Al Tahawi

٥٦٨١: حضرت سعید ابن مسیب (رح) نے حضرت ابن عباس (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے ارشاد فرمایا ہبہ کی ہوئی چیز واپس لینے والا قے کر کے لوٹانے والے کی طرح ہے۔ امام طحاوی (رح) فرماتے ہیں ‘ علماء کی ایک جماعت کا کہنا یہ ہے ہبہ والا دی ہوئی چیز کو واپس نہیں کرسکتا انھوں نے اس سلسلہ میں مندرجہ بالا روایت سے استدلال کیا ہے۔ جناب رسول اللہ (صلی اللہ علیہ وآلہ وسلم) نے ہبہ سے رجوع کرنے والے کو قے کر کے واپس لوٹانے والے کی طرح قرار دیا اور قے کر کے واپس کرنا حرام ہے تو ہبہ میں رجوع کا بھی یہی حکم ہے۔ ہبہ کرنے والا اپنے ہبہ کو واپس لے سکتا ہے جب تک کہ وہ چیز اپنی اسی حالت پر قائم ہو اور ہلاک نہ ہوئی ہو اور نہ اس کے بدن میں کوئی اضافہ ہوا ہو۔ جس کو ہبہ کیا گیا وہ اس کا رشتہ دار نہ ہو اس کی طرف سے اسے کوئی بدلہ بھی نہ ملا ہو۔ اگر اس نے اس کے بدلے کچھ دے دیا اور اس نے قبول بھی کرلیا یا ہبہ کیا ہوا شخص اس کا قریبی رشتہ دار ہو تو پھر ہبہ کرنے والا واپس نہیں کرسکتا اگر ہبہ کیا ہو اشخص اس کا رشتہ دار نہ ہو بلکہ اس کی بیوی نے اپنے خاوند کو یا خاوند نے اپنی بیوی کو ہبہ کیا ہو تو یہ دونوں اس معاملے میں قریبی رشتہ دار کی طرح ہیں ان میں سے ایک بھی دوسرے کو دی ہوئی چیز واپس نہیں کرسکتا۔ جناب رسول اللہ (صلی اللہ علیہ وآلہ وسلم) نے ہبہ کر کے واپس کرنے والے کو قے کر کے واپس لوٹانے والے سے تشبیہ دی۔ البتہ قے کر کے اسے واپس لوٹانے والے کے بارے میں یہ نہیں بتلایا کہ اس سے کون مراد ہے۔ یہ ممکن ہے کہ اس سے وہ شخص مراد ہو جو قے کر کے اسے واپس لوٹاتا ہے تو آپ نے ہبہ کر کے لوٹانے والے کو قے کر کے اسے چاٹنے والے کی طرح قرار دیا اور یہ حرام ہے اس سے پہلے قول والوں کی بات ثابت ہوجائے گی اور یہ بھی ممکن ہے کہ اس سے مراد وہ کتا ہو جو قے کر کے چاٹتا ہو اور کتا حرام و حلال کا مکلف نہیں فلہذا ہبہ کو لوٹانے والا گویا گندگی کو لوٹانے والا ہے جو اس گندگی کی طرح ہے جس کو کتا لوٹاتا ہے۔ اس صورت میں اس سے یہ بات ثابت نہ ہوگی کہ واہب کو ہبہ سے رجوع کرنا منع ہے۔ اب ہم دیکھتے ہیں کہ آیا روایات میں کوئی ایسی روایت موجود ہے جو جناب رسول اللہ (صلی اللہ علیہ وآلہ وسلم) کی اس مراد پر دلالت کرنے والی ہے جو پہلی روایات سے ظاہر ہو رہی ہے۔
تخریج : بخاری فی الہبۃ باب ١٤؍٣٠‘ الزکوۃ باب ٥٩‘ والجہاد باب ١٣٧‘ مسلم فی الہبات ١‘ ٧‘ ٨‘ ٢‘ ابو داؤد فی البیوع باب ٨١‘ ترمذی فی البیوع باب ٦٢‘ نسائی فی الزکوۃ باب ١٠‘ والہبہ باب ٢؍٣‘ ابن ماجہ فی الہبات باب ٥‘ مالک فی الزکوۃ ٤٩‘ مسند احمد ١‘ ٢١٧؍٢٥‘ ٢؍١٨٢۔

٥٦٨٢: عکرمہ نے ابن عباس (رض) سے اور انھوں نے جناب رسول اللہ (صلی اللہ علیہ وآلہ وسلم) سے روایت کی ہے کہ آپ نے ہمارے سامنے بری حالت کی مثال بیان فرمائی کہ ہبہ کی ہوئی چیز کو واپس لینے والا اس کتے کی طرح ہے جو اپنی قے کو چاٹتا ہے۔
تخریج : بخاری فی الہبہ باب ٣٠‘ والخیل باب ١٤‘ ترمذی فی البیوع باب ٦١۔

٥٦٨٣: عبداللہ بن طاوس نے ابن عباس (رض) سے انھوں نے نبی اکرم (صلی اللہ علیہ وآلہ وسلم) سے روایت کی ہے کہ ہبہ کو واپس کرنے والا اس کتے کی طرح ہے جو قے کر کے پھر اپنی قے کرودوبارہ لوٹا لیتا ہے۔ اس روایت سے یہ بات ثابت ہوئی کہ رسول اللہ (صلی اللہ علیہ وآلہ وسلم) نے اس پہلی روایت میں جو ہم نے ذکر کی ہے آپ نے اپنی امت کو کتوں کے اوصاف اپنانے سے بچانے کا ارادہ فرمایا ہے یہ بات نہیں کہ ہبہ کی ہوئی اشیاء کو واپس کرنے کو آپ نے باطل قرار دیا۔
تخریج : بخاری باب الخیل باب ١٤‘ مسلم فی الہباب ٨‘ مسند احمد ١؍٣٢٧‘ ٢؍١٢٨۔

٥٦٨٤: عوف نے حسن سے انھوں نے جناب رسول اللہ (صلی اللہ علیہ وآلہ وسلم) سے روایت کی ہے۔

٥٦٨٥: خلاس بن عمرو کہتے ہیں کہ حضرت ابوہریرہ (رض) اور انھوں نے جناب نبی اکرم (صلی اللہ علیہ وآلہ وسلم) سے روایت کی ہے۔ آپ نے فرمایا جو شخص اپنے عطیہ کو لوٹاتا ہے وہ اس کتے کی طرح ہے جو کھاتا رہتا ہے جب سیر ہوجاتا ہے تو قے کردیتا ہے اور پھر اسے چاٹ کر واپس کرلیتا ہے۔

٥٦٨٦: ابن عمر (رض) سے روایت ہے کہ عمر (رض) نے ایک گھوڑا اللہ تعالیٰ کی راہ میں صدقہ کیا اس کے بعد اسے فروخت ہوتا ہوا پایا تو اسے خریدنے کا ارادہ کیا جناب رسول اللہ (صلی اللہ علیہ وآلہ وسلم) کے پاس آ کر اجازت طلب کی تو آپ نے فرمایا اپنے صدقہ کو واپس مت لو۔ اسی بات کے پیش نظر ابن عمر (رض) اس بات کو جائز نہیں سمجھتے تھے کہ آدمی جس مال کو صدقہ کرے اسی کو خریدے۔
تخریج : بخاری فی الزکوۃ باب ٥٩‘ نسائی فی الزکوۃ باب ١٠٠‘ ابن ماجہ فی الصدقات باب ٢۔

٥٦٨٧: زید بن اسلم نے اپنے والد سے انھوں نے حضرت عمر (رض) سے روایت کی ہے کہ میں نے ایک گھوڑا ایک شخص کو جہاد کے لیے دیا اس نے اس کو ضائع کردیا میں نے اسے خریدنے کا ارادہ کیا اور سوچا کہ وہ اسے کم قیمت میں فروخت کر دے گا۔ میں نے جناب رسول اللہ (صلی اللہ علیہ وآلہ وسلم) سے اس سلسلہ میں دریافت کیا تو آپ نے فرمایا اسے مت خریدو اگرچہ وہ تمہیں ایک درہم کے بدلے دے اور اپنا صدقہ واپس نہ کرو کیونکہ صدقہ واپس کرنے والا اس کتے کی طرح ہے جو قے کر کے اسے چاٹ لیتا ہے۔
تخریج : بخاری فی الزکوۃ باب ٥٩‘ والجہاد باب ١٣٧‘ مسلم فی الہبات ١‘ نسائی فی الزکوۃ باب ١٠٠‘ مالک فی الزکوۃ ٤٩‘ مسند احمد ١؍٤٠۔

٥٦٨٨: زید بن اسلم نے اپنے والد سے انھوں نے حضرت عمر (رض) سے روایت کی ہے کہ میں نے بازار میں ایک گھوڑا فروخت ہوتے دیکھا اور وہ وہی گھوڑا تھا جو صدقہ میں دیا جا چکا تھا چنانچہ جناب رسول اللہ (صلی اللہ علیہ وآلہ وسلم) سے دریافت کیا کہ کیا میں اس کو خرید لوں تو جناب نبی اکرم (صلی اللہ علیہ وآلہ وسلم) نے فرمایا اسے مت خریدو اور نہ اس کے بچوں میں سے کسی کو خریدو۔ جناب رسول اللہ (صلی اللہ علیہ وآلہ وسلم) نے حضرت عمر (رض) کو اس چیز کے خریدنے سے روک دیا جس کو انھوں نے صدقہ کیا تھا۔ اسی طرح اس کی اولاد کی خریداری سے روک دیا اور اس فعل کو اس کتے کے فعل کی طرح قرار دیا جو قے کر کے لوٹاتا ہے تو اس سے یہ بات لازم نہیں آتی کہ صدقہ کرنے والے کے لیے صدقہ کے مال کو خریدنا حرام ہے بلکہ اس کو چھوڑنا (نہ خریدنا) افضل ہے۔ اسی طرح جو پہلے ذکر ہوا اس کا مطلب بھی یہی ہے کہ جناب نبی اکرم (صلی اللہ علیہ وآلہ وسلم) نے ہبہ کو واپس لینے کے سلسلہ میں جو کچھ فرمایا اس سے اس کی حرمت مراد نہیں بلکہ (اس سے کراہت دلا کر) اس کے چھوڑنے کا افضل ہونا ظاہر فرمایا۔
تخریج : بخاری فی الہبہ باب ٣٧‘ مسند احمد ١؍٢٥‘ ٣٧۔

٥٦٨٩: طاوس نے ابن عمر (رض) اور ابن عباس (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے فرمایا۔ ہبہ کرنے والے کو جائز نہیں کہ وہ ہبہ کی ہوئی چیز کو واپس کرے البتہ باپ اپنے بیٹے سے ہبہ واپس لے سکتا ہے۔ اس روایت سے ثابت ہو رہا ہے کہ کسی آدمی کو ہبہ واپس کرنا حرام ہے البتہ اپنے لڑکے سے ہبہ لوٹا سکتا ہے۔ ان کو جواب میں کہا جائے گا کہ روایت میں تو آپ کی بات پر کوئی دلالت موجود نہیں ممکن ہے کہ جناب نبی اکرم (صلی اللہ علیہ وآلہ وسلم) نے یہ بات لایحل بطور تغلیظ فرمائی ہو کیونکہ آپ اپنے کسی امت میں بھی بری مثال کا انطباق پسند نہ فرماتے تھے۔ جیسا جناب رسول اللہ (صلی اللہ علیہ وآلہ وسلم) نے ارشاد فرمایا کہ کسی تندرست ٹھیک ٹھاک آدمی کے لیے صدقہ حلال نہیں تو اس کا یہ مطلب نہیں کہ وہ اس پر حرام ہے جس طرح کہ مالدار لوگوں پر حرام ہے بلکہ اس کا صاف مطلب یہ ہے کہ جس طرح دیگر حاجتمندوں اور اپاہجوں کے لیے حلال ہے اسی طرح اس کے لیے حلال نہیں۔ پس اسی طرح جو ہم نے جناب رسول اللہ (صلی اللہ علیہ وآلہ وسلم) کا ارشاد گرامی نقل کیا کہ ہبہ کرنے والے کو ہبہ کی ہوئی چیز واپس لینا حلال نہیں کا مطلب ہے کہ اس کے لیے یہ اس طرح حلال نہیں جس طرح دیگر اشیاء ہیں جن کو اللہ تعالیٰ نے اپنے بندوں کے لیے حلال قرار دیا ہے اور ان کو لینے والے لوگوں کے لیے ایسی مثال بیان نہیں فرمائی۔ جیسی کچھ ہبہ کر کے واپس کرنے والے کے لیے بیان فرمائیں اور اس رجوع کرنے کے ماتحت ہبہ شدہ چیز کو واپس لینا اس کو خریدنا اور دیگر صورتیں شامل ہیں۔ پھر اس سے والد کا بیٹے کو دیا ہوا مال مستثنیٰ کیا۔ واللہ اعلم۔ مگر احناف کے ہاں یہ بھی جائز ہے جبکہ باپ کو حاجت ہو اور احتیاج ہو کیونکہ اس سلسلہ میں جو کچھ والد کے لیے واجب ہے وہ ایسا فعل نہیں ہے جس کے کرنے سے وہ واپسی کرنے میں کتے کے اپنی قے کے چاٹنے کے مترادف ہو بلکہ یہ وہ چیز ہے جس کو اللہ تعالیٰ نے اس (والد) کے فقر کی حالت میں بیٹے کے لیے واجب کیا ہے اور اس سلسلہ میں اسے کسی تنگی میں نہیں ڈالا جیسا کہ دیگر احادیث میں جناب رسول اللہ (صلی اللہ علیہ وآلہ وسلم) سے مروی ہے۔
تخریج : ترمذی فی البیوع باب ٦١‘ ولولاء باب ٧‘ نسائی فی الہبہ باب ٢؍٤‘ ابن ماجہ فی الہبہ باب ٢‘ مسند احمد ٢؍٢٧‘ ٢٨۔
تشریح اس روایت سے ثابت ہو رہا ہے کہ کسی آدمی کو ہبہ واپس کرنا حرام ہے البتہ اپنے لڑکے سے ہبہ لوٹا سکتا ہے۔
روایات ملاحظہ ہوں :

٥٦٩٠: عمرو بن شعیب نے اپنے والد سے اور وہ اپنے دادا سے روایت کرتے ہیں کہ ایک شخص جناب رسول اللہ (صلی اللہ علیہ وآلہ وسلم) کی خدمت میں حاضر ہوا اور اس نے عرض کیا کہ یارسول اللہ (صلی اللہ علیہ وآلہ وسلم) میں نے اپنی والدہ کو ایک باغ کا عطیہ دیا ہے اب اس کا انتقال ہوگیا اور اس نے میرے علاوہ کوئی وارث نہیں چھوڑا۔ آپ نے فرمایا تمہارا صدقہ واجب ہوگیا (ادا ہوچکا) اور تیرا باغ تیری طرف لوٹ آیا۔ اگر کوئی معترض کہے کہ اس روایت میں جناب رسول اللہ (صلی اللہ علیہ وآلہ وسلم) نے ہبہ کرنے والے والد کو خاص کیا ہے باقی ہبہ کرنے والے کے لیے یہ حکم کیسے ہوسکتا ہے اگر بیٹا باپ کو کوئی چیز ہبہ کرے تو اس کا حکم باپ کے بیٹے کو ہبہ کرنے کے خلاف ہے۔ تو اس کے جواب میں کہے اس سلسلے میں دونوں کا حکم یکساں ہے تو جناب نبی اکرم (صلی اللہ علیہ وآلہ وسلم) کا اس سبب سے جس کو کہ ہم نے ذکر کیا ایک کا تذکرہ دونوں کے ذکر کو کفایت کرنے والا ہے بلکہ ان دونوں کے علاوہ کے لیے بھی کافی ہے جن کا یہی حکم ہو۔ اللہ تعالیٰ نے قرآن مجید میں ارشاد فرمایا کہ تم پر تمہاری مائیں تمہاری بیٹیاں ‘ تمہاری بہنیں ‘ تمہاری پھوپھیاں ‘ تمہاری خالائیں ‘ تمہاری بھتیجیاں اور بھانجیاں حرام کی گئیں یہ نسبی رشتہ کے اعتبار سے ہیں پھر فرمایا تمہاری وہ مائیں جنہوں نے تمہیں دودھ پلایا اور تمہاری رضاعی بہنیں بھی حرام ہیں دودھ کے رشتہ میں صرف ان دو کے ذکر پر اکتفا کیا ان دو کا ذکر کردینا اس بات کی دلیل ہے کہ جو عورتیں نسب کے لحاظ سے حرام ہیں۔ دودھ کی وجہ سے بھی ان تمام کا حکم وہی ہے دودھ کی وجہ سے ان دو کے حرام ہونے کے تذکرے نے باقی کے تذکرے سے بےنیاز کردیا کیونکہ نسب کی وجہ سے حرام ہونے میں تمام کا ذکر کردیا اور ان تمام کے لیے ایک ہی حکم قرار دیا (یعنی حرمت) تو اس سے اس بات پر دلالت مل گئی کہ رضاعت کی وجہ سے بعض کے حرام ہونے سے دوسری رضاعی رشتہ دار عورتوں کا حکم بھی یہی ہے۔ اسی طرح جناب رسول اللہ (صلی اللہ علیہ وآلہ وسلم) نے جب یہ فرمایا کہ کسی شخص کو ہبہ میں رجوع درست نہیں تو یہ حکم تمام لوگوں کو شامل ہے پھر فرمایا سوائے باپ کے جو کہ اپنے بیٹے کو ہبہ کرے یہ بات جو کہ ہم نے کہی ہے اس کی بنا پر یہ اس بات پر دلالت ہے کہ والد کے علاوہ ہبہ کرنے والے اللہ تعالیٰ کے حکم سے رجوع کریں تو یہی حکم ہوگا۔ تو والد کے تذکرے نے دوسروں کے تذکرہ سے بےنیاز کردیا۔ فلہذا ان روایات میں ایسی کوئی بات نہیں پائی جاتی جو اس بات پر دلالت کرنے والی ہو کہ ہبہ کرنے والا اپنے ہبہ کو توڑ کر موہوب لہ سے واپس لے اور اسے اپنی سابقہ ملکیت میں لائے۔ جس ملکیت سے اس نے ہبہ کر کے اس شئی کو نکالا تھا۔ اب ہم دیکھنا چاہتے کہ آیا آثار صحابہ کرام میں ایسی کوئی چیز پائی جاتی ہے جس سے کوئی دلالت میسر آجائے۔
تخریج : ابن ماجہ فی الصدقات باب ٣۔
سوال : اس روایت میں جناب رسول اللہ (صلی اللہ علیہ وآلہ وسلم) نے ہبہ کرنے والے والد کو خاص کیا ہے باقی ہبہ کرنے والے کے لیے یہ حکم کیسے ہوسکتا ہے اگر بیٹا باپ کو کوئی چیز ہبہ کرے تو اس کا حکم باپ کے بیٹے کو ہبہ کرنے کے خلاف ہے۔
جواب اس سلسلے میں دونوں کا حکم یکساں ہے تو جناب نبی اکرم (صلی اللہ علیہ وآلہ وسلم) کا اس سبب سے ججس کو کہ ہم نے ذکر کیا ایک کا تذکرہ دونوں کے ذکر کو کفایت کرنے والا ہے بلکہ ان دونوں کے علاوہ کے لیے بھی کافی جن کا یہی حکم ہو۔
آثار صحابہ (رض) سے اس کی تلاش :
اب ہم دیکھنا چاہتے ہیں کہ آیا آثار صحابہ کرام میں ایسی کوئی چیز پائی جاتی ہے جس سے کوئی دلالت میسر آجائے۔