28641 ۔۔۔ سیدنا حضرت عمر بن خطاب (رض) سے مروی ہے کہتے ہیں کہ جب کسی آدمی کے تحت (یعنی نکاح میں) چار بیویاں ہوں پھر وہ ان سے ظہار کرے تو اس کو ایک کفارہ کفایت کر جائے گا ۔ (مصنف عبدالرزاق، دارقطنی ، بخاری مسلم)

28642 ۔۔۔ قاسم بن محمد (رح) سے مروی ہے کہ ایک آدمی نے ایک عورت کو اس سے شادی کرنے کی شرط پر اپنی ماں کی پیٹھ کی طرح قرار دے دیا (یعنی یوں کہا کہ اگر تجھ سے نکاح کروں تو تو مجھ پر ایسے ہے جیسے میری ماں کی پشت چنانچہ سیدنا حضرت عمر بن خطاب (رض) نے کہا اگر اس سے نکاح کرے تو اس کے قریب نہ جائے جب تک کہ کفارہ ادا نہ کر دے ۔ (عبدالرزاق ، بخاری ، مسلم)

28643 ۔۔۔ سعید بن المسیب (رض) سے مروی ہے کہتے ہیں کہ ایک شخص کو سیدنا حضرت عمر بن خطاب (رض) کے پاس لایا گیا جس کی تین بیویاں تھیں اور اس نے یہ کہہ دیا تھا کہ تم مجھ پر ایسی ہو جیسی میری ماں کی پشت حضرت عمر (رض) نے فرمایا : اس پر ایک کفارہ ہے۔ (عبدالرزاق ، کامل لابن عدی بخاری و مسلم)

28644 ۔۔۔ مسند عمرو بن سلمہ، سلیمان بن یسار سے مروی ہے وہ سلمہ بن صحر البیاضی سے نقل کرتے ہیں کہ انھوں نے (یعنی سلمہ نے) اپنی بیوی کو اپنے اوپر ایسے قرار دے دیا جیسے ان کی ماں کی پشت (اور ظہار کی یہ قرار داد) رمضان کے گذرنے تک تھی ، پس وہ (اس عرصہ میں) موٹی تازی ہوگئی ، اور تروتازہ (یعنی فربہ) ہوگئی سو وہ اس پر نصف رمضان میں (ہی) جا پڑے پھر نبی کریم (صلی اللہ علیہ وآلہ وسلم) کے پاس آئے گویا کہ وہ اس عمل کو گراں محسوس کر رہے تھے سو نبی (صلی اللہ علیہ وآلہ وسلم) نے انھیں فرمایا : کیا تو طاقت رکھتا ہے اس کی کہ ایک غلام آزاد کرے ؟ انھوں نے کہا نہیں ! فرمایا کیا اس کی طاقت رکھتا ہے کہ دو مہینے متواتر روزے رکھے ؟ کہا نہیں ! فرمایا کہا پھر یہ کرسکتا ہے کہ ساٹھ مسکینوں کو کھانا کھلا دے ؟ کہا نہیں ! پس نبی کریم (صلی اللہ علیہ وآلہ وسلم) گویا ہوئے کہ اے فروہ بن عمرویہ فرق اس کو دیدے اور فرق ایک ٹوکرا ہے جس میں پندرہ 15 یا 16 سولہ صاع آتے ہیں پس یہ شخص ساٹھ مسکینوں کو یہ ٹوکرا کھلا دے ۔ وہ بولا کیا میں اپنے سے زیادہ محتاج پر صدقہ کروں ؟ پس قسم اس ذات کی جس نے آپ کو حق کے ساتھ مبعوث فرمایا اس شہر (مبارک) کی دونوں وادیوں کے درمیان کوئی شخص ہم سے زیادہ اس کا محتاج نہیں ۔ پس (اس بات کو سن کر) نبی کریم (صلی اللہ علیہ وآلہ وسلم) ہنس پڑے ۔ پھر فرمایا کہ اس کو اپنے گھر والوں کے پاس لے جا۔ (رواہ عبدالرزاق)

28645 ۔۔۔ یوسف بن عبداللہ بن سلام سے مروی ہے کہتے ہیں کہ مجھ کو خولہ بنت مالک ثعلبہ نے بیان کیا اور یہ (خولہ بنت مالک) عبادہ بن صامت (رض) کے بھائی اوس بن صامت (رض) کے تحت تھیں (یعنی نکاح میں تھیں) کہ اللہ کے رسول (صلی اللہ علیہ وآلہ وسلم) نے میرے شوہر کی جبکہ اس نے مجھ سے ظہار کیا تھا کھجور کے ایک ٹوکرے کے ساتھ اعانت فرمائی تھی اور دوسرے ٹوکرے کے ساتھ میں نے مدد کی تھی پس یہ ساٹھ صاع ہوئے تھے کہتی ہیں کہ پھر نبی کریم (صلی اللہ علیہ وآلہ وسلم) نے ارشاد فرمایا کہ اس کو صدقہ کر دے اور مجھ سے فرمایا کہ لوٹ جا اپنے چچا زاد کے پاس اور اس کے بارہ میں اللہ سے ڈرتی رہ ۔ (رواہ ابو نعیم)

28646 ۔۔۔ عبداللہ بن عباس (رض) سے مروی ہے کہ وہ قبل از نکاح ظہار کو اور قبل از نکاح طلاق کو کچھ نہیں سمجھتے تھے ۔ (رواہ عبدالرزاق)

28647 ۔۔۔ ابن المسیب (رض) تابعی سے مروی ہے کہ ایک آدمی نے اپنی بیوی سے ظہار کیا پھر کفارہ دینے سے قبل اس سے مل گیا تو نبی کریم (صلی اللہ علیہ وآلہ وسلم) نے اس کو ایک کفارہ کا حکم فرمایا ۔ (رواہ عبدالرزاق)

28648 ۔۔۔ عکرمہ (رض) سے جو ابن عباس (رض) کے مولی ہیں مروی ہے کہ انھوں نے کہا کہ ایک شخص نے ظہار کیا پھر کفارہ ادا کرنے سے پہلے اپنی بیوی سے جا ملا پھر اس نے اس بات کا نبی کریم (صلی اللہ علیہ وآلہ وسلم) سے ذکر کیا ۔ نبی کریم (صلی اللہ علیہ وآلہ وسلم) نے فرمایا اور تجھے اس عمل پر کس نے مجبور کیا ؟ اس نے کہا اللہ آپ پر رحم فرمائے اے اللہ کے رسول ! میں نے اس کے پازیب دیکھے یا یہ کہا کہ میں اس کی پنڈلیوں کو چاند کی روشنی میں دیکھ لیا تھا نبی کریم (صلی اللہ علیہ وآلہ وسلم) نے فرمایا کہ اس سے جدا رہ یہاں تکہ تو وہ کام ہی کرے جس کا اللہ نے تجھے حکم دیا ہے (رواہ عبدالرزاق)

28649 ۔۔۔ سیدنا حضرت علی المرتضی (رض) سے مروی ہے کہ جب ایک مجلس میں کئی بار ظہار کرے تو ایک کفارہ ہے اور اگر متعدد مجلسوں میں ظہار کیا تو متعدد کفارے ہیں اور ایمان (قسمیں) بھی اسی طرح ہیں۔ (رواہ عبدالرزاق)

28650 ۔۔۔ سیدنا حضرت علی المرتضی (رض) سے مروی ہے کہتے ہی کہ ایلاء ظہار میں داخل نہیں ہوتا اور نہ ظہار ایلاء میں داخل ہوتا ہے۔ (رواہ عبدالرزاق)