Al Tahawi

٧١١٩: عمرو بن شعیب نے اپنے والد انھوں نے اپنے دادا سے روایت کی ہے کہ جناب رسول اللہ (صلی اللہ علیہ وآلہ وسلم) نے عیدین میں بارہ تکبیرات کہیں سات پہلی رکعت میں اور پانچ دوسری رکعت میں نماز کی دو تکبیروں کے علاوہ۔ امام طحاوی (رح) سے مروی ہے کہ ایک جماعت کہتی ہے کہ عیدین کی نماز میں اتنی ہی تکبیرات ہیں اور انھوں نے اس روایت سے استدلال کیا ہے۔
تخریج : ابن ماجہ فی الاقامہ باب ١٥٦۔
خلاصہ الزام :
نماز عید کی تکبیرات میں اختلاف ہے۔
: ایک جماعت کا قول یہ ہے کہ عیدین کی نماز میں پہلی رکعت میں سات اور دوسری میں پانچ تکبیرات نماز کی تکبیرات سے الگ ہیں۔
فریق ثانی کا قول یہ ہے کہ نماز عید کی پہلی رکعت میں پانچ تکبیرات اور دوسری میں چار تکبیرات ہیں۔

٧١٢٠: عروہ نے حضرت ابو واقد لیثی اور حضرت عائشہ (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے عیدالفطر و اضحی کے روز نماز پڑھائی اور پہلی رکعت میں سات تکبیرات کہیں اور سورة قٓ والقرآن کی تلاوت فرائی اور دوسری رکعت میں پانچ تکبیرات کہیں اور ” سورة اقتربت الساعۃ “ تلاوت فرمائی۔

٧١٢١: عروہ نے حضرت عائشہ (رض) سے روایت کی ہے کہ جناب رسول اللہ (صلی اللہ علیہ وآلہ وسلم) عیدین میں سات اور پانچ تکبیرات کہتے جو رکوع کی دونوں تکبیرات سے الگ ہوتیں۔ تخریج : ابن ماجہ فی الاقامہ باب ١٥٦‘ دارمی فی الصلاۃ باب ٢٢٠‘ مسند احمد ٦‘ ٦٥؍٧٠۔

٧١٢٢: اسد بن موسیٰ نے ابن لہیعہ سے پھر انھوں نے اپنی اسناد سے اسی طرح روایت کی ہے۔

٧١٢٣: عقیل نے ابن شہاب سے پھر انھوں نے اپنی اسناد سے اسی طرح روایت کی ہے۔

٧١٢٤: عروہ نے حضرت عائشہ (رض) انھوں نے جناب نبی اکرم (صلی اللہ علیہ وآلہ وسلم) سے اسی طرح روایت کی ہے۔

٧١٢٥: نافع نے حضرت ابن عمر (رض) سے انھوں نے جناب نبی اکرم (صلی اللہ علیہ وآلہ وسلم) سے روایت کی ہے کہ عیدین کی تکبیرات پہلی رکعت میں سات اور دوسری میں پانچ تکبیرات ہیں۔

٧١٢٦: حضرت نافع کہتے ہیں کہ میں حضرت ابوہریرہ (رض) کے ساتھ عیدالفطر واضحی میں حاضر ہوا تو انھوں نے پہلی رکعت میں سات تکبیریں قراءت سے قبل اور دوسری رکعت میں پانچ تکبیرات قراءت سے پہلے ادا فرمائیں۔

٧١٢٧: نافع نے حضرت ابوہریرہ (رض) سے اسی طرح کی روایت کی ہے۔ فریق اوّل کہتا ہے کہ ان آثار میں بارہ تکبیرات کا تذکرہ ہے ہم یہی کہتے ہیں اور یہی ہمارا قول ہے۔ فریق ثانی کا مؤقف ہے کہ عیدین میں نو تکبیرات ہیں۔ پانچ پہلی رکعت میں اور چار دوسری رکعت میں اور دونوں قراءتوں کو اکٹھا کرے۔ فریق اوّل کی دلیل کا جواب یہ ہے کہ آپ نے جو روایت ذکر کی ہے اس کا مدار عبداللہ بن عبدالرحمن پر ہے اور وہ خود فریق اوّل کے ہاں بھی ایسا راوی نہیں کہ جس کی روایت سے استدلال کیا جاسکے۔ دوسرا عمرو بن شعیب عن ابیہ عن جدہ میں دادا سے اس کا سماع ثابت نہیں۔ پھر وہ اس سے اپنے مخالف کے خلاف کس طرح بطور دلیل لاتے جبکہ اگر اسی سند کی روایت ان کے خلاف حجت میں پیش ہو تو قطعاً قبول نہ کریں۔ دوسری دلیل روایت ابن لہیعہ کا جواب یہ ہے کہ اس روایت میں واضح طور پر اضطراب ہے کیونکہ وہ کبھی تو عقیل عن خالد ابن یزید عن ابن شہاب روایت کرتا ہے۔ ! اور کبھی خالد بن یزید عن عقیل عن ابن شہاب روایت کرتا ہے۔ " اور کبھی عن ابن الاسود عن عروہ عن عائشہ (رض) و ابو واقد روایت کرتا ہے اوپر ہم روایات کے سارے طرق ذکر کر آئے ہیں۔ خود ابن لہیعہ جس درجہ کا راوی ہے وہ ہم اسی کتاب میں بیان کرچکے (اس سے یہ ثابت ہوا کہ اضطراب کی وجہ سے روایت قابل استدلال نہیں) روایت ابن عمر (رض) کا جواب یہ ہے کہ اس روایت کا سارا دارومدار عبداللہ بن عامر پر ہے اور وہ خود فریق اوّل کے نزدیک نہایت ضعیف راوی ہے باقی اس روایت کی اصل یہ ہے کہ یہ عبداللہ ابن عمر (رض) پر موقوف ہے چنانچہ ملاحظہ ہو۔
تشریح : فریق اوّل کہتا ہے کہ ان آثار میں بارہ تکبیرات کا تذکرہ ہے ہم یہی کہتے ہیں اور یہی ہمارا قول ہے۔

٧١٢٨: نافع ابن ابی نعیم نے نافع سے انھوں نے ابن عمر (رض) سے اسی طرح روایت کی ہے اور اس کو مرفوع قرار نہیں دیا۔ روایت کثیر بن عبداللہ : وہ درحقیقت ابن وہب کی طرف لکھا ہوا ان کا خط ہے اور فریق اوّل ابن وہب کی اس طرح سنی ہوئی روایت کو حجت قرار نہیں دیتے جو روایت سرے سے سنی ہی نہیں وہ کیسے حجت ہو۔ جب ان آثار کی حیثیت معلوم ہوگئی تو اس سے ثابت ہوا کہ ان میں سے کوئی چیز بھی عیدین کی تکبیرات کی کیفیت پر دلالت کے قابل نہیں اب ان کے علاوہ روایات کو ہم دیکھتے ہیں کہ آیا ان میں کوئی ایسی چیز پائی جاتی ہے جو اس کیفیت پر دلالت کرے چنانچہ یہ قاسم ابو عبدالرحمن کی روایت ہے۔