے حکم کے مطابق ہوا، علامہ ابن القیم نے کہا کہ اس فتوے کے معارض کوئی فتوی نہیں تو اس پر عمل کرنا ضروری ہے۔ اس سند سے بھی عبداللہ بن مسعود (رض) سے اسی کے مثل مروی ہے۔