Kanz al-Ummal

24638 ۔۔۔ سب سے افضل عمل محض اللہ کی رضا کے لیے ( کسی سے ) محبت کرنا اور محض اللہ کی رضا کے لیے (کسی سے) بغض رکھنا ہے (رواہ ابوداؤد عن ابی ذر) ۔ کلام :۔۔۔ حدیث ضعیف ہے۔ دیکھئے ضعیف ابی داؤد 998 و ضعیف الجامع 996

24639 ۔۔۔ ایسے دو شخص جو محض اللہ تعالیٰ کی رضا کے لیے آپس میں محبت کرتے ہوں وہ ( قیامت کے دن) عرش کے سائے تلے ہوں گے۔ (رواہ الطبرانی عن معاذ)

24640 ۔۔۔ جو لوگ محض اللہ تعالیٰ کی رضا کے لیے آپس میں محبت کرتے ہوں گے وہ عرش کے ارد گر یاقوت سے بنی ہوئی کرسیوں پر بیٹھے ہوں گے۔ (رواہ الطبرانی عن ابی ایوب)

24641 ۔۔۔ اللہ تعالیٰ کو سب سے زیادہ محبوب عمل اللہ کے لیے محبت کرنا اور اللہ ہی کے لیے بغض رکھنا ہے۔ (رواہ احمد بن حنبل عن ابی ذر)

24642 ۔۔۔ اپنے بھائیوں سے زیادہ سے زیادہ دوستی رکھو چونکہ قیامت کے دن ہر مومن کو سفارش کرنے کا حق حاصل ہوگا۔ (رواہ ابن النجار فی تاریخہ عن انس) ۔ کلام۔۔۔ حدیث ضعیف ہے دیکھئے ضعیف الجامع 828 ۔

24643 ۔۔۔ مومنین کے ساتھ زیادہ سے زیادہ اچھائیاں کرو چونکہ قیامت کے دن اللہ تعالیٰ کے حضور ہر مومن کو سفارش کرنے کا حق حاصل ہوگا۔ (رواہ ابو نعیم فی الحلیۃ والحاکم فی تاریخہ عن انس) ۔ کلام۔۔۔ حدیث ضعیف ہے دیکھئے تذکرۃ الموضوعات 22 ٧ التنزیہ 2 ۔ 314 ۔

24644 ۔۔۔ میں اپنی بعثت سے تا قیامت ایسے دو بھائیوں کی سفارش کروں گا جو محض اللہ تعالیٰ کے لیے آپس میں محبت کرتے ہوں۔ (راہ ابو نعیم فی الحلیۃ عن سلیمان) ۔ کلام :۔۔۔ حدیث ضعیف ہے دیکھئے الضعیفۃ 1 ٧ 23 ۔

24645 ۔۔۔ جو شخص اپنے کسی (مسلمان) بھائی سے اللہ کے لیے دوستی شروع کرتا ہے اللہ تعالیٰ جنت میں اس کا ایک درجہ بڑھا دیتے ہیں۔ (رواہ ابن ابی الدنیا فی کتاب الاخوان عن انس) ۔ کلام ۔۔۔ حدیث ضعیف ہے دیکھئے الجامع 4982 ۔

24646 ۔۔۔ اگر کوئی دو شخص محض اللہ کے لیے آپس میں محبت کرتے ہوں ان میں سے ایک مشرق میں ہو اور دوسرا مغرب میں اللہ تعالیٰ قیامت کے دن انھیں آپس میں ملا دے گا اور فرمائے گا یہی وہ شخص ہے جس سے تو محض میرے لیے محبت کرتا تھا۔ (رواہ البیھقی فی شعب الایمان عن ابوہریرہ ) ۔ کلام :۔۔۔ حدیث ضعیف ہے دیکھئے ضعیف الجامع 4808

24647 ۔۔۔ جو شخص کسی دوسرے شخص سے محبت کرتا ہے فی الواقع وہ اپنے رب تعالیٰ کا اکرام کررہا ہے۔ (رواہ احمد بن حنبل عن ابی امامۃ)