Kanz al-Ummal

12951 رشتے دار اور غیر رشتہ دار (ہر ایک میں) اللہ کی حدود کا نفاذ کرو۔ اور اللہ کے (حکم کو نافذ کرنے کے) بارے میں کسی کو ملامت کرنے والے کی ملامت کی پروا نہ ہونی چاہیے۔
ابن ماجہ عن عبادۃ بن الصامت

12952 تم سے پہلے لوگ اس لیے قہر ہلاکت میں پڑے کیونکہ جب ان میں سے کوئی بڑا آدمی چوری کرتا تو اس کو چھوڑ دیتے اور جب ان میں سے کوئی غریب آدمی چوری کرتا تو اس پر حد جاری کردیتے۔ مسند احمد ، البخاری ، مسلم، ابوداؤد، الترمذی، النسائی، ابن ماجہ عن عائشہ (رض)

12953 اپنے مملوکوں پر بھی حدود جاری کرو۔ السنن للبیہقی عن علی (رض)
کلام : روایت ضعیف ہے۔ دیکھئے : حسن الاثر 454، ضعیف الجامع 184 ۔

12954 بچہ جب پندرہ سال کی عمر کو پہنچ جائے تو اس پر حدود جاری کرو۔
السنن للبیہقی فی الخلاقیات عن انس (رض)
کلام : روایت ضعیف ہے : ضعیف الجامع 3538 ۔

12955 دس سے زائد کوڑے صرف حدود اللہ میں سے کسی حد میں ہی مارے جاسکتے ہیں۔
مسند احمد ، البخاری مسلم عن ابی بردۃ بن نیار الانصاری

12956 دس ضربوں سے زیادہ سزا صرف حدود الل میں سے کسی حد میں جاری کی جاسکتی ہے۔
البخاری عن رجل

12957 شبہات کی وجہ سے حدود ساقط کردو۔ ابومسلم الکجی عن عمر بن عبدالعزیز، مرسلاً
کلام : یہ ایک لمبی روایت کا حصہ ہے اور یہ روایت ضعیف ہے۔ اسنی المطالب 87، التمییز 12 ۔ نیز حافظ ابن حجر (رح) فرماتے ہیں اس روایت کی سند میں غیر معروف راوی ہے دیکھئے : کشف الخفاء 166 ۔

12958 اس کو مارنے کے لیے کھجور کا سوتنکوں والا گچھا اٹھاؤ اور ایک دفعہ اس کے ساتھ اس کو مار کر اس کا راستہ چھوڑ دو ۔ مسند احمد ، الکبیر للطبرانی عن سعید بن سعد بن عبادۃ

12959 آدمی جب اپنی بیوی کی باندی کے ساتھ جماع کر بیٹھے، اگر آدمی نے اس کے ساتھ زبردستی کی ہو تو وہ باندی آزاد ہوجائے گی اور آدمی پر باندی کی قیمت اپنی بیوی کو ادا کرنا واجب ہوگی۔ اور اگر باندی نے بخوشی آمادگی ظاہر کی ہو تو وہ آدمی کی مملوکہ باندی بن جائے گی اور تب بھی اس باندی کی قیمت اپنی بیوی کو ادا کرنا واجب الذمہ ہوگی۔
مسند احمد، سمویہ عن میمونۃ عن مسلمۃ بن المحیق

12960 مجھے (حد جاری کرنے میں) کیا مانع ہوتا ۔ تم اپنے بھائی کے خلاف شیطان کی مددگار نہ بنو۔ کسی امام (حاکم) کے لیے جائز نہیں ہے کہ جب اس کے پاس حد کا کوئی کیس آئے تو اس کو جاری نہ کرے۔ بیشک اللہ تعالیٰ معاف کرنے والا ہے اور معاف کرنے کو پسند کرتا ہے، پس لوگوں کو بھی معاف اور درگزر سے کام لینا چاہیے۔ کیا تم نہیں چاہتے کہ اللہ پاک تمہاری مغفرت کرے۔ بیشک اللہ مغفرت کرنے والا مہربان ہے۔
عبدالرزاق ، مسند احمد، ابن ابی الدنیا فی ذم الفضب، الکبیر للطبرانی، الخرائطی فی مکارم الاخلاق، مستدرک الحاکم، السنن للبیہقی عن ابن مسعود (رض) ، قال الحاکم صحیح الاسناد۔