٦٦٧٩: عبیداللہ بن عبداللہ بن عتبہ نے حضرت ابن عباس (رض) سے ایک طویل حدیث بیان کی جس میں اس خواب کا تذکرہ ہے جس کی تعبیر حضرت ابوبکر (رض) نے جناب رسول اللہ (صلی اللہ علیہ وآلہ وسلم) کی موجودگی میں دی۔ جناب ابوبکر نے پوچھا یارسول اللہ (صلی اللہ علیہ وآلہ وسلم) ! کیا میں نے درست تعبیر کی۔ آپ نے فرمایا تم نے کچھ درست اور کچھ غلط تعبیر کی۔ ابوبکر (رض) کہنے لگے یارسول اللہ (صلی اللہ علیہ وآلہ وسلم) میں آپ کو قسم دیتا ہوں آپ نے فرمایا تم مجھے قسم مت دو ۔ امام طحاوی (رح) کہتے ہیں بعض لوگ اس طرف گئے ہیں کہ قسم مکروہ ہے اور کسی کو کسی چیز پر قسم نہ اٹھانی چاہیے انھوں نے قسم اٹھانے کو بہت بڑا قرار دیا ہے۔ امام لیث بن سعد ان لوگوں سے ہیں کہ جنہوں نے اس کو بہت بڑا قرار دیا ہمارے کئی احباب نے عیسیٰ بن حماد زغبہ سے روایت کی ہے کہ میں بکر بن مضر کے پاس آیا تاکہ میں ان کی عیادت کروں اس وقت اچانک لیث آگئے اور انھوں نے اس کے پاس جانے کا ارادہ کیا تو بکر نے ان سے کہا میں آپ کو قسم دیتا ہوں کہ آپ ایسا نہ کریں۔ لیث کہنے لگے کیا تم جانتے ہو کہ قسم کیا ہے ؟ یا قسم کی حقیقت جانتے ہو یا تم قسم کو جانتے ہو ؟ قسم میں کوئی حرج نہیں اور یہ یمین بنے گی اور اس کا حکم یمین والا ہوگا اللہ تعالیٰ نے قرآن مجید میں کئی مقامات پر اس کا تذکرہ فرمایا ہے۔ ” لااقسم بیوم القیامہ۔ ولا اقسم بالنفس اللوامہ “ (القیامہ ١۔ ٢) اور فرمایا ” ولا اقسم بمواقع النجوم “ (واقعہ : ٧٥) اور فرمایا : ” لااقسم بہذا البلد “ (البلد ١) ان ساری آیات کی تفسیر علماء کے ہاں یہ ہے کہ لا زائدہ ہے اور یہ اقسم بیوم القیامۃ ہے اور اللہ تعالیٰ نے فرمایا : ” واقسموا باللہ جہد ایمانہم لایبعث اللہ من یموت بلٰی وعدا علیہ حقًا “ (نحل ٣٨) اللہ تعالیٰ نے ان کی قسموں پر ان کو عیب نہیں لگایا یا البتہ ان کے کفر کی تردید فرمائی اور فرمایا کہ کیوں نہیں ہمارا وعدہ تو سچا ہے اور اللہ تعالیٰ نے جہد ایمانہم کا لفظ فرما کر اس بات کو ثابت کردیا کہ ان کی یہ قسم یمین ہے اور ایک اور آیت میں اللہ تعالیٰ نے فرمایا ” اذا قسموا لیصر منہا مصبحین “ (قلم ١٧) انھوں نے قسم اٹھائی وہ ضرور صبح سویرے اس باغ کو کاٹ لیں گے یعنی پھل توڑ لیں گے اللہ تعالیٰ نے ان کی اس قسم پر اعتراض نہیں کیا بلکہ فرمایا : ” ولا یستثنون “ کہ انھوں نے استثناء بھی نہیں کیا (تو اس سے ثابت ہوا کہ یہ قسم یمین ہے)
تخریج : بخاری کتاب الایمان باب ٩‘ والتعبیر باب ٤٧‘ مسلم فی الرؤیا ١٧‘ ابو داؤد فی الایمان باب ١٠‘ والسنۃ باب ٨‘ ترمذی فی الرؤیا باب ١٠‘ ابن ماجہ فی الرؤیا باب ١٠‘ دارمی فی النذور باب ٨‘ مسند احمد ١؍٢٣٦۔
بعض علماء کا قول یہ ہے کہ مکروہ ہے اور کسی کو کسی بھی چیز پر قسم نہ اٹھانی چاہیے۔ قسم اٹھانا بھاری چیز ہے۔
فریق ثانی کا مؤقف قسم میں حرج نہیں یہ یمین بنے گی۔

٦٦٨٠: محمد بن حسن کہتے ہیں کہ اس آیت میں دلیل ہے کہ قسم یمین ہے کیونکہ استثنیٰ یمین ہی میں ہوتا ہے جب اس کا یمین ہونا ثابت ہوگیا تو پھر ان سب مقامات پر اس کا جواز ثابت ہوا جہاں یمین درست ہے اور جن مقامات پر یمین مکروہ ہے وہاں یہ بھی مکروہ ہے ہمارے نزدیک فریق ثانی کے خلاف ابن عباس کی روایت میں کوئی دلیل نہیں کیونکہ یہ کہنا ممکن ہے کہ جناب رسول اللہ (صلی اللہ علیہ وآلہ وسلم) نے قسم کو ابوبکر صدیق کے لیے مکروہ قرار دیا ہو کہ وہ تعبیر جس کو بعض کو آپ نے درست فرمایا اور بعض کو خطا قرار دیا تو وحی کے اعتبار سے نہیں تھی بلکہ علم تعبیر کے لحاظ سے تھی جیسا کہ حاملہ عورت سے وطی کی ممانعت اس خطرے کے پیش نظر کہ اولاد کو نقصان پہنچے پھر آپ کو یہ اطلاع ملی کہ فارس اور روم کے لوگ اس طرح کرتے ہیں اور یہ چیز ان کی اولاد کو نقصان نہیں دیتی تو جس سے ڈرایا تھا اس کی آزادی دے دی جس طرح کہ تعبیر نحل یعنی کھجوروں کی پیوندکاری کے بارے میں آپ نے فرمایا کہ میرے خیال میں اس کام کا کچھ بھی فائدہ نہیں تو صحابہ کرام نے اس کو چھوڑ دیا اور اس سے نقصان ہوا تو آپ (صلی اللہ علیہ وآلہ وسلم) نے فرمایا میں تم جیسا انسان ہوں اور یہ گمان ہے جو میں نے کیا اور گمان کبھی درست نکلتا ہے اور کبھی خطا لیکن جو میں اس طرح کہوں کہ اللہ تعالیٰ نے یہ فرمایا ہے تو میں ہرگز اللہ تعالیٰ پر جھوٹ نہیں بول سکتا اسی طرح کی روایت ابو داؤد نے اقضیہ باب ٧ میں ذکر کی ہے۔

٦٦٨١: سماک نے موسیٰ بن طلحہ اور انھوں نے اپنے والد سے روایت کی ہے۔ پس جناب رسول اللہ (صلی اللہ علیہ وآلہ وسلم) نے اس میں یہ بتلا دیا کہ جو کچھ میں گمان کی جانب سے کہوں تو وہ گمان میں عام انسانوں کی طرح ہے اور جو آپ اللہ تعالیٰ کی طرف سے فرمائیں تو وہ وحی ہے جس کی مخالفت جائز نہیں اور خواب کی تعبیر تو گمان اور تحری سے کی جاتی ہے اور یہ بات محمد ابن سیرین نے اس آیت ” وقال للذی ظن انہ ناج منہما “ (یوسف ٤٢) کو دلیل بنا کر فرمائی ہے۔ جب کہ تعبیر ایسی جہت سے ہے جس میں قطعی بات نہیں ہوتی تو اسی لحاظ سے جناب رسول اللہ (صلی اللہ علیہ وآلہ وسلم) نے صدیق اکبر کے اس پر قسم اٹھانے کو ناپسند کیا کہ آپ نے جس کو درست قرار دیا ہے اس کی ضرور اطلاع دیں اس طور پر کہ آپ کے ہاں اسی طرح ہے اور ہوسکتا ہے کہ حقیقت میں اس کے خلاف ہو کیا تم دیکھتے ہو کہ ایک آدمی نے فقہ کے ایک مسئلے کے بارے میں غور کیا اور پھر اجتہاد کیا اس کے اجتہاد نے اس کو ایک چیز تک پہنچایا تو اس کو اس بات کی گنجائش ہے کہ وہ اپنے اجتہاد کے مطابق بات کہے اور اس کے خلاف قول کو رد کر دے اور اس کے کہنے والے کو غلط قرار دے جبکہ دلائل جن کے ذریعے اس نے یہ مسئلہ نکالا ہے وہ مخالف کے قول کی تردید کر رہے ہیں اگر یہ آدمی اس جواب کے صحیح ہونے پر قسم اٹھائے تو وہ غلطی پر ہوگا اس لیے کہ اس کو صحیح تک پہنچنے کا مکلف نہیں بنایا گیا پس جو کچھ اس نے کہا ہے وہی درست ہوگا کیونکہ وہ اجتہاد کا مکلف بنایا گیا ہے اور یہ اجتہاد بسا اوقات اس کو درست اور بسا اوقات غیر درست کی طرف لے جائے گا پس اسی جہت کے لحاظ سے جناب رسول اللہ (صلی اللہ علیہ وآلہ وسلم) نے ابوبکر (رض) کے اس پر حلف اٹھانے کو ناپسند کیا اس لحاظ سے نہیں کہ آپ نے قسم کو ناپسند کیا اور ہم نے جو بات کہی ہے اس پر یہ روایات دلالت کرتی ہیں۔

٦٦٨٢: عبیداللہ بن عبداللہ نے اسحق بن حسین جیسی روایت نقل کی مگر اس کے اندر یہ بات زائد ہے : ” واللہ لتخبرنی بما اصبت مما اخطأت “ (اللہ کی قسم آپ مجھے ضرور بتلائیں جو میں نے اس میں سے درست کہا اور جو نادرست کہا) تو جناب رسول اللہ (صلی اللہ علیہ وآلہ وسلم) نے فرمایا قسم مت اٹھاؤ۔ اس سے یہ دلالت مل گئی کہ جناب رسول اللہ (صلی اللہ علیہ وآلہ وسلم) نے جس کو ناپسند کیا وہ آپ (صلی اللہ علیہ وآلہ وسلم) کی درست اور نادرست کی اطلاع پر جو قسم اٹھائی وہ تھی اس لیے جناب رسول اللہ (صلی اللہ علیہ وآلہ وسلم) نے وحی کے ذریعے تعبیر نہیں فرمائی تھی جس سے چیزوں کی حقیقت معلوم ہوتی ہے آپ (صلی اللہ علیہ وآلہ وسلم) نے اس لیے ناپسندیدگی نہیں فرمائی کہ انھوں نے قسم کا ذکر کیا ہے۔
تخریج : ترمذی فی الرؤیا باب ١٠‘ مسند احمد ١؍٢٣٦۔

٦٦٨٣: عبدالرحمن بن حارث نے ابن عباس (رض) سے روایت کی ہے کہ قسم یمین ہے۔ یہ ابن عباس (رض) وہی ہیں جنہوں نے پہلی روایت نقل کی ہے یہاں وہ قسم کو یمین بتلا رہے ہیں اس میں اس بات کی دلیل ہے کہ حلف مباح ہے اور یہ عام قسموں کی طرح ہے اس سے یہ بات ثابت ہوگئی کہ حدیث اول کی جو ہم نے تاویل کی ہے وہ درست ہے اور دوسری تاویل صحیح نہیں۔ امام طحاوی (رح) فرماتے ہیں : اباحت قسم کی اور روایات بھی ہیں ان میں سے چند یہ ہیں۔
تخریج : دارمی فی النذور باب ٨۔

٦٦٨٤: معاویہ بن سوید نے حضرت براء بن عازب (رض) سے نقل کیا کہ جناب رسول اللہ (صلی اللہ علیہ وآلہ وسلم) نے ہمیں قسم پورا کرنے کا حکم دیا۔
تخریج : بخاری فی الجنائز باب ٢‘ والایمان باب ٩‘ مسلم فی اللباس روایت ٣‘ ترمذی فی الادب باب ٤٥‘ نسائی فی الجنائز باب ٥٣‘ ابن ماجہ فی الکفارات باب ١٢ مسند احمد ٤؍٢٨٤۔

٦٦٨٥: ابو داؤد اور وہب دونوں نے شعبہ سے روایت کی ہے اور اس نے اپنی سند سے روایت نقل کی اور اس نے ابرار القسم کے لفظ بھی ذکر کئے ہیں۔ غور فرمائیں کہ جناب رسول اللہ (صلی اللہ علیہ وآلہ وسلم) نے قسم کے پورا کرنے کا حکم دیا اگر قسم اٹھانے والا نافرمان ہو تو پھر اسے قسم کا پورا کرنا مناسب نہیں یعنی گناہ کی قسم۔

٦٦٨٦: حمیدالطویل نے حضرت انس (رض) سے نقل کیا ہے کہ جناب رسول اللہ (صلی اللہ علیہ وآلہ وسلم) نے فرمایا بیشک اللہ کے بندوں میں سے کچھ ایسے ہیں اگر وہ اللہ تعالیٰ کے نام کی قسم اٹھالیں تو اللہ تعالیٰ ان کی قسم پوری کردیتے ہیں۔ اگر قسم مکروہ ہوتی تو اس کا کہنے والا ہی گناہ گار تھا اللہ تعالیٰ اس کی قسم کو پورا نہ کرتے ہم پہلے ذکر کر آئے کہ حضرت مغیرہ ابن شعبہ نے نقل کیا کہ میں نے جناب رسول اللہ (صلی اللہ علیہ وآلہ وسلم) کے ساتھ نماز پڑھی آپ کو لہسن کی بو محسوس ہوئی جب آپ نماز سے فارغ ہوئے تو فرمایا جو آدمی اس پودے کو کھائے تو وہ ہماری مسجد کے اس وقت تک قریب نہ آئے جب تک اس کی بو دور نہ ہو چنانچہ میں آپ کی خدمت میں آیا اور میں نے کہا یارسول اللہ (صلی اللہ علیہ وآلہ وسلم) میں آپ کو قسم دیتا ہوں کہ آپ مجھے اپنا ہاتھ پکڑائیں آپ نے اپنا ہاتھ پکڑا دیا تو میں نے آپ کو اپنے سینے کے زخم دکھائے تو آپ نے فرمایا تم معذور ہو۔ آپ (صلی اللہ علیہ وآلہ وسلم) نے مغیرہ کی قسم اٹھانے پر اعتراض نہیں فرمایا۔
تخریج : بخاری فی الصلح باب ٨‘ والایمان باب ٩‘ مسلم فی القسامہ حدیث ٢٤‘ ابو داؤد فی الدیات باب ٢٨‘ ترمذی فی جہنم باب ١٣‘ مسند احمد ٣؍١٢٨‘ ٤؍٣٠٦۔

٦٦٨٧: عمرہ نے حضرت عائشہ (رض) سے نقل کیا کہ جناب رسول اللہ (صلی اللہ علیہ وآلہ وسلم) کو گوشت کا تحفہ بھیجا گیا تو آپ نے فرمایا یہ زینب بنت جحش کو دے دو میں نے ان کے پاس بھیجا تو انھوں نے واپس کردیا تو آپ (صلی اللہ علیہ وآلہ وسلم) نے فرمایا کہ میں تمہیں قسم دیتا ہوں کہ تم اس کو واپس بھیجو تو میں نے واپس بھیج دیا۔ ان روایات سے ثابت ہوگیا کہ قسم مباح ہے اور اس کا حکم یمین والا ہے یہی امام ابوحنیفہ ‘ ابو یوسف اور محمد رحمہم اللہ کا قول ہے۔
ابراہیم نخعی (رض) کے قول سے اس کی تائید :

٦٦٨٨: حماد نے ابراہیم سے نقل کیا کہ اقسم اور اقسمت بہ کے الفاظ یمین ہیں اور ان پر قسم والا کفارہ ہے اور جناب رسول اللہ (صلی اللہ علیہ وآلہ وسلم) نے بھی اپنی بیویوں کے متعلق قسم اٹھائی تھی چنانچہ روایت یہ ہے۔

٦٦٨٩: ابی عمرہ نے حضرت عائشہ (رض) سے نقل کیا کہ جناب رسول اللہ (صلی اللہ علیہ وآلہ وسلم) کا ایلاء یہ تھا ” اقسم با اللہ لا اقربکن شہرا “ اللہ کی قسم ایک ماہ تک میں تمہارے قریب نہ جاؤں گا۔