٥٦٢٣: عبیداللہ بن ابی یزید نے ابن عباس (رض) سے انھوں نے اسامہ بن زید (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے فرمایا سود ادھار میں ہے۔
تخریج : مسلم فی المساقاۃ ١٠١؍١٠٢‘ نسائی فی البیوع باب ٥٠‘ ابن ماجہ فی التجارات باب ٤٩‘ دارمی فی البیوع باب ٤٢‘ مسند احمد ٥‘ ٢٠٢؍٢٠٦‘ ٢٠٩۔

٥٦٢٤: عمرو بن دینار نے ابن عباس (رض) سے انھوں نے اسامہ بن زید (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے اسی طرح فرمایا ہے۔

٥٦٢٥: عکرمہ نے ابن عباس (رض) سے انھوں نے اسامہ بن زید (رض) سے روایت کی کہ جناب رسول اللہ (صلی اللہ علیہ وآلہ وسلم) نے فرمایا صرف قرض میں سود ہے۔

٥٦٢٦: عطاء کہتے ہیں کہ ابو سعید خدری (رض) کی ابن عباس (رض) سے ملاقات ہوئی تو انھوں نے پوچھا بیع صرف میں تم کیا کہتے ہو۔ جبکہ درمیان میں اضافہ لیا جائے کیا تم نے جناب رسول اللہ (صلی اللہ علیہ وآلہ وسلم) سے کوئی بات سنی یا کتاب اللہ میں کوئی چیز پائی ؟ تو ابن عباس (رض) کہنے لگے کتاب اللہ میں میں اس کے متعلق میں کوئی چیز نہیں جانتا البتہ جناب رسول اللہ (صلی اللہ علیہ وآلہ وسلم) سے تم مجھ سے زیادہ جانتے ہو۔ لیکن میں نے اسامہ بن زید سے سنا کہ جناب رسول اللہ (صلی اللہ علیہ وآلہ وسلم) نے فرمایا بیشک سود قرض میں ہے۔
تخریج : مسلم فی المساقات ١٠٤‘ دارمی فی البیوع باب ٤٢‘ مسند احمد ٥‘ ٢٠٦؍٢٠٩۔

٥٦٢٧: عطا بن یسار نے ابو سعید خدری سے نقل کیا کہ میں نے ابن عباس (رض) سے پوچھا دو دینار کی بیع ایک دینار کے بدلے دو درہم کی بیع ایک درہم کے بدلے کیا درست خیال کرتے ہو میں گواہی دیتا ہوں کہ میں نے جناب رسول اللہ (صلی اللہ علیہ وآلہ وسلم) کو فرماتے سنا دینار کے بدلے دینار اور درہم کے بدلے درہم بلاتفاضل (اضافہ) درست ہے۔
ابن عباس (رض) کہنے لگے کیا تم نے یہ جناب رسول اللہ (صلی اللہ علیہ وآلہ وسلم) سے خود سنا ہے میں نے کہا۔ جی ہاں۔ وہ کہنے لگے میں نے یہ نہیں سنا۔ مجھے تو اسامہ نے وہ بات بتلائی۔ ابو سعید کہتے ہیں ابن عباس (رض) نے اس بات سے رجوع کرلیا۔
تخریج : بخاری فی البیوع باب ٧٩‘ مالک فی البیوع ٧٩‘ مسلم فی المساقات ٨٥؍٨٦‘ نسائی فی البیوع باب ٤٥؍٤٦‘ ابن ماجہ فی التجارات باب ٤٨؍٥٠‘ مالک فی البیوع ٢٩؍٣١‘ مسند احمد ٢‘ ٣٧٩؍٤٨٥۔

٥٦٢٨: ابو صالح سمان کہتے ہیں کہ میں نے ابو سعید خدری (رض) سے کہا تم بیع صرف میں تفاضل کو روکتے ہو اور ابن عباس (رض) اس کی اجازت دیتے ہیں۔ تو ابو سعید کہنے لگے میں ابن عباس (رض) سے ملا اور میں نے ان سے پوچھا تم بیع صرف میں تفاضل کا جو فتویٰ دیتے ہو اس کی کیا حقیقت ہے ؟ کیا تم نے کتاب اللہ میں کوئی چیز پائی یا جناب رسول اللہ (صلی اللہ علیہ وآلہ وسلم) سے کچھ سنا ہے ؟ تو وہ کہنے لگے تمہیں جناب رسول اللہ (صلی اللہ علیہ وآلہ وسلم) کی مجھ سے زیادہ صحبت حاصل ہے میں قرآن مجید میں تو وہی پڑھتا ہوں جو تم پڑھتے ہو لیکن اسامہ بن زید نے مجھے بیان کیا کہ جناب رسول اللہ (صلی اللہ علیہ وآلہ وسلم) نے فرمایا ربا صرف قرض میں ہے۔ امام طحاوی (رح) کہتے ہیں : بعض لوگوں کا خیال یہ ہے کہ سونا ‘ سونے کے بدلے اور چاندی چاندی کے بدلے دو مثل ایک مثل کے بدلے لے سکتے ہیں جبکہ نقد ہو۔ انھوں نے اسامہ بن زید (رض) کی اس روایت کو دلیل بنایا ہے۔ چاندی چاندی کے بدلے اور سونا سونے کے بدلے برابر برابر اور دست بدست لے دے سکتے ہیں۔ فریق اوّل کے مؤقف کا جواب یہ ہے کہ ابن عباس (رض) کی یہ روایت جس کو اسامہ بن زید (رض) سے روایت کیا گیا اس سے قرآن مجید میں مذکور ربا مراد ہے جس کی اصل ادھار پر تھی اور اس کی مثال اس طرح ہے کہ کسی آدمی کا اپنے ساتھی پر قرض ہوتا وہ اسے کہتا تم مجھے قرض کے سلسلہ میں اتنی اتنی مہلت اتنے دراہم کے بدلے میں دے دو جو تمہارے قرض میں شامل کردیئے جائیں گے۔ تو گویا وہ وقت مال کے بدلے خریدتا۔ پس جناب باری تعالیٰ نے اس سے منع کرتے ہوئے فرمایا ” یا ایہا الذین امنوا اتقوا اللہ وذروا مابقی من الربوا ان کنتم مؤمنین “ (البقرہ۔ ٢٧٨) پھر سنت نے اس کے بعد تفاضل میں ربا کو حرام قرار دیا۔ سونا بدلے سونے کے اور چاندی کے بدلے چاندی اور تمام مکیلی اور موزونی اشیاء میں تفاضل کو حرام قرار دیا گیا جیسا کہ عبادہ بن صامت (رض) نے جناب رسول اللہ (صلی اللہ علیہ وآلہ وسلم) سے روایت نقل کی ہے جو کہ باب ” بیع الحنطۃ بالشعیر “ میں گزری یہ وہ ربا ہے جس کو سنت سے حرام کیا اور اس سلسلہ میں متواتر روایات جناب رسول اللہ (صلی اللہ علیہ وآلہ وسلم) سے مروی ہوئیں جن سے حجت قائم ہوگئی۔ اب رہی یہ بات کہ اس کا کیا ثبوت ہے کہ ان روایات میں جس رباء کی حرمت کا تذکرہ ہے وہ ابن عباس (رض) عن اسامہ بن زید (رض) سے منقول روایت والے ربا سے الگ ہے۔ ابن عباس (رض) کا ابو سعید کی بات سن کر رجوع کرنا۔ اگر وہ روایات جو ابو سعید (رض) نے بیان کی اور اسامہ بن زید (رض) کی روایت کا ایک مفہوم ہوتا تو وہ ان کے ہاں اسامہ بن زید کی روایت سے مقدم نہ ہوتی مگر ان کو اس ربا کی حرمت کا اس وقت تک علم نہ تھا یہاں تک کہ ابو سعید (رض) نے ان کو روایت بیان کی۔ پس انھوں نے معلوم کرلیا کہ اسامہ (رض) کی روایت میں مذکور ربا اس سے مختلف ہے جو ابو سعید (رض) کی روایت میں وارد ہے جو کہ جناب نبی اکرم (صلی اللہ علیہ وآلہ وسلم) سے مروی ہے۔

٥٦٢٩: مالک بن ابی عامر نے عثمان بن عفان (رض) سے روایت کی جناب رسول اللہ (صلی اللہ علیہ وآلہ وسلم) نے فرمایا ایک دینار کو دو دینار کے بدلے اور ایک درہم کو دو دراہم کے بدلے مت فروخت کرو۔
تخریج : بخاری فی البیوع باب ٧٩‘ مسلم فی المساقاۃ ٧٨‘ نسائی فی البیوع باب ٤٥‘ ٤٦ مالک فی البیوع ٣٢‘ مسند احمد ٢؍١٠٩‘ ٥؍٢٠٦۔

٥٦٣٠: مجاہد مکی کہتے ہیں کہ ایک زرگر نے عبداللہ بن عمر (رض) سے سوال کیا میں (سونا ‘ چاندی) پگھلاتا ہوں پھر اس میں سے کچھ زیادہ وزن کے بدلے فروخت کرتا ہوں اور اپنے کام و محنت کی مقدار سے زائد لیتا ہوں جناب عبداللہ نے اس کو منع کیا۔ زرگر سوال دھراتا رہا اور آپ انکار فرماتے رہے۔ یہاں تک کہ ابن عمر (رض) مسجد کے دروازے یا اپنے سواری کے جانور تک پہنچ گئے عبداللہ نے اسے فرمایا ۔ دینار کے بدلے دینار۔ درہم بدلے درہم کے ان میں تفاضل جائز نہیں یہ جناب رسول اللہ (صلی اللہ علیہ وآلہ وسلم) نے ہم سے عہد لیا اور ہم تم سے عہد کر رہے ہیں۔
تخریج : مالک فی البیوع ٣١۔

٥٦٣١: مسلم مکی نے ابوالاشعث صنعانی سے روایت کی ہے کہ وہ عبادہ کے اس خطبہ میں موجود تھے انھوں نے جناب نبی اکرم (صلی اللہ علیہ وآلہ وسلم) سے بیان کیا کہ آپ نے فرمایا سونا سونے کے بدلے برابر وزن سے اور چاندی چاندی کے بدلے برابر وزن سے اور گندم کا ماپ گندم کے برابر ناپ کر اور جو جو کے بدلے برابر ماپ سے اور جو کھجور کے بدلے اور کھجور زیادہ ہو جبکہ دست بدست ہو اور کھجور کھجور کے بدلے اور نمک نمک کے بدلے برابر وزن سے دیا جائے جس نے زیادہ لیا یا زیادہ طلب کیا اس نے سود کا کام کیا۔
تخریج : مسلم فی المساقات ٨٠‘ ٨٢‘ ترمذی فی البیوع باب ٢٣‘ نسائی فی البیوع باب ٤٢‘ ٤٣‘ دارمی فی البیوع باب ٤١‘ مسند احمد ٥؍٢٧١‘ ٣٢٠۔

٥٦٣٢: ابوالاشعث نے عبادہ بن صامت (رض) سے روایت کی ہے کہ میں نے جناب رسول اللہ (صلی اللہ علیہ وآلہ وسلم) کو فرماتے سنا سونا سونے کے بدلے برابر وزن سے اور چاندی چاندی کے بدلے برابر وزن سے اور گندم گندم کے بدلے برابر سرابر اور جو جو کے بدلے برابر مقدار سے اور کھجور کھجور کے بدلے برابر برابر اور نمک نمک کے بدلے برابر سرابر لیا جائے جس نے اضافہ کیا یا بڑھایا اس نے سود کا کیا کیا۔
تخریج : مسند احمد ٥‘ ٣١٤؍٣٢٠۔

٥٦٣٣: ابن بریدہ نے اپنے والد سے انھوں نے جناب نبی اکرم (صلی اللہ علیہ وآلہ وسلم) سے روایت کی ہے کہ آپ کو کھجوروں کی طلب ہوئی تو بعض ازواج نے کھجوریں بھیجیں میرے خیال میں وہ امّ المؤمنین امّ سلمیٰ ہیں انھوں نے دو صاع کھجور بھیج کر ایک صاع عجوہ منگوائی۔ جب جناب رسول اللہ (صلی اللہ علیہ وآلہ وسلم) نے اس کو دیکھا تو اس کو عجیب خیال کر کے فرمایا تمہارے ہاں یہ کہاں سے آئیں ؟ انھوں نے کہا ہم نے دو صاع کھجور بھیج کر یہ ایک صاع منگوائی ہے آپ نے فرمایا اس کو واپس کر دو ۔ مجھے ان کی ضرورت نہیں۔ (استعمال نہیں فرمائی)

٥٦٣٤: نافع کہتے ہیں کہ ابن عمر (رض) رافع بن خدیج (رض) کے ہاں گئے تاکہ ان سے بیع صرف کے سلسلے میں پہنچنے والی روایت کے متعلق دریافت کریں رافع کے ہاں پہنچ کر پوچھا تو رافع (رض) کہنے لگے میرے ان دونوں کانوں نے یہ بات سنی ہے اور میری ان آنکھوں نے دیکھا کہ جناب رسول اللہ (صلی اللہ علیہ وآلہ وسلم) فرما رہے تھے ایک دینار کو دوسرے دینار پر ایک درہم کو دوسرے درہم پر وزن کے اعتبار سے فضیلت مت دو اور سونے چاندی غیر موجود کو نقد کے بدلے مت فروخت کرو۔ خواہ وہ خریدار تم سے دروازے کے اندر گھسنے کی مہلت مانگے۔
تخریج : مالک فی البیوع ٣٤‘ ٣٥۔
لغات : لاتشفوا۔ اضافہ کرنا۔ ناجز۔ موجود۔

٥٦٣٥: نافع کہتے ہیں کہ میں عبداللہ بن عمر (رض) کے ساتھ ابو سعید (رض) کے ہاں گیا پھر اسی طرح کی روایت نقل کی ہے البتہ استنظرک سے آخر تک نقل نہیں کیا۔
تخریج : بخاری فی البیوع باب ٧٨‘ مسلم فی المساقاۃ ٧٥؍٧٦‘ نسائی فی البیوع باب ٤٧‘ ترمذی فی البیوع باب ٢٤‘ مالک فی البیوع ٣٠؍٣٤‘ مسند احمد ٣؍٤‘ ٥١؍٥٣‘۔

٥٦٣٦: حماد بن سلمہ نے عبیداللہ سے پھر انھوں نے اپنی اسناد سے اسی طرح روایت نقل کی ہے۔

٥٦٣٧: حکیم بن جابر نے عبادہ بن صامت (رض) سے روایت کی ہے کہ میں نے جناب رسول اللہ (صلی اللہ علیہ وآلہ وسلم) کو فرماتے سنا۔ سونا سونے کے بدلے برابر برابر پلڑا پلڑے کے برابر اور چاندی بدلے چاندی کے برابر ‘ پلڑا برابر پلڑے کے۔ گندم بدلے گندم کے برابرسرابر دست بدست ‘ اور جو بدلے جو کے برابرسرابر نقد و نقد اور کھجور بدلے کھجور کے برابر برابر دست بدست لیا دیا جائے یہاں تک کہ نمک کا بھی ذکر کیا۔
لغات : الکفۃ۔ پلڑا۔
تخریج : نسائی فی البیوع باب ٤٤۔

٥٦٣٨: ابو صالح نے ابو سعید خدری (رض) سے کہ جناب رسول اللہ (صلی اللہ علیہ وآلہ وسلم) نے فرمایا سونا بدلے سونے کے اور چاندی بدلے چاندی کے مت فروخت کرو مگر برابر وزن پورا پورا۔
تخریج : بخاری فی البیوع باب ٧٧؍٧٨‘ مسلم فی المساقاۃ ٧٥؍٧٧‘ ابو داؤد فی البیوع باب ١٣‘ ترمذی فی البیوع باب ٢٤‘ نسائی فی البیوع باب ٤٧؍٥٠‘ مالک فی البیوع ٣٠؍٣٤‘ مسند احمد ٣‘ ٤؍٩‘ ٦؍٢٢۔

٥٦٣٩: نافع نے ابن عمر (رض) سے انھوں نے ابو سعید خدری (رض) سے جناب رسول اللہ (صلی اللہ علیہ وآلہ وسلم) سے نقل کیا کہ درہم بدلے درہم کے نہ اضافہ نہ کمی ‘ دینار بدلے دینار کے ایک دوسرے پر فضیلت مت دو اور نہ ہی عیب والے کو بےعیب کے بدلے میں فروخت کرو۔
تخریج : بخاری فی البیوع باب ٧٨‘ مسلم فی المساقات ٧٥؍٧٦‘ نسائی فی البیوع باب ٤٧‘ مالک فی البیوع ٣٠‘ مسند احمد ٣؍٤‘ ٥١؍٦١۔

٥٦٤٠‘ حضرت ابوسعید خدری (رض) سے اسی کی مثل منقول ہے۔
تخریج : بخاری فی الاعتصام باب ٢٠‘ البیوع باب ٨٩‘ ولوکالۃ باب ٣‘ والمغازی باب ٣٩‘ مسلم فی المساقاۃ ٩٤؍٩٥‘ نسائی فی البیوع باب ٤٠‘ مالک فی البیوع ٢١۔

٥٦٤١: سعید بن المسیب نے ابو سعید خدری اور ابوہریرہ (رض) سے روایت کیا کہ جناب رسول اللہ (صلی اللہ علیہ وآلہ وسلم) نے ایک آدمی کو خیبر پر عامل بنایا وہ جنیب نامی کھجور لایا تو آپ نے پوچھا کیا تمام خیبر کی کھجوریں ایسی ہیں اس نے کہا نہیں اللہ کی قسم یارسول اللہ (صلی اللہ علیہ وآلہ وسلم) ! ہم دو صاع دے کر یہ کھجور ایک صاع اور دو صاع تین صاع دوسری کھجور دے کرلے لیتے تھے۔ تو جناب رسول اللہ (صلی اللہ علیہ وآلہ وسلم) نے فرمایا آئندہ ایسا مت کرو۔ بلکہ تمام کھجور دراہم کے بدلے فروخت کرو اور پھر دراہم سے جنیب خرید لو۔

٥٦٤٢: عبداللہ بن حنین بیان کرتے ہیں کہ ایک عراقی ابن عمر (رض) سے کہنے لگا کہ ابن عباس (رض) نے کہا جبکہ وہ ہم پر گورنر تھے کہ جو ایک درہم کو بدلے سو درہم دے اس کو لے لو۔ ابن عمر (رض) کہنے لگے میں نے عمر بن خطاب (رض) سے سنا کہ رسول اللہ (صلی اللہ علیہ وآلہ وسلم) نے فرمایا سونے کے بدلے سونا وزن کر کے برابر دو ۔ جس نے اضافہ کیا اس نے ربا کا معاملہ کیا۔ ابن عمر (رض) کہنے لگے اگر تمہیں پھر بھی شک ہے تو ابو سعید خدری (رض) سے اس کے متعلق دریافت کرلو۔ اس نے ابو سعید سے پوچھا تو انھوں نے بتلایا کہ میں نے یہ جناب رسول اللہ (صلی اللہ علیہ وآلہ وسلم) سے سنا ہے ابن عباس (رض) کو ابن عمر (رض) کی یہ بات نقل کی تو انھوں نے فوراً اللہ تعالیٰ سے استغفار کی اور کہا وہ بات میں نے اپنی رائے سے کہی تھی۔

٥٦٤٣: ابو نضرہ بیان کرتے ہیں کہ ابو سعید نے بیان کیا کہ ایک آدمی جناب رسول اللہ (صلی اللہ علیہ وآلہ وسلم) کی خدمت میں کھجور لے کر حاضر ہوا آپ نے اس پر تعجب کرتے ہوئے فرمایا تمہارے پاس یہ کیسے آئیں اس نے کہا میں نے یہ دو صاع کے بدلے خریدی ہیں۔ تو نے بڑھا کر سود کا معاملہ کیا یا تو نے سود والا معاملہ بڑھا کر کیا۔
تخریج : مسلم فی المساقاۃ ٩٩‘ مسند احمد ٣؍٦٠۔

٥٦٤٤: سعید بن المسیب نے ابو سعید خدری (رض) سے روایت کی ہے کہ آپ کے پاس سیرابی والے درخت کی کھجور لائی گئیں اور آپ کی کھجور بارانی درخت کی تھیں آپ نے فرمایا تمہیں یہ کیسے میسر آئیں ؟ انھوں نے کہا یارسول اللہ (صلی اللہ علیہ وآلہ وسلم) ہم نے دو کھجور کے بدلے ایک صاع لی ہیں تو آپ نے فرمایا ایسا مت کرو بلکہ اپنی کھجور فروخت کر کے اس سے یہ خرید لو۔
تخریج : نسائی فی البیوع باب ٤٠۔
لغات : البعل۔ بارانی کھجور۔ ریان۔ پانی سے سینچا ہوا۔

٥٦٤٥: ابو سلمہ بن عبدالرحمن نے ابو سعید خدری (رض) سے روایت کی کہ جناب رسول اللہ (صلی اللہ علیہ وآلہ وسلم) نے فرمایا ایک دینار کے بدلے ایک دینار اور ایک درہم کے بدلے ایک درہم اور کھجور کا صاع ایک صاع کے بدلے اور گندم کا صاع ایک صاع گندم کے بدلے اور جو کا صاع ایک صاع جو کے بدلے ان اشیاء میں باہمی اضافہ جائز نہیں۔

٥٦٤٦: عقبہ بن عبدالغافر نے ابو سعید خدری (رض) سے روایت کی ہے کہ جناب نبی اکرم (صلی اللہ علیہ وآلہ وسلم) نے فرمایا ایک صاع کھجور دو صاع کھجور کے بدلے اور نہ ایک صاع گندم دو صاع گندم کے بدلے اور نہ ایک درہم دو درہم کے بدلے فروخت کیا جائے۔

٥٦٤٧: مسروق نے حضرت بلال (رض) سے روایت کی ہے کہ میرے پاس کچھ کھجوریں جناب رسول اللہ (صلی اللہ علیہ وآلہ وسلم) کے لیے رکھی تھیں میں نے اس سے عمدہ پائیں جو ایک صاع دو صاع کے بدلے ملتی تھیں میں نے وہ خرید لیں اور ان کو آپ کی خدمت میں لایا تو آپ نے پوچھا اے بلال یہ کہاں سے لائے ہو ؟ میں نے کہا میں نے خریدی ہیں دو صاع دے کر ایک صاع لیا آپ نے فرمایا انھیں واپس کر دو اور ہماری کھجوریں ہمیں لوٹا دو ۔

٥٦٤٨: حنش بن عبداللہ سبائی نے فضالہ بن عبید (رض) سے نقل کیا کہ ہم جناب رسول اللہ (صلی اللہ علیہ وآلہ وسلم) کے ساتھ خیبر میں یہود سے خریدو فروخت کر رہے تھے ایک اوقیہ سونا دے کر دو دینار اور تین دینار لے رہے تھے۔ تو جناب رسول اللہ (صلی اللہ علیہ وآلہ وسلم) نے فرمایا سونے کو سونے کے بدلے برابر وزن سے فروخت کرسکتے ہیں۔

٥٦٤٩: عبدالرحمن بن ابی بکرہ نے اپنے والد سے نقل کیا کہ جناب رسول اللہ (صلی اللہ علیہ وآلہ وسلم) نے ہمیں چاندی کو چاندی کے بدلے اور سونے کو سونے کے بدلے برابر برابر فروخت کا حکم فرمایا اور سونے کو چاندی اور چاندی کو سونے کے بدلے کم زیادہ جس طرح چاہیں فروخت کی اجازت دی۔

٥٦٥٠: حنش صنعانی رویفع بن ثابت (رض) سے غزوہ اناس میں مغرب سے پہلے یہ بات بیان کر رہے تھے کہ جناب رسول اللہ (صلی اللہ علیہ وآلہ وسلم) نے غزوہ خیبر میں فرمایا مجھے یہ اطلاع ملی ہے کہ تم ایک مثقال کی فروخت نصف اور ثلثین سے کرتے ہو اور یہ اسی صورت میں درست ہے جبکہ مثقال مثقال کے بدلے اور وزن وزن کے ساتھ برابر ہو۔

٥٦٥١: سعید بن بشار نے ابوہریرہ (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے فرمایا دینار دینار کے بدلے ہے ان میں باہمی تفاضل نہیں اور درہم درہم کے بدلے ان میں بھی کوئی اضافہ نہیں (لیا جاسکتا)

٥٦٥٢: زہیر بن محمد نے موسیٰ بن ابی تمیم سے پھر انھوں نے اپنی اسناد سے اسی طرح روایت نقل کی ہے۔ امام طحاوی (رح) فرماتے ہیں : ان آثار متواترہ سے یہ بات ثابت ہوگئی کہ چاندی کی بیع چاندی کے بدلے اور سونے کی بیع سونے کے بدلے تفاضل کی صورت میں ممنوع ہے تمام مکیلی و موزونی اشیاء جن کا آثار میں تذکرہ ہوا ان کا یہی حکم ہے۔ پس ان پر عمل کرنا اسامہ (رض) کی روایت پر عمل سے اولیٰ ہے اور یہ بھی ممکن ہے کہ روایت اسامہ کی وہ تاویل کرلی جائے جو ہم نے اسی باب میں ذکر کی ہے۔ پھر یہ اصحاب رسول (صلی اللہ علیہ وآلہ وسلم) ہیں جو آپ کے بعد اسی طرف گئے ہیں جو ان متواتر روایات میں جناب رسول اللہ (صلی اللہ علیہ وآلہ وسلم) سے وارد ہوا ہے۔
امام طحاوی (رح) فرماتے ہیں : ان آثار متواترہ سے یہ بات ثابت ہوگئی کہ چاندی کی بیع چاندی کے بدلے اور سونے کی بیع سونے کے بدلے تفاضل کی صورت میں ممنوع ہے تمام مکیلی و موزونی اشیاء جن کا آثار میں تذکرہ ہوا ان کا یہی حکم ہے۔ پس ان پر عمل کرنا اسامہ (رض) کی روایت پر عمل سے اولیٰ ہے اور یہ بھی ممکن ہے کہ روایت اسامہ کی وہ تاویل کرلی جائے جو ہم نے اسی بات میں ذکر کی ہے۔

٥٦٥٣: جبلہ بن سحیم نے نقل کیا کہ میں نے ابن عمر (رض) کو حضرت عمر (رض) کا خطبہ نقل کرتے سنا تم میں کوئی ایک دینار کے بدلے دو دینار اور نہ ایک درہم کے بدلے دو درہم اور نہ ایک قفیز کے بدلے دو قفیز خریدے۔ مجھے اس میں تمہارے متعلق سود کا خطرہ ہے جو ایسا فعل کرتے پکڑا گیا اس کو مالی اور جانی سزا دی جائے گی۔
لغات : الرماء۔ الرباء۔ دونوں کا معنی سود ہے۔ النہایہ۔
تخریج : مالک فی البیوع ٣٤؍٣٥‘ مسند احمد ٢؍١٠٩‘ ٤؍٤۔

٥٦٥٤: ابن عمر (رض) کہتے ہیں حضرت عمر (رض) نے اعلان کیا کہ کوئی تم میں ایک کے بدلے دو درہم نہ لے مجھے تمہارے متعلق اس میں سود کا خطرہ ہے۔
تخریج : مسند احمد ٢؍١٠٩‘ ٤؍٤۔

٥٦٥٥: ابن عمر (رض) بیان کرتے ہیں کہ حضرت عمر (رض) نے خطبہ میں فرمایا سونے کو سونے کے بدلے مت فروخت کرو اور اسی طرح چاندی کو چاندی کے بدلے مت فروخت کرو مگر جب دونوں برابر ہوں ایک کو دوسرے پر اضافہ مت دو ۔ مجھے اس کے متعلق رباء کا خطرہ ہے۔

٥٦٥٦: نافع نے ابن عمر (رض) سے انھوں نے حضرت عمر (رض) سے اسی طرح روایت کی ہے۔ یہ عمر بن خطاب (رض) منبر پر سرعام خطبہ دے رہے ہیں اور مجمع میں صحابہ کرام موجود ہیں ان میں سے کوئی اس کا انکار نہیں کرتا یہ دلیل ہے کہ وہ سب اس پر متفق ہیں۔

٥٦٥٧: ابو قیس مولیٰ عمرو بن العاص نے بیان کیا کہ حضرت ابوبکر (رض) نے لشکر کے سپہ سالاروں کو لکھا جبکہ وہ شام سے واپس لوٹے۔ امابعد ! تم سودی علاقہ میں گئے ہو سونے کو سونے کے بدلے برابر وزن سے خریدو فروخت کرو اور چاندی کو چاندی کے بدلے مساوی وزن سے بیچو۔ اسی طرح غلہ غلے کے بدلے برابر کیل سے فروخت کرو۔ ابو قیس راوی کہتے ہیں کہ میں نے خود ان کا خط پڑھا ہے۔

٥٦٥٨: ابو صالح سمان کہتے ہیں کہ میں حضرت علی (رض) کے ہاں بیٹھا تھا کہ ان کی خدمت میں ایک آدمی آ کر دریافت کرنے لگا کہ میرے پاس دراہم ہوتے ہیں وہ میری حاجت میں خرچ نہیں ہوتے کیا میں ان کے بدلے دوسرے دراہم خرید لوں تو یہ جائز ہوگا اور ان میں اپنی مرضی سے کم کر دوں۔ آپ نے فرمایا اپنے دراہم کے بدلے سونا خریدو پھر اس کی چاندی خرید کر جہاں چاہو خرچ کرو۔

٥٦٥٩: شریح نے عمر (رض) سے نقل کیا کہ درہم کے بدلے درہم ان میں اضافہ لینا سود ہے ابو نعیم کا بیان ہے کہ ہمارے بعض احباب نے سفیان سے ” الدرہم بالدرہم “ نقل کیا۔ حسین راوی کہتے ہیں کہ احمد بن صالح مسجد حماد کے امام نے اسی طرح بیان کیا۔

٥٦٦٠: سالم بن عبداللہ کہتے ہیں کہ عمر (رض) اور ابن عمر دونوں نقد ایک درہم کو دو درہم کے بدلے فروخت سے منع کرتے تھے اور کہتے کہ درہم بدلے درہم کے اور دینار بدلے دینار کے۔

٥٦٦١: ابو رافع کہتے ہیں کہ میرے پاس سے عمر (رض) کا گزر ہوا۔ ان کے پاس چاندی تھی تو انھوں نے کہا ہماری ایک بچی کے لیے زیور بنادو ۔ میں نے کہا اے امیرالمؤمنین میرے پاس استعمال شدہ زیور ہیں اگر تم پسند کرو تو چاندی لے کر زیور دے دو ۔ عمر (رض) کہنے لگے برابر برابر میں نے کہا جی ہاں چنانچہ انھوں نے چاندی کو ایک پلڑے میں رکھا اور دوسرے میں زیورات رکھے جب وزن برابر ہوگیا تو ایک ہاتھ سے زیور لے لیا اور دوسرے سے چاندی دے دی۔

٥٦٦٢: علی بن رباح لخمی کہتے ہیں کہ ہم فضالہ بن عبید کے ساتھ ایک غزوہ میں تھے میں نے ان سے سونے کے بدلے سونا فروخت کرنے سے متعلق سوال کیا تو انھوں نے فرمایا برابر دیا جائے ان میں تفاضل نہ ہو۔

٥٦٦٣: ابو نضرہ نے ابوالصہباء سے روایت کی کہ ابن عباس (رض) نے اپنے قول سے رجوع کرلیا۔ یہ ابن عباس (رض) ہیں جنہوں نے اسامہ بن زید (رض) سے انھوں نے جناب رسول اللہ (صلی اللہ علیہ وآلہ وسلم) سے روایت کی ہے کہ سود تو ادھار میں ہے اور اس کا نتیجہ یہ نکالا کہ چاندی کے بدلے چاندی اور سونے کے بدلے سونے کی بیع ایک مثل کے بدلے دو ۔ زیادہ مثل کی صورت میں جائز ہے اور انھوں نے اس سے رجوع کرلیا تو ان کا رجوع یا تو اس بات کے معلوم ہوجانے کی وجہ سے تھا کہ حضرت اسامہ (رض) نے جو کچھ ان سے بیان کیا کہ اس سے مراد وہ ربا ہے جس کا قرآن مجید میں تذکرہ ہے اور ان کو معلوم ہوگیا کہ ادھار والا سود اور ہے یا پھر ان کے ہاں حضرت اسامہ (رض) کی روایت کے خلاف روایت اس طریقہ پر ثابت ہوئی کہ حضرت اسامہ (رض) کی روایت اس طرح ثابت نہ ہوئی جیسا کہ دوسری روایات ہیں کیونکہ وہ نہایت کثرت سے منقول ہیں۔ اس لیے یہ روایت ان کے لیے حجت بن گئی اور یہ بات حضرت اسامہ (رض) کی روایت میں نہ تھی۔ کیونکہ وہ تو خبر واحد ہے۔ چنانچہ ان کا رجوع اس روایت کی طرف ہوا جس کو ایک بڑی جماعت نے نقل کیا کہ ان کا نقل کرنا حجت بن جاتا ہے اور انھوں نے خبر واحد کو چھوڑ دیا۔ کیونکہ اس میں بھولنے اور غلطی کا امکان ہے۔ یہ جو اوپر بیان کیا گیا امام ابوحنیفہ ‘ ابو یوسف ‘ محمد (رح) کا قول ہے۔
حاصل روایت : حضرت ابن عباس (رض) کے ہاں پہلے روایت اسامہ کی وجہ سے صرف رباء نسیہ حرام تھا پھر ابی بن کعب کے ساتھ اور ابو سعید خدری کے ساتھ گفتگو کے بعد تفاضل میں بھی رباء کے قائل ہوگئے اسی کو طحاوی (رح) نے ثابت کر کے ترجیح دی ہے۔
(المرقاۃ)