عطاء کہتے ہیں کہ میں نے ابن عباس (رض) کو کہتے سنا کہ میں گواہی دیتا ہوں کہ رسول اللہ ﷺ نے خطبے سے پہلے نماز ادا کی، پھر خطبہ دیا، آپ ﷺ نے محسوس کیا کہ عورتوں تک آواز نہیں پہنچ سکی ہے لہٰذا آپ ان کے پاس آئے، ان کو (بھی) وعظ و نصیحت کی، اور انہیں صدقہ و خیرات کا حکم دیا، اور بلال (رض) اپنے دونوں ہاتھوں سے اپنا دامن پھیلائے ہوئے تھے جس میں عورتیں اپنی بالیاں، انگوٹھیاں اور دیگر سامان ڈالنے لگیں ١ ؎۔ تخریج دارالدعوہ : صحیح البخاری/العیدین ١٦ (٩٧٥) ، ١٨ (٩٧٧) ، الزکاة ٣٣ (١٤٤٩) ، النکاح ١٢٥ (٥٢٤٩) ، اللباس ٥٦ (٥٨٨٠) ، الاعتصام ١٦ (٧٣٢٥) ، صحیح مسلم/العیدین (٨٨٤) ، سنن ابی داود/الصلاة ٢٤٨ (١١٤٢) ، سنن النسائی/العیدین ١٣ (١٥٧٠) ، (تحفة الأشراف : ٥٨٨٣) ، وقد أخرجہ : مسند احمد (١/٢٢٠، ٢٢٦، ٢٤٢، ٣٤٥، ٣٤٦، ٣٥٧، ٣٦٨) ، سنن الدارمی/الصلاة ٢١٨ (١٦٤٤) (صحیح ) وضاحت : ١ ؎: اس حدیث سے معلوم ہوا کہ عورتوں کو نماز عید کے لئے عید گاہ جانا صحیح ہے، دوسری حدیث میں ہے کہ نبی اکرم ﷺ نے باپردہ اور کنواری عورتوں کو بھی عیدگاہ جانے کا حکم دیا یہاں تک کہ حائضہ عورتوں کو بھی، اور فرمایا : وہ مسجد کے باہر رہ کر دعا میں شریک رہیں، اور یہ بھی معلوم ہوا کہ پہلے عیدگاہ میں نماز عید پڑھے اس کے بعد خطبہ دے، اور نماز عیدین کے بارے میں اختلاف ہے کہ واجب ہے یا سنت، اور حق یہ ہے کہ واجب ہے اور بعضوں نے کہا آیت :فصل لربک و انحر سے عید کی نماز مراد ہے اور جب عید کے دن جمعہ آجائے تو عید کی نماز پڑھنے سے جمعہ واجب نہیں رہتا یعنی جمعہ کا وجوب ساقط ہوجاتا ہے۔