Sunan Al Daraqutni

3989 ۔ حضرت ابوہریرہ (رض) روایت کرتے ہیں نبی کریم (صلی اللہ علیہ وآلہ وسلم) نے یہ بات ارشاد فرمائی ہے : وراثت کا علم حاصل کرو اور لوگوں کو اس کی تعلیم دو کیونکہ یہ نصف علم ہے اور یہ وہ سب سے پہلی چیز ہے جسے بھلادیا جائے گا اور یہ وہ سب سے پہلی چیز ہے جسے میری امت سے اٹھالیا جائے گا۔

3990 ۔ حضرت عبداللہ بن عمرو (رض) بیان کرتے ہیں : کہ نبی کریم (صلی اللہ علیہ وآلہ وسلم) نے یہ بات ارشاد فرمائی ہے علم تین قسم کا ہوتا ہے ، اس کے علاوہ جو ہے وہ اضافی ہے ، ایک محکم آیات کا علم، دوسرا ائم سنت کا علم اور تیسرا انصاف کے مطابق وراثت (تقسیم کرنے کے اصولوں ) کا علم ہے۔

3991 ۔ حضرت عبداللہ بن عباس (رض) بیان کرتے ہیں کہ میں نے نبی کریم (صلی اللہ علیہ وآلہ وسلم) کو یہ بات ارشاد فرماتے ہوئے سنا یہ سورة نساء کے نازل ہوجانے اور اس میں وراثت کے احکام نازل ہوجانے کے بعد کی بات ہے آپ (صلی اللہ علیہ وآلہ وسلم) نے فرمایا تھا، سورة نساء کے بعد اب کسی کو محبوس قرار نہیں دیا جاسکتا۔

3992 ۔ حضرت عبداللہ بن عباس (رض) بیان کرتے ہیں کہ نبی کریم (صلی اللہ علیہ وآلہ وسلم) نے یہ بات ارشاد فرمائی ہے : اللہ کے مقرر کردہ وراثت کے حصوں سے کسی کے محبوس قرار نہیں دیا جاسکتا۔
ابن لہیعہ کے علاوہ اور کسی نے اس کی سند بیان نہیں کی ہے اسنے اپنے بھائی کے حوالے سے نقل کیا ہے یہ دونوں راوی ضعیف ہیں۔

3993 ۔ حضرت علی (رض) نے (مرحوم کی) دو بیٹیوں ماں باپ اور بیوی کے بارے میں یہ ارشاد فرمایا ہے اس کی وراثت کے نوحصے ہوں گے۔

3994 ۔ حضرت ابوہریرہ (رض) بیان کرتے ہیں کہ نبی کریم (صلی اللہ علیہ وآلہ وسلم) نے یہ بات ارشاد فرمائی ہے : ایک مذہب دوسرے مذہب کا وارث نہیں بنتا اور ایک مذہب سے تعلق رکھنے والے لوگوں کی گواہی دوسرے مذہب کے خلاف قبول نہیں کی جاسکتی ، البتہ میری امت کا حکم مختلف ہے کیونکہ ان کی گواہی دوسرے سب لوگوں کے حق میں قبول کی جائے گی۔ روایت کے یہ الفاظ عیاش نامی راوی کے ہیں تاہم انھوں نے اپنی رویت میں یہ بات نقل کی ہے : میرا خیال ہے کہ روایت کے الفاظ میں شک عمرنامی راوی کو ہے اور عمر نامی راوی عمر بن راشد ہے جو مستند نہیں ہے۔

3995 ۔ حضرت اسامہ بن زید (رض) ، نبی کریم (صلی اللہ علیہ وآلہ وسلم) کا یہ فرمان نقل کرتے ہیں : کوئی کافر کسی مسلمان کو وارث نہیں بن سکتا، اور کوئی مسلمان کسی کافر کا وارث نہیں بن سکتا۔

3996 ۔ حضرت انس بن مالک (رض) بیان کرتے ہیں : میں اس وقت نبی کریم (صلی اللہ علیہ وآلہ وسلم) کی اونٹنی کے نیچے کھڑا ہوا تھا، اور اس کی رال میرے اوپر بہہ رہی تھی، اس موقع پر آپ نے یہ ارشاد فرمایا تھا، اللہ نے ہر حق دار کا حق مقرر کیا ہے اس لیے کسی وارث کے لیے وصیت نہیں کی جاسکتی، اولاد صاحب فراش کی ہوگی اور زنا کرنے والے کو محرومی ملے گی، کسی شخص کو اس کے باپ کی بجائے کسی اور حوالے سے نہ بلایا جائے گا اور کوئی بھی شخص اپنے آپ کو اپنے آزاد کرنے والے کے علاوہ کسی اور کی طرف منسوب نہ کرے جو شخص ایسا کرے گا اس پر اللہ کی لگاتار لعنت ہوگی عورت اپنے شوہر کے گھر میں اس کی اجازت کے بغیر کچھ خرچ نہ کرے ایک شخص نے عرض کی یارسول اللہ ! اناج بھی نہیں ؟ نبی کریم (صلی اللہ علیہ وآلہ وسلم) نے ارشاد فرمایا وہ تو ہمارا سب سے زیادہ اہم مال ہے ، پھر اس کے بعد آپ (صلی اللہ علیہ وآلہ وسلم) نے ارشاد فرمایا عاریت کے طور پر دی گئی چیز واپس کرنا ہوتی ہے قرض کو ادا کیا جائے گا، اور جو شخص ذمے دار بنے گا وہ تاوان ادا کرنے کا بھی پابند ہوگا۔

3997 ۔ ایک اور روایت میں یہی الفاظ ہیں حضرت انس (رض) فرماتے ہیں : میں نبی کریم (صلی اللہ علیہ وآلہ وسلم) کی اونٹنی کے نیچے کھڑا ہوا اس کے بعد انھوں نے حسب سابق روایت نقل کی ہے۔

3998 ۔ حضرت عبداللہ بن عباس (رض) بیان کرتے ہیں : کہ نبی کریم (صلی اللہ علیہ وآلہ وسلم) نے یہ بات ارشاد فرمائی ہے : وراثت کے فرض حصوں کے مطابق مال کی ادائیگی کرو اور جو مال بچ جائے تو وہ قریبی رشہ دار کا ہوگا۔