Sunan Al Daraqutni

3054 ۔ سیدہ عائشہ صدیقہ (رض) بیان کرتی ہیں : نبی کریم (صلی اللہ علیہ وآلہ وسلم) نے ارشاد فرمایا ہے : کسی بھی مسلمان کو صرف تین صورتوں میں قتل کرنا جائز ہے شادی شدہ زانی کہ اسے سنگسار کردیا جائے گا، وہ شخص جو کسی کو جان بوجھ کر قتل کردے تو بدلے میں اسے بھی قتل کردیا جائے گا، وہ شخص جو اسلام سے نکل جائے اور اللہ اور اس کے رسول کی مخالفت کرے تو اسے قتل کردیا جائے گا، یامصلوب کردیا جائے گا، یاجلاوطن کردیا جائے گا۔

3055 ۔ یہی روایت ایک اور سند کے ہمراہ منقول ہے۔

3056 ۔ یہی روایت بعض دیگراسناد کے حوالے سے بھی منقول ہے ، تاہم اس کے بعض راویوں کے بارے میں کچھ کلام کیا گیا ہے۔

3057 ۔ حضرت عبداللہ (رض) ، نبی کریم (صلی اللہ علیہ وآلہ وسلم) کا یہ فرمان نقل کرتے ہیں : اس ذات کی قسم جس کے علاوہ اور کوئی معبود نہیں ہے ، جو مسلمان اس بات کی گواہی دیتاہو کہ اللہ کے علاوہ اور کوئی معبود نہیں ہے اور میں اللہ کا رسول ہوں ، اس کا خون بہانا ، صرف تین صورتوں میں جائز ہے ، جب وہ اسلام کو ترک کرکے (مسلمانوں کی) جماعت سے الگ ہوجائے ، یاشادی شدہ زانی اور (قاتل یعنی ) جان کے بدلے میں جان۔
یہی روایت ایک اور سند کے ہمراہ سیدہ عائشہ صدیقہ (رض) سے منقول ہے۔

3058 ۔ حضرت عبداللہ (رض) ، نبی کریم (صلی اللہ علیہ وآلہ وسلم) کا یہ فرمان نقل کرتے ہیں : کسی بھی مسلمان کا خون بہانا جائز نہیں ہے (اس کے بعد حسب سابق حدیث ہے) ۔
اعمش کہتے ہیں : میں نے یہ حدیث ابراہیم کو سنائی تو انھوں نے بتایا : اسود نے سیدہ عائشہ صدیقہ (رض) کے حوالے سے مجھے یہ حدیث سنائی ہے ۔
سیدہ عائشہ صدیقہ (رض) ، نبی کریم (صلی اللہ علیہ وآلہ وسلم) کے حوالے سے سابقہ روایت کی مانند نقل کرتی ہیں۔ عبدالرحمن نامی محدث بیان کرتے ہیں : راوی نے ان دونوں روایات کو ایک ساتھ ملادیا ہے ، یعنی مسروق کی حضرت عبداللہ سے نقل کردہ روایت اور ابراہیم کی اسود (کے حوالے سے سیدہ عائشہ صدیقہ (رض) سے) نقل کردہ روایت۔

3059 ۔ سیدہ عائشہ (رض) فرماتی ہیں اس امت سے تعلق رکھنے والے کسی بھی مسلمان کو تین میں سے کسی ایک وجہ سے قتل کیا جاسکتا ہے ، ایک وہ شخص جو کسی کو قتل کرے تو جواب میں سے قتل کیا جائے گا۔ شادی شدہ زانی ، جماعت سے الگ ہونے والے (راوی کو شک ہے شاید یہ الفاظ ہیں) جماعت سے نکلنے والا۔ یہ حدیث موقوف ہے۔

3060 ۔ یہی روایت ایک اور سند کے ہمراہ سیدہ عائشہ (رض) سے منقول ہے۔ یہ روایت موقوف ہے۔

3061 ۔ سیدہ عائشہ صدیقہ (رض) بیان کرتے ہیں : اللہ تعالیٰ عنہا بیان کرتی ہیں : نبی کریم (صلی اللہ علیہ وآلہ وسلم) نے ارشاد فرمایا ہے ، جہاں تک تم سے ہوسکے مسلمانوں سے حدود کو پرے رکھو، اگر تم کسی مسلمان کے لیے کوئی گنجائش پاؤ تو اسے وہ گنجائش فراہم کرو، کیونکہ حاکم (یاقاضی) کا معاف کرنے میں غلطی کرنا اس کے لیے سزا دینے میں غلطی کرنے سے بہتر ہے۔

3062 ۔ حضرت علی (رض) بیان کرتے ہیں : میں نے نبی کریم (صلی اللہ علیہ وآلہ وسلم) کو یہ ارشاد فرماتے ہوئے سنا ہے : حدود کو پرے رکھنے (کی کوشش کرو) ۔

3063 ۔ حضرت عبداللہ بن مسعود (رض) ، حضرت معاذ بن جبل (رض) ، حضرت عقبہ بن عامر جہنی (رض) (یہ تینوں حضرات) فرماتے ہیں : جب حد (ثابت ہونے کا معاملہ ) تمہارے سامنے مشکوک ہوجائے تو جہاں تک تم سے ہوسکے اسے پرے رکھو۔