١: حضرت ابو سعید خدری (رض) بیان کرتے ہیں کہ جناب رسول اللہ (صلی اللہ علیہ وآلہ وسلم) بیر بضاعہ سے وضو فرماتے تھے آپ (صلی اللہ علیہ وآلہ وسلم) سے عرض کیا گیا یارسول اللہ (صلی اللہ علیہ وآلہ وسلم) اس میں متعفن مردار اور حیض والے کپڑوں کے ٹکڑے ڈالے جاتے ہیں۔ آپ (صلی اللہ علیہ وآلہ وسلم) نے فرمایا پانی ناپاک نہیں ہوتا۔
تخریج : ابو داؤد فی الطھارۃ باب ٣٤ حدیث ٦٦، ترمذی فی الطہارۃ باب ٤٩ نمبر ٦٦، ابن ماجہ فی الطہارۃ باب الرخصۃ بفضل وضوء المرأۃ حدیث ٣٧٠، نسائی فی المیاہ باب ٢، دارقطنی فی سننہ کتاب الطہارۃ ١؍٣١۔
اللغات : بضاعہ۔ یہ مدینہ منورہ میں دار بنی ساعدہ کا مشہور کنواں ہے۔ الجیف۔ جمع جیفۃ۔ مردہ لاش، متعفن مردار۔ محائض۔ جمع محیضۃ۔ حیض کے خون سے ملوث کپڑے کا ٹکڑا۔
خلاصۃ المرام : پانی میں نجاست گرنے سے جب تک اس کے تین اوصاف میں سے کسی میں تبدیلی نہ ہو خواہ پانی تھوڑا ہو یا زیادہ ‘ پانی ناپاک نہیں ہوتا۔ ! اس کو امام مالک ‘ سعید بن المسیّب ‘ ابراہیم نخعی ‘ عکرمہ (رح) نے اختیار کیا ہے۔ " پانی میں نجاست گرجائے اگر قلیل ہو تو وہ ناپاک ہوجائے گا اور اگر زیادہ ہو تو نجاست گرنے سے اس وقت ناپاک ہوگا جب تین اوصاف میں سے ایک وصف بدلے۔ اس کو شوافع ‘ حنابلہ و احناف (رح) نے اختیار کیا ہے۔ (بدائع و بدایۃ المجتہد)

٢ : حضرت ابو سعید خدری (رض) سے مروی ہے کہ آپ (صلی اللہ علیہ وآلہ وسلم) سے عرض کیا گیا کہ آپ کے لیے پینے کا پانی بیر بضاعہ سے لایا جاتا ہے اور وہ ایسا کنواں ہے جس میں انسانی غلاظت، حیض کے چیتھڑے، کتوں کا گوشت وغیرہ پھینکا جاتا ہے آپ (صلی اللہ علیہ وآلہ وسلم) نے فرمایا بیشک پانی پاک ہے اس کو کوئی چیز ناپاک نہیں کرتی۔
اللغات : عذرۃ الناس۔ پائخانہ۔
تخریج : ابو داؤد فی الطھارۃ باب ٣٤ حدیث : ٦٧، نسائی فی المیاہ باب ٢

٣ : حضرت ابو سعید خدری (رض) سے روایت ہے کہ میں آپ کی خدمت میں اس وقت پہنچا جب کہ آپ بیر بضاعہ سے وضو فرما رہے تھے میں نے گزارش کی کیا آپ بیر بضاعہ سے وضو فرما رہے ہیں ؟ جبکہ یہ وہ کنواں ہے جس میں متعفن چیزیں ڈالی جاتی ہیں اس پر آپ (صلی اللہ علیہ وآلہ وسلم) نے ارشاد فرمایا پانی کو کوئی چیز ناپاک نہیں کرسکتی۔
اللغات : النتن۔ بدبودار چیز۔
تخریج : ابو داؤد باب ٣٤ کتاب الطھارۃ، نسائی فی المیاہ باب ٢ ترمذی فی الطھارۃ باب ٤٩ ابن ماجہ فی الطھارۃ ٣٧٠،

٤ : ابو یحییٰ اسلمی اپنی والدہ سے نقل کرتے ہیں کہ میں چار عورتوں کے ساتھ حضرت سہل بن سعد (رض) کی خدمت میں حاضر ہوئی تو وہ فرمانے لگے اگر میں تمہیں بیر بضاعہ کا پانی پلاؤں تو تم ناپسند کرو گی حالانکہ میں نے خود اس کنوئیں کا پانی اپنے ہاتھ سے جناب رسول اللہ (صلی اللہ علیہ وآلہ وسلم) کو پلایا۔
اللغات : سقی یسقی۔ پینا پلانا۔
تخریج : دارقطنی فی سننہ کتاب الطھارۃ ١؍٣٢، الطبرانی فی المعجم الکبیر ٦؍٢٠٧ مسند احمد ٥؍٣٣٧، ٣٣٨،

٥ : حضرت جابر یا حضرت ابو سعیدالخدری (رض) سے روایت ہے کہ ہم جناب رسول اللہ (صلی اللہ علیہ وآلہ وسلم) کے ساتھ ایک سفر میں تھے چلتے ہوئے ہم ایک جوہڑ کے پاس پہنچے جس کے پاس مردار بھی پڑا تھا ہم نے اور دیگر لوگوں نے وہاں کے پانی کے استعمال سے ہاتھ روک لیا یہاں تک کہ ہم رسول اللہ (صلی اللہ علیہ وآلہ وسلم) کی خدمت میں پہنچے اس پر آپ (صلی اللہ علیہ وآلہ وسلم) نے دریافت فرمایا۔ تم پانی پلاتے کیوں نہیں ؟ ہم نے عرض کیا یارسول اللہ : یہ مردار پڑا ہے۔ آپ (صلی اللہ علیہ وآلہ وسلم) نے فرمایا پانی پیؤ پلاؤ بلاشبہ پانی کو کوئی چیز ناپاک نہیں کرسکتی پس ہم نے پانی پیا اور سیر ہوگئے۔ علماء کی ایک جماعت نے ان مذکورہ آثار کو اختیار کیا ہے۔ ان کا کہنا یہ ہے کہ پانی میں جو چیز بھی گرجائے وہ پانی کو نجس نہیں کرسکتی سوائے اس صورت کے کہ اس کا رنگ ذائقہ اور بو تبدیل ہوجائے۔ ان میں سے جو علامت پائی جائے گی اس سے پانی نجس ہوجائے گا ۔ علماء کی دوسری جماعت نے اس کی مخالفت کی ہے چنانچہ انھوں نے فرمایا گزشتہ روایت میں تم نے بیربضاعہ کا ذکر کیا اس میں تمہارے حق میں کوئی دلیل نہیں ملتی کیونکہ بیر بضاعہ کے بارے میں علماء کے اقوال مختلف ہیں بعض لوگوں نے کہا یہ باغات کی طرف جانے والے راستہ میں پڑتا تھا اور پانی اس میں مستقل طور پر نہ ٹھہرتا تھا۔ پس اس کے پانی کا حکم دریا کے پانی جیسا ہے اور ہم اسی طرح ہر اس مقام پر حکم دیں گے جو اس صفت پر مشتمل ہوگا کہ اگر اس کے پانی میں نجاست پڑجائے تو اس کا پانی پلید نہ ہوگا سوائے اس صورت کے کہ اس کے ذائقہ یا رنگ یا بو پر نجاست کا غلبہ ہوجائے یا جہاں سے پانی لیا جا رہا ہے اس کا نجس ہونا معلوم ہوجائے تو وہ پانی نجس شمار ہوگا۔ اور اگر ایسا معلوم نہیں ہوا تو وہ پانی پاک شمار ہوگا یہ قول جس کا ہم نے تذکرہ کیا ہے اس کو بیئر بضاعہ کے سلسلے میں امام واقدی (رح) نے نقل کیا ہے چنانچہ ہمارے استاد احمد نے ابو عبداللہ محمد بن شجاع ثلجی نے واقدی سے بیئر بضاعہ کے متعلق اس طرح نقل کیا ہے اور اس میں ایک دلیل یہ بھی ہے کہ اس پر سب کا اتفاق ہے کہ نجاست جب کنوئیں میں گرکر اس کے پانی کے ذائقہ بو یا رنگ کو بدل ڈالے تو اس کا پانی پلید ہوجائے گا اور بیئر بضاعہ میں اس ان میں سے کوئی چیز نہیں پائی جاتی اس میں صرف اتنی بات ہے کہ جناب نبی اکرم (صلی اللہ علیہ وآلہ وسلم) سے بیئر بضاعہ کے بارے میں یہ بتا کر سوال کیا گیا کہ اس میں کتے اور حیض والے کپڑے ڈالے جاتے ہیں تو جناب رسول اللہ (صلی اللہ علیہ وآلہ وسلم) نے فرمایا کہ پانی کوئی چیز بھی پلید نہیں کرسکتی اور ہم بخوبی جانتے ہیں اگر کسی بھی کنوئیں میں کوئی ایسی چیز گرجائے جو اس سے بہت کم ہو تو یہ بات ناممکن ہے کہ اس کنوئیں کے پانی کی بو اور ذائقہ اور رنگ تبدیل نہ ہو اتنی بات تو عقل اور تجربہ سے جانی پہچانی ہے جب یہ بات اسی طرح ہے اور آپ (صلی اللہ علیہ وآلہ وسلم) نے ان کے لیے اس کے پانی کو مباح قرار دیا ہے اور اس بات پر بھی اتفاق ہے کہ ان مذکورہ اطراف میں سے کسی لحاظ سے پانی میں تبدیلی آگئی (ـاور پھر اس کو استعمال کیا گیا) اور ہر چیز بھی ہمارے ہاں ناممکن ہے (واللہ اعلم) کہ نبی کریم (صلی اللہ علیہ وآلہ وسلم) سے صحابہ کرام (رض) نے اس پانی کے متعلق سوال کیا ہو اور آپ (صلی اللہ علیہ وآلہ وسلم) نے ان کو وہ جواب دیا ہو جو کہ آپ (صلی اللہ علیہ وآلہ وسلم) نے دیا اور نجاست بھی کنوئیں میں موجود ہو (واللہ اعلم) لیکن یہ تمام بات کنوئیں سے نجاست نکال دینے کے بعد تھی اور انھوں نے سوال بھی اس سلسلے میں کیا کہ آیا کہ کنوئیں سے نجاست نکال دینے کے بعد وہ پانی پلید نہیں ہوتا جو اس کے بعد کنوئیں میں سے نکلے اور یہ مشکل بات ہے کیونکہ کنوئیں کی دیواریں نہ دھوئی گئیں اور نہ اس کی مٹی نکالی گئی تو جناب رسول اللہ (صلی اللہ علیہ وآلہ وسلم) نے ان کو فرمایا کہ پانی پلید نہیں ہوتا یعنی اس سے مراد وہی پانی تھا جو نجاست کے نکالنے کے بعد تازہ نکلا ہے یہ معنی نہیں تھا کہ پانی اس وقت بھی پلید نہیں جب اس کے ساتھ نجاست مل گئی چنانچہ ہمارے سامنے اسی انداز کا آپ (صلی اللہ علیہ وآلہ وسلم) کا ارشاد : (الْمُؤْمِنُ لَا یَنْجُسُ ) ہے ۔
اللغات : غدیر سیلاب گہری وادی میں جو پانی چھوڑ جائے اور رکا ہوا پانی۔
خلاصہ روایات : ان مذکورہ بالا پانچوں روایات کا حاصل یہ ہے کہ پانی قلیل ہو یا کثیر تبدیلی ٔوصف کے بغیر نجاست گرنے سے ناپاک نہ ہوگا۔
مذاہب ِائمہ و امام طحاوی (رح) :
1 پانی میں نجاست کے پڑجانے سے جب تک اس کے اوصاف میں سے کوئی وصف تبدیل نہ ہو وہ ناپاک نہیں ہوتا خواہ پانی قلیل مقدار میں ہو یا کثیر یہ امام مالک ‘ سعید بن مسیب اور ابراہیم نخعی (رح) کا قول ہے۔
دوسری جماعت :
" قلیل پانی نجاست گرنے سے ناپاک ہوجاتا ہے کثیر پانی نجاست کے پڑنے سے اس وقت ناپاک ہوگا جبکہ اس کا ایک وصف بدل جائے امام شافعی و امام احمد بن حنبل اور ائمہ احناف اسی طرف گئے ہیں پھر امام شافعی (رح) کے ہاں قلتین سے کم مقدار ماء قلیل اور قلتین اور اس سے زائد کثیر ہے اور احناف قلیل و کثیر کی مقدار صاحب معاملہ کی رائے پر چھوڑتے ہیں۔
امام طحاوی (رح) کا ارشاد :
مذکورہ بالا تشریح تو امام طحاوی کے اشارہ کو سمجھانے کے لیے کی گئی ہے وہ پہلی جماعت کے متعلق فرماتے ہیں کہ ایک جماعت نے ان آثار کو سامنے رکھ کر کہا کہ پانی اس وقت تک ناپاک نہیں ہوتا جب تک اس کا رنگ یا ذائقہ یا بو میں سے کوئی وصف نہ بدل جائے جب ایک بدل جائے گا تو پانی نجس ہوجائے گا۔
نمبر ٢ : دوسرے ائمہ کے قول کی طرف اشارہ وخالفہم فی ذلک آخرون سے کردیا کہ دیگر ائمہ نے اس سے اختلاف کیا ہے اگلی سطور میں پہلے قول کے متعدد جوابات دیئے ہیں
پہلے مسلک کے جوابات :
جواب نمبر ١: روایات میں جس بیر بضاعہ کا تذکرہ ہے اس سے مسلک نمبر اول کا استدلال درست نہیں کیونکہ بیر بضاعہ کی کیفیت کے متعلق علماء کے قول بہت مختلف ہیں بعض کا قول یہ ہے کہ وہ کنواں باغات کی سیرابی کا کام دیتا تھا باغات کی طرف پانی جانے والے راستہ میں واقع تھا اس میں پانی برقرار نہیں رہتا تھا بلکہ منتقل ہوتا رہتا تھا جس کی وجہ سے وہ نہروں کے پانی کی طرح جاری پانی کے حکم میں تھا اس بات کی تصدیق ہمارے استاذ ابو جعفر احمد نے شجاع ثلجی کی وساطت سے واقدی سے نقل کی ہے۔
اور جو پانی ماء جاری کے حکم میں ہو اس کے متعلق ہم بھی یہی کہتے ہیں کہ اگر اس میں نجاست گرجائے تو وہ اس وقت تک نجس نہیں ہوتا جب تک اس کا رنگ یا بو یا ذائقہ نہ بدل جائے یا اس کے متعلق یہ معلوم نہ ہوجائے کہ اس سے حاصل کئے جانے والے پانی میں وہ نجاست مل کر آرہی ہے اگر ایسا معلوم ہو تو وہ نجس ہے ورنہ وہ پانی پاک رہے گا۔
جواب نمبر ٢: دوسری دلیل یہ ہے کہ اس پر تو سب کا اتفاق ہے کہ نجاست کنوئیں میں گر کر پانی کے ذائقہ یا بو یا رنگ کو بدل دے تو وہ بالاتفاق نجس ہوجائے گا مذکورہ بالا روایات میں سے کسی روایت میں بھی یہ قید موجود نہیں تمہاری یہ قید قیاس سے ہوسکتی ہے تو قلیل و کثیر والی قید کیوں معتبر نہیں۔
جواب نمبر ٣: جب بالاتفاق اوصاف کی تبدیلی سے پانی ناپاک ہوجاتا ہے تو بیر بضاعہ جیسا چھوٹا کنواں تو کیا ایسے چار کنوؤں میں ایک مردار کتا گرجائے تو سب کو متعفن کر دے گا پس ذرا سی سمجھ والا بیر بضاعہ والی روایت کے ظاہر سے استدلال نہیں کرسکتا کیونکہ ان چیزوں کے گرنے سے تغیر نہ ہونا محال و ناممکن ہے جب یہ بات اسی طرح ہے حالانکہ نبی اکرم (صلی اللہ علیہ وآلہ وسلم) نے اس کے پانی کو مباح قرار دیا اور علماء کا اس پر اتفاق ہے کہ یہ نہیں ہوسکتا کہ پانی میں کسی بھی اعتبار سے تغیر ہو اور آپ (صلی اللہ علیہ وآلہ وسلم) اس کے استعمال کا حکم دیں۔
جواب نمبر ٤ واللہ اعلم۔ ہمارے نزدیک یہ بھی محال ہے کہ صحابہ کرام (رض) بیر بضاعہ کے متعلق ایسے وقت میں سوال کر رہے ہوں جبکہ یہ نجاسات اس میں موجود ہوں بلکہ (واللہ اعلم) ۔ یہ سوال کنوئیں سے ان نجاسات کے نکالے جانے کے بعد سے متعلق تھا کہ آیا وہ کنواں اور اس میں نیا نکلنے والا پانی پاک ہوجائے گا جبکہ کنوئیں کی دیواریں نہیں دھوئی گئیں اور نہ گابھ نکالی گئی۔ تو اس پر جناب نبی اکرم (صلی اللہ علیہ وآلہ وسلم) نے فرمایا ان الماء لا ینجس “ الماء سے وہی پانی مراد ہے جو کنوئیں کی غلاظت سے صفائی کے بعد اس میں ظاہر ہوا ہے یہ معنی نہیں کہ نجاست پڑنے سے پانی ناپاک نہیں ہوتا اور یہ ارشاد نبوت علی اسلوب الحکیم ہے جیسا ان روایات میں ہے : ان المسلم لا ینجس اور ان الارض لاینجس۔ ان روایات کا یہ معنی نہیں کہ مسلمان نجاست لگنے کے باوجود ناپاک نہیں ہوتا اور زمین نجاست پڑنے کے باوجود ناپاک نہیں ہوتی بلکہ صاف مطلب یہ ہے کہ ازالہ نجاست کے بعد وہ پاک ہوجاتے ہیں ہمیشہ ناپاک نہیں رہتے کہ پاک نہ ہو سکیں۔ واللہ اعلم
یہاں امام طحاوی (رح) نے دو روایتیں ذکر فرمائی ہیں جو کہ لا ینجسہ کے مفہوم کی وضاحت کے لیے ہیں ۔
حَدَّثَنَاہُ ابْنُ أَبِیْ دَاوٗدَ قَالَ : ثَنَا الْمُقَدَّمِیُّ قَالَ ثَنَا ابْنُ أَبِیْ عَدِیٍّ عَنْ حُمَیْدٍ ح وَحَدَّثَنَا ابْنُ خُزَیْمَۃَ قَالَ : ثَنَا الْحَجَّاجُ بْنُ مِنْہَالٍ قَالَ ثَنَا حَمَّادٌ عَنْ حُمَیْدٍ عَنْ بَکْرٍ عَنْ أَبِیْ رَافِعٍ عَنْ ( أَبِیْ ھُرَیْرَۃَ قَالَ لَقِیْتُ النَّبِیَّ صَلَّی اللّٰہُ عَلَیْہِ وَسَلَّمَ وَأَنَا جُنُبٌ فَمَدَّ یَدَہٗ إِلَیَّ فَقَبَضْتُ یَدَیَّ عَنْہُ وَقُلْتُ إِنِّیْ جُنُبٌ فَقَالَ : سُبْحَانَ اللّٰہِ ، إِنَّ الْمُسْلِمَ لَا یَنْجُسُ ) وَقَالَ عَلَیْہِ السَّلَامُ فِیْ غَیْرِ ھٰذَا الْحَدِیْثِ ( إِنَّ الْأَرْضَ لَا تَنْجُسُ ) ۔
: حضرت ابوہریرہ (رض) فرماتے ہیں میں جناب نبی اکرم (صلی اللہ علیہ وآلہ وسلم) کو اس حالت میں ملا کہ مجھے غسل جنابت کی حاجت تھی آپ (صلی اللہ علیہ وآلہ وسلم) نے اپنا دست مبارک میری طرف بڑھایا تو میں نے اپنا ہاتھ کھینچ لیا اور عرض کیا میں تو حالت جنابت میں ہوں اس پر آپ (صلی اللہ علیہ وآلہ وسلم) نے فرمایا : سُبْحَانَ اللّٰہِ ، إِنَّ الْمُسْلِمَ لَا یَنْجُسُ ۔ مطلب یہ کہ مسلمان ناپاک نہیں ہوتا۔
تخریج : بخاری فی الغسل باب ٢٣، مسلم فی الحیض ١١٥؍١١٦‘ مسند احمد ٢؍٢٣٥؍٣٨٣‘ ابن ابی شیبہ ١؍١٧٣، بیہقی السنن الکبریٰ ١؍١٨٩۔
لطیف طرز استدلال :
جنابت والے شخص کا نماز کی ادائیگی کے لحاظ سے تمام جسم حکماً ناپاک ہے۔ مگر کھانے پینے اور مصافحہ کے لحاظ سے سوائے نجاست والے مقام کے تمام جسم پاک ہے بالکل اسی طرح جب تک کنوئیں میں نجس پانی اور اشیاء ہیں تو حکماً تمام کنواں ناپاک ہے جب ناپاک پانی نکال لیا تو اب نیا پانی اور کنوئیں کی دیواریں اور گابھ سب پاک ہیں۔
پس لاینجس کا یہ معنی نہ ہوا کہ کوئی نجس چیز اس کو ناپاک نہیں کرسکتی۔
دوسری روایت : میں آپ (صلی اللہ علیہ وآلہ وسلم) نے فرمایا : ان الارض لاتنجس ۔

٦: حضرت حسن بصری (رح) بیان کرتے ہیں کہ جب وفد ثقیف جناب رسول اللہ (صلی اللہ علیہ وآلہ وسلم) کی خدمت میں آیا تو ان کے لیے مسجد (کے صحن) میں خیمہ لگا دیا گیا اس پر صحابہ کرام (رض) نے عرض کیا یہ ناپاک لوگ ہیں (کافر ہیں) جناب رسول اللہ (صلی اللہ علیہ وآلہ وسلم) نے فرمایا زمین پر لوگوں کی (باطنی) نجاستوں سے کچھ اثر نہیں پڑتا بلاشبہ ان کی (باطنی) نجاستوں کا اثر ان کے دلوں میں ہوتا ہے۔ پس آپ (صلی اللہ علیہ وآلہ وسلم) کے ارشاد المسلم لا ینجس اس کا یہ معنی نہیں کہ اس کا بدن بھی پلید نہیں ہوتا اگرچہ اس کو نجاست پہنچ جائے بلکہ مراد یہ ہے کہ اور معنی کے لحاظ سے یہ پلید نہیں ہوتا اور اسی طرح آپ (صلی اللہ علیہ وآلہ وسلم) کا ارشاد کہ زمین پلید نہیں ہوتی اس کا یہ مطلب نہیں اگر زمین کو نجاست پہنچ جائے تب بھی پلید نہیں ہوتی یہ کیسے کہا جاسکتا جب کہ آپ (صلی اللہ علیہ وآلہ وسلم) نے مسجد کے اس مقام پر جہاں بدو نے پیشاب کردیا تھا پانی کے ڈول بہانے کا حکم دیا۔
طریق استدلال :
مشرک کے جسم پر اگر ظاہری نجاست نہ ہو تو اس کے متعلق دو اعتبار ہیں نمبر ١: اگر اس کا جسم زمین پر لگ جائے تو زمین پاک رہے گی۔ نمبر ٢ : باطن اور دل کے لحاظ سے وہ نص قطعی ” انما المشرکون نجس “ سے ناپاک اور پلید ہے۔
نتیجہ : یہ ہوا کہ اس ارشاد میں ان الارض لا تنجس یا لیس علی الارض من انجاس الناس شیٔ کا مطلب یہ ہے کہ زمین کو ان کی باطنی نجاست پلید نہ کرے گی اسی طرح المسلم لا ینجس میں حکمی نجاست سے اس کا ظاہری بدن ناپاک نہ ہوگا کہ وہ مصافحہ کے قابل نہ رہے یہ مطلب ہرگز نہیں کہ زمین ظاہری نجاست کے گرنے سے بھی ناپاک نہیں ہوتی اور مسجد کے اس مقام پر جہاں اعرابی نے پیشاب کردیا تھا آپ (صلی اللہ علیہ وآلہ وسلم) نے پانی کے ڈول بہانے کا حکم کیوں فرمایا ؟ جیسا کہ ان چار روایات سے ثابت ہے۔

٧ : حضرت انس بن مالک (رض) فرماتے ہیں دریں اثناء کہ ہم جناب رسول اللہ (صلی اللہ علیہ وآلہ وسلم) کی خدمت میں حاضر تھے کہ ایک بدو آیا اور وہ مسجد میں کھڑے ہو کر پیشاب کرنے لگا۔ اصحاب رسول اللہ (صلی اللہ علیہ وآلہ وسلم) نے اسے کہا رک رک : جناب رسول اللہ (صلی اللہ علیہ وآلہ وسلم) نے فرمایا اس کو چھوڑدو۔ صحابہ کرام (رض) نے اس سے تعرض نہ کیا یہاں تک کہ وہ پیشاب کرچکا پھر جناب رسول اللہ (صلی اللہ علیہ وآلہ وسلم) نے اس کو بلا کر فرمایا۔ بلاشبہ یہ مساجد پیشاب و پائخانہ جیسی غلاظت کے مناسب نہیں بلاشبہ یہ تو اللہ تعالیٰ کے ذکر ‘ نماز اور قراءت قرآن مجید کے لیے بنائی گئی ہیں۔ عکرمہ کی روایت میں اوکما قال رسول اللہ (صلی اللہ علیہ وآلہ وسلم) (یا جیسا پیغمبر (صلی اللہ علیہ وآلہ وسلم) نے فرمایا) کے الفاظ اور یہ الفاظ زائد ہیں : فامر رجلاً فجاء ہ بدلو من مائٍ فشنہ علیہ “ کہ آپ (صلی اللہ علیہ وآلہ وسلم) نے ایک آدمی کو حکم فرمایا (کہ وہ پانی لائے تو) وہ آپ کے پاس پانی کا ایک ڈول لایا اور اس پر بہا دیا۔
اللغات : اعرابی : بدو۔ اس کا نام ذوالخویصرہ تمیمی ہے۔ لا تصلح : مناسب نہیں ۔ العذرۃ : پائخانہ۔
تخریج : بخاری عن انس بن مالک فی الوضوء باب ٥٧‘ مسلم فی الطھارۃ حدیث ١٠٠ عن ابی ہریرہ فی الوضوء باب ٥٨ ۔

٨ : حضرت انس (رض) نے جناب نبی اکرم (صلی اللہ علیہ وآلہ وسلم) سے اس طرح روایت نقل کی ہے کہ یہ الفاظ اس میں نہیں ” ان ھذہ المساجد “ تا آخرالحدیث۔
فرق روایت :
یہ روایت یحییٰ بن سعید نے نقل کی ہے جبکہ طاؤس کی روایت میں اس طرح ہے : ان النبی ا امر بمکانہ ان یحفر۔ کہ آپ (صلی اللہ علیہ وآلہ وسلم) نے اس جگہ کو کھودنے کا حکم فرمایا (کہ گندی مٹی کو کھود کر باہر پھینک دیا جائے)
اللغات : یحفر۔ حفر یحفر : زمین کھودنا۔
تخریج : ایضًا ۔
(زمین کی پاکیزگی میں احناف کا قول نمبر ١ پانی ڈال دیں اور زمین خشک ہوجائے نمبر ٢ گندی مٹی کو کھود کر پھینک دیا جائے) ۔

٩ : عمر بن دینار نے طاؤس سے اس کو روایت کیا جبکہ یہ روایت حضرت عبداللہ بن مسعود (رض) نے بھی نبی اکرم (صلی اللہ علیہ وآلہ وسلم) سے نقل کی ہے۔
تخریج : روایت نمبر ٨ کی تخریج ملاحظہ ہو۔

١٠ : ابو وائل نے حضرت عبداللہ بن مسعود (رض) سے روایت نقل کی ہے کہ ایک اعرابی نے مسجد میں پیشاب کردیا تو آپ (صلی اللہ علیہ وآلہ وسلم) نے حکم فرمایا (کہ اس پر پانی ڈالا جائے تو) اس پر پانی کا ایک ڈول بہا دیا گیا پھر (پانی جذب ہونے کے بعد) آپ (صلی اللہ علیہ وآلہ وسلم) نے اس جگہ کو کھودنے کا حکم فرمایا۔ ابو جعفر (رح) کہتے ہیں کہ آپ (صلی اللہ علیہ وآلہ وسلم) کے اس ارشاد : (ان الارض لا تنجس) کا معنی یہ ہے کہ زمین سے جب نجاست دور کردی جائے تو وہ نجس باقی نہیں رہتی یہ معنی نہیں ہے کہ نجاست کے ہونے کے باوجود وہ پلید نہیں ہوتی چنانچہ اس طرح بیر بضاعہ کے بارے آپ (صلی اللہ علیہ وآلہ وسلم) کا ارشاد : (ان الماء لاینجسہ) نجاست کہ اس میں رہنے کی صورت میں نہیں بلکہ وہ نجاست کے نہ ہونے کی صورت میں ہے یہ آپ (صلی اللہ علیہ وآلہ وسلم) کے ارشاد کی (الماء یجنس) وجہ سے ۔ (واللہ اعلم) چنانچہ یہ وضاحت ہم نے اس حدیث کے علاوہ میں پائی ہے۔
اللغات : صب۔ پانی کا بہنا ‘ بہانا۔
تخریج : دار قطنی کتاب الطھارۃ ١؍١٣٢
تبصرہ طحاوی (رح) :
اس سے معلوم ہوا کہ ان الارض لا تنجس “ کا مطلب یہ ہے کہ جب نجاست زائل کردی جائے تو زمین ناپاک نہیں رہتی یہ مطلب نہیں کہ نجاست کے پائے جانے کی شکل میں وہ مقام ناپاک نہیں ہوتا۔
بالکل اسی طرح بیر بضاعہ کا معاملہ ہے کہ ان الماء لا ینجسہ شیٔ“ میں نجاست کے کنوئیں میں موجود ہونے کی حالت کا تذکرہ نہیں بلکہ نجاست کے نکال دیئے جانے کے بعد والی حالت کا ذکر ہے۔ ہم نے لا ینجسہ شیٔ کی جو وجہ بیر بضاعہ کے متعلق بیان کی ہے یہ اور کئی روایات سے بھی ثابت ہے جو ہمارے اس بیان کی تصدیق کرتی ہیں ان کو ذیل میں ملاحظہ فرمائیں۔

١ ١: حضرت ابوہریرہ (رض) سے روایت ہے کہ جناب نبی اکرم (صلی اللہ علیہ وآلہ وسلم) نے یا کھڑے پانی میں پیشاب کرنے سے منع فرمایا دائم کے لفظ فرمائے یا راکد کے (ہر دو کا معنی یکساں ہے) کہ پھر اس سے وضو یا غسل کرے۔
اللغات : الدائم : دوام و ہمیشگی۔ الراکد : رکنا ‘ ٹھہرنا۔
تخریج : اس روایت کو متعدد اسانید سے مسلم فی باب الطھارۃ نمبر ٩٤‘ ترمذی فی الطھارۃ باب ٥١۔ نسائی فی الطھارۃ ١؍٤٩ ابن ماجہ فی الطھارۃ باب ٢٥‘ مسند احمد ٢؍٢٨٨‘ ٤٦٤‘ ٥٣٢‘ ٤؍٢٤١‘ ٣٥٠ میں ذکر کیا ہے۔

١٢ : حضرت ابوہریرہ (رض) جناب رسول اللہ (صلی اللہ علیہ وآلہ وسلم) کا ارشاد نقل کرتے ہیں تم میں سے کوئی ہرگز ٹھہرے ہوئے پانی میں جو کہ نہ چلتا ہو پیشاب نہ کرے کہ پھر اس میں غسل کرنے لگے۔
تخریج : بخاری فی الوضوء باب ٦٨ مسلم فی الطھارۃ حدیث نمبر ٩٤‘ ٩٥‘ ٩٦۔ ابو داؤد فی الطھارۃ باب ٣٦‘ ترمذی فی الطھارۃ باب ٥١‘ نسائی فی الطھارۃ ١؍٤٩‘ باب الماء الدائم ‘ والغسل ١؍١٩٧‘ ابن ماجہ فی الطھارۃ باب ٢٥‘ دار می فی الوضوء باب ٥٤‘ مسند احمد ٢؍٢٥٩‘ ٢٦٥‘ ٢٨٨‘ ٣١٦‘ ٣٤٦‘ ٣٦٢‘ ٣٩٤‘ ٤٣٣‘ ٤٦٤‘ ٤٩٢‘ ٥٢٩‘ ٥٣٢‘ ٣؍٣٤١‘ ٣٥٠‘ ابن ابی شیبہ ١؍١٤١‘ بیہقی السنن الکبرٰی ١؍٩٧‘ ٢٥٦‘ مستدرک ١؍١٦٨

١٣ : حضرت ابوہریرہ (رض) کہتے ہیں کہ رسول اللہ (صلی اللہ علیہ وآلہ وسلم) نے فرمایا تم میں سے کوئی بھی ہرگز کھڑے پانی میں پیشاب نہ کرے کہ پھر اس سے وضو کرنے لگے یا اسے پینے لگے۔
تخریج : سابقہ روایت نمبر ١٣ والی ملاحظہ فرمائیں۔

١٤ : حضرت ابوہریرہ (رض) جناب نبی اکرم (صلی اللہ علیہ وآلہ وسلم) کا ارشاد نقل کرتے ہیں کوئی جنابت والا شخص تم میں سے کھڑے پانی میں غسل نہ کرے ایک سائل نے کہا اے ابوہریرہ (رض) پھر وہ کیسے غسل کرے تو ابوہریرہ (رض) کہنے لگے پانی کو الگ لے کر (غسل کرے تاکہ پانی کھڑے پانی میں نہ ملے)
تخریج : روایت نمبر ١٣ ملاحظہ کریں۔

١٥ : حضرت ابوہریرہ (رض) آپ (صلی اللہ علیہ وآلہ وسلم) کا ارشاد نقل کرتے ہیں ” کہ تم میں سے کوئی ہرگز اس کھڑے پانی میں جو نہ چلتا ہو پیشاب نہ کرے “ اور پھر اس میں غسل کرنے لگے۔
تخریج : روایت نمبر ١٣ ملاحظہ کریں۔

١٦: گزشتہ روایت عبدالرحمن نے اپنے والد ابوالزناد سے نقل کی اور یہ روایت سفیان نے ابی الزناد سے نقل کی ہے ابوالزناد نے اپنی سند کے ساتھ ابوہریرہ (رض) سے ہی نقل کی ہے۔
تخریج : روایت نمبر ١٣ ملاحظہ فرمائیں۔

١٧: حضرت ابوہریرہ (رض) آپ (صلی اللہ علیہ وآلہ وسلم) کا ارشاد نقل کرتے ہیں ” تم میں سے کوئی بھی ہرگز رکے ہوئے نہ بہنے والے پانی میں پیشاب نہ کرے کہ پھر اس سے غسل کرنے لگے۔
تخریج : روایت نمبر ١٣ میں ملاحظہ فرمائیں۔

١٨ : حضرت ابوہریرہ (رض) نے جناب رسول اللہ (صلی اللہ علیہ وآلہ وسلم) کا ارشاد نقل کیا ہے کہ ” ہرگز تم میں سے کوئی رُکے ہوئے پانی میں پیشاب نہ کرے اور نہ اس میں غسل (جنابت) کرے۔ “
تخریج : روایت نمبر ١٣ میں ملاحظہ ہو۔

١٩: حضرت ابوہریرہ (رض) جناب نبی اکرم (صلی اللہ علیہ وآلہ وسلم) کا ارشاد اسی طرح نقل کرتے ہیں البتہ ان الفاظ کا فرق ہے ولا یغتسل فیہ جنب “ یعنی اس میں کوئی جنابت والا غسل نہ کرے۔
تخریج : تخریج روایت نمبر ١٣ میں ملاحظہ فرمائیں۔

٢٠ : حضرت جابر (رض) جناب نبی اکرم (صلی اللہ علیہ وآلہ وسلم) سے نقل کیا ہے کہ آپ (صلی اللہ علیہ وآلہ وسلم) نے کھڑے پانی میں پیشاب کرنے سے منع فرمایا کہ پھر اسی سے وضو کرنے لگے۔ امام ابو جعفر (رح) فرماتے ہیں کہ جب جناب رسول اللہ (صلی اللہ علیہ وآلہ وسلم) نے کھڑا پانی جو نہ چلے اسے جاری پانی سے الگ قرار دیا اس سے ہمیں یہ معلوم ہوگیا کہ آپ (صلی اللہ علیہ وآلہ وسلم) نے ان میں اس لیے فرق کیا کیونکہ نجاست اس پانی میں جو جاری نہ ہو ‘ داخل ہوجاتی ہے اور جاری پانی میں اس کا اثر نہیں پڑتا اور یہ بات آپ (صلی اللہ علیہ وآلہ وسلم) سے اس برتن کے دھونے کے سلسلے میں مروی ہے جس میں کتے نے منہ ڈال دیا ہو اسے ہم عنقریب اسی کتاب میں ان شاء اللہ اپنے موقع پر ذکریں گے ۔ یہ بات برتن اور اس کے پانی کے پلید ہونے کی کھلی دلیل ہے حالانکہ وہاں بو ‘ رنگ اور ذائقہ کا برتن یا پانی کے پلید ہونے میں کوئی اثر نہیں پس ان آثار کے معانی کو صحیح اپنے مقام پر رکھنے سے وہی چیز ثابت ہوتی ہے جس کو ہم نے اس باب میں بیئر بضاعہ والی حدیث کے معانی کی وضاحت میں ذکر کردیا ہے تاکہ اس سے ان آثار اور ان آثار کے معانی میں یکسانیت پیدا ہوجائے اور تضاد نہ رہے پس یہ اس پانی کا حکم ہے کہ جو نہ چلتا ہو اور اس میں نجاست گرجائے البتہ بعض لوگوں نے کوئی مقدار مقرر کی ہے چنانچہ انھوں نے کہا جب پانی دو قلوں کی مقدار کو پہنچ جائے تو وہ گندگی کو نہیں اٹھاتا اور اس سلسلے میں انھوں نے ان روایات سے دلیل پیش کی۔
تخریج : روایت نمبر ١٣ میں گزری ملاحظہ کرلی جائے۔
حاصل روایات عشرہ :
حضرت ابوہریرہ (رض) کی روایت کو نو اسناد سے ذکر کیا دسویں روایت حضرت جابر (رض) سے نقل کی ان تمام روایات کا ماحصل قریب ایک ہے کہ ٹھہرے ہوئے پانی میں پیشاب کرنے اور غسل جنابت سے ممانعت کی گئی ہے تاکہ گندگی کے پڑنے سے وہ پانی وضو و غسل کے لیے ناقابل استعمال نہ ہوجائے چنانچہ علامہ طحاوی (رح) فرماتے ہیں کہ جناب رسول اللہ (صلی اللہ علیہ وآلہ وسلم) نے کھڑے اور رکے ہوئے پانی کو جو کہ نہ بہتا ہو جاری پانی سے الگ قرار دیا اس سے یہ بات بالکل ظاہر ہوگئی کہ جدا کرنے کی وجہ یہی ہے کہ نہ بہنے والے پانی میں نجاست اثر پذیر ہوتی ہے جبکہ وہ قلیل ہو اور جاری کے حکم میں نہ ہو اور کثیر پانی اور جاری پانی میں نجاست اثر نہیں کرتی جب تک رنگ بو ذائقہ نہ بدل جائے یا نجاست چلو میں نہ آنے لگے۔
اس بات پر بطور تنویر دلیل کے وہ روایت ہے جس کو حدیث ولوغ کلب کہا جاتا ہے اسے ہم دوسرے مقام پر ذکر کریں گے اس کا حاصل یہ ہے کہ اگر کتا کسی برتن میں منہ ڈال دے تو برتن کو سات مرتبہ دھویا جائے۔ اب یہ تو ظاہر ہے کہ برتن والا پانی قلیل ہے اور کتے کے منہ ڈالنے سے رنگ ‘ بو ‘ ذائقہ کا بدلنا پایا ہی نہیں گیا اس سے ثابت ہوگیا کہ پانی کے ناپاک ہونے کے لیے وصف کا بدلنا شرط نہیں۔
تطبیق : پس جماعت اول کی پیش کردہ روایات جو بیر بضاعہ سے متعلق ہیں اور ان روایات میں تضاد کے ختم کرنے کی صورت یہی ہے کہ بیر بضاعہ والی روایات کو جاری پانی پر محمول کیا جائے یا گندگی کے نکالنے کے بعد والے تازہ پانی سے متعلق سوال پر محمول کیا جائے کہ ازالہ نجاست کے بعد پانی ناپاک نہیں رہتا اور ان روایات کو قلیل رکا ہوا پانی تسلیم کیا جائے جو کہ جاری کے حکم میں نہیں اسی طرح ولوغ کلب والی روایت کہ قلیل پانی میں تغیر اوصاف کی بھی چنداں ضرورت نہیں وہ حکم کثیر اور جاری پانی کے لیے ہے اس طرح روایات کا باہمی تضاد بالکل ختم ہوجاتا ہے۔
(عقلی طور پر آپ (صلی اللہ علیہ وآلہ وسلم) کی نفاست و طہارت کا خیال کر کے روایات کا مفہوم ظاہر ہے۔ واللہ یحب المتطھرین۔
ص : ٢٢ غیر ان قوما وقتوا فی ذلک شیئا۔ فقالوا ان کان الماء مقدار قلتین لم یحمل خبثًا۔
یہاں سے امام طحاوی ایک دوسرے اختلاف کی طرف اشارہ کر رہے ہیں جو مسئلہ اول میں جماعت نمبر ٢ کے مابین پایا جاتا ہے اپنے مزاج کے مطابق پہلے قالوا سے ان کے نکتہ اختلاف کو ذکر کیا اور پھر ان کے دلائل ذکر کئے پھر مسلک منصور کے جوابات و دلائل بیان کئے گئے ہیں۔
نکتہ اختلاف :
امام شافعی و احمد بن حنبل رحمہما اللہ کے ہاں قلیل پانی دو قلہ سے کم کم مقدار ہے اور دو قلے اور اس سے زیادہ کثیر ہے اور اسی کا حکم رکھتا ہے کہ اس پر نجاست کا اثر رنگ ‘ بو ‘ ذائقہ کی صورت میں جب تک ظاہر نہ ہو ناپاک نہ ہوگا۔
احتجوا فی ذلک سے ان کے دلائل ذکر کئے جو کہ چھ روایات ہیں پانچ مرفوع اور ایک موقوف ہے امام طحاوی نے روات کی طرف چنداں تعرض نہیں کیا۔ جس کو تفصیل درکار ہو وہ امانی الاحبار اور بذل المجہود جلد : ١ کو ملاحظہ کرے۔

٢١ : حضرت عبداللہ بن عمر (رض) ذکر کرتے ہیں کہ جناب رسول اللہ (صلی اللہ علیہ وآلہ وسلم) سے اس پانی کے متعلق دریافت کیا گیا جس پر درندوں کی آمد ورفت ہو تو آپ (صلی اللہ علیہ وآلہ وسلم) نے فرمایا جب پانی دو قلہ تک پہنچ جائے تو وہ گندگی سے متاثر نہیں ہوتا یعنی پاک رہتا ہے۔
اللغات : قلہ : اس کے چار مشہور معانی ہیں ! مٹکا " قد آدم #پہاڑ کی چوٹی $چیز کا بلند حصہ۔
تخریج : ابو داؤد فی الطھارۃ باب ٣٣ /٦٣‘ ترمذی فی الطھارۃ باب ٥/ ٦٧‘ نسائی فی الطھارۃ ١؍٤٦ باب ٤٣‘ ابن ماجہ فی الطھارۃ باب ٧٥‘ الدارمی فی الوضوء باب ٥٥ مسند احمد ٢؍٢٣‘ ٢٧‘ ١٠٧‘ دارقطنی فی السنن ١؍١٩‘ ٢١‘ بیہقی فی السنن الکبرٰی ١؍٢٦ مستدرک ١؍١٣٢‘ ابن ابی شیبہ ١؍١٤٤۔

٢٢ : حضرت عبداللہ بن عمر (رض) نقل کرتے ہیں کہ جناب نبی اکرم (صلی اللہ علیہ وآلہ وسلم) سے جنگل کے ان جوہڑوں سے متعلق پوچھا گیا جن سے درندے پانی پیتے ہیں تو آپ (صلی اللہ علیہ وآلہ وسلم) نے فرمایا جب پانی دو قلے تک پہنچ جائے تو وہ گندگی کو نہیں اٹھاتا یعنی ناپاک نہیں ہوتا۔
اللغات : تصیب منھا : اس سے درندے پانی پیتے ہیں۔
تخریج : روایت نمبر ٢٢ کی تخریج ملاحظہ فرمائیں۔

٢٣ : حضرت عبداللہ بن عمر (رض) نے جناب رسول اللہ (صلی اللہ علیہ وآلہ وسلم) سے روایت نمبر ٢٢ جیسی روایت نقل کی ہے۔
تخریج : روایت نمبر ٢٢ میں دیکھ لی جائے۔

٢٤ : حضرت عبداللہ بن عمر (رض) نے جناب نبی اکرم (صلی اللہ علیہ وآلہ وسلم) سے اسی طرح روایت نقل کی ہے۔
تخریج : روایت نمبر ٢٢ والی ملاحظہ کرلی جائے۔

٥ ٢: حماد بن سلمہ کا بیان ہے کہ ہمیں عاصم بن منذر نے بتلایا کہ ہم اپنے یا عبیداللہ بن عبداللہ بن عمر (رض) کے باغ میں تھے تو نماز کا وقت آگیا اور یہ نماز ظہر تھی تو عبیداللہ باغ کے کنوئیں کی طرف گئے اور اس سے وضو کیا حالانکہ اس میں مردہ اونٹ کی کھال پڑی تھی میں نے کہا کیا اس کے ہوتے ہوئے آپ اس میں وضو کر رہے ہیں تو عبیداللہ نے جواباً فرمایا میرے والد عبداللہ نے مجھے بتلایا کہ جناب رسول اللہ (صلی اللہ علیہ وآلہ وسلم) نے ارشاد فرمایا جب پانی دو قلے ہو تو وہ ناپاک نہیں ہوتا۔
اللغات : لم ینجس : ناپاک و نجس نہیں ہوتا۔
تخریج : روایت نمبر ٢٢ کی تخریج پیش نظر رکھی جائے۔

٢٦ : حماد بن سلمہ نے پہلی روایت جیسی سند سے نقل کیا ہے مگر اس روایت کو ابن عمر سے موقوف نقل کیا ہے مرفوع نہیں کیا۔ علماء کی اس جماعت نے یہ فرمایا جب پانی اتنی مقدار کو پہنچ جائے تو اس میں جتنی بھی نجاست پڑجائے اسے نقصان نہیں دے گی سوائے اس کے جب نجاست کی بو ‘ ذائقہ یا رنگ پانی پر غالب آجائے اور انھوں نے اس سلسلے میں ابن عمر (رض) کی اسی روایت کو دلیل بنایا ہے ان کے خلاف پہلے قول والے علماء کی دلیل یہ ہے جس کو ہم نے صحیح قرار دیا کہ ان آثار میں ان دو قلوں کی مقدار ہمارے سامنے صحیح واضح نہیں ہوتی جیسا کہ تم نے بیان کیا دوسری طرف اس میں یہ احتمال بھی ہے کہ اس سے مراد آدمی کا قد ہو تو اس صورت میں یہ مراد لیا جائے گا کہ پانی کی مقدار آدمی کے دو قد کے برار ہو تو وہ نجاست کو کثرت کی وجہ سے نہیں اٹھاتا اور اس لیے بھی کہ وہ نہر کے معنی میں ہوجائے گا اگر تم یوں کہتے ہو کہ یہ روایات ہمارے نزدیک ظاہر پر ہیں اور اس سے مرا د حجاز کے معروف مٹکے ہیں تو اس کے جواب میں کہا جائے گا اگر تمہارے کہنے کے مطابق روایات اپنے ظاہر پر ہے تو پھر مناسب یہ ہوگا کہ جب پانی اس مقدار کو پہنچ جائے تو اس کو نجاست نقصان نہ دے اگرچہ اس کا رنگ ‘ ذائقہ اور بو بدل جائے کیونکہ جناب رسول اللہ (صلی اللہ علیہ وآلہ وسلم) نے اس حدیث میں ان چیزوں کا ذکر نہیں فرمایا تو حدیث اپنے ظاہر پر ہوگی پس اگر تم یہ کہو کہ اگرچہ اس روایت میں آپ (صلی اللہ علیہ وآلہ وسلم) نے اس کا ذکر نہیں فرمایا مگر اور جگہ میں تو اس کا ذکر فرمایا ہے اور تم اس روایت کو ذکر کرو کہ راشد ابن سعد نے کہا جناب رسول اللہ (صلی اللہ علیہ وآلہ وسلم) نے فرمایا ہے : (الماء لا ینجسہ شئ۔۔۔) یعنی پانی کو کوئی چیز پلید نہیں کرسکتی جو چیز اس کے رنگ ‘ ذائقہ اور بو کو بدل دے تو اس کے جواب میں یہ کہا جائے گا کہ یہ منقطع روایت ہے اور منقطع کو جب تم ثابت تسلیم نہیں کرتے اور نہ اس سے استدلال کو درست مانتے ہو۔ پس اگر تم نے قلتین والی روایت میں خاص قلے مرادلیے ہیں تو تمہارے علاوہ دوسروں کو بھی حق ہے کہ پانی کو وہ خاص پانی قرار دیں پس یہ اس طرح پہلے آثار کے معانی کے موافق ہوجائے گا اور مخالف نہ رہے گا اگر پہلے آثار جو کہ ٹھہرے ہوئے پانی میں پیشاب کرنے کے سلسلہ میں اور اس پانی کے نجس ہونے کے سلسلہ میں جو برتن میں ہو اور اس میں بلی منہ ڈال دے عام ہیں اور ان میں مقدار کا تذکرہ نہیں اور پانی کو ہر رکے ہوئے پانی کے سلسلہ میں قرار دیا جائے گا تو اس سے یہ بات بھی ثابت ہوتی ہے کہ قلتین والی روایت میں بہتا ہوا پانی مراد ہے اور اس میں بھی پانی کی مقدار کو اسی طرح پیش نظر نہ رکھیں گے جیسا کہ پہلی روایت میں پیش نظر نہیں رکھا گیا تاکہ اس باب میں آنے والی روایات آپس میں متضاد نہ ہوں۔ یہ مفہوم وہ ہے جس سے آثار کے معانی ہمارے نزدیک صحیح رہ سکتے ہیں اور یہی امام ابوحنیفہ ‘ ابو یوسف اور محمد (رح) کا قول ہے اور اس سلسلے میں پہلے ہی رواۃ سے جو ان کے مذہب کے موافق روایات گذری ہیں ایک اور روایت اس سلسلے میں وارد ہے جو مندرجہ ذیل ہے۔
تخریج : حسب سابق روایت ٢٢ میں ملاحظہ کریں۔
توجہ طلب بات :
ان چھ روایات میں مدار سند تین راوی ہیں نمبر ١ ولید بن کثیر نمبر ٢ محمد بن اسحاق نمبر ٣ حماد بن سلمہ۔ چنانچہ حماد بن سلمہ ‘ حماد بن سلمہ سے تین اور محمد بن اسحاق سے دو اور ولید بن کثیر سے ایک روایت منقول ہے ان میں دو ضعیف اور حماد بن سلمہ معتبر راوی ہیں۔
حاصل روایان : ان روایات کا ماحصل یہ ہے کہ جب پانی اس مقدار کو پہنچ جائے تو نجاست سے اس کو ضرر نہ ہوگا اور وہ ناپاک نہ ہوگا مگر صرف اس صورت میں جبکہ گندگی کی بدبو ‘ رنگ ‘ ذائقہ غالب آجائے۔ احتجوا سے مسلک راجح (احناف) کی طرف سے جوابات دے رہے ہیں۔
جواب : ان آثار میں قلتین کی مقدار کی تعیین نہیں کی گئی لغت سے اس کی تعیین مشکل ہے ممکن ہے کہ قلتین سے مقام حجر کے دو قلے مراد ہوں جیسا تم کہتے ہو اور یہ بھی عین ممکن ہے کہ اس سے دو قد انسانی کے برابر پانی مراد ہو تو روایت ابن عمر کا مطلب یہ ہوگا کہ جب پانی دو قد انسانی کے برابر ہوجائے تو کثرت کی وجہ سے نجاست کو نہ اٹھائے گا یعنی نجاست اس پر اثر انداز نہ ہوگی کیونکہ وہ اس وقت نہر جاری کے حکم میں ہوگا اور اس میں کسی کو بھی کلام نہیں۔
سوال : اس حدیث میں اگرچہ مقدار کا تذکرہ موجود نہیں ہے مگر روایت سے اپنے ظاہر کے مطابق قلال حجاز مراد لیے جائیں گے جن کی طرف ذہن فوراً منتقل ہوتا ہے۔
جواب : ہم عرض کریں گے کہ اگر تمہارے بقول خبر اپنے ظاہر پر ہے تو پھر یہ کہنا مناسب ہوگا کہ پانی جب اس مقدار کو پہنچ جائے تو نجاست اس کے لیے قطعاً کسی صورت بھی مضر نہیں خواہ اس کا رنگ ‘ بو ‘ ذائقہ ہی کیوں نہ بدل جائے کیونکہ نبی اکرم (صلی اللہ علیہ وآلہ وسلم) نے اس کو بھی اس روایت میں ذکر نہیں فرمایا۔ پس حدیث اپنے ظاہر پر ہوئی (حالانکہ آپ اس کے قائل نہیں) ۔
ایک اور سوال :
یہ تسلیم کرلیا کہ اگرچہ نبی اکرم (صلی اللہ علیہ وآلہ وسلم) نے اس روایت میں اس کو ذکر نہیں کیا مگر دیگر روایات میں تو مذکور ہے راشد بن سعد کی روایت ہے کہ جناب رسول اللہ (صلی اللہ علیہ وآلہ وسلم) نے فرمایا : ((الماء لا ینجسہ شیٔ الا ما غلب علی لونہ اوطعمہ اور یحہ)) اس روایت کو ابن ماجہ نے باب ٧٦ فی الطہارت اور دارقطنی نے اپنی سنن ١؍٢٨‘ ٢٩ پر ذکر کیا ہے اب آپ کا جواب درست نہ رہا ۔
جواب : راشد بن سعد کی روایت منقطع ہونے کی وجہ سے قابل استدلال نہیں اور شوافع کے ہاں جب منقطع قابل استدلال نہیں تو اسے آگے بطور حجت پیش کرنا کیسے درست ہوگا۔
ایک اور انداز سے :
اگر قلتین والی روایت میں قلال سے خاص قسم کے قلال حجریہ مراد لیے گئے ہیں تو دوسروں کے لیے بھی راستہ مل گیا کہ وہ قلہ کے پانی سے خاص پانی یعنی جاری پانی مراد لیں جو کہ کثیر ہے اور اس سے پہلے حضرت ابوہریرہ (رض) اور جابر (رض) والی روایات میں ماء راکد اور دائم سے ماء قلیل مراد ہو تاکہ روایات کا باہمی تعارض ختم ہوجائے۔ واللہ اعلم۔ ماء راکد میں پیشاب کی ممانعت والی روایات اور برتن میں کتے کے منہ ڈالنے والی روایات عام ہیں ان میں مقدار کا تذکرہ پایا نہیں جاتا مگر ان کو قلیل مقدار کھڑے پانی پر محمول کیا ہے جو کہ بالاتفاق ہے تو اس سے یہ ثابت ہوا کہ حدیث قلتین کو ہم جاری پانی پر محمول کریں اور پانی کی مقدار سے یہاں بھی قطع نظر کرلیں جیسا کہ ماء راکد والی روایات میں اس سے قطع نظر کی گئی ہے تاکہ روایات میں تضاد باقی نہ رہے۔
حاصل یہ ہے :
کہ روایات کا یہ تطبیقی معنی ہمارے ائمہ احناف حضرت ابوحنیفہ (رح) ‘ ابو یوسف (رح) اور محمد (رح) کا قول ہے کہ ماء کثیر کا دارومدار مبتلا ہونے والے کی رائے پر ہے اور کنوئیں کا پانی نجاست گرنے سے بلاتغیر اوصاف بھی ناپاک ہوجائے گا تو ماء قلتین کیونکر ناپاک نہ ہوگا اس کے لیے مندرجہ ذیل آثار شاہد ہیں۔

٢٧ : عطائؒ بیان کرتے ہیں کہ ایک حبشی زمزم میں گرپڑا اور مرگیا تو عبداللہ بن زبیر (رض) نے زمزم کے تمام پانی کو نکالنے کا حکم دیا وہ نکال دیا گیا مگر نیچے سے پانی منقطع نہیں ہو رہا تھا اچانک ان کی نگاہ پڑی تو ایک چشمہ حجر اسود کی جانب سے پھوٹ رہا تھا پس ابن زبیر (رض) نے فرمایا تمہیں موجودہ پانی کا نکال دینا کافی ہوگیا۔
اللغات : نزح۔ پانی نکالنا۔ قبل جانب ‘ حسبکم۔ کافی ہے۔ یہ اسم فعل ہے۔

٢٨ : جابر نے ابوالطفیل سے نقل کیا کہ زمزم میں ایک غلام گرپڑا پس اس کا تمام پانی نکالا گیا۔
اللغات : نزفت۔ یہ بھی نزح کے معنی میں ہے پانی نکالنا۔
تخریج : دراقطنی فی السنن ١؍٣٣۔

٢٩ : میسرہ بیان کرتے ہیں کہ علی (رض) نے اس کنوئیں کے متعلق جس میں چوہا گر کر مرجائے فرمایا اس کا تمام پانی نکالا جائے گا۔

٣٠ : میسرہ اور زاذان نقل کرتے ہیں کہ حضرت علی مرتضیٰ (رض) نے فرمایا جب چوہا یا کوئی جانور کنوئیں میں گرپڑے تو تم اس کا تمام پانی نکال دو یہاں تک کہ پانی تم پر غالب آجائے یعنی غالب گمان ہوجائے کہ تمام پانی نکل گیا ہے۔

٣١ : ابوالمہزم کہتے ہیں کہ ہم نے حضرت ابوہریرہ (رض) سے اس آدمی کے متعلق پوچھا جس کا گزر جوہڑ کے پاس سے ہو کیا وہ اس میں پیشاب کرسکتا ہے ؟ آپ نے فرمایا نہیں اس لیے کہ اسی جوہڑ پر اس کے مسلمان بھائی کا گزر ہوگا تو وہ اس سے (ضرورت پڑنے پر) پیئے گا اور وضو کرے گا (اگر اس نے پیشاب کردیا تو وہ ناپاک ہوگیا جبکہ وہ پانی جاری نہیں یا جاری کے حکم میں نہیں) اور اگر وہ جاری ہو تو اگر وہ چاہے تو اس میں پیشاب کرسکتا ہے (جاری پانی نجاست گرنے سے ناپاک نہیں ہوتا جب تک رنگ وغیرہ نہ بدلے)
اللغات : الغدیر۔ جوہڑ ‘ تالاب۔ فلیبل۔ یہ صیغہ امر ہے وہ پیشاب کرے۔

٣٢ : ایوب نے محمد (رح) کے واسطہ سے حضرت ابوہریرہ (رض) سے اسی طرح کی روایت نقل کی ہے۔

٣٣ : زکریّا نے امام شعبی (رح) نے پرندہ ‘ بلی اور ان جیسے جانوروں کے متعلق نقل کیا کہ اگر وہ کنوئیں میں گرجائیں تو چالیس ڈول نکالے جائیں گے۔
اللغات : السنور۔ بلی۔ ینزح۔ کنوئیں سے پانی نکالنا۔

٣٤ : زکریّا نے امام شعبی (رح) سے نقل کیا (کہ جس کنوئیں میں ایسا جانور گر کر مرجائے) اس سے چالیس ڈول نکالے جائیں گے۔

٣٥ : عبداللہ بن ہبرہ ہمدانی نے امام شعبی (رح) سے نقل کیا (کہ ایسے کنوئیں سے) ستّر ڈول نکالے۔
اللغات : یدلو منھا۔ ڈول نکالنا۔

٣٦ : عبداللہ بن سبرہ ہمدانی نے امام شعبی (رح) سے نقل کیا کہ ہم نے ان سے سوال کیا اگر مرغی کنوئیں میں گر کر مرجائے تو کیا حکم ہے ؟ فرمایا ستّر ڈول نکالے جائیں گے۔
اللغات : الدجاجہ۔ مرغی۔

٣٧ : مغیرہ نے ابراہیم (رح) سے اس کنوئیں کے متعلق پوچھا جس میں چوہا یا بلی گر کر مرجائے تو کیا حکم ہے فرمایا چالیس ٤٠ ڈول نکالے جائیں جب تک پانی متغیر نہ ہو۔
اللغات : الجرذ۔ چوہا ‘ السنور۔ بلی۔

٣٨ : مغیرہ نے ابرہیم (رح) سے اس کنوئیں سے متعلق دریافت کیا جس میں چوہا گر کر مرجائے تو انھوں نے فرمایا اس سے چالیس ڈول نکالے جائیں گے۔

٣٩ : مغیرہ نے ابراہیم (رح) سے اس کنوئیں کے متعلق دریافت کیا جس میں چوہا گر کر مرجائے ؟ تو انھوں نے فرمایا اس سے چند ڈول نکالے جائیں گے۔
اللغات : دلاء جمع دلو : ڈول۔

٤٠ : حماد بن سلمہ نے ابو سلیمان (رح) سے دریافت کیا اگر مرغی کنوئیں میں گر کر مرجائے تو کیا حکم ہے ؟ فرمایا چالیس ڈول یا پچاس ڈول کی مقدار پانی نکال دیں پھر اس سے وضو کرلیں۔ یہ جن اصحاب رسول اللہ (صلی اللہ علیہ وآلہ وسلم) اور تابعین (رح) نے روایت کیا انھوں نے کنووں کے پانیوں کو نجاسات کے پڑجانے سے نجس قرار دیا اور اس میں قلت اور کثرت کی رعایت نہیں کی بلکہ پانی کے دوام اور رکنے کی رعایت کی ہے اور انھوں نے چلنے والے پانی کو دیگر پانیوں سے الگ قرار دیا ہے۔ ان روایات کی طرف ان روایات سمیت جو ان سے پہلے ہم نے جناب رسول اللہ (صلی اللہ علیہ وآلہ وسلم) سے روایت کی ہیں ہمارے علماء کنووں میں گرنے والی نجاستوں کے سلسلے میں اس طرف گئے ہیں۔ ان کو ان روایات کی مخالفت بھی جائز نہیں کیونکہ کسی سے بھی ان کی مخالفت منقول نہیں۔ اگر کوئی شخص یہ کہے کہ تم نے کنویں کے پانی کو نجاست پڑنے سے نجس (پلید) قرار دیا۔ تو اس سے مناسب معلوم ہوتا ہے کہ کنواں کبھی بھی پاک نہ ہو کیونکہ اس کی دیواروں میں وہ پلید پانی سرایت کرچکا اور ان میں جاگزین ہوچکا۔ پس کنویں کی پاکیزگی کے لیے مناسب ہے کہ کنویں ہی کو پاٹ دیا جائے۔ اسے جواب میں یہ کہا جائے گا یہ چیز عادات سے ثابت نہیں۔ حضرت عبداللہ بن زبیر (رض) نے اصحاب پیغمبر کی موجودگی میں وہ عمل کیا جو ہم نے پیچھے ذکر کیا ہے اور ان میں سے کسی نے بھی انکار نہیں کیا اور نہ ہی بعد والوں میں سے کسی نے انکار کیا اور نہ ان میں سے کسی نے اس کے پاٹنے کی رائے دی بلکہ خود جناب رسول اکرم (صلی اللہ علیہ وآلہ وسلم) نے اس برتن کو جس میں سے کتے نے پانی لیا تھا یہ حکم فرمایا کہ اس کو دھو دیا جائے اور آپ نے توڑنے کا حکم نہیں دیا حالانکہ پلید پانی پیالے میں سرایت کرچکا ہے تو جس طرح اس برتن کے توڑنے کا حکم نہیں اسی طرح اس کنویں کے پاٹنے کا حکم بھی نہ دیا جائے گا۔ پھر اگر کوئی یہ کہے کہ ہم دیکھتے ہیں کہ برتنوں کو تو دھویا جاتا ہے لیکن کنووں کو آج تک دھوتے نہیں دیکھا گیا تو اسے یہ جواب دیا جائے گا کہ کنویں کا دھونا ممکن نہیں کیونکہ اس میں جس پانی سے دھویا جائے گا وہ دوبارہ لوٹ کر اسی میں جائے گا۔ وہ برتن کی طرح نہیں ہے کہ جس میں دھوئے ہوئے پانی کو بہا دیا جاتا ہے پس جب کنواں ان چیزوں میں سے ہوگیا جن کا دھونا ممکن نہیں اور اس کی طہارت جس حال میں بھی ہو وہ ثابت ہوگئی اور ہر وہ شخص جس نے نجاست کے گر جانے سے اس کی نجاست کا حکم لگایا تھا تو اس میں سے پانی کے نکال لیے جانے کے بعد اس کا پاک ہونا لازم ہوگیا۔ اگرچہ اس کی مٹی کو نہیں نکالا گیا۔ جب اس کی مٹی کا اس میں باقی رہنا وہ اس میں تازہ نکلنے والے پانی کی نجاست کو واجب نہیں کرتا۔ خواہ وہ اسی مٹی پر ہی چل رہا ہو تو اس کی دیواروں کا نجس نہ ہونا بدرجہ اولیٰ ثابت ہوگیا۔ اگر بطور نظر کے یہ بات مان لی جائے تو وہ پاک ہی نہیں ہوا چہ جائیکہ اس کی دیواروں کو دھو دیا جائے اور اس کی مٹی کو نکال دیا جائے اور پاٹ دیا جائے۔ پس جب اس پر سب متفق ہیں کہ اس کی مٹی اور کھدائی واجب نہیں تو اس کی دیواروں کا دھونا بدرجہ اولیٰ واجب نہ ہوگا اور یہ سب امام ابوحنیفہ، ابو یوسف اور محمد (رح) کا قول ہے۔
حاصل کلام : اصحاب رسول (صلی اللہ علیہ وآلہ وسلم) اور تابعین کے آثار واضح کر رہے ہیں کہ نمبر ١ نجاسات کے پڑنے سے کنوؤں کا پانی ناپاک ہوجاتا ہے نمبر ٢ اس میں انھوں نے قلت و کثرت کی رعایت نہیں کی بلکہ دوام و رکود (رکنا) کی رعایت کی ہے اور جاری پانی کو دوسرے پانیوں سے الگ شمار کیا ہے ان آثار سے اور جو اس سے پہلے ہم نے جناب رسول اللہ (صلی اللہ علیہ وآلہ وسلم) سے احادیث نقل کی ہیں ہمارے علماء ان نجاسات کے سلسلے میں اس طرف گئے ہیں جو کنوؤں میں گرجاتی ہیں اور ان کو ان روایات کی مخالفت جائز بھی نہیں کیونکہ کسی سے بھی ان روایات کے خلاف قول منقول نہیں۔
ایک اعتراض :
نجاست کے گرنے سے تم نے کنوئیں کو ناپاک قرار دیا تو مناسب معلوم ہوتا ہے کہ کنواں کبھی پاک نہ ہو خواہ سارا پانی اس میں سے نکال لیا جائے کیونکہ کنوئیں کی دیوار میں نجس پانی سرایت کرچکا اور جاگزین ہوچکا کنوئیں کو پاک کرنے کی بجائے پاٹ دینا مناسب ہوگا۔
S: عادۃً کنواں پاٹ ڈالنے کی بات دیکھنے میں نہیں آئی اور کنوئیں سے ناپاک پانی کے نکالنے والا عمل عبداللہ بن زبیر (رض) نے صحابہ کرام اور تابعین کی موجودگی میں کیا جبکہ زمزم میں ایک حبشی غلام گر کر مرگیا تھا اور کسی نے بھی اس کا انکار نہیں کیا اور نہ پاٹ ڈالنے کا حکم دیا اور نہ تابعین و تبع تابعین میں سے کسی نے دیا اور نہ کسی نے پاٹ ڈالنے کی رائے دی اور خود جناب رسول اللہ (صلی اللہ علیہ وآلہ وسلم) نے ولوغ کلب والے برتن کے متعلق حکم فرمایا کہ اس کو دھویا جائے اس کو توڑنے کا حکم نہیں فرمایا حالانکہ اس برتن میں نجس پانی سرایت کرچکا ہے پس جس طرح اس برتن کے توڑنے کا حکم (بالاتفاق) نہیں دیا جاتا اسی طرح کنوئیں کے پاٹ ڈالنے کا بھی حکم نہ دیا جائے گا۔
اعتراض نمبر ٢:
برتن کو تو دھونے کی بات آپ خود تسلیم کر رہے ہیں تو کنویں کو کیوں دھونے کے قائل نہیں ہوتے۔
الجواب : برتن کو بار بار دھو کر اس کا پانی پلٹ دیا جاتا ہے کنوئیں کی دیواریں دھونے سے پانی پھر اسی میں لوٹ جائے گا جب نکالیں گے تو پھر دیواروں پر پڑجائے گا پس اس کے دھونے کی طاقت نہیں۔ (اگر آپ کرسکتے ہیں تو کرتے جائیں ہم منع نہیں کرتے) جب کنوئیں کا دھونا استطاعت سے بڑھ کر ہے اور اس کی طہارت اسی حالت میں ہی ثابت ہے نیز جو لوگ نجاست کے گرنے سے اس کی نجاست کے قائل ہیں انھوں نے ناپاک پانی نکالنے کے بعد کنوئیں کی طہارت کو لازم قرار دیا ہے خواہ کنوئیں کی گابھ نہ نکالی جائے تو حاصل جواب یہ ہوا کہ جب گابھ کا موجود رہنا تازہ نکلنے والے پانی کی نجاست کو لازم نہیں کرتا خواہ وہ پانی گابھ پر بہہ کر آ رہا ہو بلکہ وہ بالکل پاک قرار دیا جاتا ہے تو جو کچھ اس کی دیواروں کے درمیان سرایت کر جانے والا ہے وہ اس بات کا زیادہ حقدار ہے کہ نجس نہ رہے۔

دلیل عقلی :
ذرا غور سے سوچیں تو یہ بات اظہر من الشمس ہے کہ مناسب تو یہی ہے کہ جب تک کنوئیں کی دیواروں کو نہ دھویا جائے اور گابھ کو نہ نکالا جائے اور گہرائی میں اس کو نہ کھودا جائے تو اس وقت تک کنواں پاک نہ ہو مگر اس پر سب نے اتفاق کرلیا کہ گابھ کا نکالنا اور مزید کھدائی کرنا لازم نہیں بلکہ اس کی حاجت نہیں تو دیواروں کا دھونا بھی واجب و لازم نہ ہونا چاہیے۔
یہی امام ابوحنیفہ (رح) ‘ ابو یوسف و محمد (رح) کا قول ہے۔
` بَابُ سُوْرِ الْہِرِّ `
بلّی کا جوٹھا
سو ٔر :۔ جوٹھا پانی۔ اس کی علماء نے سات قسمیں بیان کی ہیں :
قسم حکم
! مسلمان کا جوٹھا ۔ بالاتفاق پاک ہے۔
" جن جانوروں کا گوشت کھایا جاتا ہے۔ بالاتفاق پاک ہے۔
# کافر کا جوٹھا ۔ اس میں اختلاف ہے۔
$ خنزیر کا جوٹھا ۔ بالاتفاق ناپاک ہے۔
% کتے کا جوٹھا ۔ اس میں اختلاف ہے۔
& گھر میں رہنے والے درندوں ‘ بلی ‘ چوہا ‘ سانپ وغیرہ کا جوٹھا ۔ طاہر یا مکروہ (آگے بحث ہوگی)
' خچر گدھے کا جوٹھا ۔ مکروہ ہے
اختلافِ ائمہ (رح) :
نمبر ١: امام شافعی ‘ مالک و احمد (رح) اور دیگر علماء بلی کے جو ٹھے کو بالکل طاہر قرار دیتے ہیں نمبر ٢ : امام ابوحنیفہ حسن بصری ‘ ابن سیرین (رح) طاہر تو نہیں بلکہ مکروہ ہے امام طحاوی کے ہاں کراہت تحریمی ہے۔

٤١ : کبشہ بنت کعب جو کہ ابن ابی قتادہ کی زوجہ ہیں وہ نقل کرتی ہیں کہ ابو قتادہ میرے ہاں تشریف لائے تو میں نے ان کے لیے برتن میں وضو کا پانی ڈالا اسی وقت بلی نکل کر اس برتن سے پانی پینے لگی تو ابو قتادہ نے اس کی طرف برتن کو جھکا دیا (تاکہ وہ اچھی طرح پانی پی لے) چنانچہ اس نے پانی پی لیا۔ کبشہ کہتی ہیں کہ مجھے ابو قتادہ نے تعجب کی نگاہ سے دیکھتے پایا تو فرمایا اے بھتیجی ! کیا تم اس پر تعجب کر رہی ہو ؟ میں نے کہا : جی ہاں ! تو اس پر ابو قتادہ کہنے لگے جناب رسول اللہ (صلی اللہ علیہ وآلہ وسلم) نے فرمایا ” یہ نجس نہیں “ بیشک یہ تم پر آنے جانے اور گھومنے والے جانوروں سے ہے “
اللغات : سکبت لہ۔ ڈالنا۔ بہانا۔ اصغی لھا۔ جھکانا ‘ مائل کرنا۔ طوافین۔ طواف کی جمع ہے بہت گھومنے اور چکر لگانے والا۔
تخریج : ابو داؤد فی الطھارۃ باب ٣٨‘ ترمذی فی الطھارۃ باب ٦٩ نسائی فی الطھارۃ باب ٥٣‘ والمیاہ باب ٩‘ ابن ماجہ فی الطھارۃ باب ٣٢‘ موطا فی الطھارۃ روایت نمبر ١٣‘ مسند احمد ٥؍٢٩٦‘ ٣٠٣‘ ٣٠٩‘

٤٢ : کعب بن عبدالرحمن اپنے دادا ابو قتادہ (رض) کے متعلق نقل کرتے ہیں کہ میں نے ان کو وضو کرتے دیکھا اچانک ایک بلی آ نکلی تو انھوں نے اس کی طرف برتن جھکا دیا یہاں تک کہ اس نے برتن سے پانی پیا میں نے کہا ابا جی ! آپ یہ کیوں کرتے ہیں ؟ تو ابو قتادہ کہنے لگے کہ نبی اکرم (صلی اللہ علیہ وآلہ وسلم) اس طرح کرتے تھے یا یہ کہا کہ یہ تم پر گھومنے والے جانوروں سے ہے۔
تخریج : روایت نمبر ٤١ کی مندرجہ بالا تخریج ملاحظہ کرلیں۔

٤٣ : حضرت عائشہ صدیقہ (رض) سے روایت ہے کہ میں اور جناب رسول اللہ (صلی اللہ علیہ وآلہ وسلم) ایک ہی برتن سے غسل کرلیا کرتے تھے حالانکہ اس پانی سے بلی پہلے پی چکی ہوتی تھی۔ تخریج : ابن ماجہ فی الطھارۃ ‘ باب ٣٢‘ دارقطنی فی السنن کتاب الطھارۃ ١؍٦٩۔

٤٤ : عمرہ نے حضرت عائشہ (رض) سے اس کی مثل روایت نقل کی ۔

٤٥: عروہ بن زبیر (رض) نے حضرت عائشہ صدیقہ (رض) سے نقل کیا کہ جناب رسول اللہ (صلی اللہ علیہ وآلہ وسلم) بلی کے پانی پینے کے لیے اس کی طرف برتن جھکا دیتے اور اس کے بچے ہوئے پانی سے وضو فرما لیتے۔
اللغات : فضل۔ بچا ہوا۔
تخریج : دارقطنی فی سنۃ کتاب الطھارۃ ١؍٧٠
حاصل روایان : علامہ ابو جعفر طحاوی (رح) فرماتے ہیں فقہاء کی ایک جماعت جن میں ائمہ ثلاثہ کے علاوہ امام یوسف (رح) بھی شامل ہیں اس طرف گئے ہیں کہ بلی کے جو ٹھے میں قطعاً کوئی حرج نہیں ہے جیسا کہ روایات و آثار بالا سے ظاہر ہو رہا ہے۔
تسامح : امام محمد (رح) کا نام شاید غلطی سے درج ہوگیا کیونکہ کتاب الآثار امام محمد ١؍٨٣ باب الوضوء میں اس کے خلاف ہے۔
خالفھم فی ذلک آخرون : یہاں سے پہلی جماعت کے دلائل کا جواب ذکر کرتے ہیں یاد رہے کہ پہلی جماعت کے دلائل کا حاصل یہ ہے کہ پانچ روایات جن کو حضرت ابو قتادہ اور عائشہ صدیقہ (رض) سے مختلف اسناد سے نقل کیا گیا ہے ان سے معلوم ہوتا ہے کہ بلی کا بچا ہوا پانی پاک ہے اسے مکروہ یا ناپاک نہیں کہا جاسکتا۔
جواب نمبر ١: اسحاق بن عبداللہ والی روایت کا مفہوم یہ ہوسکتا ہے کہ وہ گھروں میں آنے جانے والے جانوروں سے ہے اس کے بستر اور کپڑے کو لگ جانے سے بستر ناپاک نہ ہوگا پانی میں منہ ڈالنے کے بعد اس کے بچے ہوئے پانی کا تو روایت میں تذکرہ ہی نہیں پس روایت اس موضوع سے تعلق نہیں رکھتی چہ جائیکہ لاینجس سے اس کے پاک ہونے کی دلیل بنائیں۔
نمبر ٢ : دوسری روایت ابو قتادہ میں ان کا فعل مذکور ہے اور دوسرے صحابی کا فعل اگر اس کے خلاف ہو تو پھر ان دونوں میں جو قرآن و سنت سے قریب تر ہوگا وہ اختیار کیا جائے گا اور وہ فعل ابوہریرہ (رض) ہے۔
الجواب نمبر ٣: جناب رسول اللہ (صلی اللہ علیہ وآلہ وسلم) کے قول لاینجس میں جب دو احتمال ہیں کپڑوں کو لگ جانے سے ان کا نجس نہ ہونا اور برتن میں منہ ڈالنے سے اس پانی کا ناپاک نہ ہونا تو دو اطراف کا احتمال رکھنے والی روایت کو ایک کے ثبوت کی دلیل بنانا درست نہ ہوا۔
اس پر تنویر دلیل کے طور پر فرماتے ہیں کہ گھروں میں حفاظت اور شکار کے لیے کتوں کا رکھنا مکروہ نہیں ان کا خشک جسم کپڑے کو ٹکرا جائے تو کپڑا ناپاک نہ ہوگا ان کا جوٹھا ناپاک اور مکروہ ہے بالکل اسی طرح بلی کا گھروں میں چوہوں اور سانپوں سے حفاظت کے لیے آنا جانا تو درست ہوگا مگر اس کا جوٹھا مکروہ رہے گا پس ان روایات میں جو ٹھے کا حکم مذکور نہیں کہ وہ مکروہ ہے یا نہیں۔
الجواب ٤: البتہ وہ آثار جو حضرت عائشہ صدیقہ (رض) سے مروی ہیں ان میں یہ تو مذکور ہے کہ اس کا جوٹھا قابل استعمال ہے اگرچہ سند کے لحاظ سے یہ روایت نہایت کمزور ہے مگر اس سے قطع نظر کرتے ہوئے ہم اس کے بالمقابل صحیح روایت موجود پاتے ہیں جس کو ابن سیرین نے حضرت ابوہریرہ (رض) سے نقل کیا کہ نبی اکرم (صلی اللہ علیہ وآلہ وسلم) نے فرمایا جب برتن میں بلی منہ ڈال جائے تو برتن کی پاکیزگی ایک مرتبہ یا دو مرتبہ دھونے سے ہوگی قرہ بن خالد راوی کو شک ہے کہ ان کے استاذابن سیرین نے مرۃً فرمایا یا مرتین۔
تخریج : ابو داؤد و فی الطھارۃ باب ٣٧ نمبر ٧٢‘ ترمذی فی الطھارۃ باب ٦٨ روایت نمبر ٩‘ دارقطنی فی سننہ کتاب الطھارۃ ١؍٦٤۔
محاکمہ :
یہ روایت صحیحہ ہے اس کی سند متصل ہے اس نے ان روایات کی تفصیل کردی کہ آثار مذکورہ بالا کا مفہوم وہ ہے جو اس روایت کی روشنی میں ہوگا اور اگر سند کی طرف جائیں گے تو تب بھی اسی روایت کو ترجیح دینا پڑے گی۔
ایک اہم اشکال :
آپ تو اس روایت کو متصل السند کہہ رہے ہیں جبکہ معاملہ اس کے خلاف ہے ہشام بن حسان اپنے استاذ محمد بن سیرین سے اس کو موقوف نقل کر رہے ہیں جو اس طرح ہے : ہشام بن حسان عن محمد عن ابی ہریرہ (رض) قال سورالھرۃ یھراق ویغسل الاناء مرۃ او مرتین “ ۔
حل اشکال :
محمد بن سیرین حضرت ابوہریرہ (رض) سے روایات نقل کرتے ہوئے کبھی ان کو مرفوع نقل کرتے ہیں اور کبھی موقوف جب ان سے سوال کیا جاتا کہ آپ اس کو موقوف نقل کر رہے ہیں تو وہ اس کو مرفوع نقل کرتے اور فرماتے میں ابوہریرہ (رض) سے جو روایات نقل کروں خواہ وہ موقوف ہوں یا مرفوع وہ سب ابوہریرہ (رض) کی مرفوع روایات ہیں موقوف ذکر کرنے میں مرفوع سے بےنیازی ہوجاتی ہے پس اس روایت کا موقوف نقل ہونا چنداں محل اعتراض نہ ہوا یہ بات ابراھیم بن ابی داؤد نے اپنی سند کے ساتھ ابن سیرین سے نقل کی ہے پس اس روایت کا اتصال ثابت ہونے کے ساتھ ساتھ قرہ بن خالد کا محدثین میں ثبت اور ضبط و اتقان مشہور و معروف ہے نیز روایت کے دیگر شواہد بھی موجود ہیں۔

٤٦ : ابو صالح السمان (رح) حضرت ابوہریرہ (رض) سے نقل کرتے ہیں کہ بلی کے برتن میں منہ ڈالنے سے برتن کو اسی طرح دھویا جائے گا جیسا کتے کے منہ ڈالے ہوئے برتن کو۔
تخریج : بیہقی ١؍٣٧٦ دارقطنی ١؍٦٨۔

٤٧ : ابو صالح (رح) نے حضرت ابوہریرہ (رض) سے اسی طرح کا قول نقل کیا ہے۔
اور یہ صحابہ کرام اور تابعین کی ایک بڑی جماعت سے مروی ہے۔

٤٨ : نافع (رح) ، ابن عمر (رض) کے متعلق نقل کرتے ہیں کہ وہ کتے اور بلی کے جو ٹھے پانی سے وضو نہ کرتے تھے اور فرماتے ان کے علاوہ گھروں میں رہنے والے جانوروں کے جو ٹھے میں کوئی حرج نہیں۔ امام ابوجعفر طحاوی (رح) فرماتے ہیں کہ ان آثار کی طرف ایک جماعت گئی ہے اس لیے انھوں نے بلی کے جو ٹھے میں کوئی حرج قرار نہیں دیا اور جو حضرات اس طرف گئے ہیں ان میں امام ابویوسف اور امام محمد (رح) ہیں۔ دوسرے علماء نے ان کی مخالفت کی ہے اور انھوں نے اس کو مکروہ قرار دیا۔ چنانچہ پہلے قول والے حضرات کے خلاف ان کی دلیل اسحق بن عبداللہ والی روایت ہے (ہم ان سے یہ عرض کریں گے کہ تمہارے حق میں جناب رسول اکرم (صلی اللہ علیہ وآلہ وسلم) کے ارشاد : ((انہا من الطوافین علیکم او الطوافات)) میں اس کے نجس نہ ہونے کی کوئی دلیل نہیں کیونکہ اس میں یہ بھی جائز ہے کہ اس کا گھروں میں رہنا مراد لیا گیا ہو اور کپڑوں کو چھونا مراد ہو بقیہ برتن میں اس کا منہ مارنا یہ اس بات کی دلیل نہیں ہے کہ اس سے اس کا نجس ہونا یا نجس نہ ہونا ثابت ہو۔ حدیث کے اندر تو حضرت ابوقتادہ (رض) کا فعل ذکر کیا گیا ہے۔ پس مناسب نہیں کہ جناب نبی کریم (صلی اللہ علیہ وآلہ وسلم) کے اس ارشاد سے جو دو معنوں کا احتمال رکھنے والا ہے اس سے ایک طرف دلیل بنائی جائے جبکہ ہم دیکھتے ہیں کہ کتوں کا گھر کے اندر رکھنا ناجائز نہیں اور ان کا جوٹھا پلید ہے تو یہ بھی جائز ہے کہ جناب رسول اکرم (صلی اللہ علیہ وآلہ وسلم) سے حدیث ابی قتادہ میں جو ارشاد آیا ہے اس کا گھروں میں شکار ‘ نگہبانی اور کھیتی کے لیے پالنا مراد لیا جائے۔ اس میں اس کے جو ٹھے کے حکم کے لیے کوئی دلیل نہیں ہے کہ آیا وہ پلید ہے یا نہیں ؟ لیکن دوسرے آثار جو عائشہ صدیقہ (رض) نے جناب رسول اللہ (صلی اللہ علیہ وآلہ وسلم) سے نقل کیے ہیں ان میں اس کے جو ٹھے کا مباح ہونا ثابت ہوتا ہے۔ پس ہم یہ چاہتے ہیں کہ ہم اس بات پر غور کریں کہ کیا جناب احمد مصطفیٰ (صلی اللہ علیہ وآلہ وسلم) سے اس کے مخالف کوئی بات مروی ہے ‘ چنانچہ ہم نے غور کیا تو حضرت ابوہریرہ (رض) کی روایت جناب حضور اکرم (صلی اللہ علیہ وآلہ وسلم) سے مروی سامنے آئی کہ آپ (صلی اللہ علیہ وآلہ وسلم) نے فرمایا کہ بلی جب پانی والے برتن میں منہ ڈال دے تو اس کی پاکیزگی یہ ہے کہ اسے ایک یا دو مرتبہ دھو دیا جائے۔ قرۃ کو ان دونوں الفاظ میں سے ایک کے بارے میں شک ہے اس حدیث کی سند متصل ہے۔ یہ حدیث پہلے آثار میں جو کچھ ہے اس کے خلاف ہے اور انھوں نے اس روایت کو صحت سند کی وجہ سے الگ ذکر کیا۔ اگر آپ اس بات کو سند کے لحاظ سے لیں تو یہ قول اس کے مخالف دیگر اقوال سے اولیٰ ہے اگر اس کے متعلق کوئی یہ کہے کہ اس روایت کو ہشام بن حسان نے ابن سیرین سے مرفوع نقل نہیں کیا اور انھوں نے اس میں وہ بیان کیا جو ابوبکرہ نے ہمیں وہب بن جریر کے واسطہ سے ابوہریرہ (رض) سے بیان کیا ہے کہ بلّی کے جو ٹھے کو بہا دیا جائے اور برتن کو ایک یا دو مرتبہ دھو دیا جائے اس کا جواب یہ ہے کہ اس سے یہ لازم نہیں آتا کہ قرۃ کی روایت فاسد ہے کیونکہ محمد ابن سیرین حضرت ابوہریرہ (رض) کی روایت میں اکثر ایسا کرتے رہتے ہیں کبھی اس کو موقوف بیان کرتے ہیں ‘ جب ان سے پوچھا جاتا ہے کہ آیا یہ جناب نبی اکرم (صلی اللہ علیہ وآلہ وسلم) سے مروی ہے تو وہ اس کو مرفوع نقل کردیتے ہیں اس کی دلیل وہ روایت ہے جو ابراہیم بن ابوداؤد کی سند سے ابن سیرین نے اس طرح ذکر کی کہ جب وہ ابوہریرہ (رض) سے نقل کرتے تو ان سے پوچھا جاتا کہ کیا یہ نبی اکرم (صلی اللہ علیہ وآلہ وسلم) کا ارشاد ہے ؟ تو وہ کہتے ہر حدیث ابوہریرہ (رض) کی نبی اکرم (صلی اللہ علیہ وآلہ وسلم) سے مروی ہے اور وہ ایسا اس لیے کرتے تھے کیونکہ ابوہریرہ (رض) ان کو آپ (صلی اللہ علیہ وآلہ وسلم) سے ہی روایت بیان کرتے تھے۔ پس ابن ابی داؤد کی روایت میں ان کے اس اعلان نے اس بات سے بےنیاز کردیا کہ ہر وہ حدیث جس کو وہ روایت کریں وہ ابوہریرہ (رض) سے مرفوع ہی نقل کریں۔ پس اس سے حضرت ابوہریرہ (رض) کی روایت کا اتصال ثابت ہوگیا اور اس کے ساتھ ساتھ قرۃ کا ضابط اور متقن ہونا بھی ثابت ہوگیا۔ پھر یہ روایت حضرت ابوہریرہ (رض) سے اس سند کے علاوہ بھی موقوف مروی ہے لیکن وہ مرفوع نہیں۔

٤٩ : نافع ابن عمر (رض) سے نقل کرتے ہیں کہ انھوں نے فرمایا گدھے ‘ کتے اور بلی کے جو ٹھے سے وضو مت کرو۔
تخریج : مصنف عبدالرزاق ٣٣٨؍٣٣٩‘ ابن ابی شیبہ ١؍٢٩۔

٥٠: قتادہ نے سعید سے نقل کیا کہ انھوں نے فرمایا جب بلی کسی برتن میں منہ ڈال دے تو اس کو دو مرتبہ یا تین مرتبہ دھو ڈالو۔
تخریج : مصنف ابن ابی شیبہ ١؍٣٢؍٣٣

٥١ : قتادہ نے حسن بصری اور سعید بن المسیب (رح) سے سوال کیا اگر بلی برتن میں منہ مارے تو کیا حکم ہے تو ایک نے فرمایا ایک مرتبہ دھو ڈالو اور دوسرے نے فرمایا یا دو مرتبہ دھو ڈالو۔ (معلوم ہوتا ہے کہ دو والا قول سعید کا ہے واللہ اعلم)
تخریج : مصنف ابن ابی شیبہ ١؍٣٢

٥٢ : قتادہ کہتے ہیں کہ حضرت سعید ابن المسیب (رح) اور حسن بصری (رح) فرماتے تھے کہ برتن کو بلی کے جو ٹھے سے تین مرتبہ دھویا جائے۔
تخریج : عبدالرزاق ١؍٩٩ باب سورالھمرۃ۔

٥٣ : ابو حرہ نے حسن بصری (رح) سے سوال کیا کہ بلی جس برتن میں منہ ڈال دے یا اس سے پانی پی لے اس کا کیا حکم ہے ؟ آپ نے فرمایا اس پانی کو گرا دیا جائے اور برتن کو ایک مرتبہ دھویا جائے۔

٥٤ : یحییٰ بن ایوب کہتے ہیں کہ میں نے یحییٰ بن سعید (رح) بن المسیب سے سوال کیا کہ کن جانوروں کے جو ٹھے سے وضو نہ کیا جائے تو انھوں نے فرمایا خنزیر ‘ کتا ‘ بلی۔ اس قول کو نظر صحیح نے اور پختہ کردیا۔ اس لیے کہ ہم نے دیکھا کہ گوشت چار قسم کے ہیں :! بعض گوشت طاہر بھی ہیں اور یہ کھایا بھی جاتا ہے۔ یہ اونٹ ‘ گائے ‘ بکری کا گوشت ہے۔ ان سب کا جوٹھا پاک ہے کیونکہ یہ پاک گوشت کو چھونے والا ہے۔ " بعض گوشت پاک ہیں مگر کھائے نہیں جاتے اور وہ اولاد آدم کا گوشت ہے ان کا جوٹھا بھی پاک ہے کیونکہ یہ بھی پاک گوشت کو چھونے والا ہے۔#ایک گوشت حرام ہے اور وہ خنزیر اور کتے کا گوشت ہے پس ان کا جوٹھا بھی حرام ہے کیونکہ یہ حرام گوشت کو چھونے والا ہے پس ان گوشت کی تینوں اقسام کو جو چیز چھونے والی ہے اس کا حکم وہی ہے جو ہم نے بیان کردیا چنانچہ اس طہارت اور تحریم میں اس کا حکم ایک جیسا ہوگا۔$ایک گوشت وہ ہے کہ جس کے کھانے کی ممانعت فرمائی گئی ہے اور وہ گھریلو گدھے کا گوشت اور اسی طرح ہر پھاڑنے والے ‘ کچلی والے درندے کا گوشت ہے اور اسی سے بلّی اور اس کے مشابہہ جانور بھی ہیں تو یہ ممنوع ہوگا اور اس کی کھانے کی ممانعت سنت سے ثابت ہوگی تو نظر و فکر کا تقاضا بھی یہ ہے کہ ان کے جو ٹھے کا حکم ان کے گوشت جیسا ہو کیونکہ وہ مکروہ گوشت کو چھونے والا ہے۔ پس اس کے جو ٹھ کا حکم اسی طرح ہوا جس طرح خود اس کے گوشت کا حکم ہے اور پہلے تین قسم کے گوشت کو چھونے والے پانی کا حکم ان کے گوشت جیسا ہوگا۔ اس سے بلّی کے جو ٹھے کی کراہت ثابت ہوگئی اور اسی کو ہم اختیار کرتے ہیں اور یہی امام ابوحنیفہ (رح) کا قول ہے۔
حاصل کلام : ان نو روایات و آثار سے ظاہر ہوا کہ بلی کا جوٹھا پانی جس برتن میں ہو اس کو ایک سے تین مرتبہ تک دھو کر صاف کیا جائے اس سے اس کی کم از کم کراہت ثابت ہوتی ہے۔
ایک دوسرا انداز یا طحاوی (رح) کی عقلی دلیل :
گہری نظر ڈالنے سے پتہ چلتا ہے کہ جوٹھا گوشت کے حکم میں ہوتا ہے اگر گوشت پاک تو جوٹھا بھی پاک اور وہ ناپاک تو جوٹھا بھی ناپاک کیونکہ جوٹھا اس سے چھو کر نکلتا ہے گوشت چار قسم پر ہے نمبر ١ طاہر ماکول نمبر ٢ طاہر غیر ماکول نمبر ٣ نجس حرام نمبر ٤ حرام غیر ماکول۔
نمبر ١ طاہر ماکول گوشت وہ ہے جو پاک ہے اور کھایا جاتا ہے جیسے اونٹ ‘ گائے ‘ بکری ‘ بھیڑ ‘ دنبہ ‘ حلال گوشت پرندے ان سب کا گوشت جس طرح ہے ان کا جوٹھا بھی پاک ہے کیونکہ وہ پاک گوشت سے مس کر کے نکلا ہے۔
نمبر ٢ طاہر غیر ماکول گوشت تو پاک ہے مگر کھانا ممنوع ہے وہ انسانی گوشت ہے ان کا جوٹھا پاک ہے کیونکہ وہ پاک گوشت کو چھو کر نکلا ہے۔
نمبر ٣ حرام و نجس گوشت : یہ کتے اور خنزیر کا گوشت ہے ان کا جوٹھا ناپاک ہے کیونکہ وہ حرام گوشت کو چھو کر برآمد ہوا ہے۔
پس ان تین اقسام کے گوشت کو مس کرنے والے پانی کا حکم وہی ہے جو اوپر ذکر کردیا گیا کہ طہارت و تحریم میں دونوں کا حکم یکساں ہے۔
نمبر ٤ دو گوشت ایسے ہیں جن کی ممانعت سنت و حدیث سے ثابت ہے ترمذی جلد ثانی میں نمبر ١ پالتو گدھے ‘ نمبر ٢ پنجے والے اور کچلی والے درندے خواہ وہ پرند ہوں یا چوپائے۔ ان کا گوشت حرام کیا گیا اور بلی بھی انہی میں شامل ہے پس یہ منہی عنہ میں سے ہوگی اس کے گوشت کی حرمت سنت سے ثابت ہوگی۔
اور یہ بات تو ہم کہہ آئے کہ جو ٹھے کا حکم گوشت والا ہے کیونکہ وہ مکروہ گوشت کو چھو کر نکلا ہے جیسا کہ پہلی تینوں اقسام میں ظاہر کیا جا چکا ہے پس اس سے ثابت ہوا کہ بلی کا جوٹھا مکروہ ہے ہم اسی کو اختیار کرتے ہیں یہی امام ابوحنیفہ (رح) کا قول ہے۔
نوٹ : احناف میں بعض کراہت تحریمی کے قائل ہیں اور بعض تنزیہی کے۔ واللہ اعلم۔

٥٥ : حضرت ابوہریرہ (رض) جناب نبی اکرم (صلی اللہ علیہ وآلہ وسلم) کا ارشاد نقل کرتے ہیں جب برتن میں کتا منہ ڈال دے تو اس برتن کو سات مرتبہ دھوؤ۔
خلاصۃ الزام : کتے کے جو ٹھے سے متعلق تین قول ائمہ سے منقول ہیں نمبر ١ نجس اور اس کے جو ٹھے برتن کو رگڑنا اور پھر سات مرتبہ دھونا واجب ہے۔ نمبر ٢ نجس ہے عام نجاسات کی طرح تین دفعہ دھونا کافی ہے۔ نمبر ٣ پاک ہے۔
قول اول : گوشت کی طرح جوٹھا بھی ناپاک ہے اس سے برتن کو صاف کرنے کے لیے سات مرتبہ دھونا واجب ہے جن میں پہلی یا آخری مرتبہ مٹی سے مانجھنا بھی لازم ہے یہ امام شافعی (رح) و احمد (رح) کا قول ہے۔
قول دوم : جوٹھا بھی گوشت کی طرح ناپاک ہے اور اس سے برتن عام نجاسات کی طرح تین مرتبہ دھونے سے پاک ہوجاتا ہے یہ ائمہ احناف کا قول ہے۔
قول سوم : جوٹھا پاک ہے اس سے دھونے کا حکم تعبدی ہے یہ امام مالک و اہل ظواہر کا قول ہے۔
قول اول والوں کے دلائل مندرجہ ذیل روایات ہیں :
تخریج : بخاری فی الوضوء باب ٣٣‘ مسلم فی الطھارۃ حدیث ٩٠؍٩٠‘ ابو داؤد فی الطھارۃ باب ٣٧‘ ترمذی فی الطھارۃ باب ٦٨‘ نسائی فی الطھارۃ ١؍٥٦‘ ابن ماجہ فی الطھارۃ باب ٣١‘ دارمی فی الوضوء باب ٥٩‘ مسند احمد ٢ ٢٤٥؍٢٥٣‘ ٢٦٥؍٢٧١‘ ٣١٤؍٣٩٨‘ بیہقی فی السنن الکبرٰی ١؍٢٤٠‘ دارقطنی فی سننہ کتاب الطھارۃ ١؍٦٥۔

٥٦ : ابو صالح نے ابوہریرہ (رض) کے واسطہ سے نبی اکرم (صلی اللہ علیہ وآلہ وسلم) کا ارشاد اسی طرح نقل کیا ہے۔

٥٧ : محمد نے ابوہریرہ (رض) کی وساطت سے جناب نبی اکرم (صلی اللہ علیہ وآلہ وسلم) کا ارشاد اسی طرح نقل کیا ہے اور یہ اضافہ بھی ہے اولاھن بالتراب کہ اول مرتبہ مٹی سے مانجھنا ہے یہ ایوب کی محمد بن سیرین سے روایت ہے۔
تخریج : ابو داؤد ١؍١٠۔

٥٨ : حضرت ابوہریرہ (رض) نے نبی اکرم (صلی اللہ علیہ وآلہ وسلم) سے اسی طرح نقل کیا ہے یہ قرہ کی محمد بن سیرین سے روایت ہے۔

٥٩: حضرت ابوہریرہ (رض) نے جناب نبی اکرم (صلی اللہ علیہ وآلہ وسلم) کا ارشاد اسی طرح نقل کیا ہے صرف ان الفاظ کا فرق ہے۔ ” اولاھا اوالسابعۃ بالتراب “ یہ سعید راوی کو شک ہے کہ قتادہ نے کیا لفظ ذکر کئے۔ بعض لوگ اس اثر کی طرف گئے ہیں اور کہا کہ جب کتا کسی برتن میں مُنہ ڈال دے تو وہ برتن تب تک پاک نہ ہوگا جب تک سات مرتبہ نہ دھویا جائے ان میں پہلی مرتبہ مٹی کے ساتھ جیسا کہ جناب نبی کریم (صلی اللہ علیہ وآلہ وسلم) نے فرمایا دوسرے علماء نے ان کے اس قول کی مخالفت کی ہے اور کہا کہ برتن کو اس سے بھی اسی طرح دھویا جائے گا جیسا کہ اور نجاسات سے دھویا جاتا ہے اور اس سلسلے میں ان روایات کو دلیل بنایا ہے جو آپ (صلی اللہ علیہ وآلہ وسلم) سے مروی ہیں۔ ان میں ایک وہ روایت ہے جس کو سلیمان نے او زاعی سے نقل کیا ہے۔
حاصل روایات : حضرت ابوہریرہ (رض) کی یہ روایت پانچ مختلف اسناد سے مروی ہے ان تمام روایات سے سات مرتبہ دھونے کا ثبوت مل رہا ہے اور ان میں پہلی بار مٹی سے مانجھنا بھی ‘ اس سے ثابت ہوا کہ جب تک کتے کے جو ٹھے برتن کو سات مرتبہ نہ دھوئیں پاک نہ ہوگا۔
خالفہم فی ذلک آخرون سے قول دوم کی طرف اشارہ فرما رہے ہیں اس قول کا حاصل یہ ہے کہ عام نجاسات کی طرح تین مرتبہ دھونے سے برتن پاک ہوجائے گا اس کی دلیل مندرجہ چھ روایات ہیں۔

٦٠ : حضرت سعید بن المسیّب کہتے ہیں کہ حضرت ابوہریرہ (رض) کہا کرتے تھے کہ جناب رسول اللہ (صلی اللہ علیہ وآلہ وسلم) نے فرمایا جب تم میں سے کوئی آدمی رات کو بیدار ہو تو وہ اپنا ہاتھ برتن میں مت ڈالے جب تک کہ اس پر دو ‘ تین مرتبہ پانی نہ ڈال لے وہ نہیں جانتا کہ اس کا ہاتھ رات کو کون کون سی جگہ لگا ہے۔
تخریج : بخاری فی الوضوء باب ٢٦‘ مسلم فی الطھارۃ روایت ٨٨‘ ابو داؤد فی الطھارۃ باب ٤٩‘ ترمذی فی الطھارۃ باب ١٩‘ نسائی فی الطھارۃ فی الترجمہ والغل باب ٢٩‘ ابن ماجہ فی الطھارۃ باب ٤٠‘ مالک فی الطھارۃ روایت ٩ مسند احمد ٢؍٢٤١‘ ٢٥٣؍٢٥٩‘ ٢٦٥؍٢٨٤‘ ٣٤٨‘ ٣٨٢‘ ٣٩٥‘ ٤٠٣‘

٦١ : سعید و ابو سلمہ نے حضرت ابوہریرہ (رض) سے جناب رسول اللہ (صلی اللہ علیہ وآلہ وسلم) کا ارشاد اسی طرح نقل کیا ہے۔

٦٢ : ابو صالح نے حضرت ابوہریرہ (رض) سے جناب رسول اللہ (صلی اللہ علیہ وآلہ وسلم) کا ارشاد اسی طرح نقل کیا ہے۔

٦٣ : ابو صالح اور ابو رزین نے حضرت ابوہریرہ (رض) سے جناب رسول اللہ (صلی اللہ علیہ وآلہ وسلم) کا ارشاد اسی طرح نقل کیا ہے البتہ یہ الفاظ مختلف ہیں فلیغسل یدیہ مرتین اوثلاثا کہ وہ اپنے دونوں ہاتھ دو یا تین مرتبہ دھو لے۔

٦٤ : ابو سلمہ نے حضرت ابوہریرہ (رض) سے جناب رسول اللہ (صلی اللہ علیہ وآلہ وسلم) کا ارشاد اسی طرح نقل کیا ہے۔

٦٥ : سالم نے حضرت عبداللہ بن عمر (رض) سے روایت نقل کی کہ جناب نبی اکرم (صلی اللہ علیہ وآلہ وسلم) جب نیند سے بیدار ہوتے تو اپنے دونوں ہاتھوں پر تین مرتبہ پانی ڈالتے۔ انھوں نے کہا کہ جب جناب رسول اللہ (صلی اللہ علیہ وآلہ وسلم) سے پیشاب سے طہارت کرنے میں یہ روایات آئی ہیں کیونکہ وہ لوگ پاخانہ اور پیشاب کر کے استنجاء نہ کرتے تھے تو آپ (صلی اللہ علیہ وآلہ وسلم) نے انھیں حکم فرمایا کہ جب وہ اپنی نیند سے بیدار ہوں تو چونکہ انھیں معلوم نہیں کہ ان کا ہاتھ ان کے بدن میں کس جگہ لگا ؟ یہ بھی ہوسکتا ہے کہ وہ ایسی جگہ میں چھو گیا ہو جو پیشاب اور پاخانے والی ہو اور پسینہ آنے کی وجہ سے ان کے ہاتھ پلید ہوجائیں تو جناب رسول اللہ (صلی اللہ علیہ وآلہ وسلم) نے ان کو تین مرتبہ دھونے کا حکم دیا اور پیشاب اور پاخانے کے وقت جب وہ ہاتھ کو لگ جائے تو اس کی طہارت اسی طرح ہے پس جب پیشاب اور پاخانے سے ہاتھ تین مرتبہ دھونے سے پاک ہوجاتا ہے حالانکہ یہ دونوں نجاست غلیظہ ہیں تو یہ زیادہ لائق ہے کہ جو نجاست اس سے کم درجہ ہو اس میں وہ پاک ہو اور جو کچھ ہم نے ذکر کیا ہے وہ حضرت ابوہریرہ (رض) کے اس قول میں مروی ہے جو انھوں نے آپ (صلی اللہ علیہ وآلہ وسلم) کے بعد فرمایا کہ کہ اسماعیل بن اسحق نے حضرت ابوہریرہ (رض) سے برتن کے بارے میں نقل کیا کہ جب اس میں کتا یا بلی مُنہ ڈال دے تو فرمایا تین مرتبہ دھویا جائے گا۔ جب حضرت ابوہریرہ (رض) کا خیال یہ ہے کہ کتے کے پانی میں منہ ڈالنے سے برتن تین مرتبہ دھونے سے پاک ہوجاتا ہے اور دوسری طرف نبی اکرم (صلی اللہ علیہ وآلہ وسلم) سے انھوں نے وہ روایت کی جو ہم نے ذکر کی ہے تو اس سے یہ ثابت ہوگیا کہ یہ سات مرتبہ کا دھونا منسوخ ہوچکا کیونکہ ہم حضرت ابوہریرہ (رض) کے بارے میں حسن ظن رکھتے ہیں اور یہ وہم بھی نہیں کرسکتے کہ انھوں نے آپ (صلی اللہ علیہ وآلہ وسلم) کے ارشاد کو چھوڑ دیا ہو سوائے اس کے جو ہم نے بیان کیا ‘ ورنہ ان کی عدالت ساقط ہوجائے گی اور ان کا قول اور روایت قابل قبول نہ ہوگی۔ اگر بالفرض سات والی روایت پر عمل کو واجب قرار دیا جائے اور اس کو منسوخ نہ کہا جائے تو جو روایت حضرت عبداللہ بن مغفل نے جناب نبی اکرم (صلی اللہ علیہ وآلہ وسلم) سے روایت کی ہے وہ حضرت ابوہریرہ (رض) کی روایت سے اولیٰ ہے کیونکہ اس میں اس کی نسبت اضافہ ہے۔
تخریج : دارقطنی ١؍٤٥ باب غسل الیدین
حاصل روایات : حضرت ابوہریرہ (رض) کی روایت پانچ اسناد اور روایت ابن عمر (رض) ایک سند سے ذکر کی گئی ہے ان روایات سے نیند سے بیدار ہونے والے کو برتن میں ہاتھ ڈالنے سے پہلے تین مرتبہ دھونا کافی قرار دیا گیا ہے چنانچہ علامہ فرماتے ہیں کہ جن علماء نے ان روایات کو بنیاد بنایا وہ کہتے ہیں کہ صحابہ کرام پیشاب و پائخانہ سے فراغت حاصل کرتے تو ڈھیلوں پر اکتفاء کرتے پانی سے استنجاء کا رواج کم و بیش تھا پس آپ نے حکم فرمایا کہ جب تم نیند سے بیدار ہو تو ہاتھ پانی میں ڈالنے سے پہلے دھو لو چونکہ یہ معلوم نہیں کہ نیند کی حالت میں ہاتھ بدن کے کس حصہ کو لگا ہو ممکن ہے پیشاب و پائخانہ والے مقامات پر بھی لگا ہو اور پیشاب و پائخانہ کو ڈھیلے وغیرہ سے صاف کرنے کے باوجود پسینہ آنے کی وجہ سے محل پر معمولی نجاست کے اثرات سے ہاتھ ملوث ہوجائیں پس احتیاطاً نبی اکرم (صلی اللہ علیہ وآلہ وسلم) نے ہاتھ کو تین مرتبہ دھو لینے کا حکم فرمایا یہ تین دفعہ دھونا پیشاب و پائخانہ کی نجاست سے پاک کر دے گا۔
جبکہ یہ غلیظ ترین نجاسات تین دفعہ دھونے سے وہ جگہ پاک ہوجاتی ہے تو اس سے کم درجہ کی نجاسات تین دفعہ دھو ڈالنے سے وہ جگہ یا برتن بدرجہ اولیٰ پاک ہوجائے گا اور اس کی تائید کے لیے حضرت ابوہریرہ (رض) کا یہ ارشاد جس کو عطائؒ نے نقل کیا کافی ہے ” کہ جس برتن میں کتا یا بلی منہ ڈال دے تو کیا حکم ہے ؟ انھوں نے فرمایا اس کو تین مرتبہ دھویا جائے گا “
جواب شوافع نمبر ١: راوی کا عمل و فتویٰ اس روایت کے خلاف ہے جس کو قول اول کے عنوان سے نقل کیا گیا ہے اس سے ظاہر ہوتا ہے کہ سات مرتبہ دھونے کا وجوب ساقط و منسوخ ہوگیا تبھی انھوں نے اپنی روایت کے خلاف فتویٰ دیا ورنہ ان کی عدالت مجروح ہو کر روایت و فتویٰ دونوں ناقابل عمل ہوجائیں گے (حاشامنہ)
نمبر ٢: اگر اس جواب کو تم نہیں مانتے بلکہ ناقص کے مقابلے میں (سات) کامل کو ضروری قرار دیتے ہو تو پھر اس سے زائد آٹھ وہ اس سے زیادہ کامل ہیں ان پر عمل اس سے زیادہ بہتر ہوگا اور وہ حضرت عبداللہ بن مغفل (رض) کی روایت میں ہے ملاحظہ کریں۔

٦٦ : مطرف بن عبداللہ حضرت عبداللہ بن مغفل (رض) سے نقل کرتے ہیں کہ جناب نبی اکرم (صلی اللہ علیہ وآلہ وسلم) نے کتوں کو قتل کرنے کا حکم فرمایا پھر آپ (صلی اللہ علیہ وآلہ وسلم) نے فرمایا ” مالی والکلاب “ مجھے کتوں سے کیا واسطہ۔ یعنی ان کو قتل کرنا چھوڑ دو ۔ جب کتا تم میں سے کسی کے برتن میں منہ ڈال دے تو اسے سات مرتبہ دھونا چاہیے اور آٹھویں مرتبہ اسے مٹی سے مانجھو۔
تخریج : مسلم فی الطھارۃ روایت نمبر ٩٣‘ ابو داؤد فی الطھارۃ باب ٣٧‘ نسائی فی الطھارۃ باب ٥٢ والمیاہ باب ٧‘ ابن ماجہ فی الطھارۃ باب ٣١‘ دارمی فی الوضوء باب ٥٩‘ احمد فی المسند ٤؍٧٦‘ ٥؍٥٦۔

٦٧ : شعبہ نے بھی عبداللہ بن مغفل (رض) سے اسی طرح کی روایت نقل کی ہے۔ یہ عبداللہ بن مغفل (رض) ہیں جو جناب نبی اکرم (صلی اللہ علیہ وآلہ وسلم) سے سات مرتبہ دھونے والی اور آٹھویں مرتبہ مٹی کے ساتھ صاف کرنے والی روایت نقل کرتے ہیں اور حضرت ابوہریرہ (رض) کی روایت پر اضافہ فرماتے ہیں اور زائد روایت ناقص سے اولیٰ ہے چنانچہ ہمارے اس مخالف کے لیے اولیٰ یہ ہے کہ وہ اس طرح کہے کہ برتن اس وقت تک پاک نہیں ہوتا جب تک آٹھ مرتبہ نہ دھویا جائے اور ان میں ساتویں بار مٹی اور آٹھویں بار بھی مٹی سے ہوتا کہ دونوں حدیثوں پر عمل ہوجائے اور اگر وہ حدیث عبداللہ بن مغفل کو ترک کرتے ہیں تو اس پر بھی وہی لازم ہوگا جو سات والی روایت کے چھوڑنے سے ان کے مخالف پر لازم ہوگا ۔ یہ روایت ہم ذکر کرچکے اور ہم نے بیان کردیا کہ غلیظ ترین نجاستوں سے برتن تین مرتبہ دھونے سے پاک ہوجاتا ہے تو اس سے کم درجہ نجاستیں اس بات کے زیادہ لائق ہیں کہ پانی ان کو پاک کر دے اور حسن بصری نے وہی بات کہی ہے جو حضرت عبداللہ بن مغفل (رض) سے مروی ہے۔
الزامی جواب :
علامہ فرماتے ہیں اگر آپ زائد کو کم پر ترجیح کی وجہ قرار دیتے ہیں تو عبداللہ بن مغفل (رض) کی روایت اس اعتبار سے زیادہ حقدار ہے کہ اس پر عمل کیا جائے کیونکہ اس میں ابوہریرہ (رض) کی روایت سے آٹھویں مرتبہ کا اضافہ ہے۔
اب دو میں سے ایک بات اختیار کرنی ہوگی نمبر ١ روایت ابوہریرہ (رض) کو اضافہ والی روایت سے منسوخ مانا جائے یا دونوں روایات پر عمل کے لیے آٹھ مرتبہ دھونا لازم قرار دیا جائے اور آٹھویں اور ساتویں مرتبہ مٹی سے مانجھنے کو طہارت کے لیے ضروری قرار دیا جائے اور ایک روایت کے ترک پر جو جواب آپ کا ہوگا وہی ہمارا ہے ورنہ وہ صورت تسلیم کرلو جو ہم نے گزشتہ سطور میں ذکر کی کہ تین دفعہ دھونا ضروری ہو اور باقی مباح ہو تاکہ تمام روایات پر عمل ہوجائے۔
ایک اشکال :
عبداللہ بن مغفل (رض) کی روایت پر تو کسی نے بھی عمل نہیں کیا پس اس سے استدلال درست نہیں۔
حل اشکال :
حضرت حسن بصری (رح) جو جلیل القدر تابعین سے ہیں وہ اسی کے مطابق فتویٰ دیتے تھے۔

٦٨ : ابو حیوہ نقل کرتے ہیں (کہ حضرت حسن سے ولوغ کلب کا مسئلہ پوچھا گیا تو انھوں نے) فرمایا ” جب کتا برتن میں منہ ڈال دے تو سات مرتبہ دھوؤ اور آٹھویں مرتبہ مٹی سے مانجھ دو “ امام احمد (رح) کا فتویٰ بھی اسی طرح منقول ہے۔ البتہ نظر و فکر کے طور پر اس سلسلے میں ہمیں وہ کلام کافی ہے جو باب ” سو ٔر الہر “ میں گوشتوں کے سلسلے میں بیان کیا گیا۔ بعض لوگوں نے کتے کے متعلق جبکہ وہ برتن میں مُنہ ڈال دے یہ بات کہی ہے کہ پانی تو پاک ہے مگر برتن کو سات مرتبہ دھویا جائے گا اور انھوں نے یہ کہا کہ یہ حکم تعبدی ہے جس کو ہم خاص طور پر برتنوں کے سلسلے میں بطور تعمیل حکم ادا کریں گے۔ ان کے خلاف ہمارے پاس جناب رسول اللہ (صلی اللہ علیہ وآلہ وسلم) کا یہ ارشاد بطور دلیل موجود ہے کہ جب آپ (صلی اللہ علیہ وآلہ وسلم) سے ان جوہڑوں کے متعلق جن پر درندے آتے جاتے ہیں دریافت کیا گیا تو آپ (صلی اللہ علیہ وآلہ وسلم) نے فرمایا جب پانی دو قلوں کی مقدار کو پہنچ جائے تو وہ نجاست کو نہیں اٹھاتا تو اس ارشاد سے یہ دلالت مل گئی کہ جب وہ دو مٹکوں سے کم ہوگا تو نجاست کو اٹھائے گا اگر یہ بات تسلیم نہ کی جائے تو مٹکوں کے تذکرے کا کوئی معنی ہی نہیں بنتا اور اس صورت میں اس سے کم اور زیادہ حکم میں یکساں ہیں۔ جب دو قلوں کا تذکرہ فرمایا تو اس سے یہ ثابت ہوگیا کہ ان کا حکم ان سے کم پانی کے حکم کے خلاف ہے۔ پس اس قول رسول (صلی اللہ علیہ وآلہ وسلم) سے ثابت ہوگیا کہ کتے کا پانی میں مُنہ ڈالنا پانی کو پلید کردیتا ہے اور اس باب میں جو کچھ ہم نے بیان کیا یہ امام ابوحنیفہ ‘ ابویوسف اور محمد (رح) کا قول ہے۔
نظر طحاوی (رح) :
گوشت کا حکم جو کہ باب سو ٔرالہر میں ذکر کر آئے وہ عقلی طور پر یہاں بھی کفایت کرتا ہے جب فریقین گوشت کی نجاست کے قائل ہیں تو اس سے مس کرنے والا جوٹھا پانی اس کے حکم میں کیونکر نہ ہوگا۔ واللہ اعلم۔
وقد ذھب قوم : سے قول ثالث کی طرف اشارہ کر کے اس کا جواب ذکر کر رہے ہیں کہ کتے کا جوٹھا پاک ہے امام مالک کے متعلق منقولہ اقوال میں سے مشہور قول یہ ہے اسی کے پیش نظر جواب دیا گیا ہے۔
مالکیہ پر اشکال اور ان کا جواب :
جب جوٹھا پاک ہے تو پھر برتن کو سات ‘ آٹھ اور تین مرتبہ دھونے کا حکم روایات میں چہ معنی دارد ؟ ان کی طرف سے جواب یہ دیا گیا کہ برتن کو سات مرتبہ وغیرہ دھونے کا حکم تعبدی ہے اور یہ تعبدی حکم برتنوں کے ساتھ خاص ہے۔ (واللہ اعلم)
اپنے مزاج و انداز کے برعکس یہاں مالکیہ کے دلائل کو ذکر نہیں کیا ایک جواب دے کر گزر گئے اسی لیے بعض نے ان کے جواب کو توجیہ القول بما لا یرضی بہ القائل قرار دیا کہ حدیث قلتین جب احناف کے ہاں مضطرب المتن ہے تو اس سے ہم پر الزام درست نہیں مگر بندہ کے نزدیک اسہل توجیہ یہ ہے کہ قلتین والی روایت کے اضطراب سے قطع نظر اتنی بات تو سب روایات سے ثابت ہے کہ مقدار کی یہ پابندی اس سے کم مقدار کے فرق کو ظاہر کرنے کے لیے لگائی گئی ہے ورنہ درندوں کے آنے جانے سے اگر کوئی فرق پیدا نہ ہوتا تھا تو جواب میں ایک خاص مقدار کی پابندی کی کیا ضرورت تھی بس اتنا کہنا کافی تھا ” وہ پاک ہے “ اس پابندی سے ظاہر کیا گیا کہ کم پر دوسرا حکم لگ گیا اور وہ ناپاکی کا ہے اور کتا بھی من جملہ درندوں کا حکم رکھتا ہے تو اس کا جوٹھا کیوں ناپاک نہ ہوگا۔ واللہ اعلم۔
پس ارشاد رسول اللہ (صلی اللہ علیہ وآلہ وسلم) سے ثابت ہوا کہ ولوغ کلب سے پانی نجس ہوجاتا ہے یہ امام ابوحنیفہ (رح) ، ابو یوسف (رح) و محمد (رح) کا قول ہے۔

٦٩ : حضرت عبداللہ بن سرجس (رض) کہتے ہیں کہ جناب رسول اللہ (صلی اللہ علیہ وآلہ وسلم) نے اس بات سے منع فرمایا کہ مرد عورت کے اور عورت مرد کے بچے ہوئے پانی سے غسل کریں لیکن یہ کہ دونوں اکٹھا شروع کریں۔
اللغات : یشرعان۔ یہ یشرع کا تثنیہ ہے۔ ابتداء کرنا۔
تخریج : ابو داؤد فی الطھارۃ باب ٤٠‘ ترمذی فی الطھارۃ باب ٤٧‘ نسائی فی الطھارۃ باب ١٤٦‘ والمیاہ باب ١١‘ ابن ماجہ فی الطھارۃ باب ٣٤‘ مسند احمد ٤؍١١٠؍١١١‘ ٢١٣‘ ٥؍٦٦‘ ٣٦٩۔ سنن دارقطنی کتاب الطھارۃ ١؍١١٦؍١١٧۔
مسلمان کا جوٹھا بالاتفاق پاک ہے بشرطیکہ اسی لمحہ شراب نہ پی ہو غیر مسلم کے جو ٹھے کے متعلق اختلاف ہے کہ آیا پاک ہے یا نجس ہے یا مکروہ ہے مسلمان مرد کا جوٹھا اور بچا ہوا عورت کے لیے یا عورت کا بچا ہوا مرد کے لیے یا اکٹھا یا الگ استعمال کیا ہوا جائز ہے یا نہیں اس میں علماء کے مختلف اقوال ہیں
نمبر ١ : عورت کیلئے مرد کا بچا ہوا پانی جائز نہیں اور مرد کیلئے عورت کا بچا ہوا پانی جائز نہیں حسن بصری و اوزاعی رحمہما اللہ کے ہاں صرف اس صورت میں جائز ہے جب کہ دونوں ساتھ ساتھ ہوں ابن المنذر کا یہ قول ہے ذھب قوم سے ان کی طرف اشارہ ہے۔
نمبر ٢ : امام ابوحنیفہ (رح) مالک (رح) و شافعی (رح) اور جمہور کے ہاں ہر ایک کے لیے جو ٹھے اور بچے ہوئے پانی کا استعمال مطلق طور پر درست ہے۔ خالفہم آخرون سے یہی مراد ہیں۔
قول اوّل کے دلائل :
چار روایات ہیں جن میں سے ایک حضرت عبداللہ بن سرجس (رض) سے اور دوسری کسی اور صحابی (رض) سے مروی ہے اور تیسری و چوتھی دونوں حضرت حکم غفاری (رض) سے مروی ہیں۔

٧٠ : حمید بن عبدالرحمن کہتے ہیں میں ایسے شخص سے ملا جس نے حضرت ابوہریرہ (رض) کی طرح چار سال تک نبوت کی صحبت اٹھائی تھی (ان سے میں نے استفسار کیا تو انھوں نے) فرمایا کہ جناب رسول اللہ (صلی اللہ علیہ وآلہ وسلم) نے اس سے منع فرمایا اور پہلی روایت کی مثل روایت نقل کی۔

٧١ : حضرت حکم غفاری (رض) روایت کرتے ہیں کہ رسول اللہ (صلی اللہ علیہ وآلہ وسلم) نے اس سے منع فرمایا کہ آدمی عورت کے بچے ہوئے یا جو ٹھے پانی سے وضو کرے ابو حاجب کو شک ہے کہ حضرت حکم (رض) نے سو ٔرالمرأہ فرمایا یا فضل المراۃ فرمایا۔
تخریج : ابو داؤد ١؍١١‘ ترمذی ١؍١٩

٧٢ : حضرت حکم غفاری (رض) روایت کرتے ہیں کہ جناب رسول اللہ (صلی اللہ علیہ وآلہ وسلم) نے عورت کے جو ٹھے پانی کے استعمال سے منع فرمایا۔ ابوجعفر کہتے ہیں کہ بعض علماء ان آثار کی طرف گئے ہیں اور انھوں نے عورت سے بچے ہوئے پانی سے وضو کو یا مرد کے بچے ہوئے پانی سے وضو کو مکروہ قرار دیا ہے دیگر علماء نے اس سلسلے میں ان کی مخالفت کی ہے اور انھوں نے کہا اس میں سے کسی میں بھی کچھ حرج نہیں اور انھوں نے ان روایات کو دلیل بنایا ہے۔
حاصل روایات : کہ عورت کا جوٹھا یا استعمال شدہ پانی مرد کو استعمال کرنا ممنوع ہے اور اسی طرح عورت کو بھی ان کا مختصر جواب یہ ہے پہلے حکم تھا پھر منسوخ ہوا نمبر ٢ کراہت تنزیہی مراد ہے واللہ اعلم۔
فریق ثانی قول نمبر ٢:
کہ ہر ایک کو استعمال جائز ہے انھوں نے ان روایات کو دلیل بنایا۔ روایات کی تعداد چودہ ہے۔

٧٣ : حضرت عائشہ (رض) سے روایت ہے میں اور جناب رسول اللہ (صلی اللہ علیہ وآلہ وسلم) ایک ہی برتن سے غسل کیا کرتے تھے۔
تخریج : مسلم فی الحیض نمبر ٤٦‘ نسائی فی الطھارۃ باب ١٤٥‘ غسل باب ٩۔ مسند احمد ٦؍١٧١؍١٧٢‘ بیہقی سنن کبرٰی ١؍١٨٧‘ ابن خزیمہ فی صحیحہ ص ٢٥١۔

٧٤: عاصم نے اپنی اسناد کے ساتھ مندرجہ روایت جیسی روایت نقل کی ہے۔

٥ ٧: عروہ نے اپنے والد سے انھوں نے حضرت عائشہ (رض) سے اسی طرح کی روایت نقل کی ہے۔

٧٦ : عروہ نے حضرت عائشہ (رض) سے اسی طرح کی روایت نقل کی ہے۔

٧٧ : عروہ نے حضرت عائشہ (رض) سے اسی جیسی روایت نقل کی ہے۔

٧٨ : عروہ نے مسروق سے حضرت عائشہ (رض) سے اسی طرح کی روایت نقل کی ہے۔

٧٩ : منصور بن عبدالرحمن نے اپنی والدہ سے والدہ نے حضرت عائشہ (رض) سے اسی جیسی روایت نقل کی ہے۔

٨٠ : زینب نے اپنی والدہ امّ سلمہ (رض) سے نقل کیا کہ وہ کہتی ہیں کہ میں اور جناب رسول اللہ (صلی اللہ علیہ وآلہ وسلم) ایک ہی برتن سے غسل کرتے تھے۔
تخریج : بخاری کتاب الحیض باب ٥‘ ٦١‘ مسلم فی الحیض حدیث نمبر ٥٩‘ نسائی فی الطھارۃ باب ١٤٥‘ دارمی فی الوضوء باب ٦٨‘ سنن کبرٰی بیہقی ٤؍٢٣٤۔