٧٧٤: روح بن عبادہ نے اپنی سند سے ابو محذورہ (رض) سے روایت نقل کی ہے۔
خلاصہ الزام : اذان کے کلمات کے متعلق بحث کہ ان کی تعداد کتنی ہے ۔
مسئلہ نمبر : امام مالک حسن بصری اور اہل مدینہ کے ہاں کلمات اذان سترہ ہیں پہلی تکبیر دو مرتبہ اور شہادتین میں ترجیع۔ نمبر ٢ امام شافعی (رح) کے ہاں انیس پہلی تکبیر چار مرتبہ اور شہادتین میں ترجیع۔ نمبر ٣ ابوحنیفہ و حنابلہ کے ہاں کلمات پندرہ تکبیر اول چار مرتبہ مگر شہادتین میں ترجیع نہیں۔
دوسرا مسئلہ : کلمات اذان کی کیفیت اول تکبیر دو مرتبہ بقیہ اسی طرح ہے یہ امام مالک و حسن بصری و ابن سیرین کا مسلک ہے۔ نمبر ٢ ابتداء کلمات میں چار مرتبہ تکبیر یہ امام ابوحنیفہ (رح) شافعی (رح) و جمہور فقہاء کا مسلک ہے۔
تیسرا مسئلہ : شہادتین میں ترجیع ہے یہ امام مالک و شافعی و حسن بصری و اہل مدینہ کا مسلک ہے۔ نمبر ٢ ترجیع نہیں احناف و حنابلہ کا یہی مسلک ہے۔
مسئلہ اوّل :
فریق اوّل امام مالک حسن بصری (رح) کا مؤقف یہ ہے کہ شروع میں تکبیر دو مرتبہ کہی جائے گی کل کلمات اذان سترہ ہوں گے شہادتین کو چار مرتبہ پڑھیں گے۔

٧٧٥: ابو وام عبدالملک بن ابی محزورہ یعنی عن ابی محذورہ قال روح فی حدیثہ عن ام عبدالملک بن ابی محذورہ یعنی ابو محذورہ (رض) کہتے ہیں کہ مجھے رسول اللہ (صلی اللہ علیہ وآلہ وسلم) نے اسی طرح اذان سکھلائی جیسے تم اب اذان دیتے ہو۔ اللہ اکبر۔ اللہ اکبر۔ اشہد ان لاالٰہ الا اللہ ‘ اشہد ان لا الٰہ الا اللہ ‘ الی آخرہ (شہادتین میں ترجیع کے ساتھ) ۔ (سترہ کلمات) روح نے اپنی حدیث میں کہا کہ مجھے عثمان نے یہ تمام خبر ام عبدالملک بن ابی محذورہ سے بیان کی کہ میں نے یہ سب ابو محذورہ سے سنا ہے اور ابو عاصم نے اپنی حدیث میں کہا کہ مجھے یہ تمام خبر عثمان بن السائب نے عن ابیہ و عن ام عبدالملک بن ابی محذورہ نے بیان کی کہ دونوں نے یہ بات ابو محذورہ سے سنی ہے۔
تخریج : مسلم فی الصلاۃ نمبر ٦۔

٧٧٦: عبدالعزیز بن عبدالملک بن ابی محذورہ کہتے ہیں کہ عبداللہ بن محیریز نے مجھے بیان کیا اور یہ ابو محذورہ کی سرپرستی میں یتیم بچہ تھا کہ ابو محذورہ (رض) نے کہا کہ مجھے جناب رسول اللہ (صلی اللہ علیہ وآلہ وسلم) نے فرمایا اٹھو اور نماز کی اذان دو میں آپ کی خدمت میں کھڑا ہوا اور آپ بذات خود کلمات اذان کہلواتے جا رہے تھے پس اسی طرح نقل کی جو روایت بالا میں موجود ہے۔ امام طحاوی (رح) فرماتے ہیں کچھ علماء اس طرف گئے ہیں اور انھوں نے فرمایا کہ اسی طرح اذان مناسب ہے جیسا کہ روایت ابومحذورہ میں مذکور ہے۔ دیگر علماء کی جماعت نے ان سے اختلاف کیا اور اختلاف کے صرف دو مواقع ہیں :! اذان کی ابتداء میں اللہ اکبر چار چار مرتبہ پڑھا جائے گا اور ان کی دلیل یہ روایت ہے۔
تخریج : ابو داؤد ١؍٧٣۔
حاصل روایات : ان روایات بالا سے ثابت ہوا کہ اذان کے کلمات سترہ ہیں جن میں شہادتین میں ترجیع ہے اور ابتدائی کلمات تکبیر دو بار ہیں۔
فریق ثانی کا مؤقف :
امام شافعی (رح) نے فرمایا اذان کی ابتداء میں چار مرتبہ اللہ اکبر اور شہادتین میں ترجیع ‘ کی ابتداء میں چار مرتبہ تکبیر کی مستدل روایات۔

٧٧٧: مکحول نے کہا کہ حضرت عبداللہ بن محیریز (رض) نے بیان کیا کہ نبی اکرم (صلی اللہ علیہ وآلہ وسلم) نے اذان کے انیس کلمات سکھائے ابتداء میں تکبیر چار مرتبہ اور شہادتین ترجیع کے ساتھ بقیہ کلمات اسی طرح ہیں۔
تخریج : ابو داؤد فی الصلاۃ باب ٢٨‘ نمبر ٥٠٢‘ ترمذی فی الصلاۃ باب ٢٦‘ نمبر ١٩٢‘ نسائی فی الاذان باب ٤‘ ٣۔

٧٧٨: ابن داؤد ہمام سے اپنی سند سے روایت نقل کی ہے۔

٧٧٩: محمد بن سنان العوفی نے ہمام سے اسی طرح روایت نقل کی ہے۔
تخریج : ابن ماجہ ١؍٥٢۔

٧٨٠: ابوالولید و ابو عمر الحوضی دونوں نے ہمام سے روایت کی پھر بقیہ اسی سند سے روایت نقل کی ہے۔ اس روایت میں یہ ہے کہ اذان کی ابتداء میں چار مرتبہ اللہ اکبر کہا جائے۔ ہمارے نزدیک نظری لحاظ سے بھی یہ قول صحیح ترین ہے۔ کیونکہ یہ ہم دیکھتے ہیں کہ اذان میں بعض کلمات وہ ہیں جو دو جگہ دھرائے جاتے ہیں اور بعض کلمات صرف ایک مرتبہ دھرائے جاتے ہیں اور ایک جگہ میں مذکور ہوتے ہیں۔ وہ کلمات جو ایک جگہ میں مذکور ہوتے ہیں مگر تکرار سے نہیں آتے وہ صلوۃ اور فلاح ہیں۔ ان میں سے ہر ایک دو مرتبہ ہے اور شہادت کا تذکرہ دو بار کیا جاتا ہے۔ اسے اذان کے شروع میں اور آخر میں بھی ۔ ابتداء میں دو مرتبہ ہے : اشہد ان لا الٰہ الا اللہ ‘ دو مرتبہ کہتے پھر آخر میں اسے ایک مرتبہ لایا جاتا ہے۔ پس جو کلمات اذان میں دو مرتبہ آئے ہیں وہ پہلی سے نصف تعداد میں دوبارہ آتے ہیں۔ اللہ اکبر بھی دو جگہ ہے شروع میں اور فلاحین کے بعد دو مرتبہ اور اس پر سب کا اتفاق ہے۔ تو اس قیاس کے مطابق جو ہم نے کیا شروع میں دوگنا یعنی چار مرتبہ ہونا چاہیے جیسا کہ کلمہ شہادت کا ہم نے تذکرہ کیا تو شروع کی تکبیر آخر کی تکبیر سے دوگنا ہونا چاہیے۔ چنانچہ شروع میں چار مرتبہ ہے تو آخر میں دو مرتبہ ہے۔ یہی درست قیاس ہے۔ امام ابوحنیفہ ‘ ابو یوسف اور محمد (رح) کا یہی قول ہے۔ امام ابویوسف (رح) سے قول اول کی طرح بھی مروی ہے اور دوسری جگہ جس میں اختلاف ہے وہ ترجیع ہے۔ بعض علماء ترجیع کی طرف گئے ہوں جبکہ دوسرے اس کے ترک کا قول کرتے ہیں اور ان کی دلیل یہ روایات ہیں۔
تخریج : دارمی ١؍١١٩٧۔
حاصل روایات : ان روایات سے معلوم ہوتا ہے کہ ابتداء میں تکبیر چار مرتبہ کہی جائے گی۔
نظر طحاوی (رح) :
ان دونوں اقوال میں سے یہ قول کہ ابتداء میں تکبیر چار مرتبہ کہی جائے یہ زیادہ صحیح قول ہے کیونکہ اذان پر غور کرنے سے معلوم ہوا کہ بعض کلمات دو مقام پر لوٹائے جاتے ہیں اور بعض کلمات ایک مقام پر ذکر کئے جاتے ہیں چنانچہ جو کلمات ایک مقام میں ذکر کئے جاتے ہیں اور دھرائے نہیں جاتے وہ الصلاۃ اور الفلاح کے کلمات ہیں ان میں سے ہر ایک کو دو مرتبہ کہا جاتا ہے اور شہادۃ کو ابتداء میں اور انتہاء دو مقام پر ذکر کیا جاتا ہے ابتداء میں تو دو مرتبہ اشہدان لاالہ الا اللہ کہا جاتا ہے پھر آخر میں لا الٰہ الا اللہ ایک مرتبہ کہا جاتا ہے۔
چنانچہ اذان میں جو کلمات دو مرتبہ آتے ہیں وہ ابتداء کے اعتبار سے نصف ہیں مثلاً تکبیر کا تذکرہ دو جگہ ہے ابتداء میں اور فلاح کے بعد بھی اس پر سب کا اتفاق ہے کہ آخر میں فلاح کے بعد ” اللہ اکبر ‘ اللہ اکبر “ دو مرتبہ کہا جائے گا۔
قیاس و نظر کے اعتبار سے :
جس میں اختلاف کیا گیا ان میں سے جن سے اذان کی ابتداء ہوتی ہے جیسے تکبیر تو وہ آخر میں دو مرتبہ ہو تو شروع میں چار مرتبہ آنا چاہیے اور شہادت میں آخر میں لاالہ الا اللہ ایک مرتبہ ہے تو شروع میں دو مرتبہ ہونا چاہیے ۔ جب اللہ اکبر بھی آخر میں دو مرتبہ آتا ہے تو شروع میں چار مرتبہ ہونا چاہیے۔ یہ امام ابوحنیفہ (رح) اور ابو یوسف (رح) اور محمد (رح) کا قول ہے البتہ ابو یوسف کا ایک قول امام مالک کے ساتھ بھی ہے۔
مسئلہ نمبر ٢ اذان میں ترجیع ہے یا نہیں
فریق اوّل امام مالک و شافعی (رح) اس میں ترجیع کے قائل ہیں ان کی دلیل روایت ابو محذورہ ہے جو شروع باب میں ہے۔
فریق دوم کی مستدل روایت ۔ کہ ترجیع نہیں ہے۔

٧٨١: عبدالرحمن بن ابی لیلیٰ کہتے ہیں کہ عبداللہ بن زید (رض) نے ایک آدمی کو دیکھا کہ وہ آسمان سے اترا اس نے دو سبز کپڑے پہن رکھے تھے یا اس پر دو سبز چادریں تھیں وہ دیوار کے ایک حصے پر کھڑا ہوا اور اس نے اذان دی اللہ اکبر اللہ اکبر اللہ اکبر اللہ اکبر ‘ ۔ اس روایت میں ابو محذورہ کے مطابق اذان کو ذکر کیا گیا ہے البتہ اس میں ترجیع نہیں ہے وہ جناب رسول اللہ (صلی اللہ علیہ وآلہ وسلم) کی خدمت میں آئے اور آپ کو اس کی اطلاع دی تو آپ نے فرمایا تم نے خوب خواب دیکھا یہ بلال کو سکھاؤ۔
تخریج : مسند احمد ٥؍٢٣٢۔

٧٨٢: عبدالرحمن بن ابی لیلیٰ بیان کرتے ہیں کہ مجھے اصحاب محمد (صلی اللہ علیہ وآلہ وسلم) نے بیان کیا کہ عبداللہ بن زید بن عبداللہ انصاری (رض) نے اذان کو خواب میں دیکھا پس وہ جناب نبی اکرم (صلی اللہ علیہ وآلہ وسلم) کی خدمت میں آئے اور آپ کو اطلاع دی تو آپ نے فرمایا تم بلال کو سکھا دو پس بلال کھڑے ہوئے اور انھوں نے دو دو مرتبہ کلمات سے اذان دی یہ عبداللہ بن زید (رض) ہیں جنہوں نے اپنی روایت میں ترجیع کا ذکر نہیں کیا۔
تخریج : مسند احمد ٥؍٢٤٦۔
حاصل روایات : یہ عبداللہ بن زید ہیں جن کی روایت میں ترجیع نہیں اور ابو محذورہ (رض) کی روایت میں ترجیع ہے اب ان کی روایت میں ترجیع ہے اس میں تاویل کرنا پڑے گی کہ وہ اس وقت مسلمان نہ ہوئے تھے اور شہادت کو انھوں نے آہستہ کہا تو آپ (صلی اللہ علیہ وآلہ وسلم) نے فرمایا ارجع وامدد من صوتک یہ الفاظ روایت ابو داؤد کتاب الصلاۃ باب ٢٨‘ نسائی فی الاذان باب ٥‘ میں مذکور ہیں تو ان کی روایت میں اس علت کی وجہ سے احتمال پیدا ہوگیا پس اس سے حجت درست نہیں اب اس فیصلہ پر پہنچنے کے لیے بطریق نظر دیکھنا ہوگا۔
نظر طحاوی (رح) :
اور کسی کلمہ اذان میں اختلاف نہیں صرف شہادتین کے متعلق اختلاف ہے تو اب جس بات میں اختلاف ہے اس کو اس طرف موڑو جس میں اختلاف نہیں ہے اور اس پر اتفاق ہے کہ علاوہ شہادتین کسی حصہ میں ترجیع نہیں ہے تو اس سے خود سمجھ آگیا کہ اس میں بھی ترجیح نہیں کیونکر ترجیع اس علت پر موقوف تھی یہی امام ابوحنیفہ (رح) اور ابو یوسف و محمد کا قول ہے۔
نوٹ : اس باب میں نظر کو دو مرتبہ استعمال کیا مگر اذان کے سلسلہ میں اپنے راجح مسلک کے روایات سے کم دلائل پیش کئے ایک ہی دلیل سے دوھرا کام لیا۔

٧٨٣: ابی قلابہ نے بیان کیا کہ حضرت انس بن مالک (رض) کہتے ہیں کہ حضرت بلال کو حکم ملا اذان کو جفت اور اقامت کو طاق کہا کریں۔
تخریج : بخاری فی الاذان باب ٢‘ ١ مسلم فی الصلاۃ نمبر ٣‘ ٢؍٥‘ ابو داؤد فی الصلاۃ باب ٢٩‘ ٥٠٨‘ ترمذی فی فی الصلاۃ باب ٦‘ مسند احمد ٣؍١٠٣‘ ١٨٩۔
اقامت کی کیفیت میں فریق اوّل امام مالک و اہل مدینہ (رح) دس کلمات بتلائے ہیں فریق دوم امام شافعی و احمد حسن بصری اہل حجاز کے ہاں کلمات اقامت گیارہ ہیں فریق ثالث امام ابوحنیفہ ‘ سفیان ثوری ‘ اہل کوفہ کلمات اقامت سترہ قرار دیتے ہیں۔
فریق اوّل کا مؤقف اور دلائل :
فریق اوّل کلمات اقامت ہر چیز نصف تکبیر دو مرتبہ شہادتین دو مرتبہ حیی علی الصلاۃ ایک مرتبہ حیی علی الفلاح ایک مرتبہ قدقامت الصلاۃ ایک مرتبہ پھر اللہ اکبر ایک مرتبہ اور لاالہ ایک مرتبہ۔

٧٨٤: شعبہ و حماد بن زید نے اپنی سند سے اسی طرح روایت نقل کی ہے۔
تخریج : دارمی ١؍١٨٧۔

٧٨٥: سفیان نے خالد سے پھر انھوں نے اپنی سند سے روایت نقل کی ہے۔
تخریج : عبدالرزاق ١؍٤٦٤۔

٧٨٦: حماد بن سلمہ و حماد بن زید نے خالد سے پھر انھوں نے اپنی سند سے روایت نقل کی ہے۔
تخریج : مسلم ١؍١٦٤۔

٧٨٧: ہشیم نے خالد سے پھر انھوں نے اپنی سند سے روایت نقل کی ہے۔
تخریج : دارقطنی ١؍٢٤٧۔

٧٨٨: ابو قلابہ نے انس بن مالک (رض) سے نقل کیا کہ مسلمانوں نے ارادہ کرلیا کہ وہ ناقوس بجائیں اور بلند جبہ پر نماز کے لیے اعلان کیا جاسکے یہاں تک کہ ایک آدمی (عبداللہ بن زید بن عبدربہ (رض)) نے وہ خواب دیکھا تو بلال کو حکم دیا گیا کہ وہ اذان کے کلمات جفت اور اقامت کے طاق کہیں۔
تخریج : بخاری ١؍٢٢٠‘ مسلم ١؍١٦٤۔

٧٨٩: ابو قلابہ نے نقل کیا کہ انس (رض) کہتے ہیں کہ بلال کو حکم دیا گیا کہ اذان کو جفت اور اقامت کو طاق کہیں۔ امام طحاوی (رح) فرماتے ہیں ‘ بعض علماء اس طرف گئے ہیں کہ اقامت ایک ایک مرتبہ کہی جائے گی۔ دوسرے علماء نے ان سے اختلاف کرتے ہوئے فرمایا کہ بقیہ اقامت تو تمہاری طرح ہے مگر قدقامت الصلوٰۃ کو دو مرتبہ کہا جائے گا ‘ ان کی مستدل یہ روایات ہیں۔
تخریج : ابو داؤد ١؍٧٥۔
حاصل روایات : اذان کے کلمات جب جفت ہیں اقامت کے کلمات طاق ہوں گے اور قدقامت الصلاۃ پھر ایک مرتبہ ملا کر دس کلمات بنیں گے پس یہی مسنون ہے۔
فریق دوم کا مؤقف :
یہ تمام کلمات فریق اوّل کی طرح ہیں البتہ قدقامت الصلاۃ اقامت کی وجہ سے دو مرتبہ کہے جانے کا مستحق ہے جیسا مندرجہ ذیل روایات سے ثابت ہے۔

٧٩٠: قلابہ نے بیان کیا کہ انس (رض) کہتے ہیں کہ بلال کو حکم دیا گیا کہ اذان کو جفت اور اقامت کو طاق کہیں سوائے اقامت کے لفظ کے۔
تخریج : بخاری ١؍٢٢٠۔

٧٩١: ابو قلابہ نے بیان کیا کہ انس (رض) نے اسی طرح روایت نقل کی ہے۔

٧٩٢: ابو قلابہ نے بیان کیا کہ انس (رض) بیان کرتے ہیں کہ حضرت بلال کو حکم دیا گیا کہ وہ اذان کو جفت اور اقامت کو طاق کہیں اسماعیل کہتے ہیں میں نے اپنے استاذ ایوب کو کہا ان یوترالاقامۃ تو انھوں نے کہا : الاقامۃ ہاں اقامت کے لفظ کو جفت کہا جائے۔
تخریج : بخاری ١؍٢٢٠‘ مسلم ١؍١٦٤۔

٧٩٣: ابو جعفرالفراء نے مسلم سے نقل کیا یہ اہل کوفہ کے مؤذن تھے انھوں نے ابن عمر (رض) سے روایت نقل کی ہے کہ اذان جناب رسول اللہ (صلی اللہ علیہ وآلہ وسلم) کے دور میں دو دو مرتبہ اور اقامت ایک ایک مرتبہ تھی البتہ جب قد قامت الصلاۃ کہتے تو اسے دو مرتبہ کہا جاتا پس اس سے ہم پہچان لیتے کہ یہ اقامت ہے پس وضو کر کے ہم نکلتے۔ انھوں نے اس سلسلہ میں نظر و فکر کو مستدل بنایا اور کہا کہ ہم نے غور سے دیکھا کہ اذان میں جو کلمات تکرار سے کہے ہیں وہ دوسری مرتبہ دوگنا نہیں آتے ہیں بلکہ ابتداء سے نصف آتے ہیں اور اقامت سے ابتداء نہیں ہوتی بلکہ وہ اذان کے بعد ہوتی ہے۔ پس منظر کا تقاضا یہ ہے کہ اس کے وہ الفاظ جو اذان میں آتے ہیں طاق ہوں اور جو اذان میں نہیں وہ جفت ہوں۔ پس قد قامت الصلوٰۃ کے علاوہ تمام کلمات اذان سے نصف ہوں گے اور قد قامت الصلوٰۃ کو دو مرتبہ لایا جائے گا کیونکہ وہ اذان میں نہیں اور بقیہ کلمات اذان میں ہیں وہ نصف تعداد میں لائے جائیں گے۔ دوسرے علماء نے ان سے اختلاف کرتے ہوئے کہا۔ اذان کی طرح اقامت کے کلمات بھی دو دو مرتبہ ہونے چاہئیں البتہ اقامت میں قدقامت الصلوٰۃ بھی کہا جاتا ہے۔ باقی جو روایت بلال (رض) آپ (صلی اللہ علیہ وآلہ وسلم) کی پیش کرتے ہیں ہم انہی کی روایت اس کے برعکس دکھا سکتے ہیں ‘ ملاحظہ کریں۔
تخریج : ابو داؤد ١؍٧٥۔
فریق ثانی کے دلائل کا خلاصہ :
یہ ہے کہ اذان کے کلمات سے اقامت کے کلمات طاق ہوں گے صرف قدقامت الصلاۃ کو دو مرتبہ کہا جائے۔
ان کا ایک عقلی دلیل سے استدلال :
اذان کے کلمات پر غور کیا کہ جو ایک مقام پر آتے ہیں اور دوسری قسم جو دو مقام پر آتے ہیں ابتداء میں دو مقام پر آتے ہیں وہ پہلی جگہ کے مقابلے میں دوسری جگہ نصف ہیں معلوم ہوا بعد والا جو ذکر کیا جائے وہ نصف ہوجاتا ہے اور اقامت کا کلمہ تو پہلی مرتبہ آیا ہے یہ اسی طرح رہے گا اور اذان والے کلمات دوبارہ آنے کی وجہ سے نصف ہوجائیں گے اقامت کا کلمہ اذان میں سرے سے مذکور نہیں پس وہ دو مرتبہ ہی رہے گا پس کل گیارہ کلمات ہوگئے۔
فریق ثالث کا مؤقف :
اذان و اقامت کے کلمات یکساں ہیں اذان میں ترجیع نہیں کل کلمات پندرہ ہوئے اور قدقامت الصلاۃ جو اقامت کے ساتھ ہے وہ دو مرتبہ ہے اس طرح سترہ کلمات بن گئے۔
مستدل روایات :
تم نے حضرت بلال (رض) کے متعلق حضرت انس (رض) کا بیان نقل کیا ہم خود ان کی اپنی روایت ذکر کرتے ہیں جو اس کے خلاف ہے۔

٢٩٤: عبدالرحمن بن ابی لیلیٰ سے روایت ہے کہ عبداللہ بن زید بن عبد ربہ نے ایک آدمی دیکھا جو آسمان سے اترا اس نے سبز کپڑے زیب تن کر رکھے تھے یا دو سبز چادریں اوڑھ رکھی تھیں وہ دیوار کے ایک حصہ پر کھڑا ہوا اور اس نے اذان دی اللہ اکبر اللہ اکبر جیسا باب اول میں ہم نے ذکر کیا پھر وہ بیٹھ گیا پھر کھڑا ہوا اور اسی طرح اقامت کہی پھر عبداللہ بن زید (رض) جناب رسول اللہ (صلی اللہ علیہ وآلہ وسلم) کی خدمت میں آئے اور آپ کو اطلاع دی تو آپ نے فرمایا تم نے بہت خوب دیکھا یہ کلمات بلال کو سکھاؤ۔
تخریج : روایت نمبر ٧٨١ کو ملاحظہ کریں۔

٧٩٥: عبدالرحمن بن ابی لیلیٰ کہتے ہیں کہ مجھے اصحاب محمد (صلی اللہ علیہ وآلہ وسلم) نے خبر دی کہ عبداللہ بن زید انصاری نے خواب میں اذان دیکھی پھر وہ جناب نبی اکرم (صلی اللہ علیہ وآلہ وسلم) کی خدمت میں آئے اور آپ کو اس کی اطلاع دی تو آپ نے فرمایا تم اسے بلال کو سکھاؤ پس انھوں نے دو دو مرتبہ کلمات سے اذان دی اور دو دو مرتبہ کلمات سے اقامت کہی اور بیٹھ گئے۔
تخریج : المحلّٰی لابن حزم ٢؍١٩١

٧٩٦: عبدالرحمن بن ابی لیلیٰ کہتے ہیں ہمیں اصحاب محمد (صلی اللہ علیہ وآلہ وسلم) نے ذکر فرمایا ہے پھر اسی طرح روایت نقل کی عبداللہ کہتے ہیں اگر اپنے نفس کو متہم کرنے کا خطرہ نہ ہوتا تو میں کہتا میں نے یہ بات بیداری کی حالت میں دیکھی ہے جبکہ میں نیند میں نہ تھا پھر کہنے لگے اور عمر بن خطاب کہنے لگے اللہ کی قسم خواب میں وہی آنے والا جو عبداللہ کو آیا مجھے بھی آیا جب میں نے دیکھا کہ وہ مجھ سے آگے بڑھ گئے ہیں تو میں خاموش ہوگیا۔ اس اثر سے یہ بات واضح ہوتی ہے کہ اذان بلالی تلقین عبداللہ بن زید (رض) سے تھی۔ پس ان کی اقامت دو دو بار ہے۔ یہ روایت پہلی روایات کے مخالف ہے۔ پھر حضرت بلال (رض) سے مروی ہے کہ وہ جناب رسول اللہ (صلی اللہ علیہ وآلہ وسلم) کے بعد اذان بھی دو دو کلمات اور اقامت بھی دو دو کلمات سے کہتے تھے۔ یہ اس چیز کی نفی پر دلالت کرتی ہے جس کو حضرت انس (رض) نے روایت کیا ہے۔
تخریج : المحلی ابن حزم ٢؍١٩٢۔
نوٹ : نمبر ١: اس اثر سے صاف ظاہرہو رہا ہے کہ بلال نے عبداللہ بن زید کی تعلیم پر جناب نبی اکرم (صلی اللہ علیہ وآلہ وسلم) کے حکم سے اذان دی پس انھوں نے اقامت دو دو مرتبہ کہی یہ حدیث اول کے خلاف ہے اور یہ روایت روایت انس (رض) کے مقابلے میں مفصل ہے وہ مجمل ہے اس کو اس پر محمول کیا جائے گا۔
نمبر ٢: دو دو مرتبہ کلمات سے اذان دیتے تھے اور اقامت بھی دو دو مرتبہ کہتے رہے پس یہ فعل بھی انس والی روایت کی نفی کرتا ہے۔

٧٩٧: اسود نے نقل کیا کہ بلال اذان کے کلمات دو دو مرتبہ ور اقامت بھی دو دو مرتبہ کہتے تھے۔
تخریج : عبدالرزاق ١؍٤٦٢‘ دارقطنی ١؍٢٥٠۔

٧٩٨: عمران بن مسلم نے بیان کیا کہ سوید بن غفلہ کہتے ہیں کہ میں نے بلال کو خود دو دو مرتبہ کلمات سے اذان و اقامت کہتے سنا۔
تخریج : دارقطنی ١؍٢٥٩‘ طبرانی فی مسند الشامیین مثلہ ٢؍٢٧٧۔
یہ بلال اقامت میں انس (رض) کی روایت کے خلاف نقل کرتے ہیں اور حدیث ابو محذورہ (رض) میں ہے کہ جناب رسول اللہ (صلی اللہ علیہ وآلہ وسلم) نے ان کو اقامت دو دو مرتبہ سکھائی ہے۔

٧٩٩: عثمان نے سائب اور ام عبدلاملک سے نقل کیا کہ دونوں نے ابو محذورہ سے اسی طرح سنا ہے۔
تخریج : نسائی ١؍١٠٤۔

٨٠٠: عثمان نے سائب اور امّ عبدالملک سے نقل کیا کہ دونوں نے ابو محذورہ (رض) کو کہتے سنا کہ مجھے جناب رسول اللہ (صلی اللہ علیہ وآلہ وسلم) نے اقامت اس طرح سکھائی دو دو مرتبہ اللہ اکبر اللہ اکبر اشہد ان لا الٰہ الا اللہ اشہد ان لا الٰہ الا اللہ اشہد ان محمدا رسول اللہ اشہد ان محمدا رسول اللہ حی علی الصلاۃ حی علی الصلاۃ حی علیٰ الفلاح حی علیٰ الفلاح قدقامت الصلاۃ قدقامت الصلاۃ اللہ اکبر اللہ اکبر لا الٰہ الا اللہ ۔ البتہ ابوبکر راوی نے اپنی روایت میں قدقامت الصلاۃ کے کلمات نقل نہیں کئے۔
تخریج : ابو داؤد ١؍٧٢‘ ترمذی فی الصلاۃ باب ٢٨‘ دارمی فی الصلاۃ باب ٧‘ مسند احمد ٣؍٤٠٩۔

٨٠١: مکحول نے عبداللہ بن محیریز سے بیان کیا کہ ابو محذورہ (رض) نے مجھے بتلایا کہ جناب رسول اللہ (صلی اللہ علیہ وآلہ وسلم) نے مجھے اقامت کے سترہ کلمات سکھائے اللہ اکبر ‘ اللہ اکبر ‘ اللہ اکبر ‘ اللہ اکبر پھر روح کی روایت کی طرح روایت نقل کی ہے۔
تخریج : ابو داؤد ١؍٧٣‘ ترمذی ١؍٤٨۔

٨٠٢: موسیٰ بن داؤد نے ہمام سے پھر انھوں نے اپنی سند سے اسی طرح روایت نقل کی ہے۔
تخریج : دارقطنی ١؍٢٤٥۔

٨٠٣: ابن محیریز نے ابو محذورہ (رض) سے انھوں نے جناب رسول اللہ (صلی اللہ علیہ وآلہ وسلم) سے اسی طرح روایت نقل کی ہے۔
تخریج : نسائی ١؍١٠٣۔

٨٠٤: حدثنا ابوالولید ‘ ابو عمرالحوضی دونوں نے نقل کیا کہ حدثنا ہمام پھر اس نے اپنی سند سے روایت نقل کی ہے۔
تخریج : المعجم الکبیر ٧؍١٧٠۔

٨٠٥: مکحول کہتے ہیں کہ ابن محیریز نے مجھے بیان کیا کہ انھوں نے ابو محذورہ کو یہ فرماتے سنا کہ مجھے جناب رسول اللہ (صلی اللہ علیہ وآلہ وسلم) نے اقامت کے سترہ کلمات سکھائے۔ ان آثار کے معانی کو درست رکھنے کیلئے ضروری ہے کہ اقامت کو اذان کی طرح تسلیم کیا جائے۔ جیسا کہ ہم نے بیان کردیا کیونکہ حضرت بلال (رض) کو جس بات کا حکم دیا گیا اس میں اختلاف ہے۔ پھر وہ اقامت میں جفت کلمات پر قائم رہے ‘ یہ تواتر سے ثابت ہے۔ اس سے معلوم ہوگیا کہ ان کو اسی کا حکم دیا گیا۔ حضرت ابومحذورہ (رض) کی روایت میں بھی جفت کلمات ہیں۔ پس اقامت میں بھی جفت ہونا ثابت ہوگیا۔ البتہ نظر و فکر کے لحاظ سے ہم دیکھتے ہیں جو لوگ اقامت منفرد مانتے ہیں وہ اس کے لیے یہ دلیل دیتے ہیں جو ہم نے اس باب کی ابتداء میں ذکر کردی کہ اذان کے بعض کلمات میں تکرار ہے اور بعض کلمات دو مرتبہ تکرار کے علاوہ ہیں تو اس سے انھوں نے استدلال کیا کہ اذان کے کلمات جو دو مرتبہ مذکور ہیں وہ پہلی مرتبہ دوبارہ آئے ہیں تو دوسری مرتبہ وہ مفرد لائے گئے اور جو دو مرتبہ نہیں آئے اور مفرد لائے گئے باقی اقامت تو اختتام اذان کے بعد کہی جاتی ہے۔ پس اس کا حکم باقی اذان کی طرح ہونا چاہیے۔ اس دلیل پر ایک اعتراض ہوتا ہے کہ جن الفاظ سے اقامت کا اختتام ہوتا ہے وہ تو نصف نہیں ہوتے پس یہ جائز ہونا چاہیے کہ اس کا مقصود اس سے نصف ہو۔ جب یہ نصف نہیں تو اس کا حکم تمام طاق اشیاء کی طرف ہونا چاہیے کہ جب ان کا بعض حصہ لازم ہوجاتا ہے تو تمام وجوب کے ساتھ واجب ہوجاتی ہے۔ پس اذان و اقامت کا اختتام لا الٰہ الا اللہ کے ساتھ برابر منفرد طور پر ہوتا ہے تو اس میں ایک معنی کے دوسرے کے لیے ثابت ہونے کی کوئی دلیل نہ رہی۔ پھر ہم نے نظری طور پر توجہ ڈالی تو ہمیں یہ ظاہر ہوا کہ اس میں تو کسی کو اختلاف نہیں ہے کہ اقامت میں فلاحین کے بعد اللہ اکبر ‘ اللہ اکبر دو مرتبہ آتا ہے اور یہ اذان و اقامت میں برابر ہے۔ اسے اذان کا نصف کر کے نہیں لایا جاتا پس جب یہ اقامت میں ایسا کلمہ ہے کہ اس کا نصف اذان کے مماثل ہے تو بقیہ اقامت بھی اذان کے برابر ہونی چاہیے۔ پس جب یہ اقامت میں نصف نہیں ہوتے تو اقامت کے بعد یہ کلمات بھی اذان کے لحاظ سے ایک جیسے ہونے چاہیں اور اس سے کوئی کلمہ چھوڑا نہ جائے اس سے یہ بات پایہ ثبوت کو پہنچ گئی کہ اقامت کے کلمات دو دو بار ہیں۔ حضرت امام ابوحنیفہ ‘ ابویوسف و محمد (رح) کا یہی مسلک ہے۔ صحابہ کرام (رض) کی ایک جماعت سے یہ منقول ہے۔ آثارِ صحابہ درج کئے جاتے ہیں۔
تخریج : دارمی ١؍١٨٨۔
اللغات : ان بارہ روایات سے یہ بات ثابت ہو رہی ہے کہ اقامت اذان کی طرح ہے حضرت بلال کو حکم کئے جانے والی روایت مجمل ہے اور اس میں اختلاف بھی ہے اور جناب رسول اللہ (صلی اللہ علیہ وآلہ وسلم) کی وفات کے بعد حضرت بلال کا بالالتزام دو دو مرتبہ کی اقامت کو لازم کرلینا متواتر روایات سے ثابت ہے پس معلوم ہوا کہ ان کو اسی کا حکم ملا تھا اور مزید براں حضرت ابو محذورہ (رض) کی روایت میں بھی دو دو مرتبہ اقامت کا ثبوت ہے جس سے یہ حقیقت مسلمہ طور پر ثابت ہوگئی کہ اقامت اذان کی طرح دو دو مرتبہ کہی جائے گی۔
فریق ثانی کی عقلی دلیل کا جواب واما وجہ :
ان کی عقلی دلیل کا حاصل یہ ہے اذان کے جو کلمات مقرر آتے ہیں وہ ابتداء کے مقابلے میں نصف استعمال ہوتے اور اقامت بھی اذان کے بعد پس یہ بھی نصف ہوگئی قدقامت پہلے مذکور نہیں وہ اسی طرح رہے گی۔
الجواب : آپ کا یہ قاعدہ تو تب چلتا جب وہ ایک چیز ہوتی اور ساتھ متصل ہوتی یہاں تو اذان اعلام عام ہے اور یہ اعلام خاص ہے اور اس کے مکمل انقطاع کے بعد ہے اس کا حکم الگ ہونا ہی مناسب ہے اور ایک اور جہت سے نظر فرمائیں دونوں کا اختتام لا الٰہ الا اللہ پر ہوتا ہے پس بقیہ کلمات میں بھی یکسانیت ہونی چاہیے۔
ایک شبہ :
لاالٰہ کا کلمہ تو غیر منقسم ہے پس جہاں آدھا بولا جائے گا تمام مراد ہوگا اقامت کا کلمہ گرچہ آدھا بولا گیا مگر پورا مراد ہے۔
الجواب : یہ اذان و اقامت میں برابر ہے اس کو غیر منقسم کہہ کر نصف سے کل واجب کرنا یا نصف بول کر کل واجب کرنا ان میں سے کسی کے لیے کوئی دلیل نہیں جیسا اذان میں استعمال ہوتا ہے اسی طرح اقامت میں استعمال کیا گیا ہے۔
ایک اور نظر :
حی علی الصلاۃ ‘ حی علی الفلاح کے بعد اللہ اکبر دو مرتبہ لایا جاتا ہے اس میں کسی کو اختلاف نہیں حالانکہ اس میں تنصیف ممکن ہے جب ہم نے غور کیا تو تکبیر و اذان میں اسے دو مرتبہ ہی پایا پس اقامت کے بقیہ کلمات بھی اسی طرح مستعمل ہونے چاہئیں جیسا کہ قدقامت الصلاۃ میں جواز تنصیف کے باوجود اس کو دو مرتبہ لایا جاتا ہے۔ یہ اس بات کی واضح دلیل ہے کہ دونوں کا حکم برابر ہے کہ جیسے اذان مثنیٰ مثنیٰ ہے تکبیر بھی مثنیٰ مثنیٰ ہے یہی ہمارے ائمہ ثلاثہ ابوحنیفہ ‘ ابو یوسف ‘ محمد (رح) کا قول ہے اور یہ بات ہم خود بنا نہیں رہے صحابہ کرام کی جماعت بتارہی ہے ملاحظہ ہو۔

٨٠٦: عبیدمولیٰ سلمہ بن الاکوع کہتے ہیں کہ حضرت سلمہ بن اکوع (رض) اقامت دو مرتبہ کہتے تھے۔
تخریج : ابن ابی شیبہ ١؍١٨٧۔

٨٠٧: حماد نے بیان کیا کہ ابراہیم کہتے ہیں کہ حضرت ثوبان (رض) مثنی مثنیٰ اذان دیتے اور مثنیٰ مثنیٰ اقامت کہتے۔

٨٠٨: عبدالعزیز بن رفیع نے کہا کہ میں نے ابو محذورہ (رض) کو سنا کہ وہ مثنیٰ مثنیٰ اذان اور اقامت کہتے تھے۔
اور یہی بات صحابہ کرام (رض) کے علاوہ جلیل القدر تابعی مجاہد سے بھی ثابت ہے۔ ملاحظہ ہو۔
یحییٰ بن سعید ‘ مجاہد (رح) سے نقل کرتے ہیں کہ اقامت ایک ایک مرتبہ یہ امراء نے تخفیف کی ہے اور یہ تو ایجاد کردہ چیز ہے اصل اس میں مثنیٰ مثنیٰ یعنی دو دو مرتبہ ہے۔
حاصل روایات : عموماً اپنی طرف سے نظر پیش کی جاتی ہے یہ پہلا موقعہ ہے کہ فریق مخالف کی طرف سے نظر پیش کر کے پھر اس کی نظر سے تردید کی ہے اور عموماً باب کے آخر میں نظر طحاوی لائے ہیں جبکہ یہاں باب کے آخر میں تائیدی روایات لائے۔

٨٠٩: ام عبدالملک نے بیان کیا کہ ابو محذورہ (رض) بیان کرتے ہیں کہ مجھے رسول اللہ (صلی اللہ علیہ وآلہ وسلم) نے صبح کی پہلی اذان میں الصَّلَاۃُ خَیْرٌ مِنَ النَّوْمِ کے کلمات سکھائے۔
تخریج : ابو داؤد فی الصلاۃ باب ٢٨‘ نمبر ٥٠٠؍٥٠٤‘ نسائی فی الذان باب ٦‘ ١٥‘ ابن ماجہ فی الاذان باب ٣‘ ١‘ دارمی فی الصلاۃ باب ٥‘ مالک فی النداء نمبر ٨‘ مسند احمد ٣؍٤٠٨‘ ٤٠٩‘ ٤؍٤٣۔
امام طحاوی (رح) فرماتے ہیں بعض لوگوں نے نماز صبح میں ” الصلوٰۃ خیر من النوم “ کو مکروہ قرار دیا ہے اور انھوں نے عبداللہ بن زید (رض) کی اس روایت سے استدلال کیا جس میں آپ (صلی اللہ علیہ وآلہ وسلم) کے حکم سے انھوں نے بلال (رض) کو اذان سکھائی۔ علماء کی دوسری جماعت نے اس بات سے اختلاف کرتے ہوئے کہا کہ اذان فجر میں اس کا کہنا مستحب ہے۔ یہ فلاحین کے بعد کہا جائے گا اور ان کی دلیل یہ ہے کہ اگرچہ یہ عبداللہ بن زید (رض) کی روایت میں نہیں مگر یہ کلمہ آپ (صلی اللہ علیہ وآلہ وسلم) نے حضرت ابومحذورہ (رض) کو اذان فجر کے لیے تعلیم دیا اور یہ اس کے بعد کا واقعہ ہے۔

خلاصہ الزام : عطاء بن ابی رباح اور طاؤس نے تثویب فجر کو مکروہ قرار دیا ہے فریق ثانی ائمہ اربعہ اور جمہور فقہاء نے اس کو مسنون قرار دیا ہے۔
فریق اوّل :
بقول امام طحاوی (رح) حضرت عبداللہ بن زید بن عبد ربہ (رض) کی روایت جو سابقہ ابواب اذان و اقامت میں گزری اس سے استدلال کیا چونکہ اس میں تثویب نہیں پس اس کا کہنا مکروہ ہے۔
فریق نمبر ٢إ
الجواب : عبداللہ بن زید (رض) کی روایت میں اگر موجود نہیں تو دیگر روایات میں اس کا وجود اس کے ثبوت کے لیے کافی ہے جناب نبی اکرم (صلی اللہ علیہ وآلہ وسلم) نے اذان عبداللہ کی تصویب فرما کر انھیں بلال کو تعلیم کا حکم دیا اور آپ (صلی اللہ علیہ وآلہ وسلم) نے ابو محذورہ (رض) کو اذان فجر میں اس کا حکم دیا پس مکروہ کہنے کا کوئی جواز نہیں۔

٨١٠: عبدالعزیز بن رفیع کہتے ہیں کہ میں نے خود ابو محذورہ کو کہتے سنا کہ میں نو عمر بچہ تھا مجھے جناب رسول اللہ (صلی اللہ علیہ وآلہ وسلم) نے فرمایا کہو : الصَّلَاۃُ خَیْرٌ مِنَ النَّوْمِ ، الصَّلَاۃُ خَیْرٌ مِنَ النَّوْمِ ۔ امام طحاوی (رح) فرماتے ہیں کہ جب جناب رسول اللہ (صلی اللہ علیہ وآلہ وسلم) نے خود ابومحذورہ (رض) کو یہ کلمات سکھائے تو یہ عبداللہ بن زید (رض) کی روایت پر اضافہ ہوا اور اس کو اختیار کرنا لازم ہوا اور آپ (صلی اللہ علیہ وآلہ وسلم) کے بعد اصحاب رسول (صلی اللہ علیہ وآلہ وسلم) نے اس کو اپنایا۔
تخریج : دارقطنی ١؍٢٤٤۔
امام طحاوی (رح) فرماتے ہیں جب جناب رسول اللہ (صلی اللہ علیہ وآلہ وسلم) نے خود سکھائے تو ان کلمات سے روایت عبداللہ بن زید بن عبد ربہ پر صحیح سند سے اضافہ ثابت ہوگیا ثقہ کا اضافہ مقبول ہے پس اس کا استعمال ضروری ہے آپ (صلی اللہ علیہ وآلہ وسلم) کے صحابہ نے آپ کی وفات کے بعد اس کو استعمال کیا اس کی شاہد یہ روایات ہیں۔

٨١١: نافع نے بیان کیا کہ ابن عمر (رض) کہتے ہیں اذان اول میں الفلاح کے بعد الصَّلَاۃُ خَیْرٌ مِنَ النَّوْمِ دو مرتبہ تھا۔
تخریج : عبدالرزاق ١؍٤٧٣ باختلاف یسیر۔

٨١٢: یحییٰ بن یحییٰ نے کہا کہ ہشیم نے اپنی سند سے روایت نقل کی ہے۔
تخریج : دارقطنی ١؍٢٥١۔

٨١٣: محمد بن سیرین نے بیان کیا کہ حضرت انس (رض) کہتے ہیں فجر کی اذان میں تثویب یہ ہے کہ جب مؤذن حَیَّ عَلَی الْفَلَاحِ سے فارغ ہوجائے تو دو مرتبہ الصَّلَاۃُ خَیْرٌ مِنَ النَّوْمِ کا کلمہ کہا جائے۔ پس یہ ابن عمر اور انس (رض) ہیں جو خبر دے رہے ہیں کہ یہ کلمات وہ ہیں جن کو مؤذن اذانِ صبح میں پڑھا کرتا تھا۔ پس ان روایات سے یہ ثابت ہوگیا اور یہ امام ابوحنیفہ ‘ ابویوسف اور محمد (رح) کا قول ہے۔
تخریج : بیہقی فی الکبرٰی ١؍٦٢٣۔
خلاصہ روایات : ان روایات ثلاثہ سے ثابت ہو کہ اذان صبح میں الفلاح کے بعد الصَّلَاۃُ خَیْرٌ مِنَ النَّوْمِ کا کلمہ جناب رسول اللہ (صلی اللہ علیہ وآلہ وسلم) اور زمانہ صحابہ سے ثابت ہے یہی ہمارے ائمہ ابوحنیفہ ‘ ابو یوسف ‘ محمد (رح) کا مسلک ہے۔
نوٹ : باب کی روایت سے الصَّلَاۃُ خَیْرٌ مِنَ النَّوْمِ کا ثبوت جو زبان نبوت سے ثابت ہوگیا تو جو لوگ اس کو احداث عمری کہتے ہیں ان کو حشر کی صبح سے ڈرنا چاہیے۔
` بَابُ التَّأْذِیْنِ لِلْفَجْرِ ، أَیُّ وَقْتٍ ہُوَ ؟ بَعْدَ طُلُوْعِ الْفَجْرِ ، أَوْ قَبْلَ ذٰلِکَ ؟`
فجر کی اذان کس وقت کہی جائے ؟
فریق نمبر ١: امام ابو یوسف ‘ شافعی ومالک و احمد ‘ جمہور کے نزدیک اذان فجر طلوع صبح صادق سے پہلے جائز ہے۔
فریق نمبر ٢: امام ابوحنیفہ ‘ محمد ‘ سفیان ثوری ‘ حسن بصری (رح) کے ہاں اذان طلوع فجر صادق سے پہلے درست نہیں لوٹانا واجب ہے۔
فریق نمبر ١ کا مؤقف اذان فجر طلوع صبح صادق سے پہلے درست ہے۔

٨١٤: سالم نے اپنے والد سے نقل کیا کہ جناب رسول اللہ (صلی اللہ علیہ وآلہ وسلم) نے فرمایا کہ بلال رات کو اذان دے دیتا ہے پس تم اس وقت تک کھاتے اور پیتے رہو یہاں تک کہ ابن ام مکتوم اذان دیں ابن شہاب کہتے ہیں یہ ابن ام مکتوم نابینا تھے یہ اس وقت تک اذان نہ دیتے جب تک لوگ ان کو تاکید سے أَصْبَحْتَ أَصْبَحْتَ کہتے۔ یعنی تم نے صبح کردی تم نے صبح کردی۔
تخریج : بخاری فی الاذان باب ١١‘ ١٢‘ ١٣‘ ترمذی فی المواقیت باب ٣٥‘ نمبر ٢٠٣‘ نسائی فی الاذان باب ٩‘ مالک فی النداء حدیث نمبر ١٤؍١٥‘ مسند احمد ٢؍٩‘ ٥٧۔

٨١٥: سالم نے حضرت نبی اکرم (صلی اللہ علیہ وآلہ وسلم) سے اسی طرح روایت نقل کی اور ابن عمر کا درمیان میں ذکر نہیں کیا۔ (یہ منقطع روایت ہے)
تخریج : موطا مالک ١؍٢٥۔

٨١٦: سالم نے نقل کیا کہ ابن عمر (رض) نے جناب نبی اکرم (صلی اللہ علیہ وآلہ وسلم) سے اسی طرح روایت نقل کی ہے۔
تخریج : نسائی ١؍١٠٥۔

٨١٧: عبدالعزیز نے زہری سے پھر انھوں نے اپنی سند سے روایت نقل کی ہے۔
تخریج : مسند الطیاسی ١؍٢٥٠۔

٨١٨: سالم بن عبداللہ نے کہا کہ کہ میں نے عبداللہ کو یہ کہتے سنا کہ جناب نبی اکرم (صلی اللہ علیہ وآلہ وسلم) نے فرمایا بیشک بلال رات کو اذان دے دیتا ہے۔ تم کھاتے پیتے رہو یہاں تک کہ ابن ام مکتوم اذان دیں۔
تخریج : مسند العدنی۔

٨١٩: سالم نے اپنے والد سے انھوں نے جناب نبی اکرم (صلی اللہ علیہ وآلہ وسلم) سے اسی طرح روایت نقل کی ہے۔

٨٢٠: عبداللہ بن دینار نے بیان کیا کہ ابن عمر (رض) نے جناب نبی اکرم (صلی اللہ علیہ وآلہ وسلم) سے اسی طرح روایت نقل کی ہے۔
تخریج : مسند احمد ٢؍٧٣۔

٨٢١: مالک نے بیان کیا کہ عبداللہ بن دینار نے اپنی سند سے اسی طرح روایت نقل کی ہے۔
تخریج : نسائی ١؍١٠٥۔

٨٢٢: مالک و شعبہ نے عبداللہ بن دینار سے بیان کہ انھوں نے اپنی سند سے اسی طرح روایت نقل کی ہے البتہ اتنا فرق ہے کہ شعبہ نے ” حَتّٰی یُنَادِیَ بِلَالٌ أَوْ ابْنُ أُمِّ مَکْتُوْمٍ “ شک کے ساتھ لکھا ہے۔

٨٢٣: قاسم نے کہا کہ حضرت عائشہ (رض) نے جناب رسول اللہ (صلی اللہ علیہ وآلہ وسلم) سے اسی طرح روایت نقل کی ہے اور اس میں شک کا لفظ بھی نہیں ۔ حضرت عائشہ (رض) کہتی ہیں ان کے درمیان بس اتنا سا فاصلہ ہوتا کہ ایک اذان کی جگہ پر چڑھتا اور دوسرا اترتا۔
تخریج : نسائی فی الاذان باب ١٠‘ مسند احمد ٦؍٤٣٣۔

٨٢٤: شعبہ کہتے ہیں میں نے خبیب بن عبدالرحمن کو اپنی پھوپھی انیسہ (رض) سے بیان کرتے سنا کہ جناب نبی اکرم (صلی اللہ علیہ وآلہ وسلم) نے فرمایا بلال یا ابن ام مکتوم رات کو ہی اذان دے دیتے ہیں (یعنی ابھی رات باقی ہوتی ہے کہ وہ اذان دے دیتے ہیں) پس تم کھاتے پیتے رہو یہاں تک کہ بلال یا ابن ام مکتوم اذان دیں جب یہ اذان والا اترتا تو دوسرا چڑھنے کا ارادہ کرتا تو لوگ اسے چمٹ جاتے اور کہتے تم اسی طرح رہو یہاں تک کہ سحر ہوجائے ۔
تخریج : المعجم الکبیر ٢٤؍١٩١‘ بیہقی ١؍٥٦١۔

٨٢٥: شعبہ نے اپنی سند سے اسی طرح روایت نقل کی اور اس میں یہ اضافہ ہے کہ انیسہ (رض) نے آپ کے ساتھ حج کیا تھا ان دونوں مؤذنوں کے درمیان بس اتنا فاصلہ تھا کہ ایک منبر پر چڑھتا اور دوسرا اترتا تھا۔
تخریج : طبرانی کبیر ٢٤؍١٩١۔

٨٢٦: منصور نے خبیب بن عبدالرحمن عن عمتہ انیسہ (رض) سے نقل کیا جناب رسول اللہ (صلی اللہ علیہ وآلہ وسلم) نے فرمایا ابن ام مکتوم رات کو اذان دے دیتے ہیں تم کھاؤ پیو یہاں تک کہ بلال کی اذان سنو۔
تخریج : نسائی ١؍١٠٥۔

٨٢٧: شعبہ نے سوادہ قشیری سے سنا (یہ ان کا امام تھا) کہ میں نے سمرہ بن جندب (رض) کو فرماتے سنا کہ جناب رسول اللہ (صلی اللہ علیہ وآلہ وسلم) نے فرمایا تمہیں بلال کی اذان دھوکا میں نہ رکھے اور نہ یہ (صبح کاذب کی) سفیدی یہاں تک کہ فجر ظاہر ہو اور صبح صادق پھوٹ پڑے۔
تخریج : مسلم فی الصیام نمبر ٤٤‘ مسند احمد ٤؍٢٢۔

٨٢٨: سوادہ القشیری نے سمرہ (رض) سے انھوں نے جناب نبی (صلی اللہ علیہ وآلہ وسلم) اسی طرح کی روایت نقل کی ہے۔ امام طحاوی (رح) فرماتے ہیں کہ علماء کی ایک جماعت کے ہاں فجر کی اذان اس کا وقت داخل ہونے سے پہلے دی جاسکتی ہے۔ اس سلسلہ میں انھوں نے ان روایات کو اپنا مستدل بنایا ہے۔ ان حضرات میں امام ابو یوسف (رح) بھی شامل ہیں۔ مگر دوسرے حضرات نے ان سے اختلاف کرتے ہوئے فرمایا کہ فجر کے لیے بھی وقت کے آجانے کے بعد اذان دی جائے جیسا کہ دیگر نمازوں کے لیے دخولِ وقت کے بعد اذان دی جاتی ہے اور انھوں نے دلیل پیش کرتے ہوئے حضرت بلال (رض) کی اذان والی روایت کہ وہ رات کو اذان دیتے تھے کا جواب یہ دیا کہ وہ نماز کے لیے نہ تھی ‘ روایت ملاحظہ ہو۔
تخریج : مسند احمد ٥؍٧‘ مسلم ١؍٣٥٠‘ المعجم الکبیر ٧؍٢٣٦۔
حاصل روایات : ان تمام روایات میں اکثر روایات میں بلال (رض) کے متعلق رات کو اذان دینا اور ایک روایت میں ابن ام مکتوم کا رات کو اذان دینا منقول ہے یہ اذان فجر تھی اور وقت سے پہلے دی جاتی تھی پس اس سے ثابت ہوگیا کہ فجر کا وقت داخل ہونے سے پہلے اذان فجر جائز ہے امام ابو یوسف (رح) اور دیگر ائمہ ثلاثہ اس بات کے قائل ہوئے۔
فریق ثانی کا مؤقف :
اذان فجر بھی وقت سے پہلے درست نہیں جیسا کہ دیگر نمازوں کے اوقات داخل ہونے پر وہ اذانیں دی جاتی ہیں۔
فریق اوّل کا جواب :
حضرت بلال کی وہ اذان نماز کے لیے نہ تھی بلکہ دیگر مقاصد کے لیے تھی اور مندرجہ ذیل روایات سے اس کی نشاندہی ہوتی ہے۔

٨٢٩: شجاع نے کہا یہ الفاظ علی بن معبد کے ہیں انھوں نے اپنی سند سے روایت بیان کی۔
تخریج : مسند احمد ١؍٤٣٥۔

٨٣٠: اسباط بن محمد نے اپنی سند سے روایت نقل کی ہے۔
تخریج : نسائی ١؍١٠٥۔

٨٣١: نعیم نے کہا ابن المبارک نے اپنی سند سے روایت نقل کی ہے۔
تخریج : المعجم الکبیر ١٠؍٢٣٠۔

٨٣٢: ابو عثمان نہدی نے عبداللہ بن مسعود (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے فرمایا بلال کی اذان تمہیں سحری سے نہ ہرگز نہ روکے وہ اس لیے اذان دیتے ہیں تاکہ تمہارا غائب گھر واپس لوٹ آئے اور قیام کرنے والا خبردار ہوجائے اور کہا کیا فجر یا صبح اس طرح اور اس طرح نہیں ہے اور انھوں نے اپنی دونوں انگلیوں کو جمع کیا اور جدا کیا ” زہیر کی روایت میں خاص طور پر یہ الفاظ ہیں “ : ” رَفَعَ زُہَیْرٌ یَدَہٗ وَخَفَضَہَا حَتّٰی یَقُوْلَ ھٰکَذَا، أَوْ مَدَّ زُہَیْرٌ یَدَیْہِ عَرْضًا “ زہیر نے عرض میں اپنے دونوں ہاتھوں کو دراز کیا (صبح صادق کو سمجھانے کے لئے۔
حاصل روایت : اس روایت سے صاف معلوم ہوگیا کہ اذان بلال اس لیے تھی تاکہ سونے والا بیدار ہوجائے اور جو ڈیوٹیوں پر مقرر ہیں وہ واپس لوٹ آئیں نماز کے لیے نہ تھی۔
تخریج : بخاری فی الاذان باب ١٣‘ مسلم فی الصیام نمبر ٣٩‘ ابو داؤد فی الصوم باب ١٨‘ نمبر ٢٣٤٧‘ نسائی فی الاذان باب ١١‘ بیہقی فی السنن الکبرٰی ٤؍٢١٨۔
ابن عمر (رض) سے بھی روایات ہیں جو اس پر دال ہیں۔

٨٣٣: موسیٰ بن اسماعیل نے حماد بن سلمہ سے اسی طرح روایت نقل کی ہے۔
تخریج : ابو داؤد ١؍٧٩۔

٨٣٤: نافع ‘ ابن عمر (رض) سے روایت کرتے ہیں کہ حضرت بلال (رض) نے ایک مرتبہ طلوع فجر سے پہلے اذان دے دی تو ان کو جناب نبی اکرم (صلی اللہ علیہ وآلہ وسلم) نے حکم فرمایا کہ وہ دوبارہ لوٹ کر یہ اعلان کردیں : أَلَا إِنَّ الْعَبْدَ قَدْ نَامَ بندے کو نیند میں معلوم نہیں رہا چنانچہ انھوں نے لوٹ کر یہ اعلان کیا : أَلَا إِنَّ الْعَبْدَ قَدْ نَامَ ۔ یہ ابن عمر (رض) ہیں جو جناب رسول اللہ (صلی اللہ علیہ وآلہ وسلم) سے یہ نقل کر رہے ہیں حالانکہ وہ ان حضرات میں سے ہیں جن کی روایت یہ ہے کہ بلال (رض) رات کو اذان دیتے ہیں۔ پس تم کھاتے اور پیتے رہو ‘ یہاں تک کہ ابن امّ مکتوم (رض) اذان دیں۔ پس اس سے ثابت ہوگیا کہ طلوع صبح صادق سے پہلے جس اذان کو مباح قرار دیا گیا تھا وہ نماز کے علاوہ دیگر عمل کے لیے تھی اور جس اذان کے طلوع فجر سے پہلے ہوجانے پر آپ نے اعتراض کیا وہ نماز کے لیے تھی اور ابن عمر (رض) نے حضرت حفصہ (رض) سے بھی اسی طرح روایت کیا ہے۔
تخریج : ابو داؤد فی الصلاۃ باب ٤٠‘ نمبر ٥٣٢‘ ترمذی فی الصلاۃ باب ٣٥‘ نمبر ٢٠٣‘
یہی ابن عمر (رض) یہاں یہ روایت کر رہے ہیں انھوں نے باب کے شروع میں وہ روایات نقل کی ہیں جن میں یہ مذکور ہے : ”إِنَّ بِلَالًا یُنَادِیْ بِلَیْلٍ فَکُلُوْا وَاشْرَبُوْا حَتّٰی یُنَادِیَ ابْنُ أُمِّ مَکْتُوْمٍ “ اس سے یہ بات ثابت ہوگئی کہ ان کی جو اذان طلوع فجر سے پہلے تھی اس کا انھیں حکم ملا تھا وہ نماز کے لیے نہ تھی اور وہ اذان جس کے متعلق نکیر کی گئی وہ فجر کے لیے تھی جس کو وہ پہلے غلطی سے دے بیٹھے تو انھیں غلطی کا اعلان کرنے کا حکم ہوا بلکہ حضرت ابن عمر (رض) نے حضرت حفصہ (رض) سے بھی یہ نقل کیا ہے۔

٨٣٥: حضرت ابن عمر (رض) ، حضرت حفصہ (رض) سے نقل کرتے ہیں کہ جناب نبی اکرم (صلی اللہ علیہ وآلہ وسلم) کی عادت مبارکہ یہ تھی کہ جب مؤذن فجر کی اذان دے دیتا تو آپ فجر کی دو رکعت پڑھتے پھر مسجد کی طرف نکلتے اور کھانا حرام ہوجاتا (سحری کے لئے) اور صبح صادق جب تک طلوع نہ ہوتی آپ اذان نہ دیتے۔ یہ ابن عمر (رض) جو حفصہ (رض) کے متعلق خبر دے رہے ہیں کہ مؤذن نمازِ فجر کے لیے اذان طلوع فجر کے بعد دیا کرتے تھے اور جناب رسول اللہ (صلی اللہ علیہ وآلہ وسلم) نے حضرت بلال (رض) کو اذان لوٹانے کا حکم فرمایا اور اس اعلان کا حکم فرمایا ” الا ان العبد قد نام “ کہ بندہ کو نیند آگئی تھی۔ یہ بات اس عادت کو ثابت کرتی ہے کہ فجر سے پہلے اذان ان کے ہاں معروف نہ تھی۔ اگر لوگ اس کو جانتے ہوتے تو دوبارہ اعلان کی چنداں حاجت نہ تھی۔ ہمارے ہاں اس اعلان کا مطلب یہ تھا کہ اللہ تعالیٰ کو معلوم ہے کہ وہ ان کو مطلع کریں کہ اب تک رات کا وقت باقی ہے تاکہ جو شخص رات کو نماز ادا کرنے کا ارادہ رکھتا ہو وہ ادا کرے اور ان چیزوں کے استعمال سے پہلے اپنے ہاتھ کو نہ روکے جن سے روزہ دار بچتا ہے اور اس میں ایک احتمال یہ بھی ہے کہ حضرت بلال (رض) یہ گمان کر کے اذان دیتے ہوں کہ فجر طلوع ہوچکی مگر نگاہ کی کمزوری کی وجہ سے اسی طلوع فجر کو اچھی طرح معلوم نہ کرسکتے تھے۔ دلیل یہ روایات ہیں۔
تخریج : بخاری فی الاذان باب ١٢‘ مسلم فی المسافرین نمبر ٨٧‘ ترمذی فی الصلاۃ باب ٢٠٣‘ نمبر ٤٣٣‘ نسائی فی الصالۃ باب ٢٩‘ مالک فی الصلاۃ نمبر ٢٩‘ مسند احمد ٦؍٢٨٤۔
نوٹ : یہ ابن عمر (رض) ہیں آپ کے مؤذن نے طلوع صبح صادق سے پہلے اذان دیدیدی تو آپ (صلی اللہ علیہ وآلہ وسلم) نے بلال کو فرمایا کہ وہ اذان کی جگہ لوٹ کر الا ان العبد قدنام کا اعلان کردیں اس سے یہ بات ظاہر ہوتی ہے کہ وہ فجر سے قبل اذان کو اذان نہ جانتے تھے اگر وہ اس کو اذان جانتے ہوتے تو اس اعلان کی ضرورت نہ رہتی تھی اس اذان سے اس بات کی تعلیم مقصود تھی کہ جو تہجد پڑھنا چاہتے ہیں وہ پڑھ لیں اور روزہ رکھنے والے کھانے سے ابھی نہ رکیں کیونکہ وقت کی گنجائش ابھی باقی ہے اور اس میں ایک دوسرا احتمال بھی عین ممکن ہے کہ بلال (رض) اپنے خیال میں کہ فجر طلوع ہوگئی اذان دیتے ہوں اور ضعف نگاہ کی وجہ سے طلوع فجر کو یقینی طور پر معلوم نہ کرسکتے ہوں۔ اس کی دلیل یہ روایات ہیں۔

٨٣٦ : ابن ابی داؤد نے احمد بن اشکاب سے اور انھوں نے اپنی سند سے روایت نقل کی ہے۔

٨٣٧: قتادہ نے انس (رض) سے بیان کیا کہ جناب نبی اکرم (صلی اللہ علیہ وآلہ وسلم) نے فرمایا تم کو اذان بلال سے دھوکا نہ لگ جائے ان کی بصارت میں کچھ کمزوری ہے۔ اس سے یہ دلالت مہیا ہوگئی کہ بلال (رض) طلوعِ صبح صادق کا ارادہ فرماتے۔ نظر کی کمزوری سے ‘ ان کی نظر کبھی خطاء کر جاتی تو جناب رسول اللہ (صلی اللہ علیہ وآلہ وسلم) نے ان کو حکم فرمایا کہ وہ اس کی اذان کے مطابق عمل نہ کریں کیونکہ نظر کی کمزوری سے خطاء ان کی عادت بن چکی ہے۔
حاصل روایات : اس روایت سے یہ ثابت ہوا کہ بلال تو اپنی طرف سے فجر کا ارادہ فرماتے مگر ضعف بصر کی وجہ سے بسا اوقات خطا کر جاتے اسی لیے جناب رسول اللہ (صلی اللہ علیہ وآلہ وسلم) نے ان کی اذان پر عمل نہ کرنے کا حکم دیا کیونکہ ضعف بصر کی وجہ سے خطا ان کی عادت بن گئی تھی۔

٨٣٨: عثمان نے عدی (رض) بن حاتم سے بیان کیا اور اس نے ابو ذر (رض) سے نقل کیا کہ جناب رسول اللہ (صلی اللہ علیہ وآلہ وسلم) نے بلال کو فرمایا تم اس وقت اذان دیتے ہو فجر (کاذب) چمک رہی ہوتی ہے اور یہ صبح (صادق) نہیں بیشک صبح تو اس طرح چوڑائی میں ہوتی ہے۔ اس ارشاد میں آپ (صلی اللہ علیہ وآلہ وسلم) نے بلال (رض) کو یہ بتلایا کہ تم اس چیز کے ظاہر ہونے پر اسے فجر سمجھ کر اذان دے دیتے ہو۔ مگر وہ حقیقت میں فجر نہیں ہے اور ہم نے حضرت عائشہ صدیقہ (رض) کا قول نقل کیا کہ جناب نبی اکرم (صلی اللہ علیہ وآلہ وسلم) نے فرمایا کہ بلال رات ابھی باقی ہوتی ہے کہ اذان دے دیتے ہیں ‘ پس تم سحری کھاؤ ‘ پیؤ یہاں تک کہ عبداللہ بن امّ مکتوم (رض) اذان دیں۔ حضرت امّ المؤمنین (رض) فرماتی ہیں کہ ان دونوں کی اذان میں اتنا وقفہ ہوتا کہ وہ اذان کے لیے چڑھتے اور وہ اذان دے کر اترتے۔ جب ان دونوں اذانوں میں اتنا کم فاصلہ تھا تو اس سے ثابت ہوگیا کہ وہ دونوں حضرات طلوع صبح صادق کا ارادہ رکھتے تھے۔ حضرت بلال (رض) بصارت میں کمزوری کی وجہ سے خطاء کر جاتے اور حضرت ابن امّ مکتوم صیح طلوع فجر پر اذان دیتے کیونکہ وہ اذان اسی وقت دیتے جب تک لوگ ان کو ” اصبحت ‘ اصبحت “ کہ صبح ہوگئی ‘ صبح ہوگئی نہ پکارتے۔ پھر حضرت عائشہ صدیقہ (رض) سے جناب رسول اللہ (صلی اللہ علیہ وآلہ وسلم) کی وفات کے بعد یہ مروی ہے۔
تخریج : مسند احمد ٥؍١٧٢۔
اس ارشاد میں حضرت بلال (رض) کو یہ خبر دی گئی ہے جس کو فجر خیال کر کے تم اذان دیتے ہو وہ صبح کاذب ہے صبح صادق نہیں کیونکہ صبح صادق تو افق کی چوڑائی میں ہوتی ہے اور حضرت عائشہ (رض) کی روایت ذکر کر آئے کہ جناب رسول اللہ (صلی اللہ علیہ وآلہ وسلم) نے فرمایا بلال تو رات میں اذان دے دیتا ہے پس تم اس وقت تک کھاتے پیتے رہو یہاں تک کہ ابن ام مکتوم اذان دیں حضرت عائشہ (رض) فرماتی ہیں ان کے درمیان معمولی سا فاصلہ ہوتا تھا کہ ایک اذان گاہ کے اوپر چڑھتا اور دوسرا اذان دے کر نیچے اترتا۔
اب جب ان کی اذانوں کے درمیان اس قدر قرب پایا جاتا تھا تو اس سے یہ خود ثابت ہوگیا کہ دونوں ایک ہی وقت کا قصد فرمانے والے تھے اور وہ طلاع فجر تھی بلال ضعف بصر کی وجہ سے اس میں غلطی کر جاتے اور ابن ام مکتوم اس کو پالیتے کیونکہ وہ نابینا تھے وہ اس وقت تک اذان نہ دیتے جب تک ان کو لوگ یہ نہ کہتے تم نے صبح کردی صبح کردی۔

٨٣٩: اسود کہتے ہیں کہ میں نے کہا اے ام المؤمنین آپ وتر کب ادا کرتی ہیں ؟ فرمایا جب مؤذن اذان دے چکتا ہے۔ اسود کہتے ہیں کہ وہ صبح صادق کے بعد اذان دیتے اور یہ مسجد نبوی (صلی اللہ علیہ وآلہ وسلم) کی اذان سے متعلق ہے کیونکہ اس کا سماع حضرت عائشہ صدیقہ (رض) سے مدینہ منورہ میں ہے اور حضرت عائشہ صدیقہ (رض) نے وہ روایت خود آپ (صلی اللہ علیہ وآلہ وسلم) سے سن رکھی جو ہم ذکر کر آئے۔ اس لیے فجر سے پہلے والی اذان کے چھوڑنے پر انھوں نے اعتراض نہ کیا اور ان کے علاوہ اصحاب رسول (صلی اللہ علیہ وآلہ وسلم) نے بھی انکار نہ کیا۔ اس سے یہ دلالت مل گئی کہ حضرت بلال (رض) کا مقصود بھی اذان سے اذان فجر تھی اور آپ (صلی اللہ علیہ وآلہ وسلم) کا ارشاد ((فکلوا واشربوا)) یہ طلوع فجر کے صحیح طور پر ظاہر ہونے کی بناء پر تھا۔ جب روایات اس انداز سے وارد ہیں جیسا کہ ہم نے ذکر کیا اور حضرت حفصہ (رض) کی روایت میں ہے کہ صحابہ کرام (رض) اس وقت تک اذان نہ دیتے تھے جب تک صبح صادق طلوع نہ ہوجاتی اگر یہ بات اسی طرح ہے تو امام ابویوسف (رح) نے جس معنی کو اختیار کیا وہ باطل ٹھہرا۔ بالفرض اگر وہ معنی مراد لیا جائے کہ وہ جان بوجھ کر فجر سے پہلے اذان دیتے تھے تو ابن مسعود (رض) کی جناب رسول اللہ (صلی اللہ علیہ وآلہ وسلم) والی روایت سے یہ بات کھول دی کہ وہ اذان فجر کے لیے اذان نہ تھی اور ابن امّ مکتوم (رض) کی وہ اذان جو طلوع فجر کے بعد ہوا کرتی تھی وہ اس پر شاہد ہے کہ یہ اس نماز کے وقت کی اذان ہے اگر وہ اس کی اذان کا وقت نہ ہوتا تو اس وقت اذان درست نہ ہوتی جب وہ مباح قرار دی گئی تو اس سے یہ بات خود ثابت ہوگئی کہ یہ وقت اذان فجر کا وقت تھا اور حضرت بلال (رض) کی اذان کو مقدم کرنے میں وہی احتمال ہے جو ہم ذکر کر آئے۔ اب اس کو نظری انداز سے دیکھا تو ہم نے یہ بات پائی کہ دوسری نمازوں کے لیے اذان ان کے وقت داخل ہونے کے بعد دی جاتی ہے۔ فجر میں صرف اختلاف ہے ایک جماعت نے کہا کہ اس کی اذان وقت سے پہلے دی جاسکتی ہے اور دوسری جماعت کا مؤقف یہ ہے کہ اذان بھی وقت کے داخل ہونے کے بعد دی جائے گی تو اس بیان کا تقاضا یہ ہے کہ فجر کے لیے بھی اذان اسی طرح ہو جس طرح دیگر نمازوں کے لیے ہوتی ہے۔ جب وہ دخول وقت کے بعد ہیں تو اس کے لیے بھی یہی حکم ہونا چاہیے۔ نظر و قیاس اسی کو چاہتے ہیں۔ یہی امام ابوحنیفہ ‘ ابو یوسف اور امام محمد (رح) کا قول ہے
تخریج : بیہقی ١؍٦٧٥۔
اسود (رح) کا قول :
اسود کہتے ہیں وہ صبح کی اذان دیتے اور یہ اذان مسجد نبوی کی بات ہے کیونکہ اسود نے حضرت عائشہ (رض) سے احادیث مدینہ میں ہی سنی ہیں اور حضرت عائشہ (رض) نے وہ ارشادات نبوت خود آپ (صلی اللہ علیہ وآلہ وسلم) سے سنے حضرت عائشہ (رض) نے فجر سے پہلے جو اذان تھی اس کے ترک پر نکیر نہیں فرمائی اور نہ دیگر اصحاب رسول اللہ (صلی اللہ علیہ وآلہ وسلم) نے اس پر نکیر فرمائی اس سے یہ خود دلالت مل گئی کہ بلال کی اذان سے مقصود تو فجر تھی اور جناب رسول اللہ (صلی اللہ علیہ وآلہ وسلم) کا فرمان ” کلوا واشربوا حتی ینادی ابن ام مکتوم “ یہ طلوع فجر کو صحیح طور پر پالینے کے لیے تھا۔
حاصل روایات : ان آثار سے یہ بات معلوم ہوئی کہ وہ اذان طلوع فجر صادق کے بعد دیتے تھے روایت حضرت حفصہ (رض) اس کی شاہد ہے جب یہ اسی طرح ہے تو امام یوسف (رح) کا ان روایات سے جو شروع باب میں گزریں یہ استدلال کہ فجر کے طلوع سے قبل اذان فجر جائز ہے یہ درست نہ ہوا۔

ایک دوسرے پہلو سے :
اگر دوسرا معنی لیں کہ وہ فجر سے قبل اذان دیتے تھے تو اور بالقصد ایسا کرتے تھے تو حدیث حضرت عبداللہ بن مسعود (رض) نے واضح کردیا کہ یہ اذان نماز کے لیے نہ تھی۔
ایک اور رُخ سے :
ابن ام مکتوم کا طلوع فجر کے بعد اذان دینا اس بات کی واضح دلیل ہے کہ اس نماز کے لیے اصل اذان کا یہی موقعہ ہے اگر یہ اذان کا مقام نہ ہوتا تو اذان دینا ان کو مباح نہ ہوتا جب ان کو اذان کا حکم دیا گیا ہے تو اس سے ثابت ہوا کہ یہی وقت اذان ہے اور بلال کی اذان کی تقدیم میں وہ احتمال ہے جس کا ہم نے تذکرہ کردیا ہے۔
نظر طحاوی (رح) :
اگر بطریق نظر دیکھیں جس سے دونوں میں اصح ترین قول سامنے آجائے تو تمام نمازوں کو ملاحظہ فرمائیں ان میں اذان دخول وقت کے بعد دی جاتی ہیں فجر کی اذان کے متعلق اختلاف ہوا کہ یہ وقت سے پہلے درست ہے یا نہیں تو جب یہ اذان دوسری اذانوں کی طرح کے ان میں دخول وقت لازم ہے تو اس میں بھی اسی طرح ہونا چاہیے یہی تقاضا نظر ہے اور یہ امام ابوحنیفہ ‘ محمد ‘ سفیان ثوری (رح) کا یہی قول ہے۔

٨٤٠: علی بن جعد کہتے ہیں کہ میں نے سفیان بن سعید سے سنا کہ ان کو ایک آدمی نے کہا میں طلوع فجر سے پہلے اذان دیتا ہوں تاکہ میری اذان سب سے پہلے اذان کے ذریعہ آسمان کا دروازہ کھٹکھٹانے والی ہو تو انھوں نے فرمایا مت اذان دو جب تک کہ فجر طلوع نہ ہو۔

٨٤١: ابراہیم کہتے ہیں ہم علقمہ کے ساتھ مکہ کی طرف گئے وہ رات کو نکلے تو انھوں نے ایک مؤذن کو رات کے وقت اذان دیتے سنا آپ نے فرمایا لو سنو ! اس شخص نے اصحاب رسول اللہ (صلی اللہ علیہ وآلہ وسلم) کے طریقہ کی خلاف ورزی کی ہے اگر اس کی بجائے سو رہتا تو بہتر تھا جب فجر طلوع ہوجاتی تب اذان دیتا۔ حضرت علقمہ نے یہ بات بتلا دی کہ طلوع فجر سے پہلے اذان یہ اصحاب رسول اللہ (صلی اللہ علیہ وآلہ وسلم) کے طریقہ کے خلاف ہے۔
تخریج : ابن ابی شیبہ ١؍١٩٤۔
حاصل آثار :
علقمہ اور سفیان بن سعید کے ارشاد سے معلوم ہوا کہ اذان فجر طلوع صبح صادق سے پہلے جناب رسول اللہ (صلی اللہ علیہ وآلہ وسلم) اور صحابہ کرام کے طریق کی مخالفت ہے۔
نوٹ : اس باب میں نظر کے بعد تائید کے لیے اقوال تابعین کو ذکر کیا اور ائمہ ثلاثہ کے ساتھ پہلی مرتبہ سفیان ثوری (رح) کا نام لائے۔

٨٤٢: زیاد بن نعیم نے زیاد بن حارث صدائی کو فرماتے سنا کہ میں جناب رسول اللہ (صلی اللہ علیہ وآلہ وسلم) کی خدمت میں آیا جب صبح کی ابتداء ہوئی تو مجھے حکم دیا پس میں نے اذان دی پھر نماز کے لیے کھڑے ہوئے تو بلال اقامت کہنے لگے تو آپ نے فرمایا تمہارے بھائی زیاد صدائی نے اذان دی ہے اور جو اذان دے وہی اقامت کہتا ہے۔
تخریج : ابو داؤد فی الصلاۃ باب ٣٠‘ نمبر ٥٤٤‘ ترمذی فی الصلاۃ باب ٣٢‘ نمبر ١٩٩‘ ابن ماجہ فی الاذان والسنۃ باب ٣‘ نمبر ٧١٧‘ مسند احمد ٤؍١٦٩‘ بیہقی فی السنن الکبرٰی ١؍٣٩٩۔
خلاصہ الزام : نمبر ١: جو اذان دے وہی اقامت کہے ایسا لازم ہے یہ امام شافعی و احمد ‘ اوزاعی (رح) کا مسلک ہے۔
نمبر ٢: ایک اذان دے دوسرا اقامت کہے تو درست مگر بہتر اسی کا کہنا ہے۔
مؤذن و مکبّر ایک شخص ہونا چاہیے اس کی روایات مندرجہ ذیل ہیں۔

٨٤٣: عبداللہ بن الحارث الصدائی نے جناب نبی اکرم (صلی اللہ علیہ وآلہ وسلم) سے اسی طرح کی روایت نقل کی ہے۔ امام طحاوی (رح) اور ایک جماعت علماء نے اس روایت کو اپنایا اور انھوں نے کہا کہ یہ مناسب نہیں کہ جس نے اذان کہی ہو اس کے علاوہ اقامت کہے۔ علماء کی دوسری جماعت نے ان کی مخالفت کرتے ہوئے کہا کہ اس میں حرج نہیں کہ مؤذن کے علاوہ دوسرا اقامت کہے اور ان کی دلیل یہ آثار ہیں۔
تخریج : المعجم الکبیر ٥؍٢٦٣۔
حاصل روایات : ان دونوں روایات سے ثابت ہوتا ہے کہ مؤذن کو ہی اقامت کہنا چاہیے دوسرے کو درست نہیں۔

٨٤٤: حضرت عبداللہ کہتے ہیں کہ جب ان کو خواب میں اذان دکھائی گئی تو آپ (صلی اللہ علیہ وآلہ وسلم) نے بلال (رض) کو حکم دیا انھوں نے اذان دی پھر آپ (صلی اللہ علیہ وآلہ وسلم) نے عبداللہ کو حکم دیا انھوں نے اقامت کہی۔
تخریج : دارقطنی ١؍٢٥٠۔

٨٤٥: حضرت عبداللہ (رض) کہتے ہیں کہ میں جناب نبی اکرم (صلی اللہ علیہ وآلہ وسلم) کی خدمت میں آیا اور آپ کو خبر دی کہ کس طرح میں نے اذان کا خواب دیکھا آپ نے فرمایا یہ کلمات بلال کو تلقین کرو وہ تم سے زیادہ بلند آواز والے ہیں جب بلال نے اذان دی تو عبداللہ شرمندہ ہوئے پس آپ نے ان کو اقامت کا حکم دیا۔ جب یہ دونوں روایات باہمی متضاد ہوئیں تو ہم نے چاہا کہ اس باب کا حکم نظر و فکر سے تلاش کریں تاکہ دونوں اقوال میں سے درست ترین قول کو نکال سکیں۔ پس غور سے معلوم کیا کہ اس اصل پر سب کا اتفاق ہے کیہ یہ مناسب نہیں کہ دو آدمی ایک اذان دیں کہ ان میں سے ہر ایک اس کا کچھ کچھ حصہ کہے۔ پس یہ احتمال پیدا ہوگیا کہ اذان اور اقامت کا بھی یہی حال ہو کہ ان دونوں کو ایک شخص ادا کرے اور یہ احتمال بھی ہے کہ یہ دو متفرق اشیاء کی طرح شمار ہوں اور اس میں کوئی حرج نہ ہو ‘ ان میں سے ہر ایک کا ایک الگ الگ شخص ذمہ دار ہو۔ چنانچہ غور سے معلوم ہوا کہ نماز کے متعدد اسباب ہیں جو اس سے پہلے ہیں ‘ نماز کی طرف اذان کے ذریعہ دعوت دی جاتی ہے اور اقامت سے بھی نماز کی طرف بلایا جاتا ہے اور یہ تمام نمازوں میں ہے۔ ہم نے یہ بھی غور کیا کہ جمعہ سے پہلے خطبہ لازمی ہے اور نماز جمعہ خطبہ سے متصل ہے۔ جو شخص خطبہ کے بغیر جمعہ ادا کرے اس کا جمعہ باطل ہے۔ اسی لیے خطبہ کو نماز سے پہلے رکھا گیا اور ہم نے یہ بھی دیکھا کہ امام خود خطیب ہی ہونا چاہیے کیونکہ ان میں سے ہر ایک دوسرے کے ساتھ متصل ہے۔ جب دونوں کا پایا جانا ضروری ہوا تو مناسب نہیں کہ ان دونوں کو انجام دینے والا ایک ہی شخص ہو۔ ہم غور کرتے ہیں کہ اقامت بھی اسباب نماز سے ہے اور اس پر سب کا اتفاق ہے کہ اس کا ذمہ دار امام کے علاوہ اور شخص ہو۔ پس جس طرح امام کے علاوہ شخص اس کا ذمہ دار بن سکتا ہے حالانکہ یہ بھی نماز سے متعلق ہے اور اذان کی نسبت اس سے قریب تر ہے تو اس میں کچھ حرج نہیں کہ اس کا ذمہ دار مؤذن کے علاوہ شخص ہو۔ نظر و فکر کا تقاضا یہی ہے۔ یہی امام ابوحنیفہ ‘ ابو یوسف اور امام محمد (رح) کا قول ہے
تخریج : ابو داؤد فی الصلاۃ باب ٣٠‘ ٥١٢۔
حاصل روایات : ان روایات سے ایک کو اذان دینے کا حکم اور دوسرے کو تکبیر کا حکم ثابت کرتا ہے کہ اس کی اجازت ہے۔
نظر طحاوی (رح) :
جب دونوں روایتیں آپس میں متضاد ہوگئیں تو بطریق نظر دونوں اقوال میں سے صحیح تر کا نکالنا ضروری ہوا چنانچہ غور سے معلوم ہوا کہ اس طرح تو کسی کے ہاں بھی درست نہیں ہے کہ دو آدمی اذان دیں اور آدھی ایک دے اور آدھی دوسرا دے اور یہی احتمال اقامت میں بھی جاری ہوتا ہے پس ثابت ہوا کہ ان کو ایک آدمی انجام دے گا اور اس میں یہ احتمال موجود ہے کہ دونوں میں ایک مستقل چیز کی طرح معاملہ ہو اور ہر ایک کا الگ الگ شخص ذمہ دار ہو۔
ہم نے اس کی نظیر تلاش کی تو نماز میں غور کرنے سے معلوم ہوا کہ نماز کے ان اسباب میں جو اس سے پہلے ہیں وہ اذان سے نماز کی طرف بلانا ہے اور اسی طرح نماز کے لیے اقامت کا کہنا ہے اور یہ تو تمام نمازوں میں ہے۔
اسی طرح ہم نے جمعہ پر نظر ڈالی کہ اس سے پہلے خطبہ ضروری ہے اور نماز جمعہ خطبہ سے متصل ہے جو بلا خطبہ نماز جمعہ پڑھے اس کا جمعہ باطل ہے بلکہ خطبے کو نماز سے پہلے رکھا گیا۔
پھر غور کیا کہ امام جمعہ وہی ہونا چاہیے جو خطیب ہو کیونکہ ہر ایک دوسرے سے متصل ہے اور دوسرے کے بغیر نہیں ہوسکتی جب دونوں ضروری ہوئے تو ان کو انجام دینے والا ایک شخص ہونا چاہیے اب ہم نے دیکھا کہ اقامت بھی اسباب نماز سے ہے اور اس کا اتصال نماز کے ساتھ خطبہ جمعہ سے زیادہ ہے کیونکہ خطبہ پہلے اور اقامت بعد میں ہوتی ہے اس اتصال کا تقاضا یہ ہے کہ اس کا ذمہ دار مؤذن کی بجائے امام ہو کیونکہ دونوں ایک چیز ہیں اور تمام علماء کا اتفاق ہے کہ جمعہ کا خطبہ اور نماز کی امامت الگ الگ آدمی کرا سکتے ہیں اگرچہ امام زیادہ بہتر ہے تو اذان و اقامت بھی الگ الگ کرا لینے میں کیا حرج ہے بلکہ یہ تو بطریق اولیٰ جائز ہونا چاہیے۔
ہمارے ائمہ ثلاثہ ابوحنیفہ ‘ ابو یوسف ‘ محمد بن الحسن (رح) کا یہی مسلک ہے۔

٨٤٦: سعید الخدری (رض) نے روایت کی ہے کہ میں نے جناب رسالت مآب (صلی اللہ علیہ وآلہ وسلم) کو فرماتے سنا کہ جب تم مؤذن کو سنو (مالک کی روایت میں مؤذن کی بجائے نداء کا لفظ ہے) تو تم اسی طرح کہو جیسا وہ کہتا ہے۔ مالک کی روایت میں المؤذن کا لفظ زائد ہے۔
تخریج : بخاری فی الذان باب ٧‘ مسلم فی الصلاۃ نمبر ١٠‘ ترمذی فی الصلاۃ باب ٤٠‘ والمناقب باب ١‘ نسائی فی الاذان باب ٣٣‘ ٣٥؍٣٧‘ ابن ماجہ فی الذان باب ٤‘ نمبر ٧١٩‘ مالک فی النداء نمبر ٢‘ دارمی فی الصلاۃ باب ٣٧‘ مسند احمد ١؍١٢٠‘ ٣؍٨‘ ٤؍٩٢‘ ٩٣‘ ٤؍٣٢٦‘ ابن ابی شیبہ کتاب الاذان والاقامۃ ١؍٢٢٧ عبرانی فی المعجم الکبیر ٢٣؍٢٢٨۔
خلاصہ الزام : مؤذن کا جواب انہی کلمات سے دیا جائے یا کچھ کلمات کے تفاوت سے اور یہ جواب واجب ہے یا مسنون۔

٨٤٧: حضرت یونس نے اپنی سند سے اس طرح روایت ذکر کی ہے۔
تخریج : دارمی ١؍١٨٩۔

٨٤٨: عبدالرحمن بن جبیر کہتے ہیں کہ میں نے عبداللہ بن عمرو بن العاص (رض) کو فرماتے سنا کہ میں نے جناب رسول اللہ (صلی اللہ علیہ وآلہ وسلم) کو فرماتے سنا جب مؤذن کو سنو ! تو اسی طرح کہو جیسا وہ کہتا ہے پھر مجھ پر درود پڑھو اس لیے کہ جو مجھ پر درود پڑھتا ہے اللہ تعالیٰ اس پر دس مرتبہ رحمت بھیجتے ہیں پھر اللہ تعالیٰ سے میرے لیے مقام وسیلہ طلب کرو وسیلہ جنت کے ایک مقام کا نام ہے وہ صرف ایک بندے کو جچتا ہے اور مجھے امید ہے کہ وہ میں ہوں گا۔ جس نے میرے لیے وسیلہ مانگا وہ میری شفاعت کا حقدار بن گیا۔
تخریج : روایت ٨٤٦ ملاحظہ کریں۔

٨٤٩: حضرت شعبہ نے اپنی سند سے اسی طرح روایت نقل کی ہے۔
تخریج : مسند احمد۔

٨٥٠: حضرت عبداللہ بن عتبہ نے ام حبیبہ (رض) سے نقل کیا کہ کہ جناب رسول اللہ (صلی اللہ علیہ وآلہ وسلم) جب مؤذن سے اذان سنتے تو اسی طرح فرماتے جیسے وہ کہتا جاتا یہاں تک کہ وہ خاموش ہوجاتا۔
تخریج : ابن ماجہ ١؍٥٢۔

٨٥١: محمد بن عمرو اللیثی اپنے باپ دادا سے نقل کرتے ہیں کہ ہم معاویہ (رض) کے پاس تھے تو مؤذن نے اذان دی تو معاویہ (رض) کہنے لگے میں نے جناب رسول اللہ (صلی اللہ علیہ وآلہ وسلم) کو فرماتے سنا جب تم مؤذن کو اذان دیتا سنو تو اسی طرح کہو جیسے وہ کہے انھوں نے مقالتہ کا لفظ فرمایا یا اسی طرح کا۔ امام طحاوی (رح) فرماتے ہیں کہ علماء کی ایک جماعت نے ان آثار کو سامنے رکھتے ہوئے کہا کہ جو شخص اذان سنے اسے اسی طرح کہنا چاہیے جس طرح مؤذن کہے یہاں تک کہ وہ اذان سے فارغ ہو۔ دوسرے علماء نے ان سے اختلاف کرتے ہوئے کہا کہ فلاحین کے کہنے کا مطلب نہیں کیونکہ مؤذن تو یہ کلمات لوگوں کو نماز و فلاح کی طرف بلانے کے لیے کہتا ہے اور سننے والا تو بلانے کی نیت سے نہیں کہتا بلکہ بطور ذکر کے کہتا ہے اور یہ ذکر نہیں ہے۔ پس مناسب یہ ہے کہ اس کی جگہ وہ کہا جائے جو جناب رسول اللہ (صلی اللہ علیہ وآلہ وسلم) سے دیگر روایات میں وارد ہوا ہے اور وہ لاحول ولا قوۃ الا باللہ اور ان کی ایک دلیل یہ بھی ہے کہ ” فقولوا مثل ما یقول “ کی مراد یہ ہو کہ وہ کلمات کہو جن سے مؤذن نے ابتداء کی ہے اور وہ تکبیر و شہادتین ہیں یہاں تک کہ وہ ان سے خاموش ہوجائے پس تکبیر اور شہادت مثل ” مایقول “ سے مراد ہیں اور حضرت ابوہریرہ (رض) کی روایت میں ان کو مقصود قرار دیا گیا ہے۔
تخریج : اس کی تخریج نمبر ٨٤٦ میں ملاحظہ ہو۔ عبدالرزاق ١؍٤٧٩۔
حاصل روایات : ان چھ روایات سے یہ معلوم ہوتا ہے کہ اذان سننے والا مؤذن کے ساتھ ساتھ کہتا جائے یہاں تک کہ وہ اذان سے فارغ ہو پھر درود شریف اور دعا وسیلہ پڑھے۔
مؤقف فریق نمبر ٢ کی مستدل روایات :
حی علی الصلاۃ ‘ حی علی الفلاح سے مؤذن دوسروں کو نماز و فلاح کی طرف دعوت دے رہا ہے اور یہ دعوت کو سن کر وہی کلمات نہ کہے کیونکہ یہ کلمات ذکر تو نہیں پس مناسب یہ ہے کہ ان کی جگہ وہ کلمات کہے جو دیگر آثار میں جناب نبی اکرم (صلی اللہ علیہ وآلہ وسلم) سے منقول ہیں اور وہ لاحول ولا قوۃ الا باللہ ہے۔
جواب دلیل فریق نمبر ١: قولوا مثل ما یقول حتی یسکت اس سے کلمات تکبیر و شہادت مراد ہیں یہاں تک کہ وہ اذان مکمل کرے باقی یہ کلمات دعوت ہیں ان کی بجائے وہ پڑھے (کہ اس دعوت پر لبیک کہنے کی توفیق تو ادھر سے ہی حاصل ہوگی) پس مایقول کی مراد مقصودی کلمات تکبیر و شہادت ہیں اور حدیث ابوہریرہ (رض) میں ان کو مقصودی قرار دیا گیا ہے۔
چنانچہ ملاحظہ ہو۔

٨٥٢: ابن شہاب نے اپنی سند سے اس طرح روایت بیان کی ہے۔

٨٥٣: سعید بن المسیّب نے حضرت ابوہریرہ (رض) سے اور انھوں نے نبی اکرم (صلی اللہ علیہ وآلہ وسلم) سے نقل کیا جب مؤذن اعلان شہادت کرے تو تم اسی طرح کہو جیسے وہ کہتا ہے اور لا حول ولا قوۃ کا کلمہ تو اس پر ابھارنے کے لیے ہے۔ پھر وہ روایت جس میں یہ کہا گیا ہے کہ اس وقت لا حول ولا قوۃ پڑھا جائے تو یہ اس پر ابھارنے اور آمادہ کرنے کے لیے ہے۔
تخریج : نسائی فی عمل الیوم واللیلہ ١٥٢‘ ١٥٣‘ ابن ماجہ فی الاذان والسنۃ باب ٤‘ نمبر ٧١٨۔

٨٥٤: حضرت عمر بن خطاب (رض) نے بیان کیا کہ جناب رسول اللہ (صلی اللہ علیہ وآلہ وسلم) نے فرمایا جب مؤذن اللہ اکبر اللہ اکبر کہے تو تم بھی اللہ اکبر اللہ اکبر کہو پھر وہ اشہد ان لاالٰہ الا اللہ کہے تو کہو اشہد ان لا الٰہ الا اللہ پھر وہ اشہد ان محمد رسول اللہ کہے تو تم اشہد ان محمد رسول اللہ کہو پھر وہ حی علی الصلاۃ کہے تو کہو لا حول ولا قوۃ الا باللہ پھر حی علیٰ الفلاح کہے تو کہو لا حول ولا قوۃ الا باللہ پھر کہے اللہ اکبر اللہ اکبر تو کہو اللہ اکبر اللہ اکبر پھر وہ کہے لا الٰہ الا اللہ تو کہو لا الٰہ الا اللہ۔ اگر کوئی دل کی گہرائیوں سے یہ جواب دے گا تو وہ جنت میں داخل ہوگا۔
تخریج : مسلم فی الصلاۃ نمبر ١٢‘ بیہقی فی السنن الکبرٰی ١؍٤٠٨؍٤٠٩۔