٥٧٢٠: ولید بن رباح نے حضرت ابوہریرہ (رض) سے روایت کی ہے کہ جناب نبی اکرم (صلی اللہ علیہ وآلہ وسلم) نے فرمایا مسلمان اپنی شرائط کے پابند ہیں۔ ابن ابی داؤد نے اپنے اسناد کے ساتھ حضرت ابوہریرہ (رض) سے روایت کی ہے کہ جناب نبی اکرم (صلی اللہ علیہ وآلہ وسلم) نے فرمایا کہ مسلمان اپنی شروط پر پورے اترنے والے ہیں۔ (بخاری فی الاجارہ باب ٢‘ ابوداؤد فی الاقضیہ باب ١٢) امام طحاوی (رح) کہتے ہیں : فقہاء کی ایک جماعت کا مؤقف یہ ہے کہ عمریٰ جائز ہے اور جس کے لیے وہ چیز عمر بھر کے لیے دی جائے گی وہ اس کی موت کے بعد اس کی طرف لوٹ آئے گی انھوں نے مندرجہ بالا روایت سے استدلال کیا ہے۔ آپ (صلی اللہ علیہ وآلہ وسلم) کے اس ارشاد سے وہ شرائط مراد ہیں جن کو قرآن مجید اور سنت جائز قرار دے اس پر سب کا اتفاق ہے جن شرائط کی ممانعت کتاب و سنت سے ثابت ہو وہ اس میں داخل و شامل نہیں کیا فریق اول والے احباب کو یہ نظر نہیں آتا کہ جناب رسول اللہ (صلی اللہ علیہ وآلہ وسلم) نے حدیث بریرہ میں یہ بات فرمائی کہ جو شرائط قرآن مجید کے مطابق نہ ہوں وہ باطل ہیں خواہ وہ سو شرائط ہی کیوں نہ ہوں اور قرآن مجید کے مطابق وہ شرائط ہیں جن کے متعلق نصوص وارد ہیں یا جناب رسول اللہ (صلی اللہ علیہ وآلہ وسلم) نے بتلائی ہیں اس لیے کہ ان کو قبول کرنا بھی کتاب اللہ کی وجہ سے ہے اللہ تعالیٰ کا ارشاد ہے : وما اتاکم الرسول فخذوہ وما نہٰکم عنہ فانتہوا “ (الحشر ٧) یہ بات نہیں کہ جو شرط بھی مسلمان لگا لیں وہ اس قول رسول اللہ (صلی اللہ علیہ وآلہ وسلم) میں داخل ہوجائے کیونکہ اگر اس طرح ہوتا تو سودے میں وہ شرائط جائز ہوتیں جن سے جناب رسول اللہ (صلی اللہ علیہ وآلہ وسلم) نے منع فرمایا اور یہ حدیث اس کے معارض بنتی اور اس صورت میں آپ کے اس قول کے بھی خلاف ہوتی ” کل شرط “ الحدیث جو جو شرط کتاب اللہ میں نہیں وہ باطل ہے اگرچہ وہ سو شرائط ہوں جب آپ نے اس کا یہ معنی نہیں لیا بلکہ اس سے خاص شرائط مراد لی ہیں جن سے ہم واقف و مطلع ہوچکے تو جناب رسول اللہ (صلی اللہ علیہ وآلہ وسلم) نے اپنے اس ارشاد سے ہمیں یہ بتلا دیا ” المسلمون عند شروطہم “ یعنی مسلمان انہی شرائط پر رہیں گے جن کی ان کو اجازت دی گئی ہے وہ ایسی شرائط نہ لگائیں جن کا توڑنا لازم ہوجائے خود ارشاد نبوت اس مفہوم پر دلالت کرتا ہے۔
تخریج : بخاری فی الاجارہ باب ١٤‘ ابو داؤد فی الاقضیہ باب ١٢۔
عمری بروزن فعلی : عمر بھر کے لیے کوئی چیز دے دینا۔
فریق اول : اگر کسی کو عمر بھر کے لیے چیز دی تو موت کے بعد وہ دینے والے کی طرف لوٹ آئے گی۔
فریق ثانی کا قول یہ ہے کہ عمر بھر کے لیے چیز دینے پر وہ مالک بن جائے گا اس کو واپس نہ کیا جائے۔
فریق اول کا مؤقف اور دلیل : جس کو عمر بھر کے لیے چیز دی گئی ہے اس کی موت کے بعد وہ واقف کی طرف لوٹ آئے گی۔ اس کی دلیل یہ روایت ہے۔
ارشادِ نبوت سے اس کی تائید :

٥٧٢١: کثیر بن عبداللہ المزنی نے اپنے والد سے انھوں نے اپنے دادا سے جناب رسول اللہ (صلی اللہ علیہ وآلہ وسلم) کا یہ ارشاد نقل کیا ہے۔ مسلمان اپنی شرائط پر قائم رہیں گے سوائے اس شرط کے جو کسی حرام کو حلال کر دے یا کسی حرام کو حلال کرے۔ اس سے یہ ثابت ہوا کہ وہ شرائط جن پر مسلمانوں کا قائم رہنا ضروری ہے وہ ان مستثنیٰ شرائط کے علاوہ ہیں اور عمریٰ میں لگائی جانے والی شرائط کے بطلان کی جناب رسول اللہ (صلی اللہ علیہ وآلہ وسلم) نے متواتر روایات میں اطلاع دی ہے ہم چند آثار نقل کرتے ہیں۔ بطلان عمریٰ کی روایات :
تخریج : ترمذی فی الاحکام باب ١٧۔

٥٧٢٢: سلیمان بن یسار کہتے ہیں کہ مدینہ منورہ کے ایک امیر کا نام طارق تھا اس نے وارث کے لیے عمریٰ کا فیصلہ کیا اس نے حضرت جابر عن النبی (صلی اللہ علیہ وآلہ وسلم) کو دلیل بنایا۔
تخریج : مسلم فی الہبات ٢٩‘ مسند احمد ٣؍٣٨١‘ ٥؍١٨٢۔

٥٧٢٣: حجر نے زید بن ثابت (رض) سے روایت کی کہ جناب نبی اکرم (صلی اللہ علیہ وآلہ وسلم) نے عمریٰ کے متعلق وارث کے لیے فیصلہ فرمایا۔ جناب رسول اللہ (صلی اللہ علیہ وآلہ وسلم) نے وارث کو عمریٰ دینے کا فیصلہ فرمایا اور عمریٰ کی شرط کو باطل قرار دیا۔ روایت میں وارث کی وضاحت نہیں کہ کون ہے وہ وارث جس کے ساتھ وہ رہتا ہے یا معمر کا وارث مراد ہے۔ تو اس کے جواب میں کہا جائے گا یہ بات ہمارے ہاں ناممکن ہے کیونکہ یہاں تک اس چیز کا تذکرہ ہے جو معمر کو زندگی بھر کے لیے دی گئی ہے اور اس شرط پر دی گئی ہے کہ معمر کی طرف لوٹے گی معمر کے ورثاء کو نہ ملے گی اب مطلب یہی ہے کہ معمر کے ورثاء کو ملے گی معمر کی وراثت نہ ہوگی اس کی دلیل یہ روایت ہے۔
تخریج : نسائی فی العمریٰ باب ١‘ ابن ماجہ فی الہبات باب ٣۔

٥٧٢٤: طاوس نے زید بن ثابت (رض) سے روایت کی کہ جناب رسول اللہ (صلی اللہ علیہ وآلہ وسلم) نے فرمایا جس نے اپنی زندگی کے لیے کوئی چیز کسی کو دی وہ اس کے لیے اور اس کے ورثاء کے لیے ہے۔ اس ارشاد سے معلوم ہوا کہ جس وارث کے لیے فیصلہ کیا وہ معمر کا وارث ہے (اور شرط باطل ہے)
تخریج : نسائی فی الرقی باب ٢‘ والعمریٰ باب ٢‘ ٤‘ ابن ماجہ فی الہبات باب ٣‘ مسند احمد ٢‘ ٣٤؍٧٣‘ ٣‘ ٢٩٣؍٣١٧۔
حاصل روایت : اس ارشاد سے معلوم ہوا کہ جس وارث کے لیے فیصلہ کیا وہ معمر کا وارث ہے (اور شرط باطل ہے)

٥٧٢٥: طاوس کہتے ہیں کہ حجر بن قیس نے بتلایا کہ زید بن ثابت (رض) نے روایت کی ہے کہ جناب رسول اللہ (صلی اللہ علیہ وآلہ وسلم) نے فرمایا عمریٰ وراثت ہے۔ (مرنے والے کی اولاد کو ملے گی)
تخریج : بخاری فی الہبہ باب ٣٢‘ مسلم فی الہبات ٣٠؍٣١‘ ابو داؤد فی البیوع باب ٨٥‘ ترمذی فی الاحکام باب ١٥‘ نسائی فی الرقبیٰ باب ٢‘ والعمریٰ باب ١‘ ٢‘ ابن ماجہ فی الہبات باب ٤‘ مسند احمد ١؍٢٥٠‘ ٢‘ ٣٤٧؍٤٢٩‘ ٣‘ ٢٩٧؍٣١٩‘ ٤؍٩٧‘ ٥‘ ٨؍١٣۔

٥٧٢٦: حجر نے زید بن ثابت (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے فرمایا عمریٰ کا طریق کار میراث والد ہے۔ یہ روایت بھی اس کے ہم معنی ہے۔

٥٧٢٧: محمد بن علی نے حضرت معاویہ (رض) سے انھوں نے جناب نبی اکرم (صلی اللہ علیہ وآلہ وسلم) سے روایت کی ہے کہ عمریٰ معمر کے گھر والوں کے لیے انعام ہے۔ فریق اول کہتے ہیں کہ اس روایت میں اہلھا سے مراد وہ لوگ ہیں جنہوں نے عمریٰ کیا ہے۔
تخریج : مسند احمد ٢؍٣٦٨‘ ٣؍٣٠٣‘ ٤‘ ٩٩‘ ٥‘ ١٣؍٢٢‘ ١٨٩۔
ایک استدلال :
فریق اول کہتے ہیں کہ اس روایت میں اہلھا سے مراد وہ لوگ ہیں جنہوں نے عمریٰ کیا ہے۔
جواب : یہ روایت ملاحظہ کریں۔

٥٧٢٨: محمد بن حنفیہ کہنے لگے مجھے حضرت معاویہ نے کہا کہ میں نے جناب رسول اللہ (صلی اللہ علیہ وآلہ وسلم) کو فرماتے سنا ہے جس نے عمریٰ کیا تو معمر اس چیز کا مالک ہے اور اس کی موت کے بعد اس کے ورثاء اس کے وارث ہوں گے (عمریٰ کرنے والا نہیں) اس روایت سے معلوم ہوا کہ اہلھا سے مراد وہ لوگ ہیں جن کو انعام دیا گیا وہ معمر ہیں۔
تخریج : مسلم فی الہبات ٢١؍٢٢‘ نسائی فی العمریٰ باب ٣‘ ابن ماجہ فی الہبات باب ٣‘ مسند احمد ٣؍٣٦٠۔

٥٧٢٩: یحییٰ بن ابی سلمہ نے جابر (رض) سے انھوں نے جناب نبی اکرم (صلی اللہ علیہ وآلہ وسلم) سے روایت کی ہے کہ عمریٰ کا وہی مالک ہے جس کو وہ ہبہ کیا گیا۔
تخریج : مسلم فی الہبات ٢٥‘ ابو داؤد فی البیوع باب ٨٥‘ نسائی فی العمریٰ باب ٤‘ مسند احمد ٣‘ ٣٠٤؍٣٩٣۔

٥٧٣٠: یحییٰ نے ہشام بن ابی عبداللہ عن یحییٰ روایت کی پھر انھوں نے اپنی اسناد سے اسی طرح روایت کی ہے۔

٥٧٣١: طاوس نے ابن عباس (رض) سے انھوں نے جناب نبی اکرم (صلی اللہ علیہ وآلہ وسلم) سے اسی طرح کی روایت کی ہے۔

٥٧٣٢: ابوالزبیر نے حضرت جابر (رض) سے مروی ہے کہ جناب رسول اللہ (صلی اللہ علیہ وآلہ وسلم) نے فرمایا اپنے اموال اپنے پاس روک کر رکھو ان کو عمریٰ مت بناؤ۔ جس نے کوئی چیز عمریٰ بنائی وہ اسی معمر کی ہوگی۔
تخریج : نسائی فی العمریٰ باب ٢‘ مسند احمد ٣‘ ٣٠٢؍٣١٧۔

٥٧٣٣: ابو سلمہ نے حضرت ابوہریرہ (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے فرمایا عمریٰ درست نہیں جس نے کردیا وہ شئی معمر کی ہوجائے گی۔ قائلین مسلک اول سے کہتا ہے ہمیں اس سے انکار نہیں کہ عمریٰ معمر کا ہوتا ہے بس ہم تو اتنی بات کہتے ہیں کہ وہ معمر کی طرف معمر کی موت کے بعد لوٹ جائے گا۔ تو اس کے جواب میں ہم کہیں گے کہ جناب رسول اللہ (صلی اللہ علیہ وآلہ وسلم) نے ان آثار میں عمریٰ سے منع فرمایا ہے یہ بات ناممکن ہے کہ منع بھی فرمایا جائے اور اس کو برقرار بھی رکھا جائے۔ کیونکہ وہ تو اس کے مخالف ہے آپ (صلی اللہ علیہ وآلہ وسلم) نے ” من اعمر شیئا فہو لہ “ کو مطلق طور پر فرمایا مادام حیا کی قید نہ لگائی اس سے یہ ثابت ہوگیا کہ یہ اس کے لیے دیگر تمام اموال کی طرح ہوگی زندگی میں اور موت کے بعد بھی۔ عمریٰ ایک انعام ہے۔ عمری کو جناب رسول اللہ (صلی اللہ علیہ وآلہ وسلم) نے جائز (انعام) قرار دیا روایت یہ ہے۔

٥٧٣٤: حسن نے سمرہ (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے فرمایا عمریٰ انعام ہے۔
تخریج : ابو داؤد فی البیوع باب ٨٢‘ ترمذی فی الاحکام باب ١٥‘ نسائی فی الرقی باب ٢‘ والعمریٰ باب ١؍٢‘ ابن ماجہ فی الہبات باب ٤‘ مسند احمد ١؍٢٥٠‘ ٢؍٣٤٧‘ ٣‘ ٢٩٧؍٣٩٢‘ ٤‘ ٩٧؍٩٩‘ ٥‘ ٨؍٢٢۔
مزید دلیل ابن ابی داؤد و احمد بن دازد کی روایت ہے۔

٥٧٣٥: قتادہ کہنے لگے مجھ سے سلیمان بن ہشام نے دریافت کیا کہ عمریٰ کے متعلق کیا کہتے ہو ؟ میں نے کہا بشیر بن نہیک نے ابوہریرہ (رض) سے انھوں نے جناب رسول اللہ (صلی اللہ علیہ وآلہ وسلم) سے روایت کی ہے کہ عمریٰ انعام ہے۔ زہری کہتے ہیں یہ عمریٰ بنتا ہی اسی وقت ہے جبکہ اس کو اس کے اور س کے پیچھے والے لوگوں کے لیے مقرر کردیا جائے۔ انھوں نے عطاء بن ابی رباح سے کہا عمریٰ کے متعلق تم کیا کہتے ہو ؟ تو انھوں نے فرمایا مجھے جابر (رض) نے جناب رسول اللہ (صلی اللہ علیہ وآلہ وسلم) سے یہ روایت نقل کی ہے کہ عمریٰ میراث ہے۔ یہ عطاء اور قتادہ ہیں ان دونوں نے اس کو انعام اور میراث قرار دیا اور زہری نے ذرا ان انکار نہیں کیا بلکہ انھوں نے یہ کہا کہ عمریٰ جس کا یہ حکم ہے وہ منعقد ہی تب ہوگا جبکہ وہ معمر اور اس کے ورثاء کے لیے اس کو مقرر نہ کیا جائے اور وہ دیگر اموال کی طرح میراث میں شامل ہوگا اگرچہ وہ ورثاء غیر اولاد ہوں جیسا کہ ابو سلمہ نے بیان کیا ہم عنقریب یہ بات اسی باب میں اپنے مقام پر درج کریں گے ان شاء اللہ۔
تخریج : سابقہ روایت ملاحظہ ہو۔
اس کی مؤقف کی صحت پر دلالت کرنے والی روایات :

٥٧٣٦: عطاء نے جابر (رض) سے انھوں نے جناب رسول اللہ (صلی اللہ علیہ وآلہ وسلم) سے روایت کی ہے۔ نہ عمریٰ بناؤ اور نہ مراقبہ ۔ رقبٰی کا مطلب یہ ہے میں نے تمہیں اپنا گھر دے دیا اگر تو مجھ سے پہلے مرگیا تو یہ میری طرف لوٹ آئے گا اور اگر میں مرگیا تو وہ تیرا ہوگا۔ جس نے کوئی چیز بطور عمریٰ دی وہ معمر کے مرجانے پر اس کے ورثاء کو ملے گی۔
تخریج : ابو داؤد فی البیوع باب ٨٦‘ نسائی فی العمریٰ باب ١‘ ٢‘ الرقبیٰ باب ٣‘ ابن ماجہ فی الہبات باب ٤‘ مسند احمد ٢‘ ٣٤؍٧٣‘ ٥؍١٨٩۔

٥٧٣٧: ابوالزبیر نے جابر (رض) سے انھوں نے جناب رسول اللہ (صلی اللہ علیہ وآلہ وسلم) سے روایت کی ہے کہ اپنے اموال اپنے لیے روک کر رکھو اور ان کو مت بگاڑو۔ جس نے عمریٰ کیا وہ زندگی اور موت کے بعد اسی کا ہے اور اس کے بعد اس کے ورثاء کو ملے گا۔
تخریج : مسلم فی الہبات ٢٦‘ مسند احمد ٣؍٣١٢۔

٥٧٣٨: ابوالزبیر سے حضرت جابر (رض) سے روایت کی ہے کہ جس نے زندگی کے لیے عمریٰ کیا وہ زندگی میں معمر کا ہے اور موت کے بعد اس کے ورثاء کا ہے۔

٥٧٣٩: حمید نے جابر (رض) سے روایت کی ہے کہ ہم میں سے ایک آدمی نے اپنی والدہ کو عطیہ دیا اور اس کی زندگی تک دیا جب وہ فوت ہوگئیں تو کہنے لگا میں اپنے عطیے کا زیادہ حقدار ہوں جناب رسول اللہ (صلی اللہ علیہ وآلہ وسلم) (کی خدمت میں فیصلہ گیا تو آپ (صلی اللہ علیہ وآلہ وسلم)) نے اس کو میراث قرار دیا ابن ابی شیبہ کہتے ہیں یہ حمید کندہ میں سے ہے۔ امام طحاوی (رح) کہتے ہیں : ان روایات نے شروع باب میں مندرج روایت کا مفہوم کھول دیا اور یہ روایات ہماری تاویل کے بالکل مطابق ہیں عمریٰ کے متعلق دیگر الفاظ سے بھی روایات وارد ہیں ملاحظہ ہوں۔
دیگر الفاظ سے عمریٰ کے متعلق روایات :

٥٧٤٠: ابو سلمہ نے حضرت جابر (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے فرمایا جس نے عمریٰ بنایا وہ معمر اور اس کے ورثاء کے لیے ہے وہ اسی کا ہے جس کو دیا گیا کیونکہ اس نے یہ ایسا عطیہ دیا ہے جس میں میراث جاری ہوتی ہے۔
تخریج : مسلم فی الہبات ٢١؍٢٢‘ نسائی فی العمریٰ باب ٣‘ ابن ماجہ فی الہبات باب ٣‘ مسند احمد ٣؍٣٦٠۔

٥٧٤١: لیث نے ابن شہاب سے روایت کی ہے۔

٥٧٤٢: ابو سلمہ نے جابر (رض) سے روایت کی ہے کہ میں نے جناب رسول اللہ (صلی اللہ علیہ وآلہ وسلم) کو فرماتے سنا ہے کہ جس نے عمریٰ بنایا تو وہ عمریٰ اس معمر اور اس کے ورثاء کا ہے۔ معمر کے قول نے اس کے حق کو اس میں منقطع کردیا وہ اسی کا ہے جس کو عمریٰ کیا گیا اور اس کے ورثاء کو ملے گا۔

٥٧٤٣: زہری نے ابو سلمہ سے انھوں نے جابر (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے فیصلہ فرمایا کہ جس نے عمریٰ بنایا وہ معمر اور اس کے ورثاء کے لیے ہے معطی کی کسی شرط کا اس میں اعتبار نہیں اور نہ استثناء ہے۔ امام طحاوی (رح) فرماتے ہیں : ان آثار میں یہ بات بالکل واضح آگئی کہ عمریٰ ایک ایسا عطیہ ہے جو معمر کا حق بن گیا اب وہ دینے والے کی شرط کے مطابق اس کی طرف نہ لوٹے گا اور نہ اس میں استثناء چلے گا وہ ایسا عطیہ ہے جس میں میراث جاری ہوگی۔ جب عمریٰ اسی شرط سے ہو تو ہم بھی کہتے ہیں کہ معطی کی طرف لوٹایا نہ جائے گا اور جب اس میں ورثاء کا تذکرہ نہ ہو تو معمر کے مرنے کے بعد وہ معطی کی طرف لوٹ آئے گا اور یہ روایت عطاء ابوالزبیر کی ان روایات سے اولیٰ ہے جو انھوں نے جابر (رض) سے نقل کی ہیں کیونکہ ابو سلمہ کی روایت میں ” ولعقبہ “ کا اضافہ ہے اور دیگر روایات میں نہیں اضافہ والی روایت اولیٰ ہے وہ ہمارے معاون بن رہی ہے۔ اس کے جواب میں اگر وہ کہیں کہ عمریٰ کے متعلق ابو سلمہ کی روایت کے علاوہ اور کوئی روایت اس طرح مروی نہیں گویا منفرد ہے مگر ہم عرض کریں گے یہ ہماری دلیل زیادہ ہے کہ عمریٰ معمر کی طرف نہ لوٹایا جائے گا اور اس کی شرط بھی جائز نہیں اس کی وجہ یہ ہے کہ عمریٰ کی دو صورتیں ہیں۔ نمبر ١ یا تو یہ جناب رسول اللہ (صلی اللہ علیہ وآلہ وسلم) کے اس قول میں داخل ہے ” المسلمون عند شروطہم “ اس میں معمر کے لیے اس کی شرط نافذ ہوجائے گی اور اس میں سے کوئی چیز باطل نہ ہوگی جیسا کہ وقف کرنے والے کی شرط موقوف میں نافذ ہوتی ہے۔ ! اور عمریٰ معطی کی ملک سے خارج ہو کر معمر کی ملک میں داخل ہوگا تو اس طرح وہ اس کے باقی مال کے ساتھ مل جائے گا اور جو شرط رکھی ہے وہ باطل ہوجائے گی۔ ہم نے اس سلسلہ میں غور کیا تو دیکھا کہ جب عمریٰ معمر اور اس کی اولاد کے لیے واقع ہوتا ہے پھر وہ مرجاتا ہے اس کی اولاد اور بیوی موجود ہوتے ہیں یا وہ کچھ وصیت کرجاتا ہے یا اس پر کچھ قرض ہوتا ہے تو یہ تمام باتیں اسی طرح نافذ ہوتی ہیں جیسے اس کے اپنے مال میں نافذ ہوتی ہیں معمر کی طرف سے کوئی شرط اس میں رکاوٹ نہیں بنتی کہ وہ مال اس کے لیے یا اس کی اولاد کے لیے ہو۔ اس کی بیوی جن کے لیے وصیت کی اور قرض دار اس کے عقب نہیں ہیں اور اس طرح اگر وہ معمر مرجائے اور اس کا کوئی عقب نہ ہو تو معمر کی طرف کوئی چیز نہیں لوٹتی۔ جب بات اس طرح ہے جیسے ہم نے بیان کی تو ہمیشہ اسی طرح ہونا چاہیے کہ معمر کا عمریٰ درست ہو اور اس نے جو شرط رکھی ہے وہ باطل ہو خواہ کوئی شرط بڑی ہو یا چھوٹی نافذ نہ ہو اور وہ جناب نبی اکرم (صلی اللہ علیہ وآلہ وسلم) کے اس قول سے نکل جائے گا کہ مسلمان اپنی شرائط کے پابند ہیں اس کی شرط ان شرائط میں سے نہیں جو جناب رسول اللہ (صلی اللہ علیہ وآلہ وسلم) کی مراد ہے یہ قول جس کی تصحیح ہم نے بیان کی ہے۔ امام ابوحنیفہ ‘ ابو یوسف ‘ محمد رحمہم اللہ کا یہی قول ہے۔ ابن عمر (رض) سے بھی اسی طرح کی روایت ہے۔

٥٧٤٤: حبیب بن ابی ثابت (رض) نے ابن عمر (رض) سے روایت کی ہے کہ آپ سے ایک شخص نے اس آدمی کے متعلق پوچھا جس نے زندگی بھر کے لیے کسی کو اونٹنی دی اور اس کے ہاں بچہ پیدا ہوا تو انھوں نے فرمایا وہ اونٹنی اور اس کی اولاد اسی شخص کے لیے ہے میں نے بعد میں دریافت کیا تو انھوں نے فرمایا وہ اس کی زندگی میں اور اس کے مرنے کے بعد بھی اسی کے لیے ہے۔
بہرحال عمریٰ نہ چاہیے اگر کسی نے کردیا تو وہ مال معطی کی طرف نہ لوٹ سکے گا خواہ معطی کی زندگی میں معمر کی موت واقع ہو یا بعد میں بلکہ وہ معمر اور اس کے ورثاء کا مال ہے وراثت کی طرح تقسیم ہوگا۔

٥٧٤٥: نافع نے ابن عمر (رض) سے روایت کی ہے کہ حضرت عمر (رض) کو خیبر میں ایک زمین ملی وہ جناب رسول اللہ (صلی اللہ علیہ وآلہ وسلم) کی خدمت میں مشورہ لینے حاضر ہوئے تو عرض کی یارسول اللہ (صلی اللہ علیہ وآلہ وسلم) ! میں نے ایک زمین خیبر میں پائی ہے اس سے بہتر مال میں نے کبھی نہیں پایا آپ اس کے متعلق کیا ارشاد فرماتے ہیں آپ نے فرمایا اگر پسند کرو تو اس کی اصل کو روک لو جو نہ فروخت کی جاسکے اور نہ ہبہ کی جاسکے۔
ابو عاصم راوی کہتے ہیں کہ ” لاتورث “ کے لفظ فرمائے کہ نہ اس میں وراثت چلے چنانچہ انھوں نے اس کو فقراء اور قرابت دار اور غلاموں اور اللہ کی راہ میں اور مسافر اور ضعفاء کے لیے اس کو صدقہ کردیا کہ جو اس کا متولی اور ان پر خرچ کرے اور اس میں سے خود کھا سکتا ہے مگر اس میں سے مال لے نہیں سکتا۔ میں نے یہ لفظ متمول کا لفظ ذکر کیا تو انھوں نے غیر متاثل فرمایا۔ (مال کو جمع کرنے والا) ۔
تخریج : بخاری فی الشروط باب ١٩‘ والوصایا باب ٢٨‘ والایمان باب ٣٣‘ مسلم فی الوصیۃ ١٥‘ ابو داؤد فی الوصایا باب ١٣‘ ترمذی فی الاحکام باب ٣٦‘ نسائی فی الاحب اس باب ٢‘ ابن ماجہ فی الصدقات باب ٤‘ مسند احمد ٢؍١١‘ ١٢۔
اللغات : غیر متمول۔ جو مال نہ لے۔ متاثل۔ مال جمع کرنے والا۔ مؤثل۔ قدیم۔ یستامر۔ مشورہ کرنا۔
اس میں دو رائے ہیں۔
نمبر 1: اگر کسی نے اپنے بیٹے پوتوں پر گھر وقف کیا پھر فی سبیل اللہ وقف کیا تو وہ اب فی سبیل اللہ ہوگا فروخت نہیں وہ سکتا اس قول کو امام ابو یوسف ‘ محمد اہل بصرہ ‘ اہل مدینہ رحمہم اللہ نے اختیار کیا ہے۔
فریق ثانی : یہ تمام مال میراث ہو کر تقسیم ہوگا وقف درست نہ ہوگا بیماری کی حالت میں وصیت ثلث مال میں نافذ ہوگی۔ پھر فریق اول کا باہمی اختلاف ہے کہ موقوفہ مال پر قبضہ ہوگیا تو وقف ہے یا نہ بھی قبضہ ہوا تب بھی وقف شمار ہوگا۔

٥٧٤٦: نافع نے ابن عمر (رض) سے روایت کی ہے کہ عمر (رض) نے اپنے مال کے صدقہ کرنے کے متعلق جو مقام ثمغ میں تھا جناب رسول اللہ (صلی اللہ علیہ وآلہ وسلم) سے مشورہ کیا تو جناب رسول اللہ (صلی اللہ علیہ وآلہ وسلم) نے فرمایا اس کو اس طرح صدقہ کر دو کہ اس کا پھل تقسیم کیا جائے گا اور اصل اسی طرح برقرار رہے گا وہ نہ فروخت کیا جاسکے گا اور نہ ہبہ کیا جائے گا۔ امام طحاوی (رح) فرماتے ہیں کہ ایک جماعت علماء کا خیال یہ ہے کہ جب کسی نے اپنی اولاد ‘ بیٹے ‘ پوتوں پر ایک گھر وقف کردیا پھر ان کے بعد اللہ تعالیٰ کی راہ میں وقف کردیا۔ تو یہ درست ہے اب وہ ان کی ملک سے نکل کر اللہ تعالیٰ کی طرف منتقل ہوگیا اس کو فروخت کرنے کی کوئی سبیل نہیں جیسا کہ مندرجہ بالا آثار سے معلوم ہوتا ہے یہ امام ابو یوسف ‘ محمد ‘ اہل مدینہ ‘ اہل بصرہ رحمہم اللہ کا قول ہے۔ دوسروں نے کہا یہ سب میراث ہے اس سب سے واقف کی ملک سے نہ نکلے گا اس کی دلیل یہ ہے کہ حضرت عمر نے آپ سے مشورہ کیا تو آپ نے فرمایا اس کے اصل کو روک لو اور اس کے پھل کو وقف کر دو ۔ آپ (صلی اللہ علیہ وآلہ وسلم) نے جو بات فرمائی اس سے جہاں اس سے یہ مراد لینا جائز ہے کہ وہ اس کی ملک سے نکل جائے گی وہاں یہ بھی جائز ہے کہ ایسا کرنے سے یہ اس کی ملک سے خارج نہ ہو لیکن وہ اس طریقہ پر جاری ہوئی جس پر انھوں نے اسے جاری کیا اور جب وہ چاہیں اس کو فسخ کرنے کا ان کو حق حاصل ہے۔ جس طرح وہ آدمی جس نے اپنی زندگی تک اپنے درخت کھجور کا پھل اللہ تعالیٰ کے وقف کیا ہے اسے کہا جائے گا اس کو نافذ کرو۔ مگر اس پر جبر نہ کیا جائے گا اور نہ اس پر کوئی مواخذہ کیا جائے گا خواہ دے یا انکار کرے۔ لیکن اگر اس نے اس کو نافذ کیا تو بہت خوب کیا اور اگر روک لیا تو اس پر جبر نہیں۔ اسی طرح اس کے ورثاء کا بھی یہی حکم ہے اگر وہ اس کو اپنے والد کے طریقہ پر جاری رکھیں تو خوب ہے اور اگر روک لیں تو اس کا ان کو اختیار ہے۔ باقی حضرت عمر (رض) کے وقف کے ہمارے زمانہ تک باقی رہنے میں یہ کوئی دلیل نہیں کہ ان کے ورثاء کو اس کے توڑنے کا حق حاصل نہ تھا وقف کو توڑنے کا اختیار نہ ہونے کی دلیل تب ہوتی جبکہ آپ کی وفات کے بعد وہ جھگڑا کرتے اور اس سے ان کو منع کیا جاتا اگر ایسا ہوتا تو یہ عمریٰ ہوجاتا جو اس بات پر دلالت کرتا کہ اوقاف کو فروخت نہیں کیا جاسکتا۔ مگر ہمارے سامنے جو روایات ہیں ان میں صرف یہ بات ہے کہ حضرت عمر (رض) کے وقف کو اسی حال پر چھوڑا گیا تاکہ اسی طرح جاری رہے جس طرح حضرت عمر (رض) اپنی زندگی میں اس کو جاری کر گئے تھے ہمیں یہ بات نہیں پہنچی کہ ان میں سے کسی نے بھی اعتراض کیا ہو اور حضرت عمر (رض) سے یہ روایت بھی وارد ہے کہ آپ کو اس کے توڑنے کا اختیار تھا۔
حضرت عمر (رض) سے توڑنے کے اختیار والی روایت :

٥٧٤٧: ابن شہاب نے حضرت عمر (رض) سے روایت کی ہے کہ اگر میں نے اپنے صدقہ کا تذکرہ جناب رسول اللہ (صلی اللہ علیہ وآلہ وسلم) سے نہ کیا ہوتا یا اس قسم کی بات فرمائی تو میں اس کو واپس لوٹا لیتا۔ جب حضرت عمر (رض) نے یہ بات فرمائی تو اس سے اس بات پر دلالت مل گئی کہ زمین کو فقط وقف کردینے سے اس کا حق رجوع ختم نہیں ہوتا۔ آپ کو رجوع سے اس بات نے روکا کہ جناب رسول اللہ (صلی اللہ علیہ وآلہ وسلم) نے آپ کو ایک بات کا حکم فرمایا اور آپ ان سے اس حالت میں جدا ہوئے کہ وہ اسے پورا کرنے والے تھے تو اس وجہ سے آپ نے اس کو واپس لینا ناپسند کیا جیسا کہ حضرت ابن عمر (رض) نے جناب رسول اللہ (صلی اللہ علیہ وآلہ وسلم) کی وفات کے بعد ان صیام سے رجوع پسند نہ کیا جنہیں وہ حضور (صلی اللہ علیہ وآلہ وسلم) سے جدائی کے وقت رکھا کرتے تھے۔ حالانکہ آپ کو روزہ نہ رکھنے کا اختیار تھا۔ پھر یہ قاضی شریح ہیں جو حضرت عمر ‘ عثمان و علی (رض) کے زمانہ میں ان کی طرف سے قاضی رہے ان کا ارشاد سنئے۔
قاضی شریح (رح) کا قول :

٥٧٤٨: عطاء بن سائب کہتے ہیں کہ میں نے شریح (رح) سے اس آدمی کے متعلق دریافت کیا جس نے اپنا مکان دوسرے شخص کو وقف کردیا اور وہ دوسرا آدمی اس کی اولاد سے ہے تو انھوں نے فرمایا اس کے متعلق میں فیصلہ کرتا ہوں فتویٰ نہیں دیتا۔ عطاء کہتے ہیں میں نے ان کو قسم دی تو فرمانے لگے اللہ تعالیٰ کے فرائض (احکام توریث) اترنے کے بعد اولاد پر وقف نہیں ہوتا اور اس بات سے قاضیوں کو جاہل رہنے کی گنجائش نہیں ہے اور نہ ہی ائمہ مقتدیٰ کے لیے گنجائش ہے کہ وہ ایسے جاہل شخص کی پیروی کریں پھر شریح (رح) کی اس بات کا صحابہ کرام (رض) اور تابعین (رح) نے انکار نہیں کیا۔
مزید برآں حضرت ابن عباس (رض) نے جناب رسول اللہ (صلی اللہ علیہ وآلہ وسلم) سے روایت کی ہے۔

٥٧٤٩: عکرمہ نے ابن عباس (رض) سے روایت کی ہے کہ میں نے جناب رسول اللہ (صلی اللہ علیہ وآلہ وسلم) سے سوہ نساء کے نزول کے بعد سنا کہ اس میں فرائض اتارے گئے ہیں اور (اولاد پر) وقف سے منع کردیا گیا ہے۔

٥٧٥٠: عمرو بن خالد اور یحییٰ بن عبداللہ نے عبداللہ بن لہیعہ سے روایت کی پھر انھوں نے اپنی اسناد سے اسی طرح روایت کی ہے۔

٥٧٥١: ابن ابی مریم نے ابن لہیعہ سے پھر انھوں نے اپنی اسناد سے اسی طرح روایت نقل کی ہے۔

٥٧٥٢: روح اور محمد بن خزیمہ دونوں نے کہا احمد بن صالح (رح) نے کہا یہ حدیث صحیح ہے اور میں بھی یہی کہتا ہوں۔ حضرت ابن عباس (رض) نے بتلایا کہ احب اس ممنوع ہے اور بدنا جائز ہے اور ہبہ فرائض کے احکام اترنے سے پہلے کی بات ہے نزول فرائض کے بعد اس کا حکم تبدیل ہوگیا۔ آثار کے پیش نظر اس باب کا حکم یہی ہے۔ اب نظر سے ملاحظہ ہو کہ امام ابوحنیفہ ‘ ابو یوسف ‘ زفر و محمد رحمہم اللہ اور تمام مخالف و موافق اس بات پر متفق ہیں کہ جب کسی آدمی نے اپنا گھر اپنے ایام مرض میں فقراء و مساکین کے لیے وقف کیا پھر وہ اپنی اسی بیماری میں مرگیا تو اس کا یہ وقف اس کے ثلث مال میں جائز قرار دیا جائے گا اور یہ ثلث اس کی طرف سے وراثت نہ بنے گا اب ہم نے دیکھا کہ آیا یہ بات کسی ایک قول کی دلیل بنتی ہے تو غور و فکر سے یہ معلوم ہوا کہ کوئی شخص جب اپنا مال جو دراہم و دنانیر کی صورت میں ہے اس میں سے کچھ صدقہ کرتا ہے مگر اس کے اجراء سے پہلے وہ مرجاتا ہے تو اس کا یہ تمام مال وراثت ہوگا خواہ اس کو اس نے بیماری کی حالت میں صدقہ کیا تھا یا صحت کی حالت میں۔ البتہ اگر اس بات کو اس کی موت کے بعد والی وصیت قرار دیا جائے تو وہ تہائی مال میں سے نافذ ہوجائے گی جس طرح کہ باقی وصایا نافذ ہوتی ہیں اگر وہ بیماری میں ایسا کرے لیکن ابھی مساکین کو نہ دیا ہو تو اس کا حکم وہی ہے جو حالت صحت میں ایسا کرنے کا ہوتا ہے اور حالت صحت میں جو کچھ کرے گا وہ تمام مال میں سے نافذ ہوگا اور وہ اس کے بعد اس کا مالک نہ رہے گا جس طرح کہ آزاد کرنا ‘ ہبہ کرنا ‘ صدقہ دینا وغیرہ اور جب ان کو بیماری کی حالت میں کرے گا تو مال کے تہائی حصے سے نافذ ہوں گی اور مرض کی حالت میں اپنا مکان یا زمین وقف کرے اور اسے اللہ تعالیٰ کی راہ میں وقف کرے تو اس کی موت کے بعد تہائی مال سے یہ جائز ہے اور اس پر سب کا اتفاق ہے اس پر ورثا کا کوئی حق نہ ہوگا اور یہ جناب رسول اللہ (صلی اللہ علیہ وآلہ وسلم) کے اس قول میں داخل نہ ہوگا کہ ” لاحبس علی فرائض اللہ “ کہ فرائض اللہ میں وقف نہیں یعنی ورثاء کے لیے وقف نہیں۔ پس قیاس کا تقاضا یہ ہے کہ صحت کی حالت میں وقف کرنے کا بھی یہی حکم ہو وہ تمام مال سے نافذ ہوگا اور اس کے بعد اس کا کوئی اختیار نہ ہوگا یہ تقاضا نظر ہے۔ ” والی ہذا اذہب وبہ اقول من طریق النظر من طریق الآثار “ میرا رجحان اور قول بھی بطری ققیاس یہی ہے البتہ بطریق آثار ان کے معانی کی وضاحت میں اور بیان وجوہ میں اپنا رجحان ذکر کردیا گیا۔ اگر کوئی معترض کہے کہ تم وقف کی وجہ سے زمین کو اس کے مالک کی ملکیت سے نکالتے ہو لیکن کسی کی ملکیت میں دینے کو تیار نہیں۔ ان کو جواب میں کہے کہ تم اس بات کا کیوں کر انکار کرسکتے ہو جبکہ تم اور تمہارے مخالفین سب اس بات پر اتفاق رکھتے ہیں کہ اگر کوئی شخص اپنی زمین کو مسجد بناتا ہے اور جو مسلمانوں اور زمین کے درمیان سے ہٹ جاتا ہے تو اس سے وہ زمین اس کی ملکیت سے نکل جاتی ہے مگر کسی دوسرے کی ملکیت میں بھی داخل نہیں ہوتی بلکہ اللہ تعالیٰ کی ملک میں آجاتی ہے تو تمہاری اس دلیل سے جو الزام تمہارے مخالفین پر ہوتا ہے وہی تم پر بھی لازم ہوتا ہے۔ (فما ہو جوابکم فہو جوابنا) اگر کوئی معترض کہے کہ حضرت ابن عباس (رض) کی روایت میں ممانعت حبس کا کیا معنی ہے۔ ان کو جواب میں کہے کہ محدثین کے اس سلسلہ میں دو قول ہیں۔ نمبر ١ اس روایت کے تذکرہ میں ہم نے ذکر کیا ہے روایت ٥٧٤٩۔ نمبر اس سے اہل جاہلیت کا عمل مراد ہے یعنی بحیرہ سائبہ ‘ ووصیلہ ‘ حام وغیرہ مراد ہیں وہ اپنے ان اعمال کو وقف خیال کرتے تھے اور کسی کو اس کا وارث قرار نہ دیتے تھے جب احکام وراثت والی سورت نازل ہوئی اور اللہ تعالیٰ نے وراثت و اموال کے احکام بیان فرمائے۔ تو جناب رسول اللہ (صلی اللہ علیہ وآلہ وسلم) نے فرمایا یہ وقف نہیں۔ جنہوں نے صدقات موقوفہ کی اس ہمارے بیان کردہ طریقے کے مطابق اجازت دی انھوں نے اس سلسلے میں اختلاف کیا۔ نمبر ١ امام ابو یوسف (رح) وغیرہ انھوں نے اس کو جائز قرار دیا جس کو صدقہ کردیا گیا خواہ اس پر قبضہ کیا جائے یا نہ کیا جائے۔ ! امام مالک ابن ابی لیلیٰ ‘ محمد بن حسن رحمہم اللہ نے فرمایا جب تک وہ چیز اس کے قبضہ سے فار غ نہ ہو اور دوسرا آدمی اس پر قبضہ نہ کرے یہ جائز نہیں ہے۔ امام طحاوی (رح) کہتے ہیں : ہم نے اس بات کی ضرورت محسوس کی کہ ان اقوال میں غور کر کے صحیح قول کو نکالا جائے۔ میں نے غور کیا کہ بندوں کے تصرفات کئی قسم کے ہیں۔ آزاد کرنا اور یہ صرف کہنے سے نافذ ہوجاتا ہے اور مالک کی ملک سے نکل کر اللہ تعالیٰ کی ملک میں داخل ہوجاتا ہے۔ ہبہ اور صدقہ کرنا وہ صرف قول سے نافذ نہیں ہوتا جب تک کہ اس کے ساتھ اس آدمی کی طرف سے قبضہ کروانا ثابت نہ ہوجائے جس نے اس کو ہبہ کیا ہے معطی موہوب لہ کو اس کا مالک بنا دے۔ اب قابل غور یہ ہے کہ وقف کا حکم کس سے مشابہت رکھتا ہے تاکہ اس کی طرف مائل کردیا جائے تو ہم نے دیکھا کہ جب کوئی شخص اپنی زمین اور مکان کو وقف کرتا ہے تو وہ جس پر وقف کرتا ہے وہ اس کے منافع کا مالک بنتا ہے اس مال کی ذات کا مالک نہیں بنتا کیونکہ وہ واقف اس چیز کو اپنی ذاتی ملک سے نکال کر اللہ تعالیٰ کی ملک میں دیتا ہے۔ پس اس سے یہ ثابت ہوگیا کہ یہ اس چیز کی مثل ہے جس کو اپنی ملکیت سے نکال کر اللہ تعالیٰ کی ملک میں دے دیا۔ تو جس طرح کہ عتاق کا تعلق صرف قول سے ہے قبضہ کا محتاج نہیں بالکل اسی طرح وقف میں بھی قول کے ساتھ قبضہ کی چنداں ضرورت نہیں کہ اگر ہم قبضہ کو لازم قرار دیں تو قبضہ کرنے والا اس چیز پر قبضہ کرے گا جس کا وقف کی وجہ سے وہ مالک نہیں ہوا۔ فلہذا اس کا قبضہ کرنا اور نہ کرنا دونوں برابر ہوئے پس ان دونوں دلیلوں سے امام ابو یوسف (رح) کا قول ثابت ہوگیا۔
امام طحاوی (رح) نے پہلی مرتبہ : الی ہذا اذہب وبہ اقول من طریق النظر لاطریق الاثارہ فرمایا ورنہ اب تک اپنا رجحان اس انداز سے کہیں ظاہر نہیں فرمایا۔ بطریق اثر تو اس کو ترجیح دی کہ صاحب میراث کے لیے یہ وقف جائز نہیں دوسری میراث کی طرح تقسیم ہوگا البتہ بطریق نظر درست ہے یہ امام ابو یوسف (رح) کا قول ہے۔ (مترجم)