Kanz al-Ummal

10477 ۔۔۔ فرمایا۔۔۔ تم پر تمہارے امیر کے ساتھ جہاد واجب ہے چاہے امیر نیک ہو یا فاجر اور اگرچہ وہ کبیرہ گناہوں میں مبتلا ہو، اور تم پر نماز واجب ہے ہر مسلمان کے پیچھے چاہے وہ نیک ہو یا برا، اور تم پر ہر مرنے والے مسلمان کی نماز جنازہ واجب ہے چاہے وہ مرنے والا نیک ہو یا فاجر ہو اگرچہ وہ کبیرہ گناہوں میں مبتلا ہو۔ (ابوداؤد، مسند ابی یعلی بروایت حضرت ابوھریرۃ )

10478 ۔۔۔ فرمایا۔۔۔ جنت تلواروں کے سائے تلے ہے۔ (مستدرک حاکم بروایت حضرت ابو موسیٰ (رض))

10479 ۔۔۔ فرمایا۔۔۔ بیشک جنت تلواروں کے سائے تلے ہے۔ مسلم ترمذی، بروایت حضرت ابو موسیٰ (رض))

10480 ۔۔۔ فرمایا۔۔۔ اگر کسی شخص پر بیوی اور اولاد کی ذمہ داری نہیں توا سے چاہیے جہاد میں لگ جائے۔ (طبرانی، کبیر بروایت حضرت محمد بن حاطب (رض))

10481 ۔۔۔ فرمایا ” جب مومن کا دل اللہ کے راستے میں لرزتا ہے تو اس کے گناہ ایسے جھڑتے ہیں جیسے کھجور کے خوشے درختوں سے جھڑتے ہیں “۔ (طبرانی کبیر حلیہ ابی نعیم بروایت حضرت سلمان (رض))

10482 ۔۔۔” جو شخص ایک شام اللہ کے راستے میں لگادے تو جس قدر غبار اس پر لگا ہے اس کے بقدر مشک اس کو قیامت کے دن ملے گی۔ (ابن ماجہ والضیاء بروایت حضرت انس (رض))

10483 ۔۔۔ فرمایا ” جو شخص اللہ کے راستے میں ایک تیر چلائے گویا اس نے ایک غلام کو آزاد کردیا “۔ (ترمذی مستدرک بروایت ابو تجیح)

10484 ۔۔۔ فرمایا ” جو شخص اللہ کے راستے میں دشمن پر ایک تیر چلائے اور اس کا تیر دشمن تک پہنچ جائے پھر چاہے اس کا تیر کام دکھائے یا نہ دکھائے اس کے لیے ایک غلام آزاد کرنے کا ثواب ہے “۔ (مسند احمد، نسائی ابن ماجہ، طبرانی کبیر ، مستدرک حاکم بروایت عمروبن عبسہ (رض))

10485 ۔۔۔ فرمایا ” جو شخص اللہ کے راستے میں اپنی تلوار سونتے تو گویا اس نے اللہ سے بیعت کرلی “۔ (ابن مردویہ بروایت حضرت ابوھریرۃ (رض))

10486 ۔۔۔ فرمایا ” اللہ کے راستے میں اگر کسی سر میں درد ہو اور وہ اس پر ثواب کی امید رکھے تو اس کے پچھلے گناہ معاف ہوجاتے ہیں “۔ (طبرانی کبیر بروایت حضرت ابن عمرو (رض))