Ibn Abi Shaybah

(١) حضرت انس بن مالک فرماتے ہیں کہ نبی کریم بیت الخلاء میں داخل ہونے سے پہلے یہ دعا پڑھتے : ” میں نر اور مادہ شیاطین سے اللہ کی پناہ چاہتا ہوں “

(٢) حضرت زید بن ارقم سے روایت ہے، نبی کریم (صلی اللہ علیہ وآلہ وسلم) نے ارشاد فرمایا ” زمین کے حشرات ادھر ادھر موجود رہتے ہیں، اس لیے جب تم میں سے کوئی بیت الخلاء میں داخل ہونے لگے تو یہ دعا پڑھے : ” اے اللہ ! میں نر اور مادہ شیاطین سے تیری پناہ مانگتا ہوں۔ “

(٣) حضرت عبداللہ بن مسعود فرماتے ہیں کہ جب تم میں سے کوئی بیت الخلاء میں داخل ہو اور ستر کھولنے لگے تو یہ دعا پڑھے : ” اے اللہ ! میں گندگی وناپا کی، نر اور مادہ شیاطین اور شیطان مردود سے تیری پناہ مانگتا ہوں “

(٤) حضرت ضحاک فرماتے ہیں کہ حضرت حذیفہ جب بیت الخلاء میں داخل ہونے لگتے تو یہ دعا پڑھتے : ” میں گندگی وناپا کی، بد باطن اور بدباطنی سکھانے اور شیطان مردود سے اللہ کی پناہ چاہتا ہوں “

(٥) حضرت انس فرماتے ہیں کہ نبی کریم (صلی اللہ علیہ وآلہ وسلم) جب بیت الخلاء میں داخل ہونے لگتے تو یہ دعا پڑھتے :” اللہ کے نام کے ساتھ، اے اللہ ! میں نر اور مادہ شیاطین سے تیری پناہ چاہتا ہوں۔ “

(٦) حضرت ضحاک بن مزاحم فرماتے ہیں کہ جب تم بیت الخلاء میں داخل ہونا چاہو تو یہ دعا پڑھو : اے اللہ ! میں گندگی ناپاکی، بدباطن، وسوسہ ڈالنے والے شیطان مردود سے تیری پناہ چاہتا ہوں۔

(٧) حضرت عائشہ فرماتی ہیں کہ نبی کریم (صلی اللہ علیہ وآلہ وسلم) جب بیت الخلاء سے باہر تشریف لاتے تو یہ فرماتے :” اے اللہ ! میں تجھ سے بخشش کا سوال کرتا ہوں “

(٨) حضرت ابراہیم تیمی فرماتے ہیں کہ حضرت نوح جب بیت الخلاء سے باہر تشریف لاتے تو یہ دعا پڑھتے :” تمام تعریفیں اس اللہ کے لیے ہیں جس نے مجھ سے تکلیف دہ چیز کو دور کردیا اور مجھے عافیت عطا فرمائی “

(٩) حضرت عوام فرماتے ہیں کہ حضرت نوح فرمایا کرتے تھے :” تمام تعریفیں اس اللہ کے لیے ہیں جس نے مجھے کھانے کی لذت عطا کی، اس کے مفید حصے کو مجھ میں باقی چھوڑا اور اس کے نقصان دہ جزو کو مجھ سے دور کردیا۔ “

(١٠) حضرت ابوعلی فرماتے ہیں کہ حضرت ابو ذر غفاری جب بیت الخلاء سے باہر تشریف لاتے تو یہ دعا پڑھتے :” تمام تعریفیں اس اللہ کے لیے ہیں جس نے مجھ سے تکلیف دہ چیز کو دور کردیا اور مجھے عافیت عطا فرمائی “