خالد بن سعد (رض) کہتے ہیں کہ ہم سفر پر نکلے، ہمارے ساتھ غالب بن ابجر بھی تھے، وہ راستے میں بیمار پڑگئے، پھر ہم مدینہ آئے، ابھی وہ بیمار ہی تھے، تو ان کی عیادت کے لیے ابن ابی عتیق آئے، اور ہم سے کہا : تم اس کالے دانے کا استعمال اپنے اوپر لازم کرلو، تم اس کے پانچ یا سات دانے لو، انہیں پیس لو پھر زیتون کے تیل میں ملا کر چند قطرے ان کی ناک میں ڈالو، اس نتھنے میں بھی اور اس نتھنے میں بھی، اس لیے کہ ام المؤمنین عائشہ (رض) نے ان سے حدیث بیان کی کہ رسول اللہ ﷺ نے فرمایا : اس کالے دانے یعنی کلونجی میں ہر مرض کا علاج ہے، سوائے اس کے کہ وہ سام ہو ، میں نے عرض کیا کہ سام کیا ہے ؟ تو آپ ﷺ نے فرمایا : موت ۔ تخریج دارالدعوہ : صحیح البخاری/الطب ٧ (٥٦٨٧) ، (تحفة الأشراف : ١٦٢٦٨) ، وقد أخرجہ : مسند احمد (٦/١٣٨) (صحیح )