Al Tahawi

٥٨٤٩: ابوالزبیر نے خبر دی کہ انھوں نے جابر (رض) کو فرماتے سنا کہ جناب رسول اللہ (صلی اللہ علیہ وآلہ وسلم) نے فرمایا شفعہ کا حق ہر اس شخص کو حاصل ہے جو زمین یا مکان یا باغ میں شریک ہو۔ اس کو فروخت کرنا جائز نہیں یہاں تک کہ وہ اپنے شریک پر پیش کرے پھر وہ اسے لے لے یا چھوڑ دے۔ امام طحاوی (رح) فرماتے ہیں کہ بعض علماء کا خیال یہ ہے کہ شفعہ صرف زمین ‘ باغ یا مکان میں شراکت کی صورت میں جائز ہے پڑوس سے لازم نہیں ہوتا۔ انھوں نے اس روایت سے استدلال کیا ہے۔ دوسروں نے کہا تمہارے کہنے کے مطابق شفعہ صرف اس شراکت میں ثابت ہوگا جو تقسیم نہ ہوئی ہو۔ پھر دوسرے اس شریک کو حق ہوگا جس نے اس راستہ کی تقسیم کی ہو جس میں شراکت باقی ہے پھر اس کے بعد متصل پڑوسی کو حاصل ہوگا۔ تمہارے بیان کردہ اثر میں صرف اس قدر ہے کہ شفعہ مشترک زمین ‘ مکان یا باغ میں ہے یہ تو نہیں کہا گیا کہ انہی میں ہے اور دوسروں میں نہ ہوگا ہر شراکت میں اس کا وجوب ثابت ہوا ‘ اس کے علاوہ میں وجوب کی نفی نہیں اور حضرت جابر (رض) کی روایت دوسرے طریق سے وارد ہے اس میں اضافہ موجود ہے۔
تخریج : مسلم فی المساقات ١٣٥‘ ابو داؤد فی البیوع باب ٧٣‘ نسائی فی البیوع باب ٨٠؍١٠٩‘ مسند احمد ٣؍٣١٦۔
امام طحاوی (رح) کا قول : بعض علماء کا خیال یہ ہے کہ شفعہ صرف زمین ‘ باغ یا مکان میں شراکت کی صورت میں جائز ہے پڑوس سے لازم نہیں ہوتا۔ انھوں نے اس روایت سے استدلال کیا ہے۔
فریق ثانی کا مؤقف : تمہارے کہنے کے مطابق شفعہ صرف اس شراکت میں ثابت ہوگا جو تقسیم نہ ہوئی ہو۔ پھر دوسرے اس شریک کو حق ہوگا جس نے اس راستہ کی تقسیم کی ہو جس میں شراکت باقی ہے پھر اس کے بعد متصل پڑوسی کو حاصل ہوگا۔
فریق اول کا جواب : تمہارے بیان کردہ اثر میں صرف اس قدر ہے کہ شفعہ مشترک زمین ‘ مکان یا باغ میں ہے یہ تو نہیں کہا گیا کہ انہی میں ہے اور دوسروں میں نہ ہوگا ہر شراکت میں اس کا وجوب ثابت ہوا اس کے علاوہ میں وجوب کی نفی نہیں اور حضرت جابر (رض) کی روایت دوسرے طریق سے وارد ہے اس میں اضافہ موجود ہے۔
دوسری سند سے روایت جابر (رض) :
شفعہ کا معنی کسی شئی کو مثل سے ملانا اور فقہ میں شراکت یا پڑوس کی وجہ سے بتکلف کسی چیز کے ملانے کا دعویٰ کرنا۔ اس مسئلہ میں دو قول ہیں۔ ! جو پڑوسی خرید کی گئی زمین میں شریک نہیں اس کے لیے شفع کا کوئی حق نہیں اس قول کو امام مالک (رح) و شافعی (رح) اور احمد (رح) نے اختیار کیا ہے۔ " شرکت جو ار کی وجہ سے بھی شفعہ ہے یہ ائمہ احناف کا قول ہے۔
تخریج : کذا فی البذل ج ٤‘ ٢٩١‘ والاشعۃ ج ٢‘ ٦٢۔

٥٨٥٠: عطاء بن ابی رباح نے جابر (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے فرمایا پڑوسی اپنے پڑوسی پر شفعہ کا زیادہ حق رکھتا ہے اگر وہ موجود نہ ہو تو اس کا انتظار کیا جائے گا بشرطیکہ ان کا راستہ ایک ہو۔
تخریج : ابو داؤد فی البیوع باب ٧٣‘ ابن ماجہ فی الشفعہ باب ٢‘ مسند احمد ٣؍٣٥٣۔

٥٨٥١: عطاء نے جابر (رض) سے روایت کی انھوں نے جناب رسول اللہ (صلی اللہ علیہ وآلہ وسلم) سے اسی طرح کی روایت کی ہے۔

٥٨٥٢: عطاء نے جابر (رض) سے انھوں نے جناب نبی اکرم (صلی اللہ علیہ وآلہ وسلم) سے اسی طرح کی روایت کی ہے۔ اس روایت میں مبیع میں حق شفعہ کو لازم کیا گیا ہے۔ جس کو صرف راستہ کی شرکت کے علاوہ شرکت حاصل نہ ہو پس ان دونوں روایات کا باہمی تضاد نہیں بلکہ دونوں ثابت ہو کر واجب العمل ہیں۔ ابوالزبیر والی روایت میں شریک کے لیے شفعہ کے حق کا ثبوت ہے جس میں سے جو فروخت ہوا سو فروخت ہوا۔ روایت عطاء میں اس مبیع کا ذکر ہے جس میں راستہ کی شرکت ہو۔ فریق اول نے اپنے مؤقف کے لیے ان روایات سے استدلال کیا ہے جو فریق ثانی کے مؤقف کی نفی کرتی ہیں۔
فریق اوّل کا ایک استدلال :
فریق اول نے اپنے مؤقف کے لیے ان روایات سے استدلال کیا ہے جو فریق ثانی کے مؤقف کی نفی کرتی ہیں۔

٥٨٥٣: ابو سلمہ نے حضرت ابوہریرہ (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے شفعہ کا فیصلہ اس زمین میں فرمایا جو تقسیم نہیں کی گئی جب حدود متعین ہوجائیں تو کوئی شفعہ کا حق نہیں۔
تخریج : بخاری فی الشفعہ باب ١‘ مسلم فی المساقاۃ ١٣٤‘ نسائی فی البیوع باب ١٠٩‘ ابن ماجہ فی الشفعہ باب ٣٠‘ مالک فی الشفعہ ١‘ مسند احمد ٣؍٣٩٩۔

٥٨٥٤: ابو سلمہ نے حضرت ابوہریرہ (رض) سے اسی طرح روایت کی ہے۔

٥٨٥٥: سعید اور ابو سلمہ دونوں نے حضرت ابوہریرہ (رض) سے اسی طرح روایت کی ہے۔

٥٨٥٦: عبدالملک بن عبدالعزیز ماجشون نے مالک سے انھوں نے پھر اپنی اسناد سے اسی طرح روایت نقل کی ہے۔ حد بندی کیے جانے تک شفعہ ہے جب حد بندی کردی گئی تو شفعہ کا موقع ختم ہوگیا۔ اس روایت سے استدلال تب درست ہوتا جب کہ یہ روایت ثابت ہوتی امام مالک (رح) نے اس کو منقطع نقل کیا ہے حضرت ابوہریرہ (رض) تک اتصال ثابت نہیں ہے۔ ملاحظہ ہو۔
طریق استدلال : حد بندی کردینے جانے تک شفعہ ہے جب حد بندی کردی گئی تو شفعہ کا موقعہ ختم۔
جواب : اس روایت سے استدلال تب درست ہوتا جب کہ یہ روایت ثابت ہوتی امام مالک (رح) نے اس کو منقطع نقل کیا ہے حضرت ابوہریرہ (رض) تک اتصال ثابت نہیں ہے۔ ملاحظہ ہو۔

٥٨٥٧: ابن شہاب نے سعید بن مسیب سے روایت کی انھوں نے فرمایا کہ جناب رسول اللہ (صلی اللہ علیہ وآلہ وسلم) نے اس میں شفعہ کا فیصلہ فرمایا جس کو تقسیم نہ کیا گیا تھا جب حدود لگا دی جائیں تو شفعہ نہیں ہے۔
تخریج : روایت ٥٨٥٤ کی تخریج ملاحظہ ہو۔

٥٨٥٨: مالک نے ابن شہاب سے انھوں نے ابن مسیب اور ابی سلمہ سے اسی طرح روایت نقل کی ہے۔ جب اس روایت کا مقطوع ہونا ثابت ہوگیا تو فریق اول کے ہاں مقطوع قابل حجت نہیں۔ بالفرض اگر یہ روایت متصل سند سے ثابت ہوجائے تو پھر بھی اس میں ہماری روایت کے خلاف کوئی دلیل نہیں جو کہ ہم عطاء عن جابر (رض) نقل کر آئے ہیں کیونکہ اس روایت میں ابوہریرہ (رض) کا قول ہے۔ کہ جناب رسول اللہ (صلی اللہ علیہ وآلہ وسلم) نے غیر تقسیم شدہ میں شفعہ کا فیصلہ فرمایا۔ تو اس سے انھوں نے اس بات کی اطلاع دی ہے جو کہ جناب نبی اکرم (صلی اللہ علیہ وآلہ وسلم) نے فیصلہ فرمایا پھر اس میں فرمایا اذا وقعت الحدود فلا شفعۃ “ اور ان کا اجتہادی قول ہے انھوں نے جناب رسول اللہ (صلی اللہ علیہ وآلہ وسلم) سے نہ نقل کیا نہ نسبت کی۔ اس روایت کو اس وقت ان لوگوں کے خلاف دلیل میں پیش کیا جاسکتا ہے جو پڑوس کی وجہ سے حق شفعہ کو واجب قرار دیتے ہیں جبکہ اس طرح فرمایا ہوتا کہ شفعہ اس میں ہے جو تقسیم نہ ہوا ہو۔ جب حدود قائم کردی گئیں اس وقت شفعہ نہیں ہے۔ تو اس صورت میں جناب رسول اللہ (صلی اللہ علیہ وآلہ وسلم) کی طرف سے منقسم چیز میں شفعہ نہ ہونے کی نفی ہوتی۔ لیکن ابوہریرہ (رض) نے یہاں اس فیصلے کی اطلاع دی جو انھوں نے معلوم کیا۔ پھر انھوں نے اپنی رائے و اجتہاد سے شفعہ کی نفی کی جس کا انھیں جناب رسول اللہ (صلی اللہ علیہ وآلہ وسلم) کی طرف سے علم حاصل نہ ہوا اور دوسرے حضرات کو معلوم ہوا۔ اس روایت کو معمر نے زہری سے روایت کیا مگر وہ روایت متن و سند دونوں کے لحاظ سے امام مالک سے مختلف ہے۔ روایت ملاحظہ ہو۔