Sunan Al Daraqutni

2759 ۔ حضرت فضالہ بن عبید (رض) بیان کرتے ہیں غزوہ خیبر کے موقعہ پر نبی کریم (صلی اللہ علیہ وآلہ وسلم) کی خدمت میں ایک ہار لایا گیا جس پر سوناچڑھا ہوا تھا اور قیمتی پتھر بھی لگے ہوئے تھے ایک شخص نے 7 یاشاید 9 دینار کے عوض خرید لیا، تو نبی کریم (صلی اللہ علیہ وآلہ وسلم) نے ارشاد فرمایا نہیں، جب تک ان دونوں کو الگ الگ نہیں کیا جاتا تو وہ شخص بولا، میں پھر پتھر لے لوں گا، تو نبی کریم (صلی اللہ علیہ وآلہ وسلم) نے ارشاد فرمایا نہیں، تم اسے واپس کروجب تک ان دونوں (یعنی پتھر اور سونے) کو الگ الگ نہیں کیا جاتا۔

2760 ۔ حضرت فضالہ بن عبید (رض) نبی کریم (صلی اللہ علیہ وآلہ وسلم) کی خدمت میں ایک ہار لایا گیا جس پر سونا اور پتھرلگے ہوئے تھے تو آپ کے حکم کے تحت سونے اور پتھر کو اتارلیا گیا تو آپ نے ارشاد فرمایا سونے اور سونے کے عوض میں برابر وزن کے ساتھ فروخت کردیاکرو۔

2761 ۔ حضرت عبداللہ بن عباس (رض) بیان کرتے ہیں نبی کریم (صلی اللہ علیہ وآلہ وسلم) مدینہ منورہ تشریف لائے تو لوگ پھلوں میں بیع سلم کیا کرتے تھے تو آپ نے فرمایا طے شدہ مقدار کے عوض میں متعین مدت کے پھلوں میں بیع سلم کیا کرو۔
ابن مہدی نامی راوی نے یہ الفاظ نقل کیے ہیں لوگ دویاتین سال تک بیع سلم کیا کرتے تھے ، تو نبی کریم (صلی اللہ علیہ وآلہ وسلم) نے ارشاد فرمایا ، متعین شدہ پیمائش اور وزن کے عوض میں سلف کیا کرو۔

2762 ۔ حضرت عبداللہ بن عباس (رض) بیان کرتے ہیں جب نبی کریم (صلی اللہ علیہ وآلہ وسلم) مدینہ منورہ تشریف لائے تو لوگ ایک سال یادوسال کے لیے بیع سلف کیا کرتے تھے ، تو آپ نے ارشاد فرمایا، جس شخص نے سلف (ادھار) سودا کرنا ہو تو وہ متعین پیمائش اور متعین وزن کے عوض میں متعین مدت کے لیے سوداکرے۔
روایت کے یہ الفاظ نیشاپوری نامی راوی کے ہیں ، محالی نے یہ الفاظ نقل کیے ہیں وہ اناج کھجور یا کھجور کے درختوں کے بارے میں بیع سلف کیا کرتے تھے تو نبی نے ارشاد فرمایا، متعین مدت کے لیے کرو اور ماپی ہوئی چیز کی بیع کرو۔

2763 ۔ حضرت عبداللہ بن عباس (رض) بیان کرتے ہیں جب نبی کریم (صلی اللہ علیہ وآلہ وسلم) مدینہ منورہ تشریف لائے تو لوگ دو سال یاتین سال کے لیے کھجوروں کا ادھار سودا کیا کرتے تھے تو آپ نے فرمایا جس شخص نے ادھارسودا کرنا ہو تو وہ متعین شدہ ماپی ہوئی چیز متعین شدہ وزن کی ہوئی چیز کے عوض میں متعین مدت تک کے لیے ادھار کرے۔

2764 ۔ حضرت عبداللہ بن عباس (رض) بیان کرتے ہیں جب نبی کریم (صلی اللہ علیہ وآلہ وسلم) مدینہ منورہ تشریف لائے تو لوگ ایک سال یادوسال تک کے لیے ادھارسودا کیا کرتے تھے تو آپ نے ارشاد فرمایا جس نے کھجوروں کا ادھار سودا کرنا ہوتومتعین ماپی ہوئی یا متعین وزن کی ہوئی چیز کا اداھار سودا کرے۔

2765 ۔ حضرت عبداللہ بن عباس (رض) بیان کرتے ہیں جب نبی کریم (صلی اللہ علیہ وآلہ وسلم) مدینہ منورہ تشریف لائے تو لوگ دو سال یاتین سال تک کے لیے پھلوں کا ادھارسودا کیا کرتے تھے ، تو نبی کریم (صلی اللہ علیہ وآلہ وسلم) نے ارشاد فرمایا متعین ماپی ہوئی اور متین وزن کی ہوئی چیز کا متعین مدت تک کے لیے ادھارسودا کرو۔

2766 ۔ مکحول مرفوع حدیث کے طور پر یہ روایت نقل کرتے ہیں نبی کریم (صلی اللہ علیہ وآلہ وسلم) نے یہ بات ارشاد فرمائی ہے جو شخص کوئی ایسی چیز خریدتا ہے جسے اس نے دیکھا نہیں ہے تو اسے اختیار ہے جب وہ اسے دیکھ لے گا تواگرچا ہے اسے وصول کرے اور اگر چاہے تو اسے ترک کردے۔
ابوالحسن (یعنی دارقطنی ) فرماتے ہیں یہ روایت مرسل ہے اور اس کا راوی ابوبکر مریم ضعیف ہے۔

2767 ۔ یہی روایت ایک اور سند کے ہمراہ منقول ہے۔

2768 ۔ یہی روایت ایک اور سند کے ہمراہ بھی منقول ہے تاہم اس میں یہ الفاظ ہیں ، ابن سیرین بیان کرتے ہیں جب وہ چیز اس وقت کے مطابق نہ ہو جو اس شخص نے خریدار کے سامنے بیان کی تھی تو بھی یہ سودالازم ہوجائے گا۔
حضرت ابوہریرہ (رض) بیان کرتے ہیں نبی کریم (صلی اللہ علیہ وآلہ وسلم) نے یہ بات ارشاد فرمائی ہے جب کوئی شخص ایسی چیز خریدتا ہے جسے اس نے دیکھا نہیں ہے تو جب اسے دیکھے گا تو اسے اختیار ہوگا (اگر وہ چاہے تو اس سودے کو ختم کردے ) ۔ یہی روایت ایک اور سند کے ہمراہ حضرت ابوہریرہ (رض) سے منقول ہے ۔
یہی روایت بعض دیگراسناد کے ہمراہ نبی کریم (صلی اللہ علیہ وآلہ وسلم) سے منقول ہے جبکہ بعض راویوں نے اسے ابن سیرین تک موقوف روایت کے طور پر یعنی ان کے اپنے قول کے طور پر نقل کیا ہے۔