Muawtta Imam Muhammad

عبداللہ بن ابوبکر (رض) بیان کرتے ہیں کہ میرے والد نے مجھے اس خط کے متعلق بتلایا جو رسول اللہ (صلی اللہ علیہ وآلہ وسلم) نے دیت کے سلسلہ میں عمرو بن حزم (رض) کو تحریر فرمایا تھا۔ اس کے مندرجات یہ تھے۔ (١) جان کی دیت سو اونٹ ہیں (٢) ناک کی دیت جب پوری کٹ جائے تو سو اونٹ ہیں۔ (٣) جائفہ (زخم) میں دیت کا تیسرا حصہ ہے۔ (٤) مامومہ (زخم) میں بھی اسی قدر ہے۔ (٥) آنکھ کی دیت پچاس اونٹ ہیں (٦) ہاتھ کی دیت پچاس اونٹ (٧) پاؤں کی دیت پچاس اونٹ (٨) ہر انگلی کی دیت دس اونٹ۔ (٩) ہر دانت کی دیت پانچ اونٹ (١٠) موضحہ (زخم) کی دیت بھی پانچ اونٹ ہے۔
قول محمد (رح) یہ ہے : ہم اسی کو اختیار کرتے ہیں امام ابوحنیفہ اور ہمارے عام فقہاء کا یہی قول ہے۔ جائفہ پیٹ تک پہنچنے والا زخم، مامومہ سر کا زخم جو پیچھے کی کھال تک پہنچے۔ موضحہ وہ زخم جس سے ہڈی ننگی ہوجائے۔

سعید بن المسیب (رح) فرماتے تھے دونوں ہونٹوں کی پوری دیت ہے۔ اگر نے چت کا ہونٹ کاٹ دیا تو تہائی ہوگئی۔ ( اس اثر کو امام مالک نے باب ما فیہ الدیۃ کاملہ میں ذکر کیا ہے) ۔
قول محمد (رح) یہ ہے ہم اسے اختیار نہیں کرتے۔ ہمارے نزدیک دونوں ہونٹ برابر ہیں۔ ان میں سے ہر ایک میں نصف دیت ہوگی کیا تم غور نہیں کرتے کہ خنصر اور بنصر دونوں انگلیوں میں دیت برابر ہے۔ جبکہ ان کا فائدہ مختلف ہے۔ یہی امام ابوحنیفہ (رح) اور ابراہمن نخعی (رح) اور ہمارے عام فقہاء کا قول ہے۔

ابن شہاب زہری فرماتے ہیں کہ سنت یہ ہے کہ قتل عمد میں قاتل کے ورثاء سے دیت نہ لی جائے بلکہ یہ خود قاتل کے ذمہ ہے۔ مگر یہ کہ ورثاء خوشی سے دیں۔
قول محمد (رح) یہ ہے : کہ ہم اسی کو اختیار کرتے ہیں۔

عبید اللہ بن عبداللہ بن مسعود (رح) فرماتے تھے۔ کہ وارث قتل عمد کی دیت نہ قصدا دیں ، نہ صلح اور اعتراف کی بناء پر ادا کریں اور نہ غلام کی دیت اس کی جنایت کی صورت میں دیں ( بلکہ قاتل و جانی خود ادا کرے)
قول محمد (رح) یہ ہے : ہم اسی کو اختیار کرتے ہیں اور یہی امام ابوحنیفہ اور ہمارے عام فقہاء کا قول ہے۔

سلیمان بن یسار کہا کرتے تھے کہ قتل خطاء کی دیت بیس بنت مخاض بیس بنت لبون، بیس ابن لبون، بیس حقے، بیس جذعے ہے۔ دوسرے سال میں داخل ہونے والی اونٹنی کو بنت مخاض، بنت لبون جو تیسرے سال میں داخل ہوجائے، حقہ چوتھے سال میں داخل ہونے والے اونٹنی جو سواری کے قابل ہو۔ جذعہ جس کا پانچواں سال شروع ۔ (اس اثر کو امام مالک (رح) نے باب دیۃ الخطأ فی القتل میں ذکر کیا ہے)
قول محمد (رح) یہ ہے : ہم اس کو اختیار نہیں کرتے۔ اور عبداللہ بن مسعود کی بات کو اپناتے ہیں۔ انھوں نے نبی اکرم (صلی اللہ علیہ وآلہ وسلم) سے روایت کیا ہے کہ آپ (صلی اللہ علیہ وآلہ وسلم) نے فرمایا کہ قتل خطاء کی دیت کے پانچ حصے ہیں۔ بیس بنت مخاض، بیس ابن مخاص، بیس بنت لبون، بیس حقے، اور بیس جذعے، سلیمان بن یسار (رح) نے ہم سے مذکر میں اختلاف کیا ہے۔ انھوں نے ابن لبون کہا ہے اور ابن مسعود (رض) نے ابن مخاض فرمایا ہے۔ امام ابوحنیفہ (رح) کا قول ابن مسعود (رض) کے مطابق ہے۔

ابو غطفان (رح) نے بتلایا کہ مروان بن حکم نے مجھے ابن عباس (رض) کی خدمت میں بھیجا کہ ڈاڑھ کی دیت کیا ہے ؟ ابن عباس (رض) نے فرمایا۔ اس کی دیت پانچ اونٹ ہیں۔ مروان نے مجھے ابن عباس (رض) کی طرف دوبارہ بھیجا کہ ڈاڑھ کو دانتوں کے برابر کیوں کرتے ہیں۔ ابن عباس (رض) نے فرمایا۔ اگر تم دانتوں کو انگلیوں کے برابر قیاس کرتے تو تمہارے لیے کافی ہوتا کیونکہ تمام انگلیوں کی دیت برابر ہے۔
قول محمد (رح) یہ ہے : ہم ابن عباس (رض) کے قول کو اختیار کرتے ہیں۔ کہ دانتوں کی دیت اور انگلیوں کی دیت دونوں برابر ہیں۔ ہر انگلی کی دیت اصل دیت کا دسواں حصہ ہے۔ اور ہر دانت کی دیت اصل دیت کا بیسواں حصہ ہے۔ یہی امام ابوحنیفہ (رح) اور ہمارے عام فقہاء کا قول ہے۔

سعید بن المسیب (رح) کہتے ہیں کہ جب دانت کو نقصان ہوجائے اور وہ سیاہ ہوجائے تو اس کی دیت پوری ہوگی۔ ( اس اثر کو اباب جامع الاسنان میں امام مالک نے ذکر کیا ہے) الفاظ کا معمولی فرق ہے۔
قول محمد (رح) یہ ہے : اسی کو ہم اختیار کرتے ہیں کہ جب دانت کو نقصان پہنچ جائے اور وہ سیاہ سرخ یا س بز ہوجائے تو اس کی پوری دیت لازم ہوگی یہی امام ابوحنیفہ (رح) کا قول ہے۔

سلیمان بن یسار فرماتے ہیں زید بن ثابت (رض) فرماتے تھے کہ جب آنکھ درست رہے لیکن بےنور ہوجائے تو اس کی دیت سو دینار ہے۔
قول محمد (رح) یہ ہے : ہمارے ہاں اس کی دیت مقرر نہیں۔ اس میں نحاکم عادل کو اختیار ہے۔ خواہ وہ سود دینار کا حکم دے یا زیادہ کا فیصلہ نافذ ہوگا۔ ہم یہ مسئلہ زید بن ثابت (رض) کے فیصلہ سے اخذ کرتے ہیں۔

سعید بن المسیب (رح) بیان کرتے ہیں کہ عمر فاروق (رض) نے اشک شخص کے قتل کا بدلہ میں پانچ یا سات آدمیوں کو قتل کیا اور فرمایا کہ اگر صنعاء شہر کے تمام آدمی اس کو قتل کرتے تو میں ان سب کو قتل کردیتا۔ ( اس روایت کو امام مالک نے باب ما جاء فی الغیلۃ والسحر میں ذکر کیا ہے) ۔
قول محمد (رح) یہ ہے : کہ ہم اس کو عمل میں لاتے ہیں کہ اگر سات یا اس سے زیادہ افراد نے کسی کو قصدا دھوکا دے کر یا دھوکا کے بغیر تلواروں سے مارا ہو تو وہ سب کے سب اس کے قتل کے بدلے میں قتل کئے جائیں گے۔ یہی امام ابوحنیفہ (رح) اور ہمارے عام فقہاء کا قول ہے۔

ابن شہاب زہری کہتے ہیں کہ عمر (رض) نے منی کے مقام میں ان لوگوں کو بلایا جو کہ دیت کے مسائل سے واقفیت رکھتے ہوں۔ تاکہ دیت کے متعلق وہ بتلائیں۔ ضحاک بن سفیان (رض) کھڑے ہوئے اور انھوں نے کہا رسول (صلی اللہ علیہ وآلہ وسلم) نے مجھے اشیم الضبابی کے متعلق تحریر فرمایا تھا کہ اس کی دیت میں اس کی ب یوی کو وراثت کا حصہ دلاؤ۔ حضرت عمر (رض) نے فرمایا تم خیمہ میں جاؤ یہ ان تک کہ میں آجاؤں۔ چنانچہ حضرت عمر (رض) خیمہ میں تشریف لے گئے تو ضحاک بن سفیان (رض) نے انھیں بتلایا اور حضر عمر (رض) نے اس کے مطابق فیصل فرمایا ( اس روایت کو باب ما جاء فی میراث العقل و التغلیظ فیہ میں ذکر کیا ہے)
قول محمد (رح) یہ ہے : کہ ہم اس کو اختیار کرتے ہیں کہ دیت اور خون بہاء میں تمام ورثاء کا حصہ ہے۔ وہ وارث شوہر ہو یا بیوی یا ان کے علاوہ اور کوئی وارث ہو۔ امام ابوحنیفہ (رح) اور ہمارے عام فقہاء کا یہی قول ہے۔