Ibn Abi Shaybah

(٢٤٧٥٨) حضرت ہارون بن ابی ابراہیم ، حضرت عبداللہ بن عمیر کے بارے میں روایت کرتے ہیں کہ کسی آدمی نے ان سے خرگوش کے بارے میں سوال کیا ؟ تو انھوں نے جواب دیا۔ اس میں کوئی حرج نہیں ہے۔ سائل نے پوچھا۔ اس کو حیض آتا ہے۔ آپ نے فرمایا : جس کو اس کے حیض کا پتہ ہے اس کو اس کے طہر کا بھی پتہ ہے۔ یہ تو حاملہ ہونے والیوں میں سے ایک حاملہ ہے۔

(٢٤٧٥٩) حضرت ہشام بن زید بن انس، حضرت انس کے بارے میں روایت کرتے ہیں۔ کہتے ہیں کہ میں نے انھیں یہ کہتے سُنا۔ ہم نے مرا الظہران کے مقام پر ایک خرگوش کو بدکا کر باہر نکالا۔ پس اس کے پیچھے بچے دوڑ پڑے یہاں تک کہ بچے بہت تھک گئے پھر میں نے اس کو (خرگوش کو) پکڑ لیا اور میں اس کو لے کر حضرت ابو طلحہ کے پاس گیا پس انھوں نے اس کو ذبح کردیا۔ اور پھر اس کی سرین دے کر مجھے آپ (صلی اللہ علیہ وآلہ وسلم) کی خدمت میں بھیجا۔ آپ (صلی اللہ علیہ وآلہ وسلم) نے اس کو قبول فرما لیا۔ بخاری ٢٥٧٢۔ مسلم ٥٣

(٢٤٧٦٠) حضرت موسیٰ بن طلحہ سے روایت ہے کہ ایک آدمی نے حضرت عمر سے خرگوش کے متعلق سوال کیا ؟ تو حضرت عمر نے جواباً ارشاد فرمایا۔ اگر مجھے یہ بات ناپسند نہ ہوتی کہ مجھ سے حدیث (بیان کرنے) میں کمی یا زیادتی ہوجائے گی۔ (تو میں خود بیان کرتا) لیکن میں تمہارے لیے عنقریب ایک آدمی کی طرف قاصد روانہ کروں گا۔ چنانچہ آپ نے حضرت عمار کی طرف قاصد بھیجا ۔ پس وہ تشریف لائے ۔ تو انھوں نے فرمایا۔ ہم جناب نبی کریم (صلی اللہ علیہ وآلہ وسلم) کے ہمراہ تھے۔ پس ہم ایسی ایسی جگہ پر اترے ۔ حضرت عمار نے کہا۔ ایک دیہاتی نے آپ (صلی اللہ علیہ وآلہ وسلم) کو ایک خرگوش ہدیۃً بھیجا۔ پس ہم نے اس کو کھایا۔ دیہاتی نے کہا۔ میں نے خون دیکھا ہے۔ تو اس پر نبی کریم (صلی اللہ علیہ وآلہ وسلم) نے فرمایا : ” کوئی حرج نہیں ہے۔ “

(٢٤٧٦١) حضرت سعید بن مسیب، حضرت سعد کے بارے میں روایت کرتے ہیں کہ انھوں نے خرگوش کھایا تھا۔ راوی کہتے ہیں کہ میں نے حضرت سعید سے پوچھا۔ آپ اس کے بارے میں کیا کہتے ہیں۔ انھوں نے فرمایا : میں بھی اس کو کھاتا ہوں۔

(٢٤٧٦٢) حضرت عبید بن سعد سے روایت ہے کہ حضرت بلال نے ایک خرگوش کو لاٹھی سے مارا اور اس کے پاؤں توڑ ڈالے پھر آپ نے اس کو ذبح کر کے کھالیا۔

(٢٤٧٦٣) حضرت ہشام، حضرت حسن کے بارے میں روایت کرتے ہیں کہ وہ خرگوش کھانے میں کوئی حرج نہیں دیکھتے تھے۔

(٢٤٧٦٤) حضرت طاؤس ، اپنے والد سے روایت کرتے ہیں کہ انھوں نے فرمایا۔ خرگوش حلال ہے۔

(٢٤٧٦٥) حضرت ابو الوسیم سے روایت ہے۔ وہ کہتے ہیں کہ میں نے حضرت حسن بن حسن بن علی سے خرگوش کے بارے میں سوال کیا ؟ تو انھوں نے فرمایا : میں اس کو ناپسند کرتا ہوں اور اس کو مسلمانوں پر حرام نہیں کرتا۔

(٢٤٧٦٦) حضرت محمد بن صیفی سے روایت ہے۔ وہ کہتے ہیں کہ میں جناب نبی کریم (صلی اللہ علیہ وآلہ وسلم) کی خدمت میں وہ دو خرگوش لے کر حاضر ہوا جنہیں میں نے مقام مروہ میں ذبح کیا تھا تو آپ (صلی اللہ علیہ وآلہ وسلم) نے مجھے ان دونوں کو کھانے کا حکم فرمایا۔

(٢٤٧٦٧) حضرت محمد بن صفوان ، جناب نبی کریم (صلی اللہ علیہ وآلہ وسلم) سے حضرت ابو الاحوص کی حدیث کی مثل ہی روایت کرتے ہیں۔