Ibn Abi Shaybah

(٣١٣٥٩) شرحبیل بن مسلم فرماتے ہیں کہ میں نے حضرت ابو امامہ باھلی (رض) کو یہ فرماتے سنا کہ میں نے رسول اللہ (صلی اللہ علیہ وآلہ وسلم) کو حجّۃ الوداع کے خطبے میں یہ فرماتے سنا : بیشک اللہ تعالیٰ نے حق دار کو اس کا حق دے دیا ہے، پس کسی وارث کے لیے کوئی وصیت معتبر نہیں۔

(٣١٣٦٠) عمرو بن خارجہ نبی کریم (صلی اللہ علیہ وآلہ وسلم) سے روایت کرتے ہیں کہ آپ نے فرمایا : کسی وارث کے لیے وصیت معتبر نہیں۔

(٣١٣٦١) حضرت حارث حضرت علی (رض) سے روایت کرتے ہیں کہ آپ نے فرمایا : کسی وارث کے لیے وصیت کا کوئی اعتبار نہیں۔

(٣١٣٦٢) عبداللہ بن بدر روایت کرتے ہیں کہ ایک آدمی نے عبداللہ بن عمر (رض) سے سوال کیا کہ اے ابن عمر ! آپ کی وارث کے لیے وصیت کرنے کے بارے میں کیا رائے ہے ؟ آپ نے اس کو ڈانٹا اور فرمایا : کیا تمہارا خارجیوں سے تعلق ہے ؟ کسی وارث کے لیے وصیت کرنا جائز نہیں۔

(٣١٣٦٣) ہشام روایت کرتے ہیں کہ حسن بصری اور محمد بن سیرین نے فرمایا : کسی وارث کے لیے وصیت معتبر نہیں مگر اس وقت جبکہ تمام ورثاء چاہیں۔

(٣١٣٦٤) ابو مسکین روایت کرتے ہیں کہ سعید بن جبیر (رض) نے فرمایا : کسی وارث کے لیے وصیت معتبر نہیں۔

(٣١٣٦٥) ابراہیم فرماتے ہیں کہ جب کوئی آدمی کسی وارث کے لیے وصیت کرے اور اس کے مرنے سے پہلے اس کے ورثاء اس کی اجازرت دے دیں پھر اس کے مرنے کے بعد اپنے فیصلے سے رجوع کرلیں تو ان کو اس کا اختیار ہے، اور اگر کسی غیر وارث شخص کے لیے ایک تہائی سے زیادہ مال کی وصیت کی گئی ہو تب بھی ایسا ہی ہے، اور اگر کسی نے غیر وارث کے لیے ایک تہائی سے کم کی وصیت کی ہو تو وہ نافذ ہوجاتی ہے۔

(٣١٣٦٦) حضرت شریح فرماتے ہیں کہ جب کوئی آدمی اپنے ورثاء سے وصیت کی اجازت مانگ کر ایک تہائی سے زائد مال کی وصیت کر دے اور وہ رضا مندی کا اظہار بھی کردیں تو اس آدمی کے مرنے کے بعد ان ورثاء کو نئے سرے سے اس وصیت کو نافذ کرنے یا نہ کرنے کا اختیار حاصل ہوجاتا ہے۔

(٣١٣٦٧) صالح بن مسلم فرماتے ہیں کہ میں نے شعبی سے ایسی وصیت کے بارے میں پوچھا تو انھوں نے فرمایا : ان کو نئے سرے سے اختیار مل جائے گا۔

(٣١٣٦٨) ابن طاؤس اپنے والد سے روایت کرتے ہیں ایسے ورثاء اگر چاہیں تو اپنے فیصلے سے رجوع کرسکتے ہیں۔