Sunan Al Daraqutni

3825 ۔ حضرت انس (رض) بیان کرتے ہیں : ایک شخص نے عرض کی : یارسول اللہ ! کیا اللہ تعالیٰ نے یہ ارشاد نہیں فرمایا : طلاق دو مرتبہ ہوتی ہے۔ پھر تیسری کا حکم کیوں ہے ؟ نبی کریم (صلی اللہ علیہ وآلہ وسلم) نے فرمایا (اللہ نے یہ بھی فرمایا ہے ) ۔
'' پھر معروف طریقے سے روکنا ہوگا یا احسان کے ساتھ آزاد کرنا ہوگا۔

3826 ۔ حضرت انس بن مالک (رض) بیان کرتے ہیں : ایک شخص نے نبی کریم (صلی اللہ علیہ وآلہ وسلم) کی خدمت میں عرض کی میں نے اللہ کا یہ فرمان سنا ہے : طلاق دو مرتبہ ہوگی۔ پھر تیسری طلاق کا حکم کہاں سے آگیا ؟ نبی کریم (صلی اللہ علیہ وآلہ وسلم) نے فرمایا (اللہ تعالیٰ نے یہ بھی فرمایا ہے ) ۔
'' پھر معروف طریقے سے روکنا ہوگا، یا احسان کے ساتھ آزاد کرنا ہوگا۔ (اس سے مراد تیسری طلاق ہے ) ۔
راوی نے اسے حضرت انس (رض) کے حوالے سے نقل کیا ہے تاہم درست یہ ہے کہ یہ روایت اسماعیل بن سمیع کے حوالے سے ، ابورزین کے حوالے سے مرسل روایت کے طور پر نبی کریم (صلی اللہ علیہ وآلہ وسلم) سے منقول ہے۔

3827 ۔ حضرت ابن عباس (رض) فرماتے ہیں : طلاق دینے کے چار طریقے ہیں ان میں دوطریقے حلال ہیں اور دوحرام ہیں ۔
ایک حلال طریقہ یہ ہے : آدمی عورت کو اس وقت طلاق دے جب وہ طہر کی حالت میں ہو (اور طہر کے دوران اس شخص نے) اس عورت کے ساتھ صحبت نہ کی ہو (دوسرا طریقہ یہ ہے ) آدمی حاملہ عورت کو اس وقت طلاق دے جب اس کا حمل ظاہر ہوچکاہو۔
(ایک) حرام طریقہ یہ ہے کہ آدمی عورت کو اس وقت طلاق دے جب وہ حیض کی حالت میں ہو۔ (دوسرا حرام طریقہ یہ ہے ) آدمی عورت کو طہر حالت میں اس وقت طلاق دے جب وہ اس کے ساتھ صحبت کر چکاہو، اسے یہ پتہ نہ چل سکے کہ رحم میں بچہ ہے یا نہیں ہے۔

3828 ۔ حضرت عبداللہ (رض) فرماتے ہیں : طلاق دینے کا سنت طریقہ یہ ہے کہ آدمی عورت کے ہر طہر کے دوران اسے ایک طلاق دے جب یہ پورا ہوجائے گا تو یہ وہ عدت ہے جس کے بارے میں اللہ نے حکم دیا ہے۔

3829 ۔ حضرت عبداللہ (رض) فرماتے ہیں : جو شخص سنت کے مطابق طلاق دینا چاہتا ہے وہ عورت کو اس وقت طلاق دے جب وہ طہر کی حالت میں ہو، اور اس شخص نے اس عورت کے ساتھ صحبت نہ کی ہو۔ (اس شخص کو یہ بھی چاہیے کہ وہ طلاق دینے پر کسی کو) گواہ بنالے۔

3830 ۔ حضرت عبداللہ بن عمر (رض) فرماتے ہیں : میں نے اپنی اہلیہ کو طلاق دیدی، وہ عورت اس وقت حیض کی حالت میں تھی ، حضرت عمر (رض) نبی کریم (صلی اللہ علیہ وآلہ وسلم) کی خدمت میں حاضر ہوئے اور آپ سے (اس مسئلہ کے بارے میں ) دریافت کیا نبی کریم (صلی اللہ علیہ وآلہ وسلم) نے فرمایا : اس سے کہو کہ وہ رجوع کرلے جب وہ عورت پاک ہوجائے گی اس وقت اگر چاہے تو اسے طلاق دیدے۔ حضرت عمر (رض) نے عرض کی : کیا آپ اس طلاق کو واقع میں شمار کریں گے ؟ نبی کریم (صلی اللہ علیہ وآلہ وسلم) نے فرمایا جی ہاں۔
حضرت عبداللہ بن عمر (رض) بیان کرتے ہیں : حضرت عمر نے نبی کریم (صلی اللہ علیہ وآلہ وسلم) سے دریافت کیا (اس کے بعد انھوں نے حسب سابق حدیث ذکر کی ) ۔

3831 ۔ سالم اپنے والد (حضرت عبداللہ بن عمر (رض) کے بارے میں نقل کرتے ہیں : انھوں نے نبی کریم (صلی اللہ علیہ وآلہ وسلم) کے زمانہ اقدس میں اپنی اہلیہ کو طلاق دیدی ، جو اس وقت حیض کی حالت میں تھی، حضرت عمر نے نبی کریم (صلی اللہ علیہ وآلہ وسلم) سے یہ مسئلہ دریافت کیا تو نبی کریم (صلی اللہ علیہ وآلہ وسلم) نے شدید ناراضگی کا اظہار کیا، آپ نے فرمایا : اس سے کہو، رکوع کرلے ، اور اس وقت تک اپنے ساتھ رکھے جب تک وہ پاک نہیں ہوجاتی ، اور اس کے بعد ایک اور حیض آنے کے بعد پاک نہیں ہوجاتی، پھرا گروہ چاہے تو طہر کی حالت میں اس سے صحبت کیے بغیر اسے طلاق دیدے یہ اس طریقہ کے مطابق طلاق ہوگی جس کا اللہ نے حکم دیا ہے۔

3832 ۔ حضرت عبداللہ بن عمر (رض) بیان کرتے ہیں : میں نے اپنی بیوی کو طلاق دیدی جو حیض کی حالت میں تھی، حضرت عمر نے نبی کریم (صلی اللہ علیہ وآلہ وسلم) سے اس بات کا ذکر کیا تو نبی کریم (صلی اللہ علیہ وآلہ وسلم) نے ناراضگی کا اظہار کیا، اور فرمایا اس عورت سے وہ رجوع کرلے ، پھرا سے اس وقت تک اپنے ساتھ رکھے جب تک اگلاحیض نہیں آجاتا، جو اس حیض کے علاوہ ہو جس میں اس نے طلاق دی ہے ، پھر اگر اسے مناسب محسوس ہو تو اس عورت کو اس وقت طلاق دے جب وہ اس اگلے حیض سے پاک ہوجائے اور یہ طلاق اس کے ساتھ صحبت کرنے سے پہلے یہ طلاق اس طریقہ کے مطابق ہوگی جس کا اللہ نے حکم دیا ہے ۔
حضرت عبداللہ (رض) نے اس عورت کو ایک طلاق دی تھی ، ان کو یہ طلاق شمار کی گئی تھی پھر حضڑت عبداللہ (رض) نے اس عورت کے ساتھ رجوع کرلیا تھا، جیسا کہ نبی کریم (صلی اللہ علیہ وآلہ وسلم) نے انھیں یہ حکم دیا تھا۔

3833 ۔ یہی روایت ایک اور سند کے ہمراہ بھی منقول ہے ، تاہم اس میں یہ الفاظ ہیں : حضرت عمر (رض) نے اس بات کا تذکرہ نبی کریم (صلی اللہ علیہ وآلہ وسلم) سے کیا تو نبی کریم (صلی اللہ علیہ وآلہ وسلم) نے اس بارے میں ناراضگی کا اظہار کیا۔
صالح نامی راوی نے یہ الفاظ نقل کیے ہیں : نبی کریم (صلی اللہ علیہ وآلہ وسلم) نے حضرت عبداللہ (رض) کے بارے میں ناراضگی کا اظہار کیا (اس کے بعد راوی نے حسب سابق حدیث ذکر کی ہے) ۔

3834 ۔ حضرت عبداللہ بن مسعود (رض) فرماتے ہیں : طلاق دینے کا سنت طریقہ یہ ہے کہ آدمی عورت کو اس وقت طلاق دے جب وہ طہر کی حالت میں ہو، اور (اس طہر کے درمیان آدمی نے) اس کے ساتھ صحبت نہ کی ہو یا پھرا سے اس وقت طلاق دے جب عورت کا حمل ظاہرہوچکاہو۔