Kanz al-Ummal

25803 ۔۔۔ جب تم نے بغیر پر کے تیر سے شکار کیا اور تیر نے شکار کو زخمی کردیا تم اسے کھا سکتے ہو اگر تیر چوڑائی کے بل شکار کر لگا ہے (اور شکار مرگیا ہے) اسے مت کھاؤ چونکہ وہ موقوذ کے حکم میں ہے۔ (رواہ مسلم والترمذی وابن ماجہ عن عدی بن حاتم) ۔ فائدہ : ۔۔۔ موقوذ اس جانور کو کہتے ہیں جو غیر دھار دار چیز سے مارا جائے خواہ وہ لکڑی ہو یا پتھر اور پھر اس جانور کو ذبح نہ کیا جائے ۔

25804 ۔۔۔ جب تم (اللہ کا نام لے کر کسی شکار پر) اپنا تیر چلاؤ اور پھر وہ (شکار تیر کھا کر) تمہاری نظروں سے اوجھل ہوجائے اور پھر وہ تمہارے ہاتھ لگ جائے تم اسے کھا سکتے ہو جب تک اس میں بدبو نہ پیدا ہوجائے ۔ (رواہ احمد بن حنبل ومسلم عن ابی ثعلبۃ)

25805 ۔۔۔ جب تم نے شکار کو (اللہ کا نام لے کر) تیر مارا اور پھر تم نے اسے تین راتیں گزرنے کے بعد پایا دراں حالیکہ تمہارا تیر شکار میں پیوست تھا تو شکار کھا سکتے ہو جب تک اس میں بدبو نہ پیدا ہوجائے ۔ (رواہ ابو داؤد عن ابی ثعلبۃ)

25806 ۔۔۔ جہاں تک تم نے اہل کتاب کے برتنوں کا ذکر کیا ہے سو اگر تمہیں ان برتنوں کے علاوہ اور برتن مل سکیں تو پھر ان کے برتنوں میں مت کھاؤ اور اگر دوسرے (متبادل) برتن نہ مل سکیں تو پھر اس کو اچھی طرح دھو کر ان میں کھالو اور رہی شکار کی بات تو جس جانور کو تم نے اپنے تیر سے شکار کیا ہے اور اللہ کا نام لیا ہے اسے کھالو اسی طرح جس جانور کو تم نے تربیت یافتہ کتے کے ذریعے شکار کیا ہے اور اللہ کا نام لیا ہے۔ (کتا چھوڑتے وقت) تو اس کو بھی کھالو، اور جو شکار تم نے غیر تربیت یافتہ کتے سے کیا پھر تم نے اسے اس حالت میں (زندہ) پایا کہ تم ہاتھ سے اسے ذبح کرلو تو وہ شکار کھا سکتے ہو ۔ (رواہ احمد بن حنبل والبخاری ومسلم وابن ماجہ عن ابی ثعلبۃ)

25807 ۔۔۔ جس شکار کو تیر دھار کی جانب سے لگا ہے (کہ شکار زخمی ہوگیا ہے) اسے کھالو اور جس شکار کو تیر چوڑائی کے بل لگا ہے پھر شکار مرگیا تو وہ موقوذہ کے حکم میں ہے اسے مت کھاؤ ۔ (رواہ البخاری ومسلم والترمذعن عدی بن حاتم) ۔ فائدہ : ۔۔۔ موقوذہ وہ جانور ہوتا ہے جو مہک ضرب لگنے سے مرجائے اور پھر ذبح اختیار نہ ہو سکے وہ حرام ہے۔

25808 ۔۔۔ (تربیت یافتہ کتا) جو شکار تمہارے پاس پکڑ کر لائے اسے کھالو ۔ (رواہ الترمذی عن عدی بن حاتم)

25809 ۔۔۔ تمہارے پاس جو سدھایا ہوا کتا یا باز ہے پھر تم نے اسے شکار پر چھوڑ دیا ہے اور اللہ تعالیٰ کا نام بھی لیا ہے تو کتا یا باز جو شکار تمہارے پاس پکڑ لائے وہ کھالو ۔ (رواہ ابو داؤد عن عدی بن حاتم)

25810 ۔۔۔ اے ابو ثعلبہ ! ہر وہ شکار جو تمہارے تیر کمان یا تربیت یافتہ کتے یا تمہارے ہاتھ سے تمہاری گرفت میں آجائے خواہ اسے ذبح کیا ہو یا نہ کیا ہو اسے کھالو ، (رواہ ابو داؤد عن ابی ثعلبۃ)

25811 ۔۔۔ جب تم نے اپنا تربیت یافتہ کتا چھوڑا اس نے شکار کو مار دیا وہ شکار کھالو اور اگر کتا شکار میں سے کھالے اسے مت کھاؤ چونکہ (درحقیقت) کتے نے شکار اپنے لیے پکڑا ہے اور اگر تم اپنے سدھائے ہوئے کتے کے ساتھ دوسرا کتا پاؤ تب بھی شکار مت کھاؤ چونکہ اللہ کا نام لے کر تم نے اپنا کتا چھوڑا ہے دوسرے کے کتے پر اللہ کا نام نہیں لیا ۔ (رواہ البخاری ومسلم عن عدی بن حاتم)

25812 ۔۔۔ جب تم شکار پر اپنے تربیت یافتہ کتے چھوڑو اور (چھوڑتے وقت ان پر) اللہ کا نام لے لو تو جو شکار کتے پکڑ کر لائیں وہ کھالو اگرچہ کتے شکار کو جان سے مار ہی کیوں نہ ڈالیں ہاں البتہ اگر کتے نے شکار میں سے کھالیا ہے تو مجھے خوف ہے کہ کتے نے شکار اپنے لیے پکڑا ہے (اس صورت میں شکار نہ کھاؤ) اگر تمہارے کتوں کے ساتھ اور کتے بھی مل گئے ہیں تب بھی شکار نہ کھاؤ چونکہ تمہیں معلوم نہیں کہ کس کتے نے شکار مارا ہے اگر تم نے شکار کو تیر مارا اور پھر شکار ایک یا دو دونوں کے بعد تمہارے ہاتھ لگے اور اس پر تمہارے تیر کے علاوہ کوئی نشان نہ ہو تم وہ شکار کھا سکتے ہو اگر شکار (تیر لگنے) کے بعد پانی میں جا پڑے اسے مت کھاؤ ۔ (رواہ البخاری ومسلم عن عدی بن حاتم)