ام المؤمنین میمونہ (رض) سے روایت ہے کہ ان کی ایک لونڈی کو صدقہ کی ایک بکری ملی تھی جو مری پڑی تھی، نبی اکرم ﷺ کا گزر اس بکری کے پاس ہوا تو آپ ﷺ نے فرمایا : ان لوگوں نے اس کی کھال کیوں نہیں اتار لی کہ اسے دباغت دے کر کام میں لے آتے ؟ لوگوں نے عرض کیا : اللہ کے رسول ! یہ تو مردار ہے، آپ ﷺ نے فرمایا : صرف اس کا کھانا حرام ہے ١ ؎۔ تخریج دارالدعوہ : صحیح مسلم/الحیض ٢٧ (٣٦٣) ، سنن الترمذی/اللباس ٧ (١٧٢٧) ، سنن ابی داود/اللباس ٤١ (١٤٢٠) ، سنن النسائی/الفرع والعتیرة ٣ (٤٢٤٠) ، (تحفة الأشراف : ١٨٠٦٦) ، وقد أخرجہ : صحیح البخاری/الزکاة ٦١ (١٤٩٢) ، البیوع ١٠١ (٢٢٢١) ، موطا امام مالک/الصید ٦ (١٦) ، مسند احمد (٦/٣٢٩، ٢٣٦) ، سنن الدارمی/الأضاحي ٢٠ (٢٠٣١) (صحیح ) وضاحت : ١ ؎: اس حدیث سے معلوم ہوا کہ ہر مرے ہوئے ماکول اللحم جانور کا گوشت کھانا حرام ہے، لیکن اس کے چمڑے سے دباغت کے بعد ہر طرح کا فائدہ اٹھانا جائز ہے، وہ بیچ کر ہو یا ذاتی استعمال میں لا کر۔