نافع بیان کرتے ہیں کہ ابن عمر (رض) فرماتے تھے کہ قربانی میں ثنی اور اس سے کچھ بڑا جانور ذبح کریں۔

ابو زبیر (رح) جابر بن عبداللہ (رض) عنہما سے روایت کرتے ہیں کہ رسول اللہ (صلی اللہ علیہ وآلہ وسلم) نے تین دن کے بعد قربانی کا گوشت کھانے سے منع کیا۔ اس کے بعد فرمایا۔ کھاؤ، توشہ بناء اور جمع کرو۔
قول محمد (رح) یہ ہے : کہ ہمارا اسی پر عمل ہے۔ کہ تین دن سے زیادہ گوشت جمع کرنے اور توشہ بنانے میں کوئی حرج نہیں ہے۔ اولا ممانعت فرمانے کے بعد رسول اللہ (صلی اللہ علیہ وآلہ وسلم) نے اس کی اجازت مرحمت فرمادی۔ جناب رسول اللہ (صلی اللہ علیہ وآلہ وسلم) نے اپنے آخری ارشاد سے پہلے قول کو منسوخ کردیا۔ پس اس کو ذخیرہ کرنے اور توشہ بنانے میں کوئی حرج و گناہ نہیں ہے۔ امام ابوحنیفہ (رح) اور ہمارے عام فقہاء کا یہی قول ہے۔