Sunan Al Daraqutni

4139 ۔ عمروبن شعیب اپنے والد کے حوالے سے اپنے داداکایہ بیان نقل کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : جو شخص ایک سواو قیہ کے عوض میں کتابت کا معاہدہ کرتا ہے اور دس اوقیہ کے علاوہ باقی سب ادائیگی کردیتا ہے ‘ تو وہ شخص غلام شمار ہوگا اور جو غلام ایک سو دینار کے عوض میں کتابت کا معاہدہ کرتا ہے اور دس دینار کے علاوہ باقی سب ادائیگی کردیتا ہے ‘ تو وہ بھی وہ غلام شمار ہوگا (یعنی پوری ادائیگی سے پہلے وہ آزاد نہیں ہوگا) ۔

4140 ۔ حضرت عبداللہ بن عباس (رض) ‘ نبی اکرم (صلی اللہ علیہ وآلہ وسلم) کا یہ فرمان نقل کرتے ہیں : جب کتابت کا معاہدہ کرنے والا شخص کسی قابل حدجرم کا ارتکاب کرے یا وراثت میں حصہ دار بن رہاہو ‘ تو جتنا حصہ اس کا آزاد ہوا ہے ‘ اسی حساب سے وہ وراثت کا حق داربنے گا اور جتنا حصہ اس کا آزاد ہوا ہے ‘ اسی حساب سے اس پر حد جاری کی جائے گی۔

4141 ۔ سعید بن ابوسعید مقبری اپنے والد کے حوالے سے یہ بات نقل کرتے ہیں : بنولیث سے تعلق رکھنے والی ایک عورت نے ذوالمجاز کے بازار سے مجھے سات سو درہم کے عوض میں خرید لیا ‘ پھر جب میں آیا تو اس نے چالیس ہزار درہم کے عوض میں میرے ساتھ کتابت کا معاہدہ کرلیا ‘ میں نے اکثرادائیگی اسے کردی ‘ جب کچھ ادائیگی باقی رہ گئی اور میں وہ لے کر اس کے پاس پہنچا اور اس سے کہا : تم اپنی یہ رقم لے لو ‘ تو وہ بولی : اللہ کی قسم ! میں اسے یوں نہیں لوں گی بلکہ ہر مہینے لیا کروں گی یاہرسال کروں گی ‘ میں اسے ساتھ لے کر حضرت عمر (رض) کے پاس آیا اور ان کے سامنے اس بات کا تذکرہ کیا تو حضرت عمر (رض) نے فرمایا : تم اسے بیت المال میں جمع کروادو ‘ پھر حضرت عمر (رض) نے اس نے اس خاتون کو بلوایا اور بولے : تمہارا مال بیت المال میں جمع ہے ‘ ابوسعید آزاد ہوگیا ہے ‘ اب تمہاری مرضی ہے ‘ اگر تم چاہوتو ہر مہینے اور ہر سال کے حساب سے بیت المال میں سے وصولی کرلیا کرو۔ راوی بیان کرتے ہیں : وہ اسے بھجوایا گیا تو وہ اس نے وصول کرلیا۔

4142 ۔ حضرت عبداللہ بن عباس (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : کتابت کا معاہدہ کرنے والا شخص جتنا آزاد ہوچکاہو ‘ اسی حساب سے ازاد شخص کی دیت اداکرے گا اور جتنا حصہ اس کا غلام ہے ‘ اس حساب سے غلام کی دیت اداکرے گا۔

4143 ۔ حضرت عبداللہ بن عباس (رض) بیان کرتے ہیں کہ نبی اکرم (صلی اللہ علیہ وآلہ وسلم) نے مکاتب شخص کے بارے میں یہ فیصلہ دیا تھا جسے قتل کردیا گیا ہو کہ اس نے اپنی مکاتبت کے معاہدے میں سے جتنی ادائیگی کی تھی ‘ اس حساب سے اس کی دیت آزاد شخص کی دیت ہوگی اور جو ادائیگی باقی رہ گئی تھی ‘ اس کے حساب سے اس کی دیت غلام کی دیت ہوگی۔

4144 ۔ حضرت عبداللہ بن عمر (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : جس شخص کا کسی غلام یاکنیز میں کوئی حصہ ہو اور وہ اپنے حصے کو آزاد کردے تو اب اس پر لازم ہے وہ غلام یاکنیز کے بقیہ مالکان کے حصوں میں سے بھی اسے آزاد کردے ‘ انصاف کے مطابق اس کی قیمت لگائی جائے گی اور وہ اپنے شراکت داروں کی طرف سے اس کی ادائیگی کردے گاجوان کے حصوں کی قیمت کے مطابق ہوگی ‘ وہ اس غلام یاکینز کو آزاد کردے گا لیکن یہ اس وقت ہے کہ جب آزاد کرنے والے شخص کے مال میں اتنا مال موجود ہو جو اس کے شراکت داروں کے حصے کی قیمت کے برابر ہو۔

4145 ۔ حضرت عبداللہ بن عمر (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : جو شخص کسی مشترکہ غلام میں سے اپنے حصے کو آزاد کردیتا ہے ‘ تو اس غلام کی انصاف کے مطابق قیمت کا اندازہ لگایا جائے گا اور پھر وہ شخص اپنے دیگرشراکت داروں کو ادائیگی کردے گا اور غلام اس شخص کی طرف سے آزادشماہوگا۔ اگر وہ شخص خوشحال ہو ‘ ورنہ اس کی طرف سے وہ حصہ آزاد ہوگا جو آزادہوگا جو آزاد کیا تھا اور غلام کا بقیہ غلام رہے گا۔

4146 ۔ حضرت ابوہریرہ (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : جو غلام دو آدمیوں کی مشترکہ ملکیت ہو ‘ ان میں سے ایک اپنے حصے کو آزاد کردیتا ہے ‘ تو نبی اکرم (صلی اللہ علیہ وآلہ وسلم) نے فرمایا ہے : وہ شخص ضامن ہوگا۔
ہشام نامی راوی نے اس کی موافقت کی ہے اور انھوں نے اس بات کا تذکرہ نہیں کیا کہ اس غلام سے مزدوری کروائی جائے گی۔ شعبہ اور ہشام ‘ قتادہ کے حوالے سے روایات نقل کرنے میں دیگر رایوں سے زیادہ حافظ ہیں۔ ہمام نامی راوی نے اس روایت کو نقل کرتے ہوئے اس بات کا تذکرہ کیا ہے کہ قتادہ نے یہ کہا ہے کہ ایسے غلام سے مزدوری کروائی جائے گی۔ انھوں نے قتادہ کے اس قول کو نبی اکرم (صلی اللہ علیہ وآلہ وسلم) کے کلام سے الگ طورپرذکر کیا ہے۔ جبکہ دیگرراویوں نے قتادہ کے حوالے سے یہ بات نقل کی ہے کہ مزدوری کروانے کا حکم نبی اکرم (صلی اللہ علیہ وآلہ وسلم) نے دیا ہے۔ میں یہ سمجھتا ہوں کہ اس بارے میں ان راویوں کو وہم ہوا ہے کیونکہ یہ روایت شعبہ اور ہشام کی نقل کردہ روایت کے مقابلے میں مختلف ہے۔

4147 ۔ حضرت ابوہریرہ (رض) ‘ نبی اکرم (صلی اللہ علیہ وآلہ وسلم) کے حوالے سے اسی کی مانند نقل کرتے ہیں کہ یہ وہی روایت ہے جس طرح شعبہ نے نقل کی ہے ‘ انھوں نے اس کی سند میں نضر بن انس کا تذکرہ نہیں کیا۔

4148 ۔ حضرت ابوہریرہ (رض) بیان کرتے ہیں : ایک شخص نے ایک غلام میں سے اپنے حصے کو آزاد کردیاتو نبی اکرم (صلی اللہ علیہ وآلہ وسلم) نے اس کے آزاد کرنے کو درست قراردیا اور اسے اس غلام کی بقیہ قیمت بطور تاوان ادا کرنے کا حکم دیا۔
قتادہ کہتے ہیں : اگر شخص کے پاس مال موجودنہ ہو ‘ تو اس غلام سے مزدوری کروائی جائے گی ‘ تاہم اس بارے میں اسے مشقت کا شکار نہیں کیا جائے گا۔
شیخ نیشاپوری نے یہ بات بیان کی ہے کہ بہترین روایت وہ ہے ‘ جسے ہمام نے نقل کیا ہے اور انھوں نے نبی اکرم (صلی اللہ علیہ وآلہ وسلم) کے فرمان اور قتادہ کے قول کے درمیان فرق واضح کیا ہے۔