Sunan Al Daraqutni

4377 ۔ حضرت عبداللہ بن عمرو (رض) بیان کرتے ہیں کہ دو آدمی اپنا مقدمہ لے کر نبی اکرم (صلی اللہ علیہ وآلہ وسلم) کی خدمت میں حاضر ہوئے تو نبی اکرم (صلی اللہ علیہ وآلہ وسلم) نے حضرت عمروبن العاص (رض) سے کہا : تم ان دونوں کے درمیان فیصلہ کرو ‘ انھوں نے عرض کی : یارسول اللہ ! آپ کی موجودگی میں ؟ نبی اکرم (صلی اللہ علیہ وآلہ وسلم) نے ارشاد فرمایا : ہاں ! انھوں نے عرض کی : میں کیسے فیصلہ کروں ؟ نبی اکرم (صلی اللہ علیہ وآلہ وسلم) نے ارشاد فرمایا : اگر تم اجتہاد کرتے ہو اور صحیح فیصلہ کرتے ہو ‘ تو تمہیں دس اجر ملیں گے اور اگر تم اجتہاد کرنے کے بعد غلطی کرجاتے ہو ‘ تو تمہیں ایک اجرملے گا۔

4378 ۔ یہی روایت اور سند کے ہمراہ منقول ہے تاہم اس میں لفظ اجر کی بجائے نیکی استعمال ہوا ہے۔

4379 ۔ حضرت عقبہ بن عامر (رض) بیان کرتے ہیں کہ دو آدمی اپنا مقدمہ لے کر نبی اکرم (صلی اللہ علیہ وآلہ وسلم) کی خدمت میں حاضر ہوئے تو نبی اکرم (صلی اللہ علیہ وآلہ وسلم) نے فرمایا : اے عقبہ ! تم اٹھو اور ان کے درمیان فیصلہ کرو۔ میں نے عرض کی : یارسول اللہ ! آپ اس کے زیادہ حق دار ہیں ‘ نبی اکرم (صلی اللہ علیہ وآلہ وسلم) نے ارشاد فرمایا : اگر تم نے ان کے درمیان فیصلہ کرتے ہوئے اجتہاد سے کام لیا اور صحیح فیصلہ کیا تو تمہیں دس اجر ملیں گے اور اگر تم اجتہاد کرتے ہوئے غلطی کی تو تمہیں ایک اجر ملے گا۔

4380 ۔ حضرت ابوہریرہ (رض) ‘ نبی اکرم (صلی اللہ علیہ وآلہ وسلم) کا یہ فرمان نقل کرتے ہیں کہ جب کوئی شخص فیصلہ کرتے ہوئے اجتہاد کرے اور درست فیصلہ کردے تو اسے دس اجرملتے ہیں اور جب کوئی شخص فیصلہ کرتے ہوئے اجتہاد کرے اور غلطی کرجائے تو اسے دواجر ملتے ہیں۔

4381 ۔ حضرت ابوہریرہ (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : جو شخص قاضی بننا چاہتاہو ‘ اسے چھری کے بغیر ذبح کردیا گیا۔

4382 ۔ حضرت ابوہریرہ (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : جس شخص کو قاضی بنادیا جائے اسے گویا چھری کے بغیر ذبح کردیا گیا۔

4383 ۔ حضرت ابوہریرہ (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : جس شخص کو قاضی بنادیا جائے ‘ اسے چھری کے بغیر ذبح کردیا گیا۔

4384 ۔ حضرت ابوہریرہ (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : جب کوئی فیصلہ کرنے والا شخص فیصلہ کرتے ہوئے اجتہاد کرے اور درست فیصلہ کرے تو اسے دواجر ملتے ہیں اور جب وہ اجتہاد کرتے ہوئے غلط فیصلہ کردے تو اسے ایک اجرملتا ہے۔ ایک روایت میں یہ الفاظ ہیں :
” جب کوئی قاضی فیصلہ کرتے ہوئے اجتہاد کرے اور درست فیصلہ کردے تو اسے دواجر ملتے ہیں اور جب وہ فیصلہ کرتے ہوئے غلطی کرجائے تو اسے ایک اجرملتا ہے “۔

4385 ۔ حضرت عبداللہ (رض) ‘ نبی اکرم (صلی اللہ علیہ وآلہ وسلم) کا یہ فرمان نقل کرتے ہیں : جو بھی حاکم لوگوں کے درمیان فیصلے کرتا ہے جب قیامت کے دن اسے زندہ کیا جائے گا تو اسے ایک فرشتہ گدی سے پکڑے گا اور اسے جہنم کے کنارے پرلے جاکرکھڑاکردے گا ‘ پھر جب وہ فرشتہ (اس شخص پر) غصے کے عالم میں اللہ تعالیٰ کی طرف دیکھے گا تو اللہ تعالیٰ فرمائے گا : اسے اس میں پھینک دو ‘ تو وہ فرشتہ اسے جہنم میں پھینک دے گا جس کی گہرائی چالیس برس کی مسافت جتنی ہوگی۔
مسروق نامی راوی بیان کرتے ہیں : میں اگر ایک دن حق کے مطابق فیصلے کرتا ہوں تو یہ میرے نزدیک ایک سو سال تک اللہ کی راہ میں جہاد کرنے سے زیادہ پسندیدہ ہے۔

4386 ۔۔ سیدہ ام سلمہ (رض) بیان کرتی ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : جس شخص کو لوگوں کے درمیان فیصلہ کرنے کی آزمائش میں مبتلا کردیا جائے تو وہ لوگوں کے درمیان انصاف سے کام لے ‘ اپنے طرزعمل میں ‘ اپنے اشارے میں ‘ اپنے بیٹھنے کے طریقے میں (ہر اعتبار سے انصاف سے کام لے) ۔