Kanz al-Ummal

27770 ۔۔۔ طلاق خاوند کے ہاتھ میں ہے۔ (رواہ الطبرانی عن ابن عباس (رض)) ۔ کلام : ۔۔۔ حدیث ضعیف ہے چونکہ اس کی سند میں فضل بن مختار ضعیف روای ہے ، دیکھئے مجمع الزوائد 3344 ۔

27771 ۔۔۔ ہر طلاق جائز ہے۔ (یعنی ہوجاتی ہے) سوائے اس شخص کی طلاق کے جس کی عقل مغلوب ہوگئی ہو۔ (رواہ الترمذی عن ابوہریرہ (رض)) ۔ کلام : ۔۔۔ حدیث ضعیف ہے دیکھئے ضعیف الترمذی 207 و ضعیف الجامع 4240 ۔

27772 ۔۔۔ آدمی کو اس طلاق کا اختیار نہیں جس کا وہ مالک نہیں (یعنی بیوی ایک کی ہو اسے طلاق دوسرا نہیں دے سکتا) آدمی جس غلام کا مالک نہ ہو اس کی آزادی کا اختیار بھی اسے حاصل نہیں اور جس چیز کا مالک نہ ہو اسے بیچ بھی نہیں سکتا ۔ (رواہ احمد بن حنبل والنسائی عن ابن عمرو (رض))

27773 ۔۔۔ جس شخص نے طلاق یا عتاق (آزادی) سے کھیل کود کی وہ ایسا ہی ہے جیسا اس نے کہا : (رواہ الطبرانی عن ابی الدرداء) ۔ فائدہ : ۔۔۔ یعنی اگر کسی شخص نے ازروئے مذاق بیوی کو طلاق دی یا غلام کو مذاقا آزادی دی تو عورت کو طلاق ہوجائے گی اور غلام آزاد ہوجائے گا ۔

27774 ۔۔۔ جب عورت دعوی کرے کہ اس کے شوہر نے اسے طلاق دی ہے اور اس پر شاہد عدل (سچا گواہ) بھی پیش کر دے تو شوہر سے حلف (قسم) لیا جائے گا اگر خاوند کی طلاق ہوجائے گی ۔ (رواہ ابن ماجہ عن ابن عمرو (رض)) ۔ کلام : ۔۔۔ حدیث ضعیف ہے دیکھئے ضعیف ابن ماجہ 243 و ضعیف الجامع 310 لیکن زوائد میں ہے کہ حدیث کی اسناد صحیح ہے اور اس کے رجال ثقات ہیں۔

27775 ۔۔۔ اسے (ابن عمر کو) چاہیے اپنی بیوی سے رجوع کرے پھر اسے اپنے پاس رکھے یہاں تک کہ پاک ہوجائے پھر حیض آئے اس کے بعد پاک ہو پھر اگر طلاق دینا چاہے تو طلاق دے دے بشرطیکہ اس پاکی (طہر) میں جماع نہ کیا ہو پس طریقہ ہے جس کا اللہ تعالیٰ نے مرد کو عورتوں کو طلاق دینے کا حکم دیا ہے۔ (رواہ البخاری ومسلم وابو داؤد والنسائی وابن ماجہ عن ابن عمر (رض))

27776 ۔۔۔ جس شخص نے بدعت کے لیے طلاق دی ہم اس کی بدعت کو اس کے سپرد کردیں گے ۔ (رواہ البیہقی فی السنن عن معاذ) ۔ کلام : ۔۔۔ حدیث ضعیف ہے اللطیفۃ 29 ۔

27777 ۔۔۔ لوگوں کو کیا ہوا جو اللہ تبارک وتعالیٰ کی مقرر کردہ حدود کے ساتھ کھیلتے رہتے ہیں ، چنانچہ کوئی کہتا ہے : میں نے تجھے طلاق دے دی میں ن ے تجھ سے رجوع کرلیا میں نے تجھے طلاق دے دی میں نے تجھ سے رجوع کرلیا ۔ (رواہ ابن ماجہ والبیہقی فی السنن عن ابی موسیٰ)

27778 ۔۔۔ نکاح سے پہلے طلاق نہیں ہوتی ۔ (رواہ ابن ماجہ عن علی والحاکم عن جابر) ۔ کلام : ۔۔۔ حدیث ضعیف ہے المتناھیۃ 1062 ۔

27779 ۔۔۔ طلاق نہیں ہوتی مگر ملکیت میں ، آزادی نہیں ہوتی مگر ملکیت میں ، فروخت اسی چیز کو کرسکتے ہو جس کے تم مالک ہو ۔ اسی چیز کی نذر پوری کرسکتے ہو جس کے تم مالک ہو نذر وہی ہوتی ہے جس سے رب تعالیٰ کی رضا جوئی مطلوب ہو جس نے معصیت پر قسم کھائی اس کی قسم کا کوئی اعتبار نہیں جس نے قطع رحمی پر قسم اٹھائی اس کی قسم نہیں ہوتی ۔ (رواہ ابو داؤد والحاکم عن ابن عمرو (رض))