Muawtta Imam Muhammad

امام محمد (رح) نے اپنی سند کے ساتھ عبداللہ بن رافع (جو ام المؤمنین ام سلمہ (رض) عنہا کے غلام ہیں) سے نقل کرتے ہیں کہ میں نے ابوہریرہ (رض) سے نماز کے وقت کے سلسلہ میں سوال کیا تو ابوہریرہ (رض) نے فرمایا میں تمہیں نماز کا وقت بتلاتا ہوں۔ جب تیرا سایہ تیرے برابر ہوجائے تو ظہر کی نماز پڑھ لو۔ جب تمہارا سایہ تم سے دو مثل ہوجائے تو عصر کی نماز ادا کرلو۔ اور جب سورج غروب ہوجائے تو مغرب کی نماز ادا کرلو۔ اور عشاء کی نماز تہائی رات آنے پر ادا کرو اور اگر تو آدھی رات تک سو گیا اللہ کرے تیری آنکھ نہ سوئے (عشاء کی نماز سے پہلے سوجانے پر ناپسندیدگی کا اظہار فرمایا گیا ہے) اور صبح کی نماز منہ اندھیرے میں پڑھو۔
امام محمد کا ارشاد : وقت عصر کے سلسلہ میں امام ابوحنیفہ کا مسلک اوپر کی روایت کے مطابق مثلین میں ہے۔ البتہ نماز فجر وہ اسفار (صبح کے سپیدے) میں پڑھنے کے قائل ہیں۔ مگر ہمارے ہاں (محمد و ابویوسف) جب ہر چیز کا سایہ ایک مثل سے بڑھ جائے اور وہ اضافہ فی الزوال کے علاوہ ہو۔ تو عصر کا وقت شروع ہوگیا۔ مگر ابوحنیفہ (رح) دو مثل سے پہلے وقت عصر کے داخل ہونے کے قائل نہیں ہیں۔

امام محمد نے اپنی سند سے عروہ سے نقل کیا ہے۔ عروہ کہتے ہیں مجھے ام المؤمنین حضرت عائشہ صدیقہ (رض) عنہا نے بیان کیا کہ رسول اللہ (صلی اللہ علیہ وآلہ وسلم) عصر کی نماز ادا فرمالیتے جب کہ دھوپ ابھی میرے حجرہ میں ہوتی تھی، ابھی دیواروں پر نہ چڑھی ہوتی تھی۔

امام محمد نے اپنی سند کے ساتھ انس بن مالک (رض) سے نقل کیا کہ ہم عصر کی نماز ادا کرتے، پھر کوئی جانے والا مضافاتی بستی قباء میں سورج کے بلند ہوتے ہوئے پہنچ جاتا۔

امام محمد نے اپنی سند کے ساتھ انس بن مالک (رض) کا فرمان نقل کیا ہے کہ ہم عصر کی نماز ادا کرتے پھر بنی عمرو بن عوف کی طرف جانے والا جاتا تو وہ ان کو ہاں نماز عصر ادا کرتے ہوئے پاتا۔
قول محمد (رح) : ہمارے نزدیک نماز عصر کو مؤخر کرنا اس کے جلد ادا کرنے سے افضل ہے۔ مگر اس کی شرط یہ ہے کہ نماز عصر ایسے وقت کے اندر ادا کرلی جائے جب دھوپ صاف ستھری ہو اس میں زردی کا اثر نہ پایا جائے اور عام آثار صحابہ وتابعین اس کی تائید کرتے ہیں۔ امام ابوحنیفہ رحمہ کا یہی مسلک ہے۔ بعض فقہاء نے اس کی تاخیر کا قول لفظ ” عصر “ سے اخذ کیا ہے۔ کیونکہ اس کا معنی نچوڑنا اور مؤخر کرنا ہے۔ اور اس کو مؤخر کرکے پڑھا جاتا ہے۔

عمرو بن یحی نے اپنے والد یحی بن عمارہ سے روایت کی کہ اس نے عبداللہ بن زید بن عاصم سے کہا جو رسول اللہ (صلی اللہ علیہ وآلہ وسلم) کے اصحاب میں سے تھے کہ کیا آپ مجھے دکھاسکتے ہیں کہ رسول اللہ (صلی اللہ علیہ وآلہ وسلم) کس طرح وضو فرماتے تھے ؟ عبداللہ بن زید نے کہا۔ ہاں۔ پھر انھوں نے پانی منگوایا اور اپنے ہاتھ پر پانی ڈالا اور اپنے دونوں ہاتھ دو دو مرتبہ دھوئے، پھر کلی کی اور پھر اپنا منہ تین بار دھویا، پھر اپنے دونوں ہاتھ دو مرتبہ کہنیوں سمیت دھوئے، پھر اپنے دونوں ہاتھوں سے سر کا مسح اس طرح کیا کہ دونوں ہاتھوں کو سر کی اگلی جانب سے گدی کی طرف لے گئے پھر ان کو اسی جگہ واپس لائے جہاں مسح کی ابتداء میں رکھا تھا، پھر اپنے دونوں پاؤں دھوئے۔
امام محمد (رح) فرماتے ہیں کہ یہ خوب ہے یاور تین تین بار دھونا افضل ہے۔ اور دو بار کفایت کرنے والا ہے اور ایک بار بھی کفایت ہے بشرطیکہ اعضاء پر پانی کو خوب بہا لیا جائے اور یہی ابوحنیفہ کا قول ہے۔

عبد الرحمن الاعرج نے ابوہریرہ سے روایت نقل کی کہ جب تم میں سے کوئی وضو کرے تو وہ اپنے ناک میں پانی ڈال کر اسے صاف کرے۔

ابو ادریس خولانی نے ابوہریرہ (رض) سے نقل کیا کہ رسول اللہ (صلی اللہ علیہ وآلہ وسلم) نے فرمایا جو وضو کریپ وہ ناک میں پانی لے کر ناک صاف کرے اور جو ڈھیلے استنجاء کے لیے استعمال کرے وہ طاق عدد لے۔
امام محمد کہتے ہیں کہ ہم اسی طرح استدلال کرتے ہیں کہ وضو کرنے والے کو اول پانی لے کر کلی اور پھر ناک صاف کرنی چاہیے اور ڈھیلوں سے استنجاء کرنا مناسب ہے اور استجمار۔ استنجاء کو کہتے ہیں۔ یہی امام ابوحنیفہ کا قول ہے۔

نعیم بن عبداللہ الجمر کہتے ہیں کہ میں نے ابوہریرہ (رض) کو کہتے سنا کہ جس شخص نے خوب انداز سے وضو کیا پھر نماز کا قصد کرکے گھر سے نکلا تو وہ وقت قصد سے نماز کا ثواب پانے لگا۔ اس کے ہر قدم پر ایک نیکی لیھہ جاتی ہے اور دوسرا قدم اٹھانے پر ایک برائی مٹائی جاتی ہے۔ اگر چلنے کے دوران تم میں سے کوئی اقامت سن پائے تو وہ بالکل نہ دوڑے۔ تم سے دور گھر والا زیادہ ثواب حا حقدار ہے۔ شاکردوں نے سوال کیا حضرت ! یہ کیوں ؟ تو ابوہریرہ (رض) فرمانے لگے کیونکہ وہ مسجد کی طرف زیادہ قدم اٹھاکر آیا ہے۔

اعرج (رح) نے ابوہریرہ (رض) سے روایت نقل کی کہ رسول اللہ (صلی اللہ علیہ وآلہ وسلم) نے فرمایا جب تم میں سے کوئی نیند سے جاگے تو پانی والے برتن میں ہاتھ داخل کرنے سے پہلے وہ اپنے ہاتھ دھولے۔ اس لیے کہ اس کو یہ معلوم نہیں کہ رات سوتے میں اس کا ہاتھ کہاں کہاں رہا۔
قول محمد (رح) یہ ہے کہ یہ طریقہ مستحسن ہے، لازم نہیں کہ اس کو چھوڑنے والا گناہ گار ہو اور امام ابوحنیفہ رحمہ کا بھی یہی قول ہے۔

عبد الرحمن بن عثمان تیمی (رح) کہتے ہیں کہ میں نے عمر بن خطاب (رض) کے بارے میں سنا کہ وہ اپنے ستر کی صفائی کے لیے پانی استعمال فرماتے تھے۔
قول محمد (رح) : ہم اسی سے دلیل لیتے ہیں۔ پانی سے استنجاء ہمارے ہاں دیگر تمام اشیاء کے ساتھ استنجاء کرنے سے افضل ہے اور امام ابوحنیفہ (رح) کا بھی یہی قول ہے۔