4226 ۔ حضرت جابربن عبداللہ (رض) بیان کرتے ہیں : ایک مرتبہ میرا خیبر جانے کا ارادہ ہوا ‘ میں نبی اکرم (صلی اللہ علیہ وآلہ وسلم) کی خدمت میں حاضرہوا آپ اس وقت مسجد میں موجود تھے ‘ میں نے آپ کو سلام کیا ‘ پھر میں نے عرض کی : میں خیبرجانا چاہ رہاہوں ‘ اس لیے میں نے چاہا کہ میں آپ کو سلام کردوں اور یہ سلام مدینہ منورہ میں میرا آخری عمل ہو ‘ میرے ماں باپ آپ پر قربان ہوں ! حضرت جابر (رض) بیان کرتے ہیں کہ نبی اکرم (صلی اللہ علیہ وآلہ وسلم) نے مجھ سے فرمایا : جب تم خیبر میں میرے وکیل کے پاس جاؤگے تو اس سے پندرہ وسق وصول کرنا۔ حضرت جابر (رض) کہتے ہیں : جب میں وہاں سے مڑ کر جانے لگا تو آپ نے مجھے بلایا اور فرمایا : تم اس سے تیس وسق لینا ‘ اللہ کی قسم ! محمد کے گھروالوں کے لیے خیبر میں صرف وہی کھجوریں ہیں ‘ اگر وہ تم سے کوئی نشانی (یعنی ثبوت) مانگے تو تم اپنا ہاتھ اس کی ہنسلی پر رکھ دینا۔ اس کے بعد انھوں نے پوری حدیث ذکر کی ہے۔
خبرواحد ‘ عمل کو لازم کردیتی ہے

4227 ۔ حضرت انس (رض) بیان کرتے ہیں کہ حضرت ابوطلحہ ‘ حضرت ابی بن کعب اور حضرت سہیل بن بیضاء (رض) ‘ حضرت ابوطلحہ (رض) کے پاس بیٹھ کر کھجور اور چھوہاروں کی بنی ہوئی شراب پی رہے تھے۔ میں ان حضرات کو شراب پلارہا تھا ‘ انھوں نے وہ شراب لینا چاہی تو اسی دوران ایک مسلمان وہاں سے گزرا اور بولا : کیا تم لوگ یہ بات جانتے ہو کہ شراب کو حرام قراردے دیا گیا ہے ‘ تو ان سب نے کہا : اے انس ! اپنے برتن میں موجود شراب کو بہادو ‘ انھوں نے یہ بات اس وقت کہی جب ہمیں اس بات کا پتہ چل گیا تو حضرت انس (رض) کہتے ہیں کہ میں نے اس شراب کو بہادیا۔
شیخ ابوعبداللہ یعنی عبیداللہ بن عبدالصمد ‘ یہ فرماتے ہیں : یہ اس بات پر دلالت کرتی ہے کہ خبرواحد عمل کو لازم کردیتی ہے۔

4228 ۔ سیدہ عائشہ صدیقہ (رض) بیان کرتی ہیں کہ نبی اکرم (صلی اللہ علیہ وآلہ وسلم) کے سامنے شعر کا تذکرہ ہوا تو آپ (صلی اللہ علیہ وآلہ وسلم) نے ارشاد فرمایا : یہ کلام کی طرح ہے ‘ اچھا شعراچھا ہوتا ہے اور براشعربرا ہوتا ہے۔

4229 ۔ یہی روایت ایک اور سند کے ہمراہ بھی منقول ہے۔

4230 ۔ حضرت عبداللہ بن عمروبن العاص (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : شعرکلام کی طرح ہے ‘ اچھا شعراچھے کلام کی طرح ہے اور براشعربرے کلام کی طرح ہے۔

4231 ۔ حضرت ابوہریرہ (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : اچھا شعراچھے کلام کی طرح ہے اور براشعربرے کلام کی طرح ہے۔

4232 ۔ حضرت عبداللہ بن عباس (رض) ‘ نبی اکرم (صلی اللہ علیہ وآلہ وسلم) کا یہ فرمان بیان کرتے ہیں : مسلمان پر جزیہ دینا لازم نہیں ہے۔

4233 ۔ قابوس اپنے والد کے حوالے نبی اکرم (صلی اللہ علیہ وآلہ وسلم) کا یہ فرمان نقل کرتے ہیں : مسلمان پر جزیہ دینا لازم نہیں ہے۔

4234 ۔ عمروبن شعیب اپنے والد کے حوالے سے اپنے دادا کا یہ بیان نقل کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : دعوی کرنے والے پر ثبوت پیش کرنا لازم ہے اور جس شخص کے خلاف دعوی کیا گیا ہو ‘ اس پر قسم اٹھانا لازم ہے۔

4235 ۔ حضرت عبداللہ بن عباس (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : اگر لوگوں کو ان کے دعوے کے مطابق دیناشروع کردیا جائے تو لوگ دوسروں کی جانوں اور اموال کے بارے میں دعوے کرنے لگیں گے۔ جس شخص کے خلاف دعوی کیا گیا ہو ‘ اس پر صرف قسم اٹھانا لازم ہے۔

4236 ۔ حضرت ابوہریرہ (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : قسم سے وہ مفہوم مراد ہوتا ہے جس کی تمہارا ساتھی تصدیق کردے۔

4237 ۔ یہی روایت ایک اور سند کے ہمراہ بھی منقول ہے۔

4238 ۔ یہی روایت ایک اور سند کے ہمراہ بھی منقول ہے۔

4239 ۔ یہی روایت ایک اور سند کے ہمراہ بھی منقول ہے۔