ام المؤمنین عائشہ (رض) کہتی ہیں کہ رسول اللہ ﷺ نے اپنے مرض الموت میں فرمایا : میری خواہش یہ ہے کہ میرے پاس میرے صحابہ میں سے کوئی ہوتا ، ہم نے عرض کیا : اللہ کے رسول ! کیا ہم ابوبکر کو نہ بلا دیں ؟ آپ ﷺ خاموش رہے، ہم نے عرض کیا : کیا ہم عمر کو نہ بلا دیں ؟ آپ ﷺ خاموش رہے، ہم نے عرض کیا : کیا ہم عثمان کو نہ بلا دیں ؟ آپ ﷺ نے فرمایا : ہاں ، تو وہ آئے، آپ ﷺ ان سے تنہائی میں باتیں کرنے لگے، اور عثمان (رض) کا چہرہ بدلتا رہا۔ قیس کہتے ہیں : مجھ سے عثمان (رض) کے غلام ابوسہلۃ نے بیان کیا کہ عثمان بن عفان (رض) نے جس دن ان پر حملہ کیا گیا کہا : بیشک رسول اللہ ﷺ نے مجھ سے جو عہد لیا تھا میں اسی کی طرف جا رہا ہوں۔ علی بن محمد نے اپنی حدیث میں : وأنا صابر عليه کہا ہے، یعنی : میں اس پر صبر کرنے والا ہوں۔ قیس بن ابی حازم کہتے ہیں : اس کے بعد سب لوگوں کا خیال تھا کہ اس گفتگو سے یہی دن مراد تھا ١ ؎۔ تخریج دارالدعوہ : تفرد بہ ابن ماجہ، (تحفة الأشراف : ١٧٥٦٩، ومصباح الزجاجة : ٤٧) ، وقد أخرجہ : سنن الترمذی/المناقب ١٩ (٣٧١١) ، مسند احمد (١/٥٨، ٦٩، ٥/٢٩٠، ٦/ ٢١٤) ، مقتصراً علی ما رواہ قیس عن أبي سہلة فقط (صحیح) (نیز ملاحظہ ہو : تعلیق الشہری علی الحدیث فی مصباح الزجاجة : ٤٦ ) وضاحت : ١ ؎: صحابہ کرام رضی اللہ عنہم نے شہادت عثمان (رض) کے دن کو یوم الدار سے یاد رکھا، ظالموں نے کئی دن محاصرہ کے بعد آپ کو بھوکا پیاسا شہید کیا، نبی اکرم ﷺ نے آپ کو اس کی پیش گوئی فرما دی تھی، اور تنہائی کی گفتگو کا حال کسی کو معلوم نہ تھا، آپ کی شہادت کے بعد معلوم ہوا، رضی اللہ عنہ۔