Al Tahawi

٦٢٨١: ابو کثیر نے حضرت ابوہریرہ (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے فرمایا شراب ان دو درختوں سے بنتی ہے۔ کھجور۔ ! انگور۔
تخریج : مسلم فی الاشربہ ١٣؍١٤‘ ابو داؤد فی الاشربہ باب ٤‘ ترمذی فی الاشربہ باب ٨‘ ابن ماجہ فی الاشربہ باب ٥‘ مسند احمد ٢٧٩؍٤٠٩۔
ایک علماء کی جماعت کا خیال یہ ہے کہ شراب صرف کھجور اور انگور دونوں سے ہوتی ہے۔
فریق ثانی : شراب جس کی حرمت نص میں وارد ہے وہ شراب انگوری ہے یہ قول امام ابوحنیفہ (رح) کا ہے بقیہ شرابوں کی حرمت قیاسی ہے۔ امام ابو یوسف (رح) کے ہاں انگور کا پانی جوش مارے اگرچہ جھاگ پیدا نہ کرے تب بھی وہ شراب ہے۔

٦٢٨٢: ابو کثیر نے حضرت ابوہریرہ (رض) سے انھوں نے جناب نبی اکرم (صلی اللہ علیہ وآلہ وسلم) سے اسی طرح کی روایت کی ہے۔

٦٢٨٣: ابو کثیر یمامی کہتے ہیں کہ میں یمامہ سے مدینہ آیا جبکہ لوگوں کے درمیان نبیذ کے اختلاف نے زور پکڑا میں نے اپنے آپ کو کہا کہ میں ضرور ابوہریرہ (رض) سے ملاقات کروں گا اور اس کے متعلق ان سے سوال کروں گا۔ چنانچہ میں ان سے ملا اور میں نے کہا اے ابوہریرہ (رض) ! میں نبیذ کے متعلق پوچھنے کے لیے یمامہ سے حاضر ہوا ہوں میں نے کہا آپ جناب رسول اللہ (صلی اللہ علیہ وآلہ وسلم) کا ارشاد میرے سامنے نقل کیجئے اور کوئی بات نقل مت کریں۔ تو وہ فرمانے لگے میں نے جناب نبی اکرم (صلی اللہ علیہ وآلہ وسلم) کو فرماتے سنا کہ شراب انگور کی بیل اور کھجور سے بنتی ہے۔ امام طحاوی (رح) فرماتے ہیں : ایک جماعت کا خیال یہ ہے کہ شراب کھجور اور انگور دونوں سے ہوتی ہے انھوں نے اس روایت کو دلیل بنایا۔ وہ شراب جس کو کتاب اللہ میں حرام کہا گیا وہ انگور کا نچوڑ ہے جبکہ اسے جوش آئے اور وہ جھاگ پھینکے۔ امام ابوحنیفہ (رح) کا یہی قول ہے۔ قول ابو یوسف (رح) یہ ہے جب وہ جوش کرے اگرچہ وہ جھاگ پیدا نہ کرے وہ شراب بن جائے گی۔ شروع باب میں مذکورہ حضرت ابوہریرہ (رض) والی روایت وہ اس کے مخالف نہیں ہے۔ ” الخمر من ہاتین الشجرتین “ خطاب اگرچہ عام ہے مگر مراد ایک ہے جیسا کہ اس ارشاد الٰہی میں ” یخرج منہما اللؤلؤ والمرجان “ (الرحمن۔ ٢٢) ان میں سے ایک سے یہ مونگے موتی نکلتے ہیں جیسا کہ فرمایا ” یٰمعشرالجن والانس “ (الانعام ١٣٠) دونوں اجناس کا ذکر فرما کر مراد انسان لیے ہیں کیونکہ رسول تو صرف انسانوں سے آئے ہیں نہ کہ جنات سے۔ جس طرح کہ رسول اللہ (صلی اللہ علیہ وآلہ وسلم) نے فرمایا جو کہ حضرت عبادہ بن صامت والی روایت میں مذکور ہے کہ آپ (صلی اللہ علیہ وآلہ وسلم) نے صحابہ سے بھی اسی طرح بیعت لی جس طرح صحابیات سے لی۔ ان لاتشرکو۔۔۔ کہ شرک نہ کرنا ‘ چوری نہ کرنا اور زنا نہ کرنا پھر فرمایا جو ان میں سے کسی چیز کا ارتکاب کر بیٹھا پھر اسے سزا مل گئی وہ اس کے لیے کفارہ ہے۔ (بخاری فی الایمان باب : ١١)
تخریج : بخاری فی الایمان باب ١١‘ والحدود باب ٨‘ مسلم فی الحدود روایت ٤١‘ ترمذی فی الحدود باب ١٢‘ دارمی فی الیسیر باب ١٦‘ مسن داحمد ٥؍٣١٤۔

٦٢٨٤: ابو ادریس خولانی نے حضرت عبادہ بن صامت (رض) سے انھوں نے جناب نبی اکرم (صلی اللہ علیہ وآلہ وسلم) سے روایت کی ہے۔ ہم جانتے ہیں کہ جس آدمی نے شرک کیا پھر اس کو شرک کی سزا دے دی گئی یہ اس کے لیے کفارہ نہیں بنے گا جو کچھ ہم نے ذکر کیا وہ شرک کے علاوہ مراد ہے اس سے ثابت ہوتا ہے کہ اس سے مراد شرک کے علاوہ گناہ ہیں جن کا تذکرہ اس روایت میں آیا ہے جب ان اشیاء کو ظاہری طور پر اکٹھا ذکر کیا حالانکہ حقیقی طور پر ان میں بعض خاص ہیں تو اسی طرح روایت : ” الخمر من ہاتین الشجرتین النخلۃ والعنبۃ “ ظاہری طور پر دونوں مذکور ہیں اور حقیقی طور پر ایک مراد ہے پس مقصودی شراب انگور سے بنتی ہے۔ ممکن ہے کہ دونوں کے درخت بھی مراد ہوں اور جو ان دونوں کے پھلوں میں سے خمر بنائی جائے وہ خمر ہو جیسا کہ امام ابوحنیفہ (رح) کا یہ قول ہے کہ جو کھجور اور انگور میں سے نچوڑ کر بنائی جائے وہ خمر ہے۔ اس خمر والی روایت سے مراد یہ ہے کہ شراب دونوں سے ہے اگرچہ وہ مختلف ہے جیسا کہ انگور سے ہم جانتے ہی ہیں اور کھجور میں سے وہ جو نشہ پیدا کرے پس اس لحاظ سے انگور کی شراب تو بعینہٖ وہی نچوڑ ہے جبکہ وہ گاڑھا ہوجائے اور کھجور کی شراب نبیذ تمر کی ایسی مقدار جو نشہ آور ہوجائے جب اس روایت میں ان وجوہات کا احتمال ہوا تو پھر ایک احتمال دوسرے سے کسی طور پر بھی اولیٰ نہیں ہر ایک اس کو دلیل بنا سکتا ہے۔ اس حدیث عمر کا پھر کیا مطلب ہوگا (روایت یہ ہے)

٦٢٨٥: شعبی نے ابن عمر (رض) سے اور وہ کہتے ہیں کہ میں حضرت عمر (رض) سے سنا وہ منبر رسول (صلی اللہ علیہ وآلہ وسلم) پر یہ فرما رہے تھے : اما بعد ! اے لوگو ! شراب کی حرمت اتری ان دنوں شراب پانچ چیزوں سے بنتی تھی : کھجور ‘ انگور ‘ شہد ‘ گندم ‘ جو اور خمر وہ ہے جو عقل کو ڈھانپ لے۔
تخریج : بخاری فی الاشربہ باب ٥‘ ٦‘ مسلم فی التفسیر روایت ٣٢‘ ٣٣‘ ابو داؤد فی الاشربہ باب ١‘ نسائی فی الاشربہ باب ٢٠۔
اس جیسی روایت ابن عمروالنعمان نے جناب نبی اکرم (صلی اللہ علیہ وآلہ وسلم) سے نقل کی ہے۔

٦٢٨٦: سالم بن عبداللہ نے اپنے والد سے نقل کیا کہ جناب رسول اللہ (صلی اللہ علیہ وآلہ وسلم) نے فرمایا کہ انگور میں خمر ہے اور میں تمہیں ہر نشے والی چیز سے منع کرتا ہوں۔
تخریج : بخاری فی الاشربہ باب ١٠‘ مسلم فی الاشربہ روایت ٧٢‘ ابو داؤد فی الاشربہ باب ٤‘ مسند احمد ٤؍٢٧٣۔

٦٢٨٧: شعبی نے نعمان ابن بشیر (رض) اور انھوں نے جناب نبی اکرم (صلی اللہ علیہ وآلہ وسلم) سے اسی طرح کی روایت ذکر کی البتہ اس میں ” انہاکم عن کل مسکر “ کے الفاظ نہیں ہیں۔ ان دونوں روایاتوں میں وہ تمام احتمالات ہیں جو پہلی روایت میں ہم نے ذکر کئے البتہ ایک معنی کا احتمال نہیں جو کہ فقط پہلی روایت میں پایا جاتا ہے وہ یہ ہے کہ جنہوں نے کھجور اور کشمش کے رس کو مکروہ قرار دیا ہے ان روایات میں اس معنی کا حتمال اس لیے نہیں کیونکہ پہلی روایت میں گندم اور جو اور شہد کی خمر کو بھی ساتھ ملایا گیا ہے اور فریق اول اس کا قائل نہیں کیونکہ ان کے خیال میں جو اور گندم کے نچوڑ میں کوئی حرج نہیں اسی لیے وہ ان کے نچوڑ اور کھجور اور کشمش کے نچوڑ میں فرق کرتے ہیں تو اس روایت میں اس تاویل کا احتمال نہیں بلکہ اس کے علاوہ تاویلات کا احتمال ہے۔ اگر کوئی معترض کہے کہ کچی اور پکی کھجوروں کا رس بھی ان کے ہاں خمر میں شمار ہوتا تھا جیسا کہ یہ روایات دلالت کرتی ہیں۔
تخریج : ابو داؤد فی الاشربہ باب ٤۔

٦٢٨٨: یزید بن ابی مریم نے حضرت انس (رض) سے روایت کی ہے کہ ہم رسول اللہ (صلی اللہ علیہ وآلہ وسلم) کے زمانے میں کچی اور پکی کھجوروں کا نبیذ بناتے تھے جب شراب کی حرمت اتری تو ہم نے ان دونوں کو بھی برتنوں سے گرا دیا اور اس کو چھوڑ دیا۔

٦٢٨٩: حمیدالطویل کہتے ہیں کہ حضرت انس (رض) نے ذکر کیا کہ حضرت ابو عبیدہ بن جرح ‘ سہیل بن بیضاء اور ابی ابن کعب حضرت ابو طلحہ کے پاس مہمان تھے اور میں ان کو شراب پلا رہا تھا قریب تھا کہ شراب ان پر اپنا اثر کر جائے کہ ہمارے پاس سے ایک مسلمان کا گزر ہوا اس نے زور سے آواز دی۔ سنو کیا تمہیں معلوم نہیں ہوا کہ شراب حرام کردی گئی ہے اللہ کی قسم ! انھوں نے ذرا انتظار نہیں کیا مجھے حکم دیا کہ جو کچھ برتنوں میں ہے۔ میں وہ سب انڈیل دوں میں نے فوراً ایسا کردیا پھر وہ اس میں سے کسی چیز کی طرف بھی نہیں لوٹے۔ یہاں تک کہ ان کی وفات ہوئی اور بلاشبہ وہ کچی اور پکی کھجور تھی اور ان دنوں ہماری وہی شراب تھی۔

٦٢٩٠: حمید نے حضرت انس (رض) سے اسی طرح کی روایت نقل کی ہے۔