Kanz al-Ummal

١٧٤٧۔۔ اللہ تعالیٰ کے کچھ فرشتے اعمال نامہ لکھنے کے سوا زمین میں گھومتے پھرتے ہیں، وہ اہل ذکر کو تلاش کرتے ہیں، جب وہ ایسی قوم کو جو ذکراللہ میں مشغول ہوپالیتے ہیں تو آپس میں پکارتے ہیں آؤ تمہارا مقصود مل گیا، پھر وہ انک واپنے پروں سے ڈھانپ لیتے ہیں اور ایک دوسرے کے اوپرصف بندی کرتے ہوئے آسمان تک جاپہنچتے ہیں۔ پھر فرشتے ختم مجلس پر بارگاہ الٰہی میں حاضر ہوتے ہیں تو اللہ ان سے سوال کرتے ہیں حالانکہ وہ اپنے بندوں کے احوال کو بخوبی جانتا ہے، کہ بتاؤ میرے بندے کیا کہہ رہے تھے ؟ فرشتے عرض کرتے ہیں تیری تسبیح وتمجید اور تکبیر وتحمید کررہے تھے اللہ پاک فرماتے ہیں کہ کیا انھوں نے مجھے دیکھا ہے ؟ عرض کرتے ہیں نہیں اللہ کی قسم دیکھاتو نہیں۔ ارشاد ہوتا ہے اگر دیکھ لیتے تو ان کا کیا حال ہوتا ؟ عرض کرتے ہیں تیری عبادت میں اور زیادہ منہمک ہوجاتے اور خوب تیری بڑائی بیان کرتے اور تیری تسبیح کثرت سے کرتے۔ ارشاد ہوتا ہے وہ مجھ سے کیا مانگ رہے تھے عرض کرتے ہیں وہ آپ سے جنت کے طلب گار تھے ارشاد ہوتا ہے کیا انھوں نے جنت کو دیکھا ہے ؟ عرض کرتے ہیں نہیں اللہ کی قسم دیکھاتو نہیں ارشاد ہوتا ہے اگر دیکھ لیتے تو ان کا کیا حال ہوتا ؟ عرض کرتے ہیں اور زیادہ اس کی حرص کرتے اور شدت سے اس کی طلب میں لگ جاتے ارشاد ہوتا ہے وہ کس چیز سے پناہ مانگ رہے تھے ؟ عرض کرتے ہیں جہنم سے پناہ مانگ رہے تھے ارشاد ہوتا ہے کیا انھوں نے جہنم کو دیکھا ہے ؟ عرض کرتے ہیں نہیں اللہ کی قسم دیکھاتو نہیں ارشاد ہوتا ہے اگر دیکھ لیتے تو ان کا کیا حال ہوتا ؟ عرض کرتے ہیں اور زیادہ اس سے دوربھاگتے اور مزید اس کا خوف ان میں پیدا ہوجاتا، ارشاد ہوتا ہے گواہ رہنا کہ میں نے ان سب کو مغفرت کردی ہے ایک فرشتہ عرض کرتا ہے کہ ایک شخص ان میں شامل نہیں تھا لیکن اپنی کسی حاجت سے ان کے پاس آیا تھا ؟ ارشاد ہوتا ہے یہ ایسی قوم ہے کہ ان کے پاس بیٹھنے والابھی محروم نہیں رہتا۔ مسنداحمد، بخاری و مسلم، بروایت ابوہریرہ (رض)۔

١٧٤٨۔۔ سب سے افضل ذکر، لاالہ الا اللہ ، ہے اور سب سے افضل دعا، الحمدللہ ہے۔ ترمذی، النسائی، ابن ماجہ، ابن حبان، المستدرک للحاکم، بروایت جابر (رض)۔

١٧٤٩۔۔ ذکراللہ کی نعمت ہے۔ اس کی توفیق میسر ہو تو اس پر اللہ کا شکرادا کرو، الفردوس للدیلمی (رح) بروایت نبی ط بن شریط۔

١٧٥٠۔۔ وہ ذکر جس کو نگہبان فرشتے بھی نہ سن سکیں اس ذکر پر جس کو وہ فرشتے سن سکیں ستردرجہ زیادہ فضیلت رکھتا ہے۔ شعب الایمان ، بروایت عائشہ (رض)۔

١٧٥١۔۔ اللہ کا ذکر دلوں کی شفاء ہے۔ الفردوس للدیلمی ، بروایت انس (رض)۔

١٧٥٢۔۔ اللہ کے نزدیک محبوب ترین عمل یہ ہے کہ تیری موت اس حال میں آئے کہ تیری زبان ذکراللہ میں تر ہو۔ صحیح ابن حبان، ابن السنی فی عمل الیوم واللیلہ، الکبیر للطبرنای ، الصحیح لابن حبان، بروایت معاذ ۔

١٧٥٣۔۔ اس کثرت کے ساتھ اللہ کا ذکر کرو، کہ لوگ تمہیں مجنون کہنے لگ جائیں۔ مسنداحمد، المسند لابی یعلی، الصحیح لابن حبان، المستدرک للحاکم، شعب الایمان، بروایت ابی سعید (رض) ۔

١٧٥٤۔۔ اس کثرت کے ساتھ اللہ کا ذکر کرو کہ منافق لوگ تمہیں کہنے لگیں کہ یہ ریاء کار لوگ ہیں۔ السنن لسعید، مسنداحمد فی الزھد، شعب الایمان ، بروایت ابی الجوزاء مرسلا۔

١٧٥٥۔۔ اللہ کا ذکر کرو یہ تمہارے مطلوب کام میں مددگار ہے۔ ابن عساکر۔ بروایت عطاء بن ابی مسلم مرسلا۔

١٧٥٦۔۔ اللہ کا ذکر یوں کرو کہ منافق لوگ تمہیں کہنے لگیں کہ یہ ریاء کار لوگ ہیں۔ الکبیر للطبرانی ، بروایت ابن عباس (رض)۔