Sunan Al Daraqutni

3457 ۔ حضرت عائشہ صدیقہ (رض) فرماتی ہیں : زمانہ جاہلیت میں نکاح چار طریقے سے ہوتے تھے ، ایک نکاح کا طریقہ وہ تھا جو آج کل لوگوں میں رائج ہے ، آدمی کسی دوسرے شخص کی بیٹی کے لیے نکاح کا پیغام بھیجتا تھا اور اس کو مہر دیتا ہے اور اس کے ساتھ نکاح کرلیتا ہے۔ سیدہ عائشہ صدیقہ (رض) بیان کرتی ہیں نکاح کا دوسرا طریقہ یہ تھا کوئی شخص اپنی بیوی سے جب وہ اس شخص سے طلاق لینے کے بعد پاک ہوجاتی تھی یہ کہتا تھا تم فلاں شخص کو پیغام بھیجو اور اس کے ساتھ صحبت کرلو ، وہ شخص اس دوران اپنی بیوی سے الگ رہتا تھا، اور اس کے بیوی کے ساتھ اس وقت تک صحبت نہیں کرتا تھا جب تک اس دوسرے شخص سے اس عورت کا حمل ظاہر نہ ہوجاتا تھا، جس کے ساتھ اس عورت نے صحبت کی تھی ، جب عورت کا حمل ظاہرہوجاتاتو اس کا اصل شوہر اس کے ساتھ صحبت کرلیتا۔ اگر اسے اس کی خواہش ہوتی وہ شخص اس لیے کرتا تھا تاکہ اس کی اولاد کسی بڑے خاندان کے فرد کا نطفہ ہو، اس نکاح کو ، نکاح استبضاع، کا نام دیاجاتا تھا۔
سیدہ عائشہ صدیقہ (رض) فرماتی ہیں : نکاح کا تیسرا طریقہ یہ تھا کہ کچھ لوگ اکٹھتے ہوئے ان کی تعداد دس سے کم ہوتی وہ سب کسی عورت کے پاس جاتے اور وہ سب اس کے ساتھ صحبت کرتے پھر وہ حاملہ ہوجاتی اور آخر کار بچے کو جنم دیتی بچے کو جنم دینے کے کچھ دن بعد وہ ان سب کو بلواتی ان سب میں سے کوئی بھی شخص آنے سے انکار نہیں کرسکتا تھا، جب وہ لوگ اس عورت کے پاس اکٹھتے ہوتے تو وہ عورت ان سے کہتی، تم لوگ جانتے ہو کہ تم نے کیا کیا تھا ؟ میں نے ایک بچے کو جنم دیا ہے ، اے فلاں ! یہ تمہارا بیٹا ہے ، وہ عورت ان افراد میں سے جس کا چاہتی اس شخص کا نام لیتی، تو اس کے بچے کا نسب اس شخص کے ساتھ لاحق کردیاجاتا وہ شخص اب اس بچے کا انکار نہیں کرسکتا تھا۔
چوتھا طریقہ یہ تھا کہ بہت سے لوگ اکٹھے ہو کر کسی عورت کے پاس جاتے وہ عورت اپنے ہاں آنے والے کسی شخص ک روک نہیں سکتی تھی، یہ جسم فروش عورتیں ہوا کرتی تھیں، انھوں نے اپنے دروازوں پر مخصوص جھنڈے لگائے ہوئے ہوتے تھے جوان (کے پیشے ) کا علامتی نشان ہوتا تھا، جو شخص ان کے ہاں جانا چاہتا وہ چلاجاتا، جب ان میں سے کوئی ایک عورت حاملہ ہوتی اور بچے کو جنم دیتی تو سب لوگوں کو اس کے پاس اکٹھاکیاجاتا پھر کسی قیافہ شناس کو بلایاجاتا وہ اس عورت کے بچے کو اس شخص کے ساتھ لاحق کردیتا، جس کے ساتھ وہ بچہ مشابہت رکھتا ، پھر لوگ اس بچے کو اس شخص کے بیٹے کے طور پر بلاتے اور وہ شخص اس سے انکار نہیں کرسکتا تھا۔

3458 ۔ سیدہ عائشہ صدیقہ (رض) زمانہ جاہلیت میں چار طرح کے نکاح ہوتے تھے (اس کے بعد انھوں نے حسب سابق حدیث ذکر کی ہے ) ۔
ایک روایت میں یہ الفاظ زائد ہیں : (شوہر اپنی بیوی سے یہ کہتا) تم فلاں شخص کو پیغام بھیجو پھر تم اس کے ساتھ صحبت کرلو اس دوران اس عورت کا شوہر اس سے الگ رہتا اور عورت کے ساتھ اس وقت تک صحبت نہ کرتا جب تک اس شخص سے حمل ظاہر نہ ہوجاتا جس کے ساتھ عورت نے صحبت کی تھی ، جب عورت کا حمل ظاہر ہوجاتا تو شوہراس کے ساتھ صحبت کرلیتا اگر اسے اس کی خواہش ہوتی وہ ایسا اس لیے کرتا تھا تاکہ اس کی اولاد نجیب ہو، اس نکاح کو، نکاح استبضاع، کا نام دیا گیا تھا۔
یہی روایت ایک اور سند کے ہمراہ بھی منقول ہے ، تاہم اسمیں یہ الفاظ ہیں (شوہر بیوی سے کہتا : ) تم فلاں شخص کو پیغام بھیجو اور اس سے حاملہ ہوجاؤ، عورت کا شوہر عورت سے الگ رہتا اس وقت تک اس کے ساتھ صحبت نہ کرتا جب تک دوسرے شخص سے عورت کا حمل ظاہر نہ ہوجاتا اس نکاح کو، نکاح استرضاع، کا نام دیا گیا۔
محمد بن اسحاق بیان کرتے ہیں : یہ درست ہے۔ (اس میں یہ الفاظ بھی ہیں : ) جب اللہ تعالیٰ نے حضرت محمد (صلی اللہ علیہ وآلہ وسلم) کو حق کے ہمراہ مبعوث کیا تو زمانہ جاہلیت کے نکاح (کے مختلف طریقوں ) کو ختم کردیا۔

3459 ۔ حضرت ابوہریرہ (رض) بیان کرتے ہیں : زمانہ جاہلیت میں بدل یہ ہوتا تھا کہ کوئی شخص دوسرے سے کہتا، تم مجھے اپنی بیوی کے س اتھ صحبت کرنے دو میں تمہیں اپنی بیوی کے ساتھ صحبت کرنے دیتاہوں میں تمہیں مزید (فائدہ ) دوں گا، تو اللہ تعالیٰ نے یہ آیت نازل کی : (ولاان تبدل بھن من ازواج ولواعجبک حسنھن) ۔
راوی بیان کرتے ہیں : حضرت عیینہ بن حصن فزاری (رض) نبی کریم (صلی اللہ علیہ وآلہ وسلم) کی خدمت میں حاضر ہوئے ، نبی کریم (صلی اللہ علیہ وآلہ وسلم) اس وقت سیدہ عائشہ (رض) کے ہاں موجود تھے ، عیینہ اجازت لیے بغیر اندر آگئے تو نبی کریم نے ان سے فرمایا : اے عیینہ ، تم نے اجازت کیوں نہیں لی ؟ انھوں نے عرض کی یارسول اللہ جب سے میں بالغ ہوا میں نے مضر قبیلہ کے کسی فرد کے ہاں اندر داخل ہونے کی اجازت طلب نہیں کی، اس نے یہ بھی کہا : آپ (صلی اللہ علیہ وآلہ وسلم) کے پہلو میں موجود یہ خوبصورت خاتون کون ہے ؟ نبی کریم نے فرمایا یہ عائشہ ہے ، جو تمام اہل ایمان کی ماں ہے، اس نے کہا : کیا میں اس کی جگہ تبدیل کرکے آپ (صلی اللہ علیہ وآلہ وسلم) کو زیادہ خوبصورت عورت نہ دوں ؟ نبی کریم نے فرمایا اے عیینہ ! اللہ تعالیٰ نے اس عمل کو حرام قرار دیا ہے ۔
راوی کہتے ہیں) جب وہ شخص چلا گیا تو سیدہ عائشہ صدیقہ (رض) نے دریافت کیا یارسول اللہ ، یہ کون تھا ؟ نبی کریم نے فرمایا یہ ایک احمق رہنما تھا، تم نے اس کی (جوذہنی حالت) دیکھی ہے اس کے باوجود یہ اپنی قوم کا سردار ہے۔

3460 ۔ ابوبردہ اپنے والد کے حوالے سے نبی کریم (صلی اللہ علیہ وآلہ وسلم) کا یہ فرمان نقل کرتے ہیں : ولی کے بغیر نکاح نہیں ہوتا۔

3461 ۔ یہی روایت ایک اور سند کے ہمراہ بھی منقول ہے۔

3462 ۔ عبدالرحمن ہمذانی نے اپنی سند کے حوالے سے اسے اسرائیل سے اس طرح نقل کیا ہے جیسے ابن سنان نے نقل کیا ہے۔
محمد بن مخلد کہتے ہیں : عبدالرحمن ہمذانی سے کہا گیا، شعبہ اور سفیان دونوں نے اسے ابوبردہ تک، موقوف، روایت کے طور پر نقل کیا ہے۔ تو انھوں نے فرمایا : اسرایئل نے ابواسحاق کے حوالے سے جو روایت نقل کی ہے وہ میرے نزدیک سفیان اور شعبہ سے منقول روایت سے زیادہ پسندیدہ ہے۔

3463 ۔ دعلج بن احمر نے اپنی سند کے ہمراہ عبدالرحمن بن مہدی کا یہ فرمان نقل کیا ہے : اسرائیل کو ابواسحاق کی روایات اسی طرح یاد تھیں جس طرح انھیں سورة فاتحہ یاد تھی۔
صالح فرماتے ہیں : اسرائیل بطور خاص ابواسحاق کی روایات کو زیادہ محفوظ طور پر (نقل کرتے ہیں ) ۔

3464 ۔ ابوبردہ اپنے والد (حضرت ابوموسی اشعری (رض)) کے حوالے سے نبی کریم (صلی اللہ علیہ وآلہ وسلم) کا یہ فرمان نقل کرتے ہیں ولی کے بغیر نکاح نہیں ہوتا۔

3465 ۔ ابوسعید فرماتے ہیں : ولی ، گواہوں اور مہر کے بغیر نکاح درست نہیں ہوتا، البتہ نبی کریم (صلی اللہ علیہ وآلہ وسلم) (کا نکاح ان کے بغیر بھی ہوسکتا ہے) ۔

3466 ۔ سیدہ عائشہ صدیقہ (رض) ، نبی کریم (صلی اللہ علیہ وآلہ وسلم) کا یہ فرمان نقل کرتی ہیں جو عورت ولی کے بغیر اجازت نکاح کرلے اس کا نکاح باطل ہوگا، اس کا نکاح باطل ہوگا، اس کا نکاح باطل ہوگا، اگر مرد اس کے ساتھ صحبت کرلے تو مرد کے اس عمل کی وجہ سے اس عورت کو مہر ملے گا، اگر ان کے درمیان آپس میں اختلاف ہوجائے تو جس کا کوئی ولی نہ ہو، حاکم وقت اس کا ولی ہوتا ہے۔