Kanz al-Ummal

29867 ۔۔۔ میری بات کو تم ان لوگوں سے زیادہ نہیں سننے والے ہاں البتہ اتنی بات ہے کہ یہ میری بات کا جواب دینے کی طاقت نہیں رکھتے ۔ (رواہ احمد بن حنبل ومسلم والنسائی عن انس (رض))

29868 ۔۔۔ کون کعب بن اشرف کی خبر لے گا چونکہ اس نے اللہ اور اس کے رسول کو اذیت پہنچائی ہے۔ (رواہ البخاری عن جابر)

29869 ۔۔۔ میں تم سے زیادہ اجر وثواب کا محتاج ہوں اور تم مجھ سے زیادہ چلنے کی قوت نہیں رکھتے ۔ (رواہ الحاکم عن ابن مسعود (رض))

29870 ۔۔۔ سطح زمین پر تمہارے سوا کوئی قوم نہیں جو اللہ تعالیٰ کو پہچانتی ہو کہاں ہیں دنیا سے بےرغبتی کرنے والے اور آخرت کی طرف رغبت کرنے والے ۔ (رواہ ابن عساکر عن ابن مسعود (رض)) کہ رسول اللہ (صلی اللہ علیہ وآلہ وسلم) بدر کے دن سرخ خیمے سے باہر تشریف لائے یہ حدیث ارشاد فرمائی ۔

29871 ۔۔۔ اللہ تبارک وتعالیٰ نے ابوجہل کو قتل کیا ہے تمام تعریفیں اس اللہ کے لیے ہیں جس نے اپنا وعدہ سچا کر دکھایا اور اپنے دین کی مدد کی ۔ (رواہ العقیلی عن ابن مسعود (رض)) ۔ کلام : ۔۔۔ حدیث ضعیف ہے دیکھئے ضعیف الجامع 1621 ۔

29872 ۔۔۔ تمام تعریفیں اس اللہ کے لیے ہیں جس نے تجھے رسوا کیا اے اللہ کے دشمن یہ (ابوجہل) اس امت کا فرعون ہے۔ (رواہ احمد بن حنبل عن ابن مسعود (رض))

29873 ۔۔۔ اللہ تعالیٰ میری طرف سے اس جماعت کو برا بدلہ دے تم نے مجھے خائن سمجھا حالانکہ میں امانتدار ہوں تم نے مجھے جھٹلایا حالانکہ میں سچا ہوں پھر ابوجہل کی طرف متوجہ ہو کر فرمایا : اس نے فرعون سے بڑھ کر اللہ تعالیٰ کی نافرمانی کی چونکہ فرعون کو جب ہلاکت کا یقین ہوا اس نے اللہ تعالیٰ کی وحدانیت کا اقرار کرلیا تھا جبکہ اس (ملعون) کو جب موت کو یقین ہوا اس وقت بھی اس نے لات اور عزی کو پکارا ۔ (رواہ الطبرانی والخطیب وابن عساکر) کہ نبی کریم (صلی اللہ علیہ وآلہ وسلم) نے بدر کے مقتولین پر کھڑے ہو کر یہ حدیث ارشاد فرمائی ۔

29874 ۔۔۔ اے ابو جہل ! اے عتبہ ! اے شیبہ ! اے امیہ ! کیا تم نے اپنے رب کے وعدہ کو سچا پایا ؟ میں نے تو اپنے رب کے وعدہ کو سچا پایا ہے سیدنا حضرت عمر بن خطاب (رض) نے عرض کیا : یا رسول اللہ (صلی اللہ علیہ وآلہ وسلم) آپ بےروح جسموں سے کلام کیوں کر رہے ہیں ؟ آپ نے فرمایا : قسم اس ذات کی جس کے قبضہ قدرت میں میری جان ہے تم میری بات کو ان (مردوں) سے زیادہ نہیں سنتے (بلکہ وہ تم سے زیادہ سن رہے ہیں) البتہ اتنی بات ہے کہ وہ جواب دینے کی طاقت نہیں رکھتے ۔ (رواہ احمد بن حنبل ومسلم عن انس (رض))

29875 ۔۔۔ اے اہل قلیب کیا تم نے اپنے رب کے وعدہ کو سچا پایا ہے ؟ صحابہ کرام رضوان اللہ تعالیٰ عنہم اجمعین نے عرض کیا ! کیا یہ سن سکتے ہیں ؟ آپ نے فرمایا : یہ اسی طرح سنتے ہیں جس طرح تم سنتے ہو ۔ لیکن یہ جواب نہیں دیتے ۔ (وراہ الطبرانی عن عبداللہ بن سیدان عن ابیہ)

29876 ۔۔۔ اے اہل قلیب کیا تم نے اپنے رب کے وعدہ کو سچا پایا ہے میں نے تو اپنے رب کے وعدہ کو سچا پایا ہے صحابہ کرام رضوان اللہ تعالیٰ عنہم اجمعین نے عرض کیا : یا رسول اللہ ! کیا یہ سنتے ہیں ؟ آپ نے فرمایا : تم ان سے زیادہ نہیں سنتے (بلکہ وہ تم سے زیادہ سنتے ہیں) البتہ وہ جواب نہیں دے پاتے ۔ (رواہ الطبرانی عن عبداللہ بن سیدان عن ابیہ)