Sunan Al Daraqutni

اس بارے میں نبی اکرم (صلی اللہ علیہ وآلہ وسلم) سے جو روایات منقول ہیں وہ یہاں ذکر کی گئی ہیں (یہ اصل کتاب میں اضافہ ہے)
4729 ۔ حضرت عبداللہ بن عمر (رض) بیان کرتے ہیں کہ نبی اکرم (صلی اللہ علیہ وآلہ وسلم) نے گھوڑوں کے درمیان دوڑلگوائی تھی اور مقررہ حدتک پہلے پہنچنے والے کو کامیاب قراردیا تھا۔

4730 ۔ حضرت عبداللہ بن عمر (رض) بیان کرتے ہیں کہ نبی اکرم گھوڑوں کو تربیت دلوایا کرتے تھے اور ان کے درمیان مقابلہ کروایا کرتے تھے۔ یہاں پر راوی نے روایت کے الفاظ نقل کرنے میں اختلاف کیا ہے۔

4731 ۔ حضرت عبداللہ بن عمر (رض) بیان کرتے ہیں کہ نبی اکرم (صلی اللہ علیہ وآلہ وسلم) نے تربیت یافتہ گھوڑوں کے درمیان ” حفیاء “ سے لے کر ” ثنیۃ الوداع “ تک دوڑلگوائی تھی اور غیر تربیت یافتہ گھوڑوں کے درمیان ” ثنیۃ الوداع “ سے لے کر مسجد بنوزریق تک دوڑلگوائی تھی۔

4732 ۔ حضرت عبداللہ بن عمر (رض) بیان کرتے ہیں کہ نبی اکرم گھوڑوں کو تربیت دلوایا کرتے تھے ‘ آپ تربیت یافتہ گھوڑوں کا مقابلہ حفیاء سے لے کر ثنیۃ الوداع تک کرواتے تھے اور غیر تربیت یافتہ گھوڑوں کا مقابلہ ثنیۃ الوداع سے لے کر مسجد بنوزریق تک کرواتے تھے۔

4733 ۔ حضرت عبداللہ بن عمر (رض) بیان کرتے ہیں کہ نبی اکرم (صلی اللہ علیہ وآلہ وسلم) نے تربیت یافتہ گھوڑوں کے درمیان ثنیۃ الوداع سے لے کر مسجد بنوزریق تک دوڑکامقابلہ کروایا تھا۔ میرا گھوڑا مجھے لے کر دیوار پرچڑھ گیا تھا۔
سفیان نامی راوی نے یہ بات بیان کی ہے کہ ثنیۃ الوداع سے لے کر حفیاء تک پانچ یاچھ میل کا راستہ ہے ‘ جبکہ ثنیۃ الوداع سے لے کر مسجد بنوزریق تک کا فاصلہ ایک میل تک کا ہے۔ سفیان نامی راوی نے یہ بات بھی بیان کی ہے کہ حفیاء سے لے کر ثنیۃ الوداع تک چھ میل کا فاصلہ ہے اور مسجد بنوزریق تک ایک میل کا فاصلہ ہے۔
ابومسعود نامی راوی نے اپنی روایت میں یہ الفاظ نقل کیے ہیں : آپ (صلی اللہ علیہ وآلہ وسلم) نے غیر تربیت یافتہ گھوڑوں کے درمیان مقابلہ ثنیۃ الوداع سے لے کر مسجد بنوزریق تک کروایا تھا۔
حضرت عبداللہ بن عمر (رض) بیان کرتے ہیں : میں بھی اس دوڑ میں حصہ لینے والوں میں شامل تھا۔

4734 ۔ حضرت عبداللہ بن عمر (رض) بیان کرتے ہیں کہ نبی اکرم (صلی اللہ علیہ وآلہ وسلم) نے گھوڑوں کے درمیان مقابلہ کروایا ‘ آپ نے تربیت یافتہ گھوڑوں کا مقابلہ حفیاء سے لے کر ثنیۃ الوداع تک کروایا اور غیر تربیت یافتہ گھوڑوں کا مقابلہ مسجد بنوزریق سے لے کر ثنیۃ الوداع تک کروایا۔
حضرت عبداللہ (رض) بیان کرتے ہیں : میں بھی ان سواروں میں شامل تھا ‘ میں لوگوں سے آگے نکل گیا تھا اور میرا گھوڑا مجھے لے کر مسجد بنوزریق تک پہنچ گیا تھا۔

4735 ۔ حضرت عبداللہ بن عمر (رض) بیان کرتے ہیں کہ نبی اکرم (صلی اللہ علیہ وآلہ وسلم) نے گھوڑوں کے درمیان دوڑکا مقابلہ کروایا تھا ‘ آپ نے تربیت یافتہ گھوڑوں کی حدحفیاء سے ثنیۃ الوداع تک مقرر کی تھی اور جو غیر تربیت یافتہ گھوڑے تھے ان کی حدثنیۃ الوداع سے لے کر مسجد بنوزریق تک کی تھی۔
حضرت عبداللہ (رض) بیان کرتے ہیں کہ میں آگے نکل گیا تھا اور قریب تھا کہ میرا گھوڑا مجھے لے کر مسجد کی دیوار پرچڑھ جاتا ‘ جو بہت چھوٹی سی تھی۔

4736 ۔ حضرت عبداللہ بن عمر (رض) بیان کرتے ہیں کہ نبی اکرم نے تربیت یافتہ گھوڑوں کے درمیان حفیاء سے لے کر ثنیۃ الوداع تک مقابلہ کروایا ‘ جبکہ غیر تربیت یافتہ گھوڑوں کے درمیان ثنیۃ الوداع سے لے کر مسجد بنوزریق کے درمیان مقابلہ کروایا تھا۔
راوی بیان کرتے ہیں : حضرت عبداللہ بن عمر (رض) بھی ان لوگوں میں شامل تھے جو یہ مقابلہ جیت گئے تھے ‘ روایت کے الفاظ ایک دوسرے کے قریب ہیں۔

4737 ۔ حضرت جابربن عبداللہ (رض) بیان کرتے ہیں کہ نبی اکرم (صلی اللہ علیہ وآلہ وسلم) نے گھوڑوں کے درمیان مقابلہ کروایا تھا ‘ میں بھی ان میں سے ایک گھوڑے پر سوار تھا ‘ نبی اکرم (صلی اللہ علیہ وآلہ وسلم) نے فرمایا : تم مسلسل اس پر غصہ کرتے رہنا یعنی اسے مسلسل چھڑی مارتے رہنا۔

4738 ۔ ابولبیدالمازہ بن زبیدبیان کرتے ہیں کہ میں نے حاجیوں کے گھوڑوں کے درمیان مقابلہ کروایا ‘ حاکم بن ایوب ان دنوں بصرہ کے گورنر تھے ‘ جب ہم لوگ اس دوڑ کے میدان میں پہنچے اور گھوڑے وہاں آگئے تو ہم نے سوچا کہ اگر ہم حضرت انس بن مالک (رض) کے پاس جاکر ان سے اس بارے میں دریافت کرلیتے ہیں ‘ کیا وہ لوگ بھی نبی اکرم (صلی اللہ علیہ وآلہ وسلم) کے زمانے میں اسی طرح دوڑلگوایا کرتے تھے ‘ تو یہ مناسب ہوتا ‘ توہم حضرت انس بن مالک (رض) کی خدمت میں حاضر ہوئے ‘ وہ اپنے محل میں موجود تھے ‘ ہم نے کہا : اے حضرت انس ! کیا آپ لوگ نبی اکرم (صلی اللہ علیہ وآلہ وسلم) کے زمانہ میں گھوڑوں کا مقابلہ کروایا کرتے تھے ؟ تو انھوں نے جواب دیا : جی ہاں ! نبی اکرم (صلی اللہ علیہ وآلہ وسلم) نے اپنے گھوڑے کو مقابلے میں شامل کیا تھا ‘ جس کا نام ” سنجہ “ تھا تو وہ سب سے آگے نکل گیا تھا۔ اس بات پر نبی اکرم (صلی اللہ علیہ وآلہ وسلم) بہت خوش ہوئے تھے اور آپ کو یہ بات بہت پسند آئی تھی۔