Shamail Tirmidhi

حضرت عائشہ (رض) فرماتی ہیں کہ میں حضور اقدس ﷺ کے بالوں میں کنگھا کرتی تھی، حالانکہ میں حائضہ ہوتی تھی۔

حضرت انس (رض) فرماتے ہیں، کہ حضور اقدس ﷺ اپنے سر مبارک پر اکثر تیل کا استعمال فرماتے تھے اور اپنی داڑھی مبارک میں اکثر کنگھی کیا کرتے تھے۔ اور اپنے سر مبارک پر ایک کپڑا ڈال لیا کرتے تھے جو تیل کے کثرت استعمال سے ایسا ہوتا تھا جیسے تیلی کا کپڑا ہو۔

حضرت عائشہ (رض) فرماتی ہیں کہ حضور اقدس ﷺ اپنے وضو کرنے میں، کنگھی کرنے میں، جوتا پہننے میں (غرض ہر امر میں) دائیں کو مقدم رکھتے تھے، یعنی پہلے دائیں جانب کنگھا کرتے پھر بائیں جانب۔

عبداللہ مغفل (رض) فرماتے ہیں، کہ حضور اقدس ﷺ کنگھی کرنے کو منع فرماتے تھے۔ مگر گاہے بگاہے۔

حمید بن عبدالرحمن ایک صحابی سے نقل کرتے ہیں کہ حضور ﷺ گاہے بگاہے کنگھی کیا کرتے تھے۔