Ibn Abi Shaybah

(٣١٦٧٩) ابو الأحوص فرماتے ہیں کہ حضرت عبداللہ بن مسعود (رض) نے ارشاد فرمایا : جس شخص نے قرآن کی تعلیم حاصل کی اس کو چاہیے کہ علم الفرائض کی تعلیم بھی حاصل کرلے اور اس آدمی کی طرح نہ ہوجائے جس کو ایک دیہاتی ملا اور اس سے پوچھا : اے اللہ کے بندے ! کیا آپ مہاجر ہیں ؟ اس نے کہا : جی ہاں ! اس نے پوچھا : میری اہلیہ فوت ہوگئی ہے اور اتنا اتنا مال چھوڑ گئی ہے، سو اگر اس کو معلوم ہوا تب تو وہ اللہ تعالیٰ کا عطا کیا ہوا علم ہے، اور اگر اس معلوم نہ ہوا تو وہ دیہاتی کہنے لگا کہ اے مہاجرین کی جماعت ! تمہیں ہم پر کس بات میں برتری حاصل ہے ؟

(٣١٦٨٠) حضرت عبداللہ (رض) سے ایک دوسری سند سے بھی یہی بات منقول ہے۔

(٣١٦٨١) ابراہیم فرماتے ہیں کہ حضرت عمر (رض) نے ارشاد فرمایا : علم میراث کو حاصل کرو کیونکہ میراث تمہارے دین کا حصّہ ہے۔

(٣١٦٨٢) صالح ابو الخلیل سے روایت ہے کہ حضرت ابو موسیٰ (رض) نے فرمایا : اس آدمی کی مثال جو قرآن پڑھتا ہے اور میراث کے علم کو نہیں جانتا ایسے ہے جیسے کسی کے دو ہاتھ ہوں لیکن سر نہ ہو۔

(٣١٦٨٣) عبداللہ بن قیس سے روایت ہے کہ حضرت ابن عباس (رض) نے فرمایا : جس آدمی نے سورة نساء پڑھی اور اس کو معلوم ہوجائے کہ کون سی چیزیں میراث میں رکاوٹ بنتی ہیں اور کون سی چیزیں رکاوٹ نہیں بنتیں تو اس شخص کو میراث کا علم حاصل ہوگیا۔

(٣١٦٨٤) مسلم سے روایت ہے کہ حضرت مسروق سے پوچھا گیا کہ کیا حضرت عائشہ (رض) میراث کا علم جانتی تھیں ؟ فرمانے لگے کہ قسم ہے اس ذات کی جس کے قبضے میں میری جان ہے میں نے بڑے مشائخِ صحابہ کو دیکھا ہے کہ ان سے میراث کے بارے میں سوالات کیا کرتے تھے۔

(٣١٦٨٥) ہشام سے روایت ہے کہ ان کے والد ماجد نے فرمایا کہ میں نے کسی کو حضرت عائشہ (رض) سے زیادہ میراث ، فقہ اور شعر کا علم رکھنے والا نہیں پایا۔

(٣١٦٨٦) علی بن رباح سے روایت ہے کہ حضرت عمر (رض) نے لوگوں کو مقام جابیہ میں خطبہ دیا ، حمدوثنا کے بعد ارشاد فرمایا : جو قرآن کے بارے میں سوال کرنا چاہے وہ ابی بن کعب کے پاس آئے ، اور جو علم الفرائض ( علم المیراث) کے بارے میں سوال کرنا چاہے وہ زید بن ثابت کے پاس آئے۔

(٣١٦٨٧) قاسم بن عبد الرحمن فرماتے ہیں کہ حضرت عبداللہ (رض) نے فرمایا : قرآن اور میراث کا علم کو حاصل کرو، کیونکہ وہ وقت قریب ہے کہ آدمی اس علم کا محتاج ہوجائے گا جس کو وہ جانتا تھا، یا ایسی قوم میں رہ جائے گا جو اس کو نہیں جانتے۔

(٣١٦٨٨) حضرت سلیمان بن موسیٰ سے روایت ہے کہ رسول اللہ (صلی اللہ علیہ وآلہ وسلم) نے ارشاد فرمایا : جس شخص نے اس میراث کی خلاف ورزی کی جس کو اللہ تبارک و تعالیٰ نے اپنی کتاب میں فرض فرمایا ہے تو اللہ تبارک و تعالیٰ جنت میں اس کی وراثت کو ختم فرما دیں گے۔