Kanz al-Ummal

23561 ۔۔۔ حضور اکرم (صلی اللہ علیہ وآلہ وسلم) کا ارشاد ہے کہ روزہ ڈھال ہے۔ (رواہ مسلم والامام احمد بن حنبل والنسائی عن ابوہریرہ (رض))

23562 ۔۔۔ حضور اکرم (صلی اللہ علیہ وآلہ وسلم) کا ارشاد ہے کہ روزہ دار کا سونا بھی عبادت ہے، اس کی خاموشی تسبیح ہے ، اس کے عمل کا ثواب دو چند ہے ، اس کی دعا قبول کی جاتی ہے اور اس کے گناہ بخش دیئے جاتے ہیں ، (رواہ البیہقی فی شعب الایمان عن عبداللہ بن ابی اوفی والنواضح 2409)

23563 ۔۔۔ حضور اکرم (صلی اللہ علیہ وآلہ وسلم) نے ارشاد فرمایا : کہ روزہ دوزخ سے بچنے کے لیے ڈھال ہے جیسے جنگ میں تمہاری ڈھال ہوتی ہے۔ (رواہ الامام احمد بن حنبل والنسائی وابن ماجہ عن عثمان بن ابی العاص (رض))

23564 ۔۔۔ حضور اکرم (صلی اللہ علیہ وآلہ وسلم) نے ارشاد فرمایا : کہ روزہ ڈھال ہے اور دوزخ سے بچاؤ کے لیے قلعہ ہے۔ (رواہ شعب الایمان للبیہقی عن جابر (رض)) کلام : ۔۔۔ یہ حدیث ضعیف ہے دیکھے ضعیف الجامع 3577 ۔

23565 ۔۔۔ حضور اکرم (صلی اللہ علیہ وآلہ وسلم) نے ارشاد فرمایا : کہ روزہ ڈھال ہے اور دوزخ سے بچاؤ کا ایک مضبوط قلعہ ہے۔ مرواہ الامام احمد بن حنبل شعب الایمان للبیہقی ، عن ابوہریرہ (رض))

23566 ۔۔۔ حضور اکرم (صلی اللہ علیہ وآلہ وسلم) نے ارشاد فرمایا : کہ روزہ ڈھال ہے بیشک روزہ دار اسے پھاڑ نہ ڈالے ۔ (رواہ النسائی ، والبیہقی فی السنن عن ابی عبیدۃ) کلام : ۔۔۔ یہ حدیث ضعیف ہے دیکھے ضعیف الجامع 3578 ۔

23567 ۔۔۔ حضور اکرم (صلی اللہ علیہ وآلہ وسلم) نے ارشاد فرمایا : کہ روزہ ڈھال ہے جب تک کہ صاحب روزہ اسے جھوٹ اور غیبت سے پھاڑ نہ دے ۔ (رواہ الطبرانی فی الاوسط عن ابوہریرہ (رض))

23568 ۔۔۔ جس نے ایک دن روزہ رکھا اور ضائع نہیں کیا اس کے لیے دس نیکیاں لکھ دی جاتی ہیں۔ (رواہ ابو نعیم فی الحلیۃ عن البراء ) کلام : ۔۔۔ یہ حدیث ضعیف ہے دیکھے ضعیف الجامع 3579 ۔ والضعیفہ 1327 ۔

23569 ۔۔۔ روزہ ڈھال ہے اور وہ مومن کے مضبوط قلعوں میں سے ایک قلعہ ہے اور ہر عمل اس کے کرنے والے کے لیے ہوتا ہے سوائے روزے کے چنانچہ اللہ تبارک وتعالیٰ فرماتا ہے ، روزہ میرے لیے ہے اور اس کی جزاء میں خود دوں گا ۔ (رواہ الطبرانی عن ابی امامۃ)

23570 ۔۔۔ حضور اکرم (صلی اللہ علیہ وآلہ وسلم) نے ارشاد فرمایا : کہ روزہ دوزخ کی آگ سے بچنے کے لیے ڈھال ہے جو آدمی صبح کو روزہ کی حالت میں اٹھے وہ جہالت کا مظاہرہ نہ کرے اور جب کوئی دوسرا اس کے ساتھ جہالت کرے تو یہ (روزہ دار) اسے نہ گالی دے اور نہ ہی برا بھلا کہے بلکہ وہ کہے کہ میں روزہ دار ہوں قسم اس ذات کی جس کے قبضہ قدرت میں محمد کی جان ہے ! روزہ دار کے منہ کی بو اللہ تبارک وتعالیٰ کے ہاں مشک سے بھی عمدہ ہوتی ہے۔ (رواہ البیہقی حضرت عائشۃ صدیقہ (رض))