Sunan Al Daraqutni

4210 ۔ حضرت عبداللہ بن عمر (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے کہ اللہ تعالیٰ نے فرمایا ہے : اے آدم کے بیٹے ! تمہارے اندردوخصوصیات ہیں جو پہلے تم میں نہیں تھی ‘ ایک یہ کہ جب تم اپنے غصے پر قابو پاؤگے تو میں تمہارے مال میں اضافہ کردوں گا تاکہ اس طرح تمہیں پاک وصاف کروں اور دوسرایہ کہ جب تمہاری زندگی پوری ہوجائے گی تو میرے بندے تمہارے لیے دعا کرتے رہیں گے (یا نماز ہ اداکریں گے) ۔

4211 ۔ حضرت معاویہ بن قرۃ اپنے والد کے حوالے سے یہ بات نقل کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : جس شخص کی موت کا وقت قریب آجائے اور وہ کوئی وصیت کرے تو اللہ تعالیٰ کی کتاب کے حکم کے مطابق اگر اس کی وصیت ہو ‘ تو یہ اس چیز کے لیے کفارہ بن جائے گی جو وہ زکوۃ ادا نہیں کرسکا تھا۔

4212 ۔ حضرت معاذ بن جبل (رض) ‘ نبی اکرم (صلی اللہ علیہ وآلہ وسلم) کا یہ فرمان نقل کرتے ہیں : اللہ تعالیٰ نے موت کے قریب تمہیں تمہارے مال کا ایک تہائی حصہ ‘ صدقے کے طورپرعطاء کردیا ہے ‘ تاکہ تم اپنی نیکیوں میں اضافہ کرلو ‘ تاکہ وہ تمہارے اعمال میں پاکیزگی کا باعث بن جائے۔

4213 ۔ حضرت عبداللہ بن عمر (رض) ‘ نبی اکرم (صلی اللہ علیہ وآلہ وسلم) کا یہ فرمان نقل کرتے ہیں : کسی بھی شخص کو اس بات کا حق حاصل نہیں ہے کہ اس کے پاس کوئی ایسا مال موجودہوجس میں اس نے وصیت کرنی ہو اور پھر دو راتیں ایسی گزرجائیں (کہ اس نے وہ وصیت تحریرنہ کی ہو) اس کے وصیت اس کے پاس لکھی ہوئی ہونی چاہیے۔

4214 ۔ حضرت عبداللہ بن عمر (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : کسی بھی مسلمان شخص کو اس بات کا حق حاصل نہیں ہے کہ اس کے پاس مال موجودہوجس کے بارے میں اس نے وصیت کرنی ہو اور پھر دو راتیں ایسی گزرجائیں (کہ اس نے وصیت نہ کی ہو) اس کی وصیت اس کے پاس لکھی ہوئی ہونی چاہیے۔

4215 ۔ حضرت عبداللہ بن عمر (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : کسی بھی شخص کے لیے یہ بات مناسب نہیں ہے کہ اس پر تین دن ایسے گزرجائیں کہ اس کے پاس ایسا مال موجودہو کہ جس کے بارے میں اس نے وصیت کرنی ہو (اور اس نے وصیت نہ کی ہو) اسے بارے میں وصیت کردینی چاہیے۔

4216 ۔ حضرت عبداللہ بن عباس (رض) ‘ نبی اکرم (صلی اللہ علیہ وآلہ وسلم) کا یہ فرمان نقل کرتے ہیں : وصیت کرتے ہوئے کسی (وارث) کو نقصان پہنچانا کبیرہ گناہ ہے۔

4217 ۔ سیدہ عائشہ صدیقہ (رض) بیان کرتی ہیں : آدمی کو اپنی وصیت میں یہ تحریر کرنا چاہیے کہ اگر میں اپنی وصیت کو تبدیل کیے بغیر فوت ہوگیا (تویوں ہوگا) ۔

4218 ۔ حضرت عبداللہ بن عباس (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : وارث کے لیے وصیت کرنا جائز نہیں ہے البتہ اگر دیگر ورثاء چاہیں (تو حکم مختلف ہوگا) ۔

4219 ۔ حضرت عمروبن خارجہ (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : وصیت ‘ وارث کے لیے نہیں ہوتی البتہ اگر دیگر ورثاء چاہیں (تو ہوسکتی ہے) ۔