Kanz al-Ummal

28554 ۔۔۔ پرندوں کو اپنے انڈوں پر رہنے دو ۔ (ابو داؤد عن ام کرز)

28555 ۔۔۔ (نیک یا بد) فال جاری واقع ہوتی ہے تقدیر کے مطابق ۔ (مستدرک حاکم ، عن عائشۃ صدیقۃ (رض))

28556 ۔۔۔ بدشگونی کرنا شرک کی بات ہے۔ (مسند احمد بخاری فی الادب المفرد ، مستدرک حاکم عن ابن مسعود (رض))

28557 ۔۔۔ زمانہ جاہلیت کے لوگ کہتے تھے کہ نحوست عورت میں ہے اور سواری میں ہے اور گھر میں ہے۔ (مستدرک حاکم ، سنن کبری ، للبیہقی عن عائشۃ صدیقۃ (رض))

28558 ۔۔۔ نحوست تین چیزوں میں ہے عورت میں اور رہائش گاہ میں اور سواری میں ۔ (ترمذی نسائی عن ابن عمرو (رض))

28559 ۔۔۔ نحوست گھر میں اور عورت میں اور گھوڑے میں ہے۔ (مسند احمد ، عن ابو ہریرہ (رض) ، )

28560 ۔۔۔ تین چیزوں میں تو نحوست ہی ہے : گھر میں اور عورت میں اور گھوڑے میں ۔ (بخاری ، ابوداؤد ، ابن ماجہ عن ابن عمرو (رض))

28561 ۔۔۔ اگر کسی چیز میں نحوست ہے تو گھر میں اور عورت میں اور گھوڑے میں ہے۔ (مالک احمد ، بخاری ابن ماجہ ، عن سھل بن سعد (رض) ، بخاری و مسلم عن ابن عمرو (رض) ، مسلم نسائی عن جابر (رض))

28562 ۔۔۔ بدفالی یا نیک فالی کے لیے پرندوں کو اڑنے پر اکسانا اور کسی کو منحوس قرار دینا اور پیش گوئی کے لیے کنکریاں پھینکنا بتوں(کو ماننے) کی قبیل سے ہے۔ (ابو داؤد عن قبیصہ (رض) ضعیف ابی داؤد 842 ضعیف الجامع 3900 ۔

28563 ۔۔۔ انسان کے اندر تین چیزیں ہیں بدشگونی اور گمان (بد) قائم کرلینا اور حسد کرنا پس شگون سے اس کو نکالنے والی بات یہ ہے کہ (کلام سے) نہ پھرے اور گمان سے اس کو نکالنے والی بات یہ ہے کہ تحقیق میں نہ پڑے اور حسد سے اس کو نکالنے والی بات یہ ہے کہ زیادتی نہ کرے ۔ (البیہقی فی شعب الایمان، عن ابو ہریرہ (رض) ، ضعیف الجامع 3993)