Kanz al-Ummal

18859 ۔۔۔ پہلی چیز جو اللہ تبارک وتعالیٰ نے میری امت پر فرض فرمائی وہ پانچ نمازیں ہیں۔ سب سے پہلی چیز جو ان کے اعمال میں سے اٹھائی جائے گی وہ پانچ نمازیں ہیں۔ اور سب سے پہلی چیز جس کے بارے میں لوگوں سے باز پرس ہوگی وہ پانچ نمازیں ہیں۔ جس شخص نے ان نمازوں میں کچھ نمازیں ضائع کی ہوگی پروردگار فرمائیں گے ! دیکھو میرے بندے کے پاس کچھ نفل نمازیں ہیں ان کے ساتھ اس کے فرضوں کو پورا کر دو ۔ اور دیکھو میرے بندے کے رمضان کے روزوں کو ، اگر ان میں سے کچھ روزے ضائع کیے ہیں تو دیکھو اس کے پاس نفلی روزے ہیں ان کے ساتھ تم اس کے فرض روزوں کا نقصان پورا کر دو ۔ اور دیکھو میرے بندے کی زکوۃ کو ، اگر اس میں سے کچھ ضائع کیا ہے تو دیکھو میرے بندے کے پاس نفلی صدقات ہیں ان کے ساتھ م اس کے فرض صدقہ (زکوۃ ) کی کمی کو پورا کر دو ۔ پس یوں نفلی عبادات کے ساتھ اللہ کے فرائض کی کمی کو پورا کیا جائے گا ۔ یہ محض اللہ کی رحمت اور اس کے عدل کے طفیل ہوگا ۔ پھر اگر زائد کوئی عبادت بچ جائے گی تو اس زائد عبادت کو بندے کے میزان میں رکھ دیا جائے گا اور اس کو کہا جائے گا کہ خوشی خوشی جنت میں داخل ہوجا ۔ اگر (فرض میں کمی کے ساتھ) نفلی عبادات بھی نہیں ہیں تو زبانیہ (جہنم کے فرشتوں) کو حکم دیا جائے گا وہ اس کو ہاتھوں اور پیروں سے پکڑ کر جہنم میں پھینک دیں گے ۔ (الحاکم فی الکنی عن ابن عمر (رض))

18860 ۔۔۔ پانچ نمازیں اللہ عزوجل نے فرض فرمائی ہیں ، جو اچھی طرح وضو کرے ، ان نمازوں کو ان کے پورے وقت پر پڑھے ، رکوع (وسجدے) کو خشوع خضوع سے پورا پورا ادا کرے اس کے لیے اللہ کا وعدہ ہے کہ اس کی مغفرت فرمائے گا ۔ اور جو ایسا نہیں کرے گا اس کے لیے اللہ کا کوئی وعدہ نہیں ، اگر چاہے گا تو مغفرت فرما دے گا اور اگر چاہے گا تو عذاب دے گا ۔ (ابو داؤد ، السنن للبیہقی عن عبادۃ بن الصامت)

18861 ۔۔۔ پانچ نمازیں اللہ پاک نے بندوں پر فرض فرما دی ہیں۔ جو ان کو لے کر آئے گا اور ان کو ہلکا سمجھ کر ان میں سے کچھ کو نہ چھوڑا ہوگا تو اللہ کے ہاں اس کے لیے جنت کا وعدہ ہے۔ اور جو ان کو اس طرح نہیں لائے گا پس اللہ کے ہاں اس کے لیے کوئی وعدہ نہیں ، اگر چاہے گا تو عذاب دے گا اور اگر چاہے گا تو جنت میں داخل کر دے گا ۔ (مالک ، مسند احمد ، ابو داؤد ، نسائی ، ابن حبان ، مستدرک الحاکم عن عبادۃ بن الصامت)

18862 ۔۔۔ یہ پانچ نمازیں ہیں ، جس نے ان کی محافظت کی یہ اس کے لیے قیامت کے دن نور ، برہان اور نجات کا سبب ہوں گی ۔ جس نے ان کی محافظت نہیں کی اس کے لیے قیامت کے دن نور ہوگا اور نہ برہان ہوگی ، اور نہ نجات ہوگی ، اور قیامت کے دن وہ فرعون ، قارون ، ہامان اور ابی بن خلف کے ساتھ ہوگا ۔ (ابن نصر عن ابی عمرو)

18863 ۔۔۔ نماز کی حفاطت کرو ، اپنے مملوکوں کا خیال کرو، نماز کی حفاظت کرو ، اور اپنے مملوکوں کا خیال کرو ۔ (مسند احمد ، نسائی ، ابن ماجۃ ، ابن حبان عن انس (رض) ، مسند احمد ، ابن ماجۃ عن ام سلمہ (رض) ، الکبیر للطبرانی حضرت عبداللہ ابن عمرو (رض)) فائدہ : ۔۔۔ یہ الفاظ حضور اکرم (صلی اللہ علیہ وآلہ وسلم) نے اپنی جانکنی کے وقت ارشاد فرمائے تھے ۔

18864 ۔۔۔ نماز کے بارے میں اللہ سے ڈرو ، نماز کے بارے میں اللہ سے ڈرو، نماز کے بارے میں اللہ سے ڈرو، اپنے غلام باندیوں کے بارے میں اللہ سے ڈرو ، دو کمزور (اور بےسہارا) کے بارے میں اللہ سے ڈرو ، تنہا عورت اور یتیم بچہ ۔

18865 ۔۔۔ قیامت کے روز سب سے پہلے بندے سے جس چیز کا حساب لیا جائے گا وہ نماز ہے۔ اگر وہ درست نکلی تو تمام اعمال درست ہوں گے اور اگر وہ خراب نکلی تو تمام اعمال خراب جائیں گے ۔ (الاوسط للطبرانی ، الضیاء عن انس (رض))

18866 ۔۔۔ قیامت کے دن سب سے پہلی چیز جس کا بندے دے حساب کتاب لیا جائے گا وہ نماز ہے۔ اور سب سے پہلے لوگوں کے درمیان جس چیز کا فیصلہ کیا جائے گا وہ خون ہے۔ (نسائی عن ابن مسعود (رض))

18867 ۔۔۔ سب سے پہلی چیز جس کا قیامت کے دن بندے سے حساب لیا جائے گا وہ نماز ہے۔ اگر وہ کامل نکلی تو اس کے لیے نماز کامل لکھ دی جائے گی اور اگر وہ کامل نہ نکلی تو اللہ عزوجل اپنے ملائکہ سے فرمائیں گے : دیکھو میرے بندے کے پاس کچھ نفل (نمازیں) ہیں ان کے ساتھ اس کمی کو پورا کر دو ، پھر اسی طرح زکوۃ کا حساب ہوگا پھر دوسرے اعمال کا بھی اسی طرح حساب ہوگا ۔ (مسند احمد ، نسائی ، ابو داؤد ، ابن ماجۃ ، مستدرک الحاکم عن تمیم الدارمی)

18868 ۔۔۔ آدمی اور اس کے کفر وشرک کے درمیان نماز چھوڑنے کا فرق ہے۔ (مسلم ، ترمذی ، ابو داؤد ابن ماجۃ عن جابر (رض))