1773 حضرت ابوہریرہ (رض) بیان کرتے ہیں میں نے نبی اکرم (صلی اللہ علیہ وآلہ وسلم) کو یہ ارشاد فرماتے ہوئے سنا ہے ایک مرتبہ ایک نبی لوگوں کے ساتھ نماز استسقاء ادا کرنے کے لیے نکلے ‘ وہاں ایک چیونٹی بھی تھی جس نے اپنے پاؤں (یعنی ہاتھ) آسمان کی طرف اٹھائے ہوئے تھے ‘ تو اس نبی نے فرمایا تم لوگ واپس چلے جاؤ ‘ کیونکہ اس چیونٹی کی وجہ سے تمہاری دعاقبول کرلی گئی ہے۔

1774 امام جعفرصادق (رض) اپنے والد (امام محمد الباقر (رض)) کے حوالے سے یہ بات نقل کرتے ہیں نبی اکرم (صلی اللہ علیہ وآلہ وسلم) نے بارش کی دعا مانگتے ہوئے اپنی چادرکوالٹادیاتا کہ قحط سالی ختم ہوجائے۔

1775 عباد بن تمیم اپنے چچاکا یہ بیان نقل کرتے ہیں نبی اکرم (صلی اللہ علیہ وآلہ وسلم) عیدگاہ کی طرف تشریف لے گئے ‘ تاکہ نماز استسقاء اداکریں (دعا مانگتے ہوئے) آپ (صلی اللہ علیہ وآلہ وسلم) نے قبلہ کی طرف رخ کیا ‘ آپ نے اپنی چادرکوالٹادیا اور دو رکعت (نماز استسقاء) ادا کی۔
سفیان نامی راوی کہتے ہیں چادرکوالٹا کرتے ہوئے نبی اکرم (صلی اللہ علیہ وآلہ وسلم) نے اس کے دائیں حصے کو بائیں طرف اور بائیں حصے کو دائیں طرف کردیا۔

1776 طلحہ نامی راوی بیان کرتے ہیں مروان نے مجھے حضرت عبداللہ بن عباس (رض) کے پاس بھیجا تاکہ میں ان سے نماز استسقاء کا سنت طریقہ دریافت کرسکوں تو حضرت عبداللہ بن (رض) نے فرمایا استسقاء (یعنی بارش کی دعا کے لیے) سنت یہ ہے عیدگاہ میں نماز استسقاء ادا کی جائے ‘ البتہ نبی اکرم (صلی اللہ علیہ وآلہ وسلم) نے اپنی چادرکوالٹا بھی دیا تھا ‘ آپ (صلی اللہ علیہ وآلہ وسلم) نے اس کے دائیں حصے کو بائیں طرف اور بائیں حصہ کو دائیں طرف کردیا تھا ‘ آپ (صلی اللہ علیہ وآلہ وسلم) نے دو رکعت نماز ادا کی تھی آپ (صلی اللہ علیہ وآلہ وسلم) نے پہلی رکعت میں سات بارتکبیر کہی تھی اور سورۃ الاعلیٰ کی تلاوت کی تھی ‘ جبکہ دوسری رکعت میں سورۃ الغاشیہ کی تلاوت کی ‘ آپ (صلی اللہ علیہ وآلہ وسلم) نے دوسری رکعت میں پانچ مرتبہ تکبیر کہی تھی۔

1777 عبادبن تمیم اپنے چچا کا یہ بیان نقل کرتے ہیں نبی اکرم (صلی اللہ علیہ وآلہ وسلم) بارش کی دعا مانگنے لوگوں کے ساتھ نکلے ‘ آپ نے وہاں لوگوں کو دورکعات پڑھائیں جن میں آپ نے بلند آواز میں قرأت کی۔ نبی اکرم (صلی اللہ علیہ وآلہ وسلم) نے اپنی چادرکوالٹادیا اور اپنے دونوں ہاتھ بلند کرکے دعامانگی ۔ آپ نے بارش کے نزول کی دعا کی۔ آپ کا رخ قبلہ کی طرف تھا۔

1778 عبادبن تمیم اپنے چچا کا یہ بیان نقل کرتے ہیں نبی اکرم (صلی اللہ علیہ وآلہ وسلم) بارش کی دعا مانگنے لوگوں کے ساتھ نکلے ‘ آپ عیدگاہ تشریف لائے وہاں آپ نے بارش کے لیے دعامانگی ‘ نبی اکرم (صلی اللہ علیہ وآلہ وسلم) نے کھڑے ہو کراللہ سے دعا کی ‘ قبلہ کی طرف رخ کیا اور اپنی چادرکوالٹادیاتو لوگوں کو سیراب کردیا گیا (یعنی بارش نازل ہوگئی) ۔

1779 حضرت عبداللہ بن عمر (رض) بیان کرتے ہیں نبی اکرم (صلی اللہ علیہ وآلہ وسلم) عیدین اور استسقاء کی نماز میں بلند آواز میں قرأت کرتے تھے۔

1780 عباد بن تمیم اپنے چچا حضرت عبداللہ بن زید (رض) کا یہ بیان نقل کرتے ہیں نبی اکرم (صلی اللہ علیہ وآلہ وسلم) بارش کی دعا مانگنے کے لیے تشریف لائے ‘ آپ نے لوگوں کو خطبہ دیا ‘ جب آپ دعا مانگنے لگے تو آپ (صلی اللہ علیہ وآلہ وسلم) نے اپنا رخ قبلہ کی طرف کیا اور اپنی چادر کو الٹادیا۔

1781 یہی روایت بعض دیگر اسناد کے ہمراہ عبداللہ بن زید کے حوالے سے نبی اکرم (صلی اللہ علیہ وآلہ وسلم) سے اسی کی مثل منقول ہے۔۔

1782 اسحق بن عبداللہ بیان کرتے ہیں مدینہ منورہ کے گورنرولید بن عتبہ نے انھیں عبداللہ بن عباس (رض) کے پاس بھیجا ‘ اس نے کہا اے میرے بھتیجے ! تم ان سے یہ دریافت کرنا کہ نبی اکرم (صلی اللہ علیہ وآلہ وسلم) نے بارش کی دعا کے سلسلے میں کیا کیا تھا ‘ جب آپ نے لوگوں کے لیے بارش کی دعامانگی تھی تو حضرت عبداللہ بن عباس (رض) نے جواب دیا جی ہاں ! نبی اکرم (صلی اللہ علیہ وآلہ وسلم) خشوع و خضوع کی کیفیت کے ساتھ تشریف لے گئے تھے ‘ آپ نے وہاں اسی طرح کیا تھا جس طرح عیدالفطر اور عیدالاضحی کی نماز میں کرتے ہیں۔
یہاں پر ایک لفظ نقل کرنے میں راوی نے اختلاف کیا ہے۔

1783 ہشام بن اسحاق اپنے والد کا یہ بیان نقل کرتے ہیں ایک امیرنے مجھے حضرت عبداللہ بن عباس (رض) کے پاس بھیجا تاکہ میں ان سے نماز استسقاء کے بارے میں دریافت کروں۔ ہارون اور یوسف نامی راوی نے یہ الفاظ نقل کیے ہیں
تاکہ میں ان سے بارش کی دعا کے سلسلے میں پڑھی جانے والی نماز کے بارے میں دریافت کرسکوں ‘ تو حضرت عبداللہ بن عباس (رض) نے فرمایا اس نے خود مجھ سے کیوں نہیں دریافت کیا ‘(پھر انھوں نے بتایا ) نبی اکرم (صلی اللہ علیہ وآلہ وسلم) خشوع و خضوع کے عالم میں گریہ وزاری کی کیفیت میں (عیدگاہ) تشریف لے گئے تھے اور آپ (صلی اللہ علیہ وآلہ وسلم) نے دو رکعت اس طرح ادا کی تھی جس طرح آپ عید کی نماز میں ادا کرتے ہیں ‘ نبی اکرم (صلی اللہ علیہ وآلہ وسلم) نے تم لوگوں کی طرح خطبہ نہیں دیا تھا۔

1784 حضرت انس (رض) بیان کرتے ہیں نبی اکرم (صلی اللہ علیہ وآلہ وسلم) نے صرف بارش کی دعا مانگتے ہوئے دعا کے دوران ہاتھ اٹھائے ہیں ‘ آپ (صلی اللہ علیہ وآلہ وسلم) نے اس دوران اتنے ہاتھ بلند کیے تھے کہ آپ کی بغلوں کی سفیدی نظر آنے لگی تھی۔
ایک اور سند کے ہمراہ یہ الفاظ منقول ہیں حضرت انس (رض) بیان کرتے ہیں نبی اکرم (صلی اللہ علیہ وآلہ وسلم) نے دعا مانگتے ہوئے کبھی ہاتھ بلند نہیں کیے ‘ صرف بارش کی دعا مانگتے ہوئے آپ (صلی اللہ علیہ وآلہ وسلم) نے ایسا کیا تھا اور ہاتھوں کو اتنا بلند کیا تھا ‘ آپ کی بغلوں کی سفیدی نظر آنے لگی تھی۔