Kanz al-Ummal

17730 ۔۔۔ اے (لوگو ! ) کیا میں تم کو اچھے گواہ کی خبر نہ بتاؤں ؟ وہ شخص جو اپنی شہادت خود پیش کر دے قبل اس سے کہ اس سے شہادت کا مطالبہ کیا جائے ۔ (مؤطا امام مالک (رح) ، مسند احمد ، ابو داؤد مسلم ، ترمذی ، عن زید بن خالد الجھنی)

17731 ۔۔۔ بہترین شہادت وہ ہے جس کا مطالبہ کیا جانے سے قبل وہ شہادت (گواہی) پیش کردی جائے (الکبیر للطبرانی عن زید بن خالد الجھنی)

17732 ۔۔۔ سب سے اچھا شاہد (گواہ) وہ شخص ہے جو اپنی شہادت خود پیش کر دے قبل اس سے کہ اس سے اس کا مطالبہ کیا جائے (ابن ماجہ عن زید بن خالد)

17733 ۔۔۔ گواہوں کا اکرام کرو ۔ اللہ تبارک وتعالیٰ ان کے ذریعے (اہل حقوق کے) حقوق ادا کرواتے ہیں اور ان کے طفیل ظلم کو دفع کرتے ہیں۔ (البانیاسی فی جزنہ ، الخطیب فی التاریخ ، ابن عساکر عن ابن عباس (رض))
کلام : ۔۔۔ علامہ مناوی (رح) فیض القدیر میں فرماتے ہیں اس روایت میں عبداللہ بن موسیٰ متفرد ہیں ، اور ان کو محدثین نے ضعیف قرار دیا ہے۔ (فیض القدیر 3 ۔ 94)

17734 ۔۔۔ میں ظلم پر شاہد نہیں بن سکتا ۔ (بخاری ۔ مسلم ، نسائی ، عن النعمان (رض) بن بشیر)
فائدہ : ۔۔۔ ایک صحابی حضور اکرم (صلی اللہ علیہ وآلہ وسلم) کی خدمت میں حاضر ہوئے اور عرض کیا کہ میری بیوی کی خواہش ہے کہ میں اس کی اولاد کو باغ ہبہ کروں اور آپ اس پر گواہ بن جائیں ۔ آپ (صلی اللہ علیہ وآلہ وسلم) نے اس سے دریافت فرمایا کیا تم اپنی دوسری اولاد کو (جو دوسری بیوی سے ہے) کو بھی اس کے برابر وصیت کرنا چاہتے ہو ؟ صحابی (رض) نے عرض کیا : نہیں ، یارسول اللہ ! تب آپ (صلی اللہ علیہ وآلہ وسلم) نے ارشاد فرمایا : میں ظلم پر گواہ نہیں بن سکتا ۔

17735 ۔۔۔ میں انصاف پسند ہوں (اور) انصاف پر ہی گواہ بننا پسند کرتا ہوں ۔ ابن قانع عنہ عن ابیہ۔

17736 ۔۔۔ مجھے ظلم پر گواہ نہ بناؤ ۔ (ابن حبان عن النعمال بن بشیر (رض))

17737 ۔۔۔ مجھے صرف انصاف (کی بات) پر گواہ بناؤ ۔ میں ظلم (کی بات) پر گواہ نہیں بن سکتا ۔ ابن حبان۔

17738 ۔۔۔ جھوٹے گواہ کے قدم (قیامت کے روز) ہل نہ سکیں گے حتی کہ اللہ پاک اس کے لیے جہنم واجب کردیں ۔ (حلیۃ الاولیاء ، ابن عساکر عن ابن عمر (رض))

17739 ۔۔۔ جھوٹا شاہدٹیکس وصول کرنے والے کے ساتھ جہنم میں جائے گا اللہ تباوک وتعالیٰ (مسند الفردوس للدیلمی عن المغیرہ)