Sunan Al Daraqutni

4275 ۔ ابوزبیربیان کرتے ہیں کہ انھوں نے حضرت جابر (رض) سے دریافت کیا : آپ کیا سمجھتے ہیں کہ ایک مرتبہ رضاعت کے ذریعے حرمت ثابت ہوجاتی ہے ؟ انھوں نے جواب دیا : جی ہاں !

4276 ۔ مجاہد بیان کرتے ہیں کہ حضرت علی اور حضرت عبداللہ بن مسعود (رض) یہ فرماتے ہیں : رضاعت تھوڑی ہو یا زیادہ ہو ‘ وہ حرمت کو ثابت کردیتی ہے۔

4277 ۔ حضرت ابوہریرہ (رض) ‘ نبی اکرم (صلی اللہ علیہ وآلہ وسلم) کا یہ فرمان نقل کرتے ہیں ‘ جبکہ سیدہ عائشہ نے بھی نبی اکرم (صلی اللہ علیہ وآلہ وسلم) کا یہ فرمان نقل کیا ہے ‘ ان میں سے ایک کے الفاظ یہ ہیں :” ایک مرتبہ یادومرتبہ چوسنے سے حرمت ثابت نہیں ہوتی “۔ دوسرے راوی نے یہ الفاظ نقل کیے ہیں :” ایک مرتبہ منہ میں لینے یادومرتبہ منہ میں لینے سے حرمت ثابت نہیں ہوتی “۔

4278 ۔ ابوموسیٰ ہلالی اپنے والد کا یہ بیان نقل کرتے ہیں کہ ایک مرتبہ ایک شخص سفرکررہا تھا ‘ اس کی بیوی نے ایک بچے کو جنم دیا ‘ لیکن اس عورت کا دودھ جاری نہیں ہوا۔ اس شخص کو اس عورت کی طرف سے اندیشہ ہوا تو اس نے اس عورت کی چھاتی کو چوسنا شروع کیا جس کی وجہ سے دودھ اس کے حلق تک پہنچ گیا ‘ اس نے حضرت ابوموسیٰ اشعری (رض) سے اس بارے میں دریافت کیا تو حضرت ابوموسیٰ اشعری (رض) نے فرمایا : وہ عورت تم پر حرام ہوگئی ہے ‘ پھر وہ حضرت عبداللہ بن مسعود (رض) کے پاس آیا ‘ ان سے اس بارے میں دریافت کیا تو انھوں نے بتایا کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : وہی رضاعت حرمت کو ثابت کرتی ہے جو گوشت پیداکرے اور ہڈیوں کی نشوونماکاباعث بنے (یعنی جو کم عمری میں ہو) ۔

4279 ۔ حضرت زید بن ثابت (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : ایک مرتبہ یادومرتبہ (ایک گھونٹ) پی لینے سے حرمت ثابت نہیں ہوتی۔

4280 ۔ حضرت ابوہریرہ (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : ایک مرتبہ یادومرتبہ چوس لینے سے حرمت ثابت نہیں ہوتی۔ حرمت اس کے ذریعے ثابت ہوتی ہے جو انتڑیوں کو سیراب کردے۔
ابراہیم بیان کرتے ہیں کہ میں نے یہ روایت سعید بن مسیب کے سامنے ذکر کی تو وہ بولے : جب دودھ کا ایک قطرہ بھی بچے کے پیٹ تک پہنچ جائے جبکہ وہ ابھی چھوٹا ہو ‘ تو اس کے لیے حرمت ثابت ہوجاتی ہے۔
جبکہ عثمان نامی راوی نے یہ الفاظ نقل کیے ہیں کہ صرف اسی کے ذریعے حرمت ثابت ہوتی ہے جو دودھ انتڑیوں کو سیراب کردے۔ انھوں نے اس کے علاوہ اور کوئی لفظ نقل نہیں کیا۔

4281 ۔ حضرت عبداللہ بن مسعود (رض) کے صاحبزادے بیان کرتے ہیں : ایک مرتبہ ایک شخص کے ساتھ اس کی بیوی سفر کررہی تھی ‘ اس عورت نے بچے کو جنم دیا۔ وہ بچہ دودھ نہیں چوس سکاتو اس عورت کے شوہرنے اس عورت کے دودھ کو چوسناشروع کیا ‘ یہاں تک کہ اسے اس دودھ کا ذائقہ اپنے حلق میں محسوس ہوا ‘ وہ حضرت ابوموسیٰ اشعری (رض) کی خدمت میں حاضرہوا اور ان کے سامنے اس بات کا تذکرہ کیا تو انھوں نے فرمایا : تمہاری بیوی تمہارے لیے حرام ہوگئی ہے۔ پھر وہ شخص حضرت عبداللہ بن مسعود (رض) کے پاس آیا ‘ پھر حضرت عبداللہ بن مسعود (رض) ‘ حضرت ابوموسیٰ اشعری (رض) کے پاس آئے اور بولیـ: آپ نے یہ ‘ یہ فتوی دیا ہے ‘ جبکہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : رضاعت وہی ہوتی ہے جو ہڈی کو مضبوط کرتی ہے اور گوشت کو پیدا کرتی ہے۔

4282 ۔ ابوعطیہ بیان کرتے ہیں : ایک شخص حضرت ابوموسیٰ اشعری (رض) کے پاس آیا اور بولا : میری بیوی کی چھاتی میں ورم آگیا تھا ‘ میں نے اسے چوساتو میرے حلق میں تھوڑسادودھ چلا گیا تو حضرت ابوموسیٰ اشعری (رض) نے اسے سخت ڈانٹا ‘ پھر وہ شخص حضرت عبداللہ بن مسعود (رض) کے پاس آیا تو انھوں نے دریافت کیا : کیا تم نے میرے علاوہ بھی کسی سے یہ مسئلہ دریافت کیا ہے ؟ اس نے جواب دیا : جی ہاں ! حضرت ابوموسیٰ (رض) سے بیان کیا ہے اور انھوں نے مجھے اس بارے میں سخت ڈانٹا ہے ‘ تو حضرت عبداللہ بن مسعود (رض) ‘ حضرت ابوموسیٰ اشعری (رض) کے پاس آئے اور بولے : کیا یہ شخص دودھ پینے والابچہ ہے ؟ حضرت ابوموسیٰ اشعری (رض) نے فرمایا : جب تک اتنے بڑے عالم تمہارے درمیان موجود ہیں تم لوگ مجھ سے کوئی مسئلہ نہ پوچھا کرو۔

4283 ۔ حضرت عبداللہ بن مسعود (رض) فرماتے ہیں : دو سال گزرجانے کے بعد رضاعت کا اعتبار نہیں ہوتا۔

4284 ۔ حضرت عبداللہ بن عباس (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : دو سال کے اندر جو ہو صرف وہی رضاعت معتبر ہوتی ہے۔